Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku anji tangilabi ni udi mua kuandamuna nkonko idi ilonda eyi:

• Bible wa miakulu ya bungi uvua bible kayi, ne uvua ne diambuluisha kayi?

Mbible mufunda mu miakulu ya bungi uvua ne mfundilu ya miaku ya mu tshiena-Ebelu, tshiena-Gelika, mu Latin, kabidi ne ya bimue bitupa bia mu tshiena-Alama ivua mitambe buimpe tshikondo atshi, mitapulula mu milongo milondangane bimpe mu dibeji dionso. Bible wa miakulu ya bungi au uvua tshidia tshinene tshiela mu malu a dipatula mifundu minsantu mijalame ya miakulu ya ku ntuadijilu ya Bible.​—15/4, dibeji 28-31.

• Bantu badi mua kusankisha Nzambi mushindu kayi?

Bu mudi Yehowa muntu mulelela udi ne muoyo, nanku utu ne lungenyi ne meji, wenza malu ne muikale pende umvua bimpe anyi bibi. Yeye udi ‘Nzambi wa disanka’ udi usanka bua kukumbaja disua diende. (1 Timote 1:11, NW; Musambu 104:31) Tuetu tudienzeja muetu muonso bua kumvua mudi majinga a Nzambi, netujingulule bimpe tshitudi mua kuenza bua kusankisha muoyo wende.​—15/5, dibeji 4-7.

• Bua tshinyi Davidi wakalekela mukajende Mikala ne lupingu lua telafima?

Pakalongolola mukalenge Shaula bua kushipa Davidi, Mikala wakanyemesha Davidi pa kuteka lupingu luvua pamuapa anu bu muntu pa bulalu buende. Uvua mua kuikala pamuapa mulame lupingu lua telafima bualu kavua mudifile ne muoyo wende mujima kudi Nzambi to. Davidi muine kavua nansha mumanye bualu abu to, anyi wakabulengulula bualu Mikala uvua muana wa mukalenge Shaula. (1 Kulondolola 16:25, 26)​—1/6, dibeji 29.

• Ntshipatshila kayi tshinene tshivua Nzambi natshi mu mikenji ivuaye muele bua mashi?

Bilondeshile tshiakamba Nzambi panyima pa Mvula wa kabutu, mu Mikenji ya Mose, ne mu mukenji udi mu Bienzedi 15:28, 29, uvua uleja bualu bua mulambu wa mashi akalua Yezu kupuekesha. Anu ku mashi ende au nkayawu ke kudi Nzambi utubuikidila mibi ne usomba netu mu ditalala. (Kolosai 1:20)​—15/6, dibeji 14-19.

• Mbishima bia Yezu bungi kayi bidibu bafunde mu Bible?

Malu adi mafunda mu Evanjeliyo adi akula bua bishima 35 biakenza Yezu. Kadi ki mbaleje bungi buonso bujalame bua bishima biakenza Yezu (kusangisha ne bidibu kabayi batele) nansha. (Matayo 14:14)​—15/7, dibeji 5.