Yehowa ‘ntshinyemenu tshietu mu tshikondo tshia ntatu’

‘Lupandu lua bantu bakane ludi kudi Yehowa; yeye udi tshinyemenu tshiabu palua dikenga.’​—MUSAMBU 37:39.

1, 2. (a) Ntshinyi tshivua Yezu mulombele bayidi bende mu disambila? (b) Ndisua kayi didi nadi Nzambi bua bantu bende?

 YEHOWA udi wa-bukole-buonso. Udi ne bukole bua kukuba batendeledi bende ba lulamatu mu mushindu wonso udiye musue. Uvua mene mua kutapulula bantu bende ne bena panu ne kubateka wabu muaba udi kawuyi njiwu ne wa ditalala. Nansha nanku, Yezu wakasambila Tatuende wa mu diulu bua bayidi bende ne: ‘Tshiena nkulomba ne: ubumushe pa buloba; ndi nkulomba ne: ubasungile kudi [mubi].’​—Yone 17:15.

² Yehowa ki musue bua ‘kutumusha pa buloba’ to. Kadi disua diende ndia se: tuikale basombele munkatshi mua bantu bonso badi pa buloba apa bua tumone mua kumanyisha bantu bakuabu mukenji wende wa ditekemena ne wa busambi. (Lomo 10:13-15) Kadi anu muakasua Yezu kuleja mu disambila diende adi, patudi pa buloba apa, badi mua kutuenzela bibi kudi “mubi.” Makole a nyuma mibi ne bantu bena bupidia badi bakebesha ntatu ne tunyinganyinga tua bungi, ne dikenga ditu dikuata ne bena Kristo.​—1 Petelo 5:9.

3. Mmalu kayi adi ne bua kukuata nansha batendeledi ba lulamatu ba Yehowa, kadi mbusambi kayi butudi tupeta mu Dîyi dia Nzambi?

³ Mu ntatu ya mushindu’eu, bidi mua kutufikila bua tuetu kuteketa mu mikolo bimue bikondo. (Nsumuinu 24:10) Mu Bible mudi miyuki ya bungi ya bantu bena lulamatu bavua bapete ntatu. Mufundi wa Misambu udi wamba ne: ‘Makenga a muntu muakane adi a bungi; kadi Yehowa udi umusungila ku buonso buawu.’ (Musambu 34:19) Bushuwa, malu makole adi akuata too ne “muntu muakane.” Anu bu mufundi wa Misambu Davidi, minga misangu tudi mene mua ‘kupanga ne kutshibuka bikole.’ (Musambu 38:8) Kadi bidi bikankamija bua kumanya ne: ‘Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majiya.’​—Musambu 34:18; 94:19.

4, 5. (a) Bilondeshile Nsumuinu 18:10, ntshinyi tshitudi ne bua kuenza bua Nzambi kutukubaye? (b) Mmalu kayi masunguluke atudi ne bua kuenza bua kupeta diambuluisha dia Nzambi?

⁴ Bilondeshile disambila dia Yezu, Yehowa udi utusungila. Udi ‘tshinyemenu tshietu palua  dikenga.’ (Musambu 37:39) Mukanda wa Nsumuinu udi wakula bualu bua muomumue padiwu wamba ne: ‘Dîna dia Yehowa didi tshibumba tshikole; muntu muakane udi unyemenaku, udi upanduka.’ (Nsumuinu 18:10) Mvese eu udi uleja bulelela bua nshindamenu bua mushindu udi Yehowa uditatshisha ne dinanga dionso bua bifukibua biende. Nzambi udi ukuba nangananga bantu bakane badi bamukeba ne muoyo mujima, bienze anu bu se: tudi tunyema bua kuya kusokoma mu tshibumba tshikole.

⁵ Padi ntatu mikole itukuata, mmunyi mutudi mua kunyemena kudi Yehowa bua kutukubaye? Tumonayi malu manene asatu atudi mua kuenza bua kupeta diambuluisha dia Yehowa. Bua kumpala, tudi ne bua kunyemena kudi Tatu wetu wa mu diulu mu disambila. Buibidi, tudi ne bua kulekela nyuma wende utulombola. Ne Buisatu, tudi ne bua kulonda malu adi Yehowa mulongolole pa kukeba bua kudisangisha ne bana betu bena Kristo badi mua kukepesha ntatu yetu.

Bukole bua disambila

6. Mmunyi mudi bena Kristo balelela bangata disambila?

⁶ Bamue bashikuluji ba malu a mubidi batu bambila bantu bua kusambila bua kujikija tunyinganyinga. Nansha mudi kuelangana meji mu disambila muaba mutalale mua kukepesha tunyinganyinga, kuteleja miadi ya bimue bifukibua anyi mene kukamata muntu panyima kudi paku mua kuambuluisha. Bena Kristo balelela kabatu bapepeja disambila mu didiangata anu bu tshintu tshidi tshiondapa lungenyi. Tudi tuangata disambila bu diyukila ne Mufuki ne kanemu kakole. Disambila didi diumvuija lulamatu ne dieyemena bitudi nabi kudi Nzambi. Bulelela, disambila ntshitupa tshia ntendelelu wetu.

7. Kusambila Yehowa ne dishindika kudi kumvuija tshinyi, ne mmunyi mudi masambila a nunku atuambuluisha bua kutantamena makenga?

⁷ Tudi ne bua kusambila Yehowa ne dishindika dionso. Mupostolo Yone wakafunda ne: ‘Edi ndikima ditudi nadi kudiye ne: bituamulomba tshintu tshionso bu mu disua diende, yeye udi utumvuila.’ (1 Yone 5:14) Yehowa, Mutambe Bunene, Nzambi umuepele mulelela ne wa-bukole-buonso udi uteleja ne ntema ya pa buayi masambila adi batendeledi bende benza ne muoyo mujima. Dimanya patupu se: Nzambi wetu wa dinanga udi ututeleja patudi tumuleja tunyinganyinga tuetu ne malu adi atutonda didi ditukolesha ku muoyo.​—Filipoi 4:6.

8. Bua tshinyi bena Kristo ba lulamatu kabena ne bua kumvua buôwa anyi kudimona kabayi bakumbane padibu basambila Yehowa?

⁸ Bena Kristo ba lulamatu kabena ne bua kumvua buôwa, kudimona kabayi bakumbane anyi kabayi ne dishindika padibu basemena kudi Yehowa mu disambila. Bulelela, patudi bapangile amue malu anyi ntatu mitupite bukole, katuena anu mua kumvua muoyo wa kusemena kudi Yehowa mu disambila. Mu bikondo bia nunku tudi ne bua kuvuluka ne: Yehowa ‘udi ufuila bantu bende badi bakenga luse’ ne ‘udi usamba bantu badi [bazengele ne ntatu].’ (Yeshaya 49:13; 2 Kolinto 7:6)  Patudi ne dibungama ne dikenga ke patudi nangananga ne bua kusemena kudi Tatu wetu wa mu diulu, bamueyemene ne muoyo mujima bu tshinyemenu tshietu.

9. Mmushinga kayi udi nawu ditabuja patudi tusemena kudi Nzambi mu disambila?

⁹ Bua diakalenga edi ditudi nadi dia kusambila kutuambuluisha menemene, tudi ne bua kuikala ne ditabuja dilelela. Bible udi wamba ne: ‘muntu udi ulua kudi Nzambi budiye nabu mbua kuitabuja ne: yeye udiku, ne udi mufutshi wa badi bamukeba.’ (Ebelu 11:6) Kabiena anu bikengela kuitabuja patupu ne: Nzambi “udiku” to. Muntu udi muitabuje Nzambi mu bulelela mmujadike ne: Udi ne bukole ne dijinga dia kutufuta bualu tudi tumutumikila. ‘Mêsu a Mukalenge adi kudi bakane, ne matshi ende adi buashi ku milombu yabu.’ (1 Petelo 3:12) Tuetu bikale bamanye misangu yonso ne: Yehowa udi uditatshisha ne dinanga dionso bua bualu buetu masambila etu neikale ne mushinga wa pa buawu.

10. Masambila etu adi ne bua kuikala a mushindu kayi bituikala basue bua Yehowa atukuatshishe mu nyuma?

¹⁰ Yehowa udi uteleja masambila etu patudi tuenza ne muoyo mujima. Mufundi wa Misambu wakamba ne: “Ndi nkubikila ne mutshima wanyi mujima; witabe kundi, Yehowa.” (Musambu 119:145) Masambila etu mmashilangane ne masambila a mikiya atubu benza mu bitendelelu bia bungi bualu wowu kaatu a tshidingishilu peshi menza ne muoyo muabuluke to. Patudi tusambila Yehowa ne ‘mutshima mujima,’ mêyi etu adi ne diumvuija ne kipatshila kawu. Kunyima kua masambila menza ne muoyo mujima nunku, tudi tubanga kumvua disulakana didi difumina ku diteka ‘bujitu buetu pambidi pa Yehowa.’ Bible udi ulaya ne: ‘Yeye neatukoleshe.’​—Musambu 55:22; 1 Petelo 5:6, 7.

Nyuma wa Nzambi udi utuambuluisha

11. Ng’umue mushindu kayi udi Yehowa utuandamuna patudi tutungunuka ne ‘kulomba’ diambuluisha diende?

¹¹ Yehowa katu anu uteleja patupu masambila etu to, utu kabidi uandamuna. (Musambu 65:2) Davidi wakafunda ne: “Mu dituku dia dikenga dianyi nenkubikile; bualu bua wewe newitabe kundi.” (Musambu 86:7) Bia muomumue, Yezu wakakankamija bayidi bende bua kutungunuka ne ‘kulomba’ Yehowa diambuluisha bualu ‘Tatu wa mu diulu neape batu bamulomba nyuma muimpe.’ (Luka 11:9-13) Bushuwa, bukole buenzeji bua Nzambi budi buambuluisha anyi busamba bantu bende.​—Yone 14:16.

12. Mmunyi mudi nyuma wa Nzambi mua kutuambuluisha padi makenga amueneka bu matupite bukole?

¹² Nansha patudi tupeta ntatu, nyuma wa Nzambi udi mua kutupesha “bukole bupite” bua bantu. (2 Kolinto 4:7, MMM) Mupostolo Paulo, muntu wakatantamena ntatu mikole ya bungi wakamba ne muoyo mujima ne: ‘Ndi mumanye mua kuenza malu onso mu Mukalenge udi unkolesha.’ (Filipoi 4:13) Bia muomumue, bena Kristo ba bungi lelu mbapetulule bukole bua mu nyuma ne bua mu lungenyi bu diandamuna dia milombu yabu. Misangu mivule, patutu tupeta diambuluisha dia nyuma wa Nzambi, makenga kaatu atamba kumueneka bu matupite bukole to. Bua bukole ebu budi Nzambi utupesha, tudi tuamba anu muakamba mupostolo Paulo ne: ‘Bakatutshintshimika ku nseke yonso, kadi katuena mu muaba mubumbakane; tudi tulubakana, kadi katuena banji kuteketa; tuakuipatshibua, kadi katuena tulekedibua pa nkayetu; tuakukumibua panshi, kadi katuena tushipibua.’​—2 Kolinto 4:8, 9.

13, 14. (a) Mmunyi mudi Yehowa muleje ne: udi tshinyemenu tshietu ku diambuluisha dia Dîyi diende difunda? (b) Mmunyi mudi ditumikila mêyi a mu Bible dikuambuluishe wewe pa nkayebe?

¹³ Nyuma muimpe mmuambuluishe kabidi bua kufundabu ne kulama Dîyi dia Nzambi bua diakalenga dietu. Mmunyi mudi Yehowa muleje ne: udi tshinyemenu tshietu mu tshikondo tshia dikenga ku diambuluisha dia Dîyi diende edi? Mmuenze nunku padiye mutupeshe meji adi atukuatshisha ne bukole bua kupangadija malu. (Nsumuinu 3:21-24) Bible udi ulongesha biumvuilu bietu ne udi ulengeja tshieledi tshietu tshia lungenyi. (Lomo 12:1) Patudi tubala ne tulonga Dîyi dia Nzambi pa tshibidilu ne patudi tuditumikila, tudi mua kupeta ‘meji mibidija a kujingulula tshidi tshimpe ne tshidi tshibi.’ (Ebelu 5:14) Ukadi mua kuikala mudimuene mudi mêyi a mu Bible makuambuluishe bua  kuangata mapangadika mimpe pauvua mupete ntatu. Bible udi utupesha budimu budi mua kutuambuluisha bua kujikija ntatu mu mushindu mumpe.​—Nsumuinu 1:4.

¹⁴ Dîyi dia Nzambi didi ditupesha tshintu tshikuabu tshidi tshitupesha bukole: ditekemena dia lupandu. (Lomo 15:4) Bible udi utuambila ne: malu mabi kaakutungunuka ne kuenzeka bua kashidi to. Makenga onso atudi tupeta nga tshitupa tshîpi. (2 Kolinto 4:16-18) Tudi ne ‘ditekemena dia muoyo wa tshiendelele, udi Nzambi udi kayi mua kudinga mulaye diambedi bikondo bia tshiendelele kabiyi bianji kuikalaku.’ (Tito 1:2) Tuetu tusanka bua ditekemena edi, bikale bavuluke anu malu mimpe adi Yehowa mulaye mu matuku atshilualua, tudi mua kutantamena makenga.​—Lomo 12:12; 1 Tesalonike 1:3.

Tshisumbu ntshijadiki tshia dinanga dia Nzambi

15. Mmunyi mudi bena Kristo mua kuambuluishangana munkatshi muabu?

¹⁵ Tshintu tshikuabu tshia kudi Yehowa tshidi mua kutuambuluisha mu tshikondo tshia dikenga ndidisangisha pamue ne bana betu mu tshisumbu tshia bena Kristo. Bible udi wamba ne: ‘Mulunda utu wananga mu bikondo bionso, muanetu utu waleja bulela mu tshikondo tshia dikenga.’ (Nsumuinu 17:17) Dîyi dia Nzambi didi dikankamija bonso badi mu tshisumbu bua kunemekangana ne kunangangana. (Lomo 12:10) Mupostolo Paulo wakafunda ne: “Muntu kakebi mua kudisankisha, kadi akebe mua kusankisha mukuabo.” (1 Kolinto 10:24) Dikala ne lungenyi lua nunku didi mua kutuambuluisha bua kumona majinga a bakuabu pamutu pa kumona anu makenga etu tuetu. Patudi tudifila bua kuambuluisha bakuabu, katuena anu tubambuluisha patupu to, kadi tudi kabidi tupeta disanka dia bungi didi divuija bujitu buetu bukumbane bua kubuambula.​—Bienzedi 20:35.

16. Mmunyi mudi muena Kristo yonso mua kuikala ukankamijangana?

¹⁶ Balume ne bakaji bapie mu nyuma badi mua kuambuluisha bikole bua kukolesha bakuabu. Bua bobu kukolesha bakuabu nunku, badi ne badienzeja bua kuikala badilongolole bua kubateleja padibu babakuatshila bualu. (2 Kolinto 6:11-13) Tshisumbu tshia bena Kristo tshidi tshipeta disanka dia bungi padi bantu bonso badienzeja bua kuela bansonga kalumbadi, bua kukolesha bapiabapia ne bua kukankamija aba badi babungame. (Lomo 15:7) Dinanga bana betu nedituambuluishe kabidi bua kuepuka dielelangana meji mabi. Katuena ne bua kuikala ne lukasa lua kuamba ne: makenga adi muntu upeta ntshimanyinu tshia butekete bua mu nyuma. Ke bua tshinyi Paulo udi ubela bena Kristo bua ‘kukolesha badi ne mitshima yamba kupanga.’ (1 Tesalonike 5:14) Bible udi uleja ne: nansha bena Kristo ba lulamatu batu bapeta makenga.​—Bienzedi 14:15.

17. Mbikondo kayi bitudi tupita kukolesha malanda etu a bena Kristo?

¹⁷ Bisangilu bia bena Kristo bidi bitupesha  mushindu muimpe wa tuetu kukoleshangana ne kukankamijangana. (Ebelu 10:24, 25) Dikuatshishangana mushindu’eu ne dinanga kadiena dishikidila anu mu bisangilu bia tshisumbu to. Kadi bantu ba Nzambi badi kabidi bakeba mishindu ya kusomba bimpe mu bikondo bikuabu bia tshianana. Padi ntatu imueneka, netukuatshishangane ne muoyo wa budisuile bualu tukadi bamane kudia bulunda bukole. Mupostolo Paulo wakafunda ne: ‘Mu mubidi kamuikadi ditapuluka, kadi bitupa [biawu] biambuluishangane. Bikala tshitupa tshimue ne dikenga, bitupa bionso bidi bikenga natshi; ne bikala tshitupa tshimue tshitumbishibua, bitupa bionso bidi bisanka natshi.’​—1 Kolinto 12:25, 26.

18. Ndungenyi kayi lutudi ne bua kuepuka patudi tudiumvua batekete mu mikolo?

¹⁸ Minga misangu, tudi petu mua kudiumvua batekete mu mikolo bua kusomba ne bena Kristo netu. Tudi ne bua kuepuka lungenyi lua nunku bua katudipangishi busambi ne diambuluisha bidi bena Kristo netu mua kutupesha. Bible udi utubela ne: ‘Udi udipandulula kudi banga bantu udi ukeba anu bualu budiye musue, ne udi upatula mêyi a tshiji tshikole bua kupidia meji makane.’ (Nsumuinu 18:1) Nzambi udi ututabalela kabidi ku diambuluisha dia bana betu ba balume ne ba bakaji. Tuetu bangate malu mimpe aa adi Nzambi mutulongoluele ne mushinga, netupete disulakana mu tshikondo tshia dikenga.

Ikala ne lungenyi luimpe

19, 20. Mmunyi mudi Mukanda wa Nzambi utuambuluisha bua kuepuka ngenyi mibi?

¹⁹ Paudi uteketa mu mikolo ne ubungama, mbipepele bua wewe kupeta ngenyi mibi. Tshilejilu, padi bamue bantu bapeta makenga, badi mua kubanga kudiula makanda abu a mu nyuma, bamba ne: makenga adibu bapete adi tshimanyinu tshia se: Nzambi ki mmubanyishe to. Kadi vuluka ne: Yehowa katu uteta muntu nansha umue ne “malu mabi.” (Yakobo 1:13) Bible udi wamba ne: ‘[Nzambi] kêna usanka bua kubakengesha, anyi bua kunyingalaja mitshima ya bukua-bantu.’ (Muadi wa Yelemiya 3:33) Kadi Yehowa udi unyingalala bikole padi basadidi bende bakenga.​—Yeshaya 63:8, 9; Zekâya 2:8.

²⁰ Yehowa udi “Tatu wa luse ne Nzambi wa busambi buonso.” (2 Kolinto 1:3) Udi utulama ne neatubandishe mu tshikondo tshidiye mulongolole. (1 Petelo 5:6, 7) Dishala anu bavuluke ne: Nzambi udi utumvuila luse nedituambuluishe bua kuikala ne lungenyi luimpe anyi mene bua kusanka. Yakobo wakafunda ne: ‘Nububale bu disanka dionso panuapona mu mateta a mishindu ya bungi.’ (Yakobo 1:2) Bua tshinyi? Udi wandamuna ne: ‘Bualu bua pakamanabu kumujadika, neangate tshifulu tshia butumbi tshia muoyo tshiakalaya Mukalenge badi bamunanga.’​—Yakobo 1:12.

21. Nansha mutudi tupeta ntatu, mbualu kayi budi Nzambi ujadikila aba badi badileja bena lulamatu kudiye?

²¹ Anu muvua Yezu mutudimuije, pa buloba netupete makenga. (Yone 16:33) Kadi Bible udi ulaya ne: ‘Ntatu, anyi kanyinganyinga, anyi tshinyangu, anyi tshiyole, anyi butaka, anyi njiwu’ kabiena mua kutupandulula ku dinanga dia Yehowa ne dia Muanende. (Lomo 8:35, 39) Bidi bitukolesha ku muoyo patudi bamanye ne: dikenga dionso ditudi tupeta ndia tshitupa tshîpi. Bua mpindieu utudi bindile ndekelu wa makenga a bantu, Tatu wetu wa dinanga Yehowa udi utusungila. Tuetu banyemene kudiye bua atukube, neikale “tshibumba tshile kudi bantu badi bakengeshibua. Neikale tshibumba tshile kudi bantu mu tshikondo tshia ntatu.”​—Musambu 9:9.

Mmalu kayi atudi balonge?

• Ntshinyi tshidi bena Kristo ne bua kutekemena padibu pa buloba ebu bua malu mabi?

• Mmunyi mudi masambila etu menza ne muoyo mujima mua kutukolesha patudi tupeta ntatu?

• Mmunyi mudi nyuma wa Nzambi utuambuluisha?

• Ntshinyi tshitudi mua kuenza bua kuambuluishangana munkatshi muetu?

[Nkonko ya dilonga]

[Tshimfuanyi mu dibeji 18]

Tudi ne bua kukeba Yehowa bienze anu bu se: tudi tunyemena mu tshibumba tshikole

[Bimfuanyi mu dibeji 20]

Bantu bapie mu nyuma badi bela bakuabu kalumbandi ne babakankamija misangu yonso