Malu malonda kudi bamanyishi ba Bukalenge

Badi bavuluka “bantu badibu bapue muoyo bakashipabu”

KU NTUADIJILU kua tshidimu tshia 2001, Haykaz, Ntemu wa Yehowa wa bidimu 15 wakaya mu tshimenga tshia Berne, mu ditunga dia Suisse bua kumona bimfuanyi bia “Bantu badibu bapue muoyo bakashipabu,” bivua bileja mushindu uvua bena Nazi bakengeshe Bantemu ba Yehowa. Mumane kujikija kubandila bimfuanyi abi, Haykaz wakamba ne: “Mvua mumvue mushindu uvuabu bakengeshe Bantemu ba Yehowa bu nyama mu bukokeshi bua bena Nazi, kadi au uvua musangu wa kumpala umvua mumone mikanda ne bimfuanyi bilelela bia mu tshikondo atshi. Bimfuanyi, luapolo lua bavua badimuene malu ne mêsu abu abidi, ne malu avua bafundi ba miyuki ya kale bafunde pa bidi bitangila bimvua mubandile akashala mu lungenyi luanyi ne mu mutshima wanyi.”

Panyima pa lupolo kampanda, pakapeshabu Haykaz mudimu wa kufunda luapolo bua balongi babu ba mu bikadilu, wakasungula tshiena-bualu tshia se: “Bantemu ba Yehowa badibu bapue muoyo bakashipabu kudi bena Nazi.” Mulongeshi wabu wakitaba tshiena-bualu atshi kadi kuambilaye Haykaz bua se: uvua ne bua kuangatshila amue malu a kufunda mu mikanda ivua kayiyi ya malu a Nzambi. Haykaz wakitaba ne disanka dionso. Udi wamba ne: “Ngakafunda malu a mu imue mikanda idi itangila Bantemu ba Yehowa ba mu tshikondo tshia bena Nazi ingakabala. Ngakumvuija kabidi tshimvua mumone pa bidi bitangila bimfuanyi bia ‘bantu badibu bapue muoyo bakashipabu.’ Ngakasakidila mu luapolo elu lua mabeji 43 bimfuanyi ne foto.”

Mu ngondo wa dikumi ne umue 2002, Haykaz wakumvuija luapolo luende kumpala kua balongi ne balongeshi babu, bena dîku diabu ne balunda bende. Pashishe kuakalonda tshitupa tshia nkonko ne mandamuna, tshiakamupetesha mushindu wa kumvuija malu a mu Bible avuaye witabuja. Pakamuebeja nsongakaji kampanda uvua munkatshi mua bateleji bua tshivuaye musunguile tshiena-bualu atshi, Haykaz wakumvuija ne: mikanda ya bungi ya miyuki ya kale kayitu yakula bua malu a Bantemu ba Yehowa to, ne uvua musue bua bantu bamanye muvua Bantemu ba Yehowa babingishe ditabuja diabu dia bena Kristo ne dikima dionso. Muyuki wende wakapatula bipeta kayi?

Haykaz udi wamba ne: “Balongi betu bakakema bikole. Kabavua bamanye ne: bavua bakengeshe tshisumbu tshia Bantemu ba Yehowa bikole to. Ba bungi kabavua bamanye ne: Bantemu bavuabu bele mu maloko manene a bena Nazi bavua bavuale kamanyinu ka kalamba kakunzubile ka matumba asatu nansha.”

Pakajikija Haykaz muyuki wende, wakapeta mishindu ya bungi ya kuakula ne balongi babu ne kubaleja mmuenenu wa Bantemu bilondeshile Bible pa bidi bitangila diedibua mashi mu mubidi, dinua maluvu makole ne malu a bikadilu bilenga. Haykaz wakamba ne: “Mulongi wetu nansha umue kakanseka to.” Mbashale kabidi balame luapolo luende elu mu tshilaminu tshia mikanda tshia tshilongelu tshiabu. Ebi nebiambuluishe bua bantu kabapu muoyo dikima dia Bantemu ba Yehowa to.