Mushindu wa kujikija diteketa ku muoyo

UDIKU mutekete ku muoyo anyi? Mu tshikondo etshi tshia malu a mpukapuka ne ndululu, bantu ba bungi mbatekete ku muoyo. Bamue mbatekete ku muoyo bualu mbalofu. Bakuabu badi ne ntatu milela kudi njiwu kampanda ivua mienzeke. Banga pabu badi baluangana ne ntatu ya mu dîku, disama dikole anyi dikala nkaya.

Biwikala mutekete ku muoyo, nkuepi kuudi mua kupeta diambuluisha? Bantu miliyo mivule pa buloba bujima mbapete busambi mu dibala Bible Dîyi dia Nzambi. Mbabakoleshe ku muoyo kudi mêyi a mupostolo Paulo, wakamba ne: ‘Nzambi Tatu wa Mukalenge wetu Yezu Kristo, Tatu wa luse ne Nzambi wa busambi buonso, atumbishibue; utu watusamba mu makenga etu onso.’ (2 Kolinto 1:3, 4) Bua tshinyi kubenga kubala mvese eu ne mikuabu kabidi mu Bible webe? Dibala edi ‘nedisambe muoyo webe ne nediukankamike.’​—2 Tesalonike 2:17, MMM.

Udi mua kupeta kabidi diambuluisha dia mushindu wa kujikija diteketa ku muoyo mu didisangisha ne aba badi basadila Yehowa. Nsumuinu 12:25 udi wamba ne: ‘Lutatu mu mutshima wa muntu ludi lumunemeshila bujitu, kadi dîyi dia luse didi dimusanguluja.’ Patudi tubuela mu bisangilu bia bena Kristo, tudi tumvua ‘dîyi dia luse’ didi ‘dishemakane ku muoyo ne disanguluja mubidi.’ (Nsumuinu 16:24) Bua tshinyi kubenga kubuela mu tshisangilu kampanda ku Nzubu wa Bukalenge wa Bantemu ba Yehowa bua wewe kudiumvuila nkayebe mudi didisangisha edi dikukolesha?

Bukole bua disambila budi kabidi mua kukuambuluisha. Wewe udiumvua mujingila kudi makenga mapite bungi, ambila eu udi ‘umvua milombu’ malu adi makutonde mu mutshima webe. (Musambu 65:2) Yehowa Nzambi Mufuki wetu udi utumvuila bimpe kupita mutudi tuetu tudiumvuila. Nunku tueyemenayi diambuluisha diende. Dîyi diende didi ditulaya ne: ‘Teka bujitu buebe pambidi pa Yehowa, ne yeye neakukoleshe; kêna witabuja tshiendelele bua bantu bakane banyungishibue.’ (Musambu 55:22) Bushuwa, ‘aba badi bindila Yehowa [nebapetulule] bukole buabu.’​—Yeshaya 40:31.

Yehowa Nzambi mmutupeshe bintu bia bungi bidi mua kutuambuluisha bua kujikija diteketa ku muoyo. Newenze nabi mudimu anyi?