Nkonko ya babadi

Bua tshinyi Bantemu ba Yehowa batu bangata nomba wa 144 000 udibu batele mu mukanda wa Buakabuluibua anu mudiyi, kabayi bamuangata bu wa tshifuanyikijilu?

Mupostolo Yone wakafunda ne: “Meme kumvua batela bungi bua bavuabo bafunde tshimanyinu: bavua bantu binunu lukama makumi anayi ne binayi.” (Buakabuluibua 7:4, MMM) Mu Bible, tshiambilu tshia “bavuabo bafunde tshimanyinu” tshidi tshitangila tshisumbu tshia bantu badibu basungule munkatshi mua bukua-bantu bua kukokesha mu diulu ne Kristo pa buloba bualua Mparadizu. (2 Kolinto 1:21, 22; Buakabuluibua 5:9, 10; 20:6) Bungi buabu 144 000 mbua kuangata anu mudibu amu bilondeshile malu kabukabu. Bumue bua ku malu aa budi busanganyibua mu mvese idi pabuipi ne Buakabuluibua 7:4.

Kunyima kua bamane kuambila mupostolo Yone mu tshikena-kumona bualu bua tshisumbu tshia bantu 144 000, bakamuleja tshisumbu tshikuabu. Yone udi ubikila bena tshisumbu tshibidi etshi ne: ‘[Musumba munene] wa bantu wakadi muntu kayi mua kubala, munkatshi mua ditunga dionso, ne munkatshi mua bisamba bionso, ne bantu bonso, ne miakulu yonso.’ Musumba munene eu udi utangila aba bapanduka palua “dikenga dinene” dikala ne bua kubutula malu mabi a mu tshikondo etshi.​—Buakabuluibua 7:9, 14.

Kadi mona dishilangana didi Yone uleja pankatshi pa mvese 4 ne wa 9 ya Buakabuluibua nshapita wa 7. Udi wamba ne: tshisumbu tshia kumpala tshia “bavuabo bafunde tshimanyinu” ntshienza ne bantu bungi bujadika. Kadi tshisumbu tshibidi anyi “musumba munene” katshiena tshienza ne bantu bungi bujadika to. Ke bualu kayi bidi biakanyine bua kuangata nomba wa 144 000 anu mudiye amu. Bu nomba wa 144 000 muikale wa tshifuanyikijilu ne utangila tshisumbu tshia bantu bungi kabuyi kubala, kakuvua mua kuikala dishilangana pankatshi pa mvese ibidi eyi to. Nunku, mvese idi kumpala ne kunyima kua mvese eu idi ileja ne: nomba wa 144 000 ng’wa kuangata anu bu mudiye amu.

Bamanyi bapiluke kabukabu ba Bible, ba kale ne ba lelu, bakafika ku nkomenu wa muomumue wa se: nomba eu ng’wa kuangata anu bu mudiye amu. Tshilejilu, Ethelbert Bullinger (mufundi wa nkonga-miaku wa mu ditunga dia Grande-Bretagne) wakamba kukadi mpindieu bidimu bitue ku 100 ne: “Ntshiambilu patupu tshia bualu: mbungi bujadika bushilangane ne bungi budi kabuyi bujadika buleja mu nshapita umuepele eu.” (The Apocalypse or “The Day of the Lord,” dibeji 282) Matuku adi panshi aa, Robert Thomas (Mulongeshi wa Dipungila Dipiadipia mu Seminere wa mu États-Unis) wakafunda ne: “Kuangata bungi ebu bu bua tshifuanyikijilu kakuena ne nshindamenu menemene to.” Wakasakidila ne: “Mbungi bujadika [budi mu nshapita 7:4] bushilangane ne bungi budi kabuyi bujadika budi mu nshapita 7:9. Bobu bangate nomba wa 144 000 bu tshifuanyikijilu, nanku kabakuangata bungi bukuabu nansha bumue bua mu mukanda wa Buakabuluibua anu mudibu amu to.”​—Revelation: An Exegetical Commentary, Volime 1, dibeji 474.

Bamue badi bamba ne: bu mudi Buakabuluibua mufunda nangananga mu ngakuilu wa tshifuanyikijilu, nomba yonso idi mu mukanda eu,  nansha mene wa 144 000 idi ne bua kuikala ya tshifuanyikijilu. (Buakabuluibua 1:1, 4; 2:10) Kadi mbimueneke patoke ne: kabiena nanku to. Bushuwa, mu Buakabuluibua mudi nomba ya tshifuanyikijilu kabukabu, kadi mudi kabidi nomba ya kuangata anu mudiyi mifunda amu. Tshilejilu, Yone udi wakula bua “mena dikumi ne abidi a bapostolo dikumi ne babidi ba Muana wa Mukoko.” (Buakabuluibua 21:14) Bulelela, nomba eu 12 udibu batele mu mvese eu nnomba anu mudiyi mufunda, ki ng’wa tshifuanyikijilu to. Mupostolo Yone mmufunde kabidi bua “bidimu tshinunu” bia bukokeshi bua Kristo. Patudi tukonkonona Bible ne ntema yonso, bidi bimueneka ne: bungi ebu mbua kuangata kabidi anu mushindu udibu eu. * (Buakabuluibua 20:3, 5-7) Nunku, bua kumanya bikala bungi kampanda bua mu Buakabuluibua buikale bua kuangata anu mudibu bufunda amu anyi buikale bua tshifuanyikijilu, bidi bikengela kukonkonona mvese idi kumpala ne idi kunyima kuabu.

Lungenyi lua se: nomba wa 144 000 ng’wa kuangata anu mudiyi ne udi utangila bungi bukese bua bantu, mbuena kuamba se: kasumbu kakese patudi tufuanyikija bungi ebu ne bena mu “musumba munene.” Lungenyi alu ludi kabidi lupetangana ne mvese mikuabu ya mu Bible. Tshilejilu, mu tshikena-kumona tshivua mupostolo Yone mupete kunyima, badi bamba bua bantu 144 000 ne: ‘Bakasumbibua munkatshi mua bantu, bua kuikala mamuma a kupuola diambedi.’ (Buakabuluibua 14:1, 4) Kabidi, pavua Yezu pa buloba, wakakula bua bantu bikala ne bua kukokesha nende mu Bukalenge buende bua mu diulu ne kubabikila ne: “Kasumbu kakese.” (Luka 12:32, NW; 22:29) Bushuwa, bantu bikala ne bua kukokesha mu diulu mbakese ku bantu bikala ne bua kusombela mu Mparadizu wa pa buloba udi ne bua kulua.

Nunku, mvese idi kulu ne kuinshi kua Buakabuluibua 7:4 ne mêyi makuabu adi apetangana nende adi miaba mikuabu mu Bible bidi bijadika ne: nomba wa 144 000 ng’wa kuangata anu mudiyi. Nomba eu udi utangila aba bikala ne bua kukokesha ne Kristo mu mparadizu wa pa buloba wikala muule tente ne bantu bena disanka bungi kabuyi kubala bikala batendelela Yehowa Nzambi.​—Musambu 37:29.

[Mêyi adi kuinshi]

[Lungenyi lunene lua mu dibeji 31]

Bungi bua bapianyi ba mu diulu budi anu bua bantu 144 000

[Tshimfuanyi mu dibeji 31]

Bena mu “musumba munene” kabena kubala

[Mêyi a dianyisha bua tshimfuanyi mu dibeji 31]

Mitoto: Ne dianyisha dia Anglo-Australian Observatory, photo wa David Malin