Tshia kuenza menemene bua kuikala ne disanka

YEHOWA, “Nzambi wa disanka” ne Yezu Kristo ‘Wa diakalenga ne Munene umue,’ mbamanye bimpe kupita bantu bonso tshidi tshikengela kuenza bua kuikala ne disanka. (1 Timote 1:11, NW; 6:15, MMM) Nunku, kabiena bikemesha bua mudi Dîyi dia Nzambi dileja tshia kuenza bua kuikala ne disanka.​—Buakabuluibua 1:3; 22:7.

Mu Muyuki muende lumu wa Yezu wa pa Mukuna, udi umvuija tshidi tshikengela kuenza bua kuikala ne disanka. Udi wamba ne: “Badi ne disanka” mbadi (1) bapele mu mitshima, (2) badila, (3) bapole malu, (4) ne nzala ne nyota ya buakane, (5) ne luse, (6) ne mitshima mitoke, (7) bena ditalala, (8) bakakengeshibua bua buakane buabu, ne (9) bakapendabu ne bakakengeshabu bua bualu buende.​—Matayo 5:3-11.

Mêyi a Yezu mmalelela anyi?

Bulelela bua amue mêyi a Yezu budi bulomba diumvuija dikese. Nganyi wela mpata bua se: muntu mupole malu, muena luse ne mukebi wa ditalala musaka kudi mutshima mutoke neikale ne disanka kupita muntu muena tshiji, muena bilumbu ne udi kayi muena luse?

Kadi tudi mua kudikonka mudi bantu badi ne nzala ne nyota ya buakane anyi badi badila mua kuikala ne disanka. Bantu aba badi ne mmuenenu mulelela wa nsombelu udi pa buloba.  Badi ‘bapumuna muoyo ne badi badila bualu bua malu a bundu adi bakuabu benza’ matuku etu aa. (Yehezekele 9:4) Malu aa kaena abapesha disanka to. Kadi padibu bamanya malu adi Nzambi mulongolole bua kuteka nsombelu muakane pa buloba ne kulumbulula kuakane bua bantu badibu bakengesha, disanka diabu didi divula.​—Yeshaya 11:4.

Dinanga dia buakane didi kabidi disaka bantu bua kunyingalala misangu yonso idibu bapanga kuenza malu makane. Nunku badi bapele mu mitshima. Bantu ba nunku mbasue kukeba buludiki kudi Nzambi bualu badi bajingulula ne: yeye nkayende udi mua kuambuluisha bantu bua kutshimuna butekete buabu.​—Nsumuinu 16:3, 9; 20:24.

Bantu badi badila, badi ne nzala ne nyota ya buakane, ne badi bapele mu mitshima mbamanye mushinga wa kuikala ne malanda mimpe ne Mufuki. Dikala mu malanda mimpe ne bantu didi difila disanka, kadi dikala mu malanda mimpe ne Nzambi didi diodi difila disanka dipite. Bushuwa, mbikumbanyine bua banangi balelela ba malu makane, badi basue kuitaba buludiki bua Nzambi kuikala ne disanka.

Kadi bidi mua kukukolela bua kuitaba ne: muntu udibu bakengesha anyi bapenda udi mua kuikala ne disanka. Mbualu bulelela bualu Yezu nkayende ke wakabuamba. Nunku, mmunyi mutudi ne bua kumvua miaku yende eyi?

Bakengeshibue kadi bikale ne disanka: mmunyi mudibi mua kuenzeka?

Mona ne: Yezu kakamba se: bipendu ne dikengeshibua ke bidi bifikisha ku disanka to. Kadi wakaleja ne: ‘Bakakengeshibua bua buakane buabu badi ne disanka, . . . panupendabu ne panukengeshabu . . . bua bualu buanyi.’ (Matayo 5:10, 11) Nunku muntu udi upeta disanka anu padiye ukenga bualu udi muyidi wa Kristo, ne bualu udi utumikila mêyi makane avua Yezu mulongeshe.

Muanda kampanda wakenzekela bena Kristo ba kumpala udi ujadika bualu ebu. Bena mu Sanedren, kabadi kakulu ka bena Yuda, ‘bakabikila bapostolo, bakabakuma, bakabakandika ne: Kanuambi bualu mu dîna dia Yezu, bakabalekela.’ Ntshinyi tshiakenza bapostolo? ‘Bakumuka kumpala kua bena tshilumbuluidi basanka bualu bua bakabadibua ne: mbakane bua kufuishibuabu bundu bualu bua dîna dia Yezu. Ku dituku ku dituku, mu ntempelo ne mu nzubu yabu, kabakalekela kuyisha bantu ne kubambila lumu luimpe ne: Yezu udi Kristo.’​—Bienzedi 5:40-42; 13:50-52.

Mupostolo Petelo wakafila butoke bukuabu pa bidi bitangila diumvuangana didi pankatshi pa bipendu ne disanka. Wakafunda ne: ‘Bianupendabu bua dîna dia Kristo, nudi ne disanka; bualu bua nyuma wa butumbi ne nyuma wa Nzambi udi unuikila pambidi penu.’ (1 Petelo 4:14) Bushuwa, kukenga bu muena Kristo bualu tudi tuenza malu makane kudi kupetesha disanka didi difumina ku dimanya dia se: tudi tupeta nyuma muimpe wa Nzambi. Mmushindu kayi udi nyuma wa Nzambi upetangana ne disanka?

Malu mabi adi mubidi wenza anyi mamuma a nyuma?

Nyuma wa Nzambi udi anu kudi aba badi batumikila Nzambi. (Bienzedi 5:32) Yehowa katu ufila nyuma wende kudi bantu badi benza “malu mabi adi mubidi wenza” to. Malu mabi aa adi ‘tshiendenda tshia malunda mabi, meji mabi, masandi, ditendelela dia mpingu, kupaka kua manga, lukuka, kutandangana, mukawu, tshiji, kutapuluka, mpata, diyoyo, mutshiaudi, bukuatshiki bua maluvu, manaya a bundu ne malu aa onso.’ (Galatia 5:19-21) Bulelela, lelu’eu, “malu mabi adi mubidi wenza” mmatangalake bikole. Bantu badi baenza kabena bapeta disanka dilelela ne dia kashidi to. Kadi, dienza malu aa didi dinyanga malanda a muntu ne balela bende ne balunda ne bamanyangana nabu kabidi. Dîyi dia Nzambi didi diamba kabidi ne: bantu batu ‘benza malu aa kabena bapiana bukalenge bua Nzambi.’

Kadi Nzambi udi ufila nyuma wende kudi badi bakuama “mamuma a nyuma.”  Mamuma a nyuma aa adi “dinanga, disanka, ditalala, lutulu, bulenga, buimpe, ditabuja, bupole-malu, didikanda.” (Galatia 5:22, 23, NW) Patudi tuleja ngikadilu eyi, tudi tuenza malu adi atufikisha ku dikala mu ditalala ne bantu netu, ne Nzambi kabidi, ne ebi bidi bitufikisha ku disanka dilelela. (Bala kazubu.) Tshidi ne mushinga mutambe ntshia se: patudi tuleja dinanga, bulenga, buimpe ne ngikadilu mikuabu ya Nzambi, tudi tusankisha Yehowa ne tupeta ditekemena dilenga dia muoyo wa tshiendelele mu bulongolodi bupiabupia bua buakane.

Kuikala ne disanka nkuenza disungula

Mu ditunga dia Allemagne, pakatuadija bena dibaka babidi Wolfgang ne Brigitte kulonga Bible ne muoyo mujima, bavua ne bintu bia bungi bitu bantu bela meji ne: bidi bipetesha bantu disanka. Bavua bansonga ne bikale ne bukole bua mubidi. Bavua bavuala bilamba bia mushinga mukole, basombele mu nzubu milengeja bimpe, ne mushinga wabu uvua wenda bimpe. Dîba diabu dia bungi divua diya amu ku dikeba dia bintu bivule bia ku mubidi, kadi abi kabiakabapetesha disanka dilelela to. Nansha nanku, matuku mamane kupita, Wolfgang ne Brigitte bakangata dipangadika dinene. Bakabanga kufila dîba dia bungi ne kudienzeja bua kulonda malu a mu nyuma ne kukeba mishindu ya kusemena pabuipi ne Yehowa. Dipangadika diabu diakashintulula lungenyi luabu, bobu kupepeja nsombelu wabu ne kuluabu bampanda-njila anyi bamanyishi ba lumu luimpe lua Bukalenge ba ku dîba ne ku dîba. Lelu’eu, badi benza mudimu ku budisuile ku biro bia filiale wa Bantemu ba Yehowa mu ditunga dia Allemagne. Kabidi, badi balonga muakulu kampanda wa mu Asia bua bamone mua kuambuluisha benyi bua kulonga bulelela bua mu Bible, Dîyi dia Nzambi.

Bena dibaka aba bavua bapete disanka dia bushuwa anyi? Wolfgang udi wamba ne: “Katshia tuabanga kudifila bikole mu malu a mu nyuma, tudi ne disanka dipite bungi. Kuenzela Yehowa mudimu ne mutshima mujima nkukoleshe kabidi dibaka dietu. Kumpala tuvua ne nsombelu wa disanka mu dibaka, kadi tuvua ne midimu ne malu atuvua tujinga kuenza biakatufikisha ku dikala ne bipatshila bishilangane. Mpindieu tudi ne tshipatshila tshia muomumue.”

 Bidi bikengela tshinyi bua kuikala ne disanka?

Mu tshikoso: Epuka “malu mabi adi mubidi wenza” ne kuama “mamuma a nyuma” wa Nzambi. Bua kuikala ne disanka, tudi ne bua kudienzeja bua kuikala mu malanda mashême ne Nzambi. Muntu udi udienzeja bua kuenza nunku mmukumbanangane ne diumvuija dia Yezu dia muntu udi ne disanka.

Ke bualu kayi, kudidingi ne: kuena mua kupeta disanka to. Bushuwa, mpindieu udi mua kuikala kuyi ne bukole bua mubidi anyi udi nansha mua kuikala ne ntatu mu dibaka diebe. Pamu’apa kuena kabidi ne mushindu wa kulela bana anyi udi mua kuikala uluangana bua kupeta mudimu udi ufuta. Peshi kuena kabidi ne makuta bu muuvua nawu kumpala to. Nansha nanku, kolesha muoyo, kakuena tshia wewe kuteketela mu mikolo to! Bukalenge bua Nzambi nebujikije ntatu eyi ne mikuabu nkama ne nkama. Bulelela, mu katupa kîpi emu Yehowa Nzambi neakumbaje dilaya diende dimanyisha kudi mufundi wa Misambu ne: ‘Bukalenge buebe budi bukalenge bua tshiendelele. Udi ubulula tshianza tshiebe, tshintu tshionso tshidi ne muoyo udi utshiukutshisha ne diakalengele.’ (Musambu 145:13, 16) Anu mudi miliyo ya basadidi ba Yehowa ba pa buloba bujima mua kuamba kujadika, dikala bavuluke mulayi eu mulenga wa Yehowa nedikuambuluishe bikole bua kuikala ne disanka lelu.​—Buakabuluibua 21:3.

[Kazubu/​Tshimfuanyi mu dibeji 6]

Malu adi apetesha muntu disanka

Dinanga diebe nedisake bakuabu bua kukunanga pebe.

Disanka didi dikupesha bukole bua kukolela ntatu.

Ditalala didi dikuambuluisha bua kuikala kuyi tshilumbu ne muntu.

Lutulu ludi lukuambuluisha bua kushala ne disanka paudi mu diteta.

Bulenga budi busemeja bakuabu kuudi.

Buimpe buudi uleja nebufikishe ku dikuambuluisha paudi dijinga ne diambuluisha.

Ditabuja nedikujadikile ne: Nzambi udi ukuludika ne dinanga.

Bupole-malu budi buenza bua se: wikale mutukije mutshima, lungenyi ne mubidi.

Didikanda, wewe nadi bilema biebe nebikale bikese.

[Bimfuanyi mu dibeji 7]

Bua kupeta disanka, udi ne tshia kukumbaja majinga ebe a mu nyuma