Tumbishayi Nzambi ‘ne dîyi dimue’

‘Nutumbishe Nzambi Tatu [wa] Mukalenge wetu Yezu Kristo ne dîyi dimue.’​—LOMO 15:6.

1. Ndilongesha kayi divua Paulo mupeshe bena kuitabuja nende bua tshia kuenza padibu ne ngenyi ibengangana?

 BENA KRISTO kabatu bonso basungula anyi basue anu malu a muomumue to. Kadi bobu bonso badi ne bua kuenda mu buobumue mu njila udi ufikisha ku muoyo. Abi bidi mua kuenzeka anyi? Eyowa, bidi mua kuenzeka bituikala katuyi tudiundisha tualu tukese tutuvuija malu manene. Adi ke dilongesha divua mupostolo Paulo mupeshe bena kuitabuja nende ba mu bidimu lukama bia kumpala. Mmunyi muakumvuijaye bualu bua mushinga ebu? Ne mmunyi mutudi petu lelu’eu mua kutumikila mubelu wende eu mufundisha ku nyuma wa Nzambi?

Mushinga udi nawu buobumue bua bena Kristo

2. Mmunyi muvua Paulo muleje mushinga udi nawu buobumue?

² Paulo uvua mujadike ne: buobumue bua bena Kristo budi ne mushinga wa bungi, e kufilaye mibelu milenga bua kuambuluisha bena Kristo bua kuikalabu ne dinanga dia bafuilangana luse. (Efeso 4:1-3; Kolosai 3:12-14) Nansha nanku, kunyima kua Paulo mumane kuenza bisumbu bia bungi ne mukumbulule bikuabu munkatshi mua bidimu bipite pa 20, wakamona ne: bivua bualu bukole bua bisumbu abi kushalabi ne buobumue. (1 Kolinto 1:11-13; Galatia 2:11-14) Ke bualu kayi wakabela bena kuitabuja nende ba mu Lomo ne: ‘Nzambi wa ditantamana ne wa busambi anupe bua nuenu nutumbishe Nzambi Tatu [wa] Mukalenge wetu Yezu Kristo ne mutshima umue ne dîyi dimue.’ (Lomo 15:5, 6) Lelu’eu, tuetu petu tudi ne bua kutumbisha Yehowa Nzambi ‘ne dîyi dimue,’ bikale tshisumbu tshimue tshia basadidi bende badi mu buobumue. Mmunyi mutudi tufika ku dienza nanku?

3, 4. (a) Bena Kristo ba ku Lomo bavua bashilangane ku malu kayi? (b) Mmunyi muvua bena Kristo ba ku Lomo mua kufika ku disadila Yehowa ‘ne dîyi dimue’?

³ Bena Kristo ba bungi ba ku Lomo bavua balunda ba Paulo. (Lomo 16:3-16) Nansha muvuabu bafumine miaba mishilangane, Paulo uvua wangata bana babu bonso aba bu bantu “banangibue kudi Nzambi.” Wakafunda ne: ‘Ndi nsakidila Nzambi wanyi mu Yezu Kristo bua buonso buenu, bualu bua ditabuja dienu didi dimanyishibue pa buloba buonso.’ Bulelela, bena Lomo bavua tshilejilu tshimpe mu malu a bungi. (Lomo 1:7, 8; 15:14) Bamue bena mu tshisumbu atshi bavua kabidi ne meji mashilangane pa amue malu. Bu mudi bena Kristo lelu’eu bafumina miaba mishilashilangane ne bikale kabidi ne bibidilu bishilangane, kulonga mibelu ya Paulo mifundisha ku nyuma wa Nzambi bua mushindu wa kujikija bilumbu kudi mua kutuambuluisha bua kuakula ‘ne dîyi dimue.’

⁴ Mu Lomo muvua bena kuitabuja bena Yuda ne ba mu bisamba bia bende. (Lomo 4:1; 11:13) Nansha muvua bamue bena Yuda bavua balue bena Kristo mua kuikala bamanye muvua bilele bikuabu bivuabu banemekela mu Mikenji ya Mose kabiyi ne mushinga bua kupeta lupandu, bidi bimueneka ne: kabakafika ku dibilekela to. Kadi bena Kristo ba bungi ba bena Yuda bakitaba ne: mulambu wa Kristo uvua mubapikule ku mikandu ivuabu batumikila kumpala kua kuluabu bena Kristo. Ke bualu kayi bakashintulula bimue bilele ne bibidilu bivuabu nabi. (Galatia 4:8-11) Nansha nanku, anu muakaleja Paulo, bonso bavua “banangibue kudi Nzambi.” Bonso bavua mua kutumbisha Nzambi ‘ne dîyi dimue’ bu bobu bikale belelangana meji makane. Tuetu petu lelu tudi mua kuikala ne mmuenenu ya malu mishilangane pa imue mianda. Ke bualu kayi tudi ne bua kukonkonona bimpe bimpe mushindu udi Paulo umvuija dîyi adi dia mushinga.​—Lomo 15:4.

 ‘Nuitabujangane’

5, 6. Bua tshinyi bena mu tshisumbu tshia mu Lomo bavua ne mishindu ya dimona malu mishilangane?

⁵ Mu mukanda wa Paulo uvuaye mutumine bena Lomo, udi wakula bua bualu buvua bantu mua kumvua mishindu mishilangane. Udi ufunda ne: ‘Munga muntu udi ne ditabuja dia mua kudia bintu bionso, kadi mukuabu udi mutekete mu ditabuja udi udia midioko.’ Bua tshinyi bivua bienzeka nanku? Bushuwa, mu Mikenji ya Mose bavua bakandike bua kudia ngulube. (Lomo 14:2; Lewitiki 11:7) Kadi pakafua Yezu, Mikenji ayi kayitshivua kabidi ne mushinga to. (Efeso 2:15) Pashishe, bidimu bisatu ne tshitupa kunyima kua lufu lua Yezu, muanjelu wakambila mupostolo Petelo ne: ku mêsu kua Nzambi kakuena tshiakudia tshidi tshibipe to. (Bienzedi 11:7-12) Bu mukavua bamue bena Yuda bakalua bena Kristo bamanye malu aa, bakamona pamu’apa ne: bavua mua kudia ngulube peshi kudia tshiakudia tshikuabu tshivuabu bakandike mu Mikenji ya Mose.

⁶ Kadi, lungenyi lua kudia biakudia abi bivuabu bangata kumpala bu bibipe kaluvua pamu’apa mua kusankisha bena Kristo bakuabu bena Yuda to. Bena Kristo aba bavua pamu’apa bumvue bibabungamije bua kumona bena Yuda bavua bana babu mu Kristo badia biakudia bia mushindu’eu. Kabidi, bamue bena Kristo ba mu bisamba bia bende bavua bafumine mu bitendelelu bivuabu pamu’apa kabayi bakandike biakudia kampanda mu mikenji yabu bavua mua kuikala bakeme bua kumona bantu bakokangana bua biakudia. Bulelela, kabivua bibi bua muntu kubenga bimue biakudia bikalaye kavua wamba ne: dibibenga nunku ke divua mua kupetesha muntu lupandu to. Tshidibi, dishilangana dia mushindu wa dimona malu ke divua pamu’apa dijudije makokangana mu tshisumbu. Bena Kristo ba mu Lomo bavua ne bua kudimuka bua makokangana aa kaabapangishi bua kutumbisha Nzambi ‘ne dîyi dimue.’

7. Mmishindu kayi mishilangane ivuabu bamona dinemekela dituku kampanda dia pa buadi lumingu luonso?

⁷ Paulo udi ufila tshilejilu tshibidi: ‘Mukuabu udi utumbisha dituku pa mutu pa dikuabu; kadi mukuabu udi utumbisha matuku onso muomumue.’ (Lomo 14:5a) Mu Mikenji ya Mose, kabavua ne bua kuenza mudimu nansha umue dituku dia Nsabatu. Nansha kuenza luendu bavua bakukandike dituku adi. (Ekesode 20:8-10; Matayo 24:20; Bienzedi 1:12) Kadi pakafua Mikenji ayi, mikandu ayi kayitshivua kabidi ne mushinga to. Tshidibi, bamue bena Kristo ba mu bena Yuda bavua mua  kuikala bumvua bibi bua kuenza mudimu kayi wonso peshi kuenza luendu lule dituku divuabu bamona kumpala bu dia tshijila. Nansha pakavuabu bamane kulua bena Kristo, bavua mua kuikala balame dituku dia muanda mutekete anu bua malu a mu nyuma nansha muvua Nsabatu katshiyi kabidi ne mushinga ku mêsu kua Nzambi. Bivua bibi pavuabu benza bualu ebu anyi? Kabavua benza bibi to bikalabu bavua benza nanku kadi kabayi bamba ne: dinemekela Nsabatu divua bualu buvua bulombibue kudi Nzambi. Ke bualu kayi, bua Paulo kunemeka kuondo ka muoyo ka bana babu bena Kristo, wakafunda ne: ‘Muntu ne muntu ikale ne dijingulula dijalame bua bualu budi bupite buimpe.’​—Lomo 14:5b.

8. Nansha muvua bena Kristo ba mu Lomo mua kunemeka kuondo ka muoyo ka bakuabu, ntshinyi tshivuabu kabayi ne bua kuenza?

⁸ Kadi, nansha muvua Paulo ukankamija bana babu ne musangelu wonso bua kuikalabu ne lutulu kudi aba bavua bajula makokangana bua malu avua atangila kuondo ka muoyo ka muntu nkayende, wakapisha aba bavua bakeba kuenzeja bena kuitabuja nabu bua kutumikilabu Mikenji ya Mose bua kupetabu lupandu. Tshilejilu, pamue ne mu tshidimu tshia 61 bikondo bietu ebi, Paulo wakafunda mukanda wa Ebelu, mukanda uvua ne malu manene avuaye mufundile bena Kristo bena Yuda uvua umvuija bimpe bitoke muvua kulonda kua Mikenji ya Mose kakuyi ne mushinga nansha mukese, bualu bena Kristo bakavua ne ditekemena divua ne mushinga mubandile divua dishindamene pa mulambu uvua Yezu mufile bua kupikula nawu bantu.​—Galatia 5:1-12; Tito 1:10, 11; Ebelu 10:1-17.

9, 10. Ntshinyi tshidi bena Kristo ne bua kudikanda bua kuenza? Umvuija.

⁹ Anu mutudi bamone, Paulo udi ujadika ne: kusungula bua kuenza malu adi mashilangane ne a bakuabu kakuena ne bua kunyanga buobumue padiku kakuyi mêyi a bena Kristo adibu bashipe patoke to. Ke bualu kayi Paulo udi ukonka bena Kristo badi ne kuondo ka muoyo katekete ne: ‘Apu wewe, udi ulumbuluisha muanenu bua tshinyi?’ Pashishe udi webeja kabidi aba badi bakole (pamu’apa badi kuondo kabu ka muoyo kabanyishila bua kudia bimue biakudia bivuabu bakandike mu Mikenji ya Mose anyi bua kuenza mudimu wa tshianana dituku dia Nsabatu) ne: ‘Anyi wewe kabidi, udi upetula muanenu bua tshinyi?’ (Lomo 14:10) Bilondeshile Paulo, bena Kristo badi ne kuondo ka muoyo katekete badi ne bua kulekela dibipisha bana babu badi bamona malu mu mushindu mutamba kualabala. Kabidi, bena Kristo badi bakole kabena ne bua kupepeja aba badi ne kuondo ka muoyo katshidi katekete mu amue malu nansha. Bonso badi ne bua kuangata meji makane a bakuabu ne mushinga ne kubenga ‘kutamba kudielelangana meji mapite adibu ne bua kuela.’​—Lomo 12:3, 18.

¹⁰ Paulo wakumvuija mushindu muakanyine wa dimona malu nunku: ‘Muntu udi udia bintu bionso kapetudi udi kayi ubidia; ne udi kayi ubidia kalumbuluishi udi ubidia; bualu bua Nzambi mene wakamuitabuja.’ Udi wamba kabidi ne: ‘Nunku nuitabujangane bu muakanuitabuja Kristo bua kuvuija butumbi kudi Nzambi.’ Bu mudi Nzambi ne  Kristo bitabe bantu badi batekete ne badi bakole, tudi ne bua kuikala ne lungenyi lua muomumue ne ‘kuitabujangana.’ (Lomo 14:3; 15:7) Nnganyi uvua mua kubenga mubelu eu ne kabengela?

Dinanga dia bana betu didi dilela buobumue lelu

11. Nnsombelu kayi wa pa buende uvuaku mu tshikondo tshia Paulo?

¹¹ Mu mukanda wa Paulo uvuaye mutumine bena Lomo, wakakula bua nsombelu kampanda wa pa buende. Yehowa uvua ufuma ku dishipa tshipungidi tshimue ne ku dijadika tshikuabu tshipiatshipia. Bamue bavua ne lutatu lua kuibidilangana ne malu a mu tshipungidi tshipiatshipia etshi. Nsombelu au musunguluke kenaku lelu to, kadi malu a muomumue adi mua kujuka imue misangu.

12, 13. Mmu imue nsombelu kayi mudi bena Kristo lelu mua kunemeka kuondo ka muoyo ka bana babu?

¹² Tshilejilu, mukaji kampanda muena Kristo uvua mua kuikala kumpala mu tshitendelelu tshivuabu babenga divuala bilamba bidi bilengeja bakaji anyi didilengeja mubidi bua kumueneka bimpe ku bantu. Padiye witaba bulelela, udi mua kumona bikole bua kushintulula meji ende bua kuitaba se: ki mbikandikibue bua kuvuala bilamba bilenga ne bikumbanyine mubidi anyi kudilengeja ne nkatshinkatshi mu bikondo kampanda biakanyine to. Bu mudiku kakuyi dîyi kampanda dia mu Bible didi diakula bualu ebu, kabiakuikala bimpe bua muntu mukuabu kukeba bua kusuisha mukaji muena Kristo eu bua kuenzaye bualu budi bubengangane ne kuondo kende ka muoyo nansha. Kabidi mbimpe mukaji muena Kristo eu umvue pende ne: kêna ne bua kubipisha bakaji bena Kristo badi kuondo kabu ka muoyo kabanyishila bua kuvuala bilamba bidi bibalengeja anyi bua kudilengeja mubidi nansha.

¹³ Angata tshilejilu tshikuabu. Mulume muena Kristo udi mua kuikala mukolele muaba uvua bantu kabayi basue kunua maluvu to. Padiye ulonga bulelela, umanya tshidi Bible wamba bua se: mvinyo ta maluvu ndipa dia kudi Nzambi ne tudi mua kuanua pa nnuinu. (Musambu 104:15) Udi witaba bualu ebu. Kadi anu bua muaba udiye mukolele, udi wangata dipangadika dia kubenga kunua maluvu onso kadi kayi ubipisha aba badi baanua pa nnuinu to. Dîba adi udi utumikila mêyi a Paulo a se: ‘Nunku tulonde bietu malu adi avuija ditalala ne malu atudi mua kudiundishangana nawu.’​—Lomo 14:19.

14. Mmu nsombelu kayi mudi bena Kristo mua kutumikila lungenyi ludi mu mubelu uvua Paulo mupeshe bena Lomo?

¹⁴ Kutu kumueneka nsombelu mikuabu idi ilomba bua kutumikila lungenyi ludi mu mubelu wa Paulo uvuaye mupeshe bena Lomo. Tshisumbu tshia bena Kristo ntshienza ne bantu bashilangane, kabidi bikale basue malu mashilashilangane. Ke bualu kayi badi mua kusungula muntu ne muntu ende malu mashilangane ne a mukuabu, bu mudi mu tshilumbu tshia mvuadilu ne ndengejilu wa mubidi. Bushuwa, Bible udi uleja mêyi matoke adi bena Kristo balelela bonso batumikila. Muntu nansha umue wa kutudi kêna ne bua kuvuala bilamba anyi kulengeja nsuki mu mushindu udi kauyi muakanyine peshi udi utuvuija bafuanangane ne bantu ba bikadilu bibi ba pa buloba ebu nansha. (1 Yone 2:15-17) Bena Kristo mbavuluke ne: dîba dionso, nansha padibu bajikija lutetuku, mbena mudimu ba Mukalenge wa diulu ne buloba badi baleji-mpala bende. (Yeshaya 43:10; Yone 17:16; 1 Timote 2:9, 10) Kadi miaba ya bungi, malu anyi bintu bidi bianyishibue bidi bena Kristo mua kusungula bua kuenza bidi mishindu kabukabu. *

Tuepukayi dilenduisha bakuabu

15. Ndîba kayi didi muena Kristo mua kudikanda bua kuenza malu adiye ne bukenji bua kuenza bua disanka dia bakuabu?

¹⁵ Kudi dîyi dikuabu dia mushinga didi Paulo utuleja mu mubelu wende uvuaye mupeshe bena Kristo ba ku Lomo. Imue misangu, muena Kristo udi ne kuondo kende ka muoyo kalongesha bimpe udi mua kubenga bua kuenza bualu kampanda pabu kabuyi nansha bubi to. Mbua tshinyi? Bualu udi umona ne: yeye muenze bualu ebu bidi mua kutatshisha bakuabu. Dîba adi ntshinyi tshitudi ne bua kuenza? Paulo udi wamba ne: ‘Bidi bimpe bua muntu kadi munyinyi anyi kanu maluvu anyi kenji bualu buonso budi muanenu wa mu Kristo ulenduka nabu.’ (Lomo 14:14, 20, 21) Nunku, ‘butudi nabu, tuetu bantu bakole, mbua kutuala matekete a badi batekete, ki mbua kudisankisha  nkayetu. Muntu ne muntu wa munkatshi muetu asankishe muena mutumba nende bua kuvuija malu mimpe kudiye adi mua kumudiundisha.’ (Lomo 15:1, 2) Bikala malu atudi tuenza anyingalaja kuondo ka muoyo ka muena Kristo netu, dinanga dia bana betu neditusake bua kuditeka pa muaba wa bakuabu ne kubenga kuenza anu malu adi mua kunyingalaja bakuabu. Bua muanda eu, tudi mua kuangata tshilejilu tshia maluvu. Bible mmuanyishile muena Kristo bua kunua maluvu pa nnuinu. Kadi bikala dinua dia maluvu difuane kulenduisha muinende, ki mbimpe yeye kusumisha anu bua kuanua amu bualu udi ne bukenji bua kuanua nansha.

16. Mmunyi mutudi mua kuleja ne: tudi tuangata bantu ba muaba utudi tuyisha ne mushinga?

¹⁶ Dîyi edi didi mua kukumbanyina kabidi malu atudi tuenza pambelu pa tshisumbu tshia bena Kristo. Tshilejilu, tudi mua kuikala basombele muaba udi bantu bapite bungi baya mu tshitendelelu tshidi tshibalongesha bua kuangata dituku dimue dia mu lumingu bu dituku dia dikisha. Bua bualu ebu, bua kubenga kulenduisha bena mutumba betu ne kukebela mudimu wa buambi lutatu, netuenze muetu muonso bua kuepuka dienza bualu kampanda dituku adi budi mua kunyingalaja bena mutumba netu. Bualu bukuabu: muena Kristo kampanda mubanji udi mua kuya kusombela muaba udibu dijinga ne bamanyishi ba lumu luimpe udi bantu bikale bapele. Muanetu eu udi mua kuanyisha bua kuangata bena mutumba nende bapiabapia ne mushinga mu dikala divuala bilamba bia mushinga mukese peshi mu dikala ne nsombelu udi kayi uleja ne: mmuena mfranga.

17. Bua tshinyi mbimpe kuangata bakuabu ne mushinga mu malu atudi tusungula bua kuenza?

¹⁷ Bidiku bimpe kutekemena bua “bantu bakole” mu nyuma kushintululabu malu mushindu’eu anyi? Anji elabi meji bua tshilejilu etshi: Wewe upita ne mashinyi mu njila kampanda, umona kumpala kuebe bamue bana banayila pabuipi ne mu njila bafuane kupetakana ne njiwu. Neutungunuke anu ne kuendesha mashinyi ne lubilu lukole ludibu banyishe bua njila au anu bualu udi ne bukenji bua kunyema nanku anyi? Tòo, udi utekesha lubilu bua kulu kututa bana abu ku mashinyi. Imue misangu bitu bikengela kuitaba bua kutekesha lubilu anyi kushintulula lungenyi mu mushindu wa muomumue mu malanda etu ne bena kuitabuja netu nansha ne bantu bakuabu. Tudi mua kuikala tuenza bualu butudi ne bukenji buonso bua kubuenza katuyi tushipa dîyi dia mu Bible nansha dimue. Kadi bikala dienza bualu ebu dinyingalaja  bakuabu anyi dienzela badi ne kuondo ka muoyo katekete bibi, dinanga dia buena Kristo neditusake bua kuikala ne budimu. (Lomo 14:13, 15) Kulama buobumue ne kulubuluja midimu ya Bukalenge mmalu a mushinga wa bungi kupita bukenji butudi nabu bua kuenza malu kampanda atudi basue.

18, 19. (a) Mmunyi mutudi tulonda tshilejilu tshia Yezu mu diangata bakuabu ne mushinga? (b) Mmu bualu kayi mutudi tuetu bonso tuenza malu mu diumvuangana, ne ntshinyi tshituamona mu tshiena-bualu tshidi tshilonda?

¹⁸ Patudi tuenza malu mushindu’eu, tudi tulonda tshilejilu tshidi tshitambe buimpe. Paulo udi wamba ne: ‘Bua Kristo kabidi kakadisankisha, kadi bu muakafundabu ne: Bipendu bia bakadi bakupenda, biakapona pambidi panyi.’ Yezu wakitaba bua kulambula muoyo wende bua bualu buetu. Kakuyi mpata, tuetu petu tudi tuitaba bua kulambula amue a ku malu atudi ne bukenji bua kuenza padibi bipetesha “badi batekete” mushindu wa kutumbisha netu Nzambi mu buobumue. Bulelela, kuleja lungenyi lua kalolo ne lua dianyishila bena Kristo badi ne kuondo ka muoyo katekete tshidibu bobu basue (peshi kuitaba bua kulekela malu atudi tuetu basue katuyi tusunsuma anu bua bukenji butudi nabu bua kuenza) kudi kuleja mutudi ne ‘meji amue [a buena a] Kristo Yezu.’​—Lomo 15:1-5

¹⁹ Nansha mudiku mua kuikala dishilangana mu mushindu utudi tumona malu adi mêyi a mu Bible kaayi makule, mu malu a ntendelelu tudi tuenza malu mu diumvuangana. (1 Kolinto 1:10) Tshilejilu, buobumue bua nunku budi bumuenekela ku mushindu utudi tuangata bantu badi baluisha ntendelelu mulelela. Dîyi dia Nzambi didi dibikila baluishi aba ne: mbenyi, kabidi didi ditubela bua kudimukila ‘dîyi dia [benyi].’ (Yone 10:5) Mmunyi mutudi mua kumanya benyi aba? Mmunyi mutudi ne bua kubangata? Netuandamune nkonko eyi mu tshiena-bualu tshidi tshilonda.

[Mêyi adi kuinshi]

Newandamune munyi?

• Bua tshinyi dishilangana mu mushindu wa dimona malu adi atangila muntu nkayende kadiena ne bua kunyanga buobumue?

• Bua tshinyi tuetu bena Kristo tudi ne bua kuangata bakuabu ne mushinga?

• Ng’imue mishindu kayi lelu itudi mua kutumikila mubelu udi Paulo ufila bua buobumue, ne ntshinyi tshiatusaka bua kuutumikila?

[Nkonko ya dilonga]

[Tshimfuanyi mu dibeji 9]

Mubelu wakafila Paulo bua buobumue uvua ne mushinga wa bungi kudi tshisumbu

[Tshimfuanyi mu dibeji 10]

Bena Kristo badi mu buobumue nansha mudibu bafumine miaba mishilangane

[Tshimfuanyi mu dibeji 12]

Ntshinyi tshidi muendeshi wa mashinyi eu ne bua kuenza mpindieu?