‘Nusambile nenku’

UDI mumanye mêyi a mu disambila dia Tatu wetu anyi? Ndisambila dia tshilejilu divua Yezu Kristo mulongeshe. Yezu wakamba mu muyuki wende muende lumu wa pa mukuna ne: “Nusambile nenku.” (Matayo 6:9, MMM) Bu muvua Yezu mulongeshe disambila edi, bantu ba bungi batu badibikila ne: Disambila dia Mukalenge anyi kabidi ne: disambila dia Tatu wetu.​—Mu Latin, Pater noster.

Bantu ba bungi mbakuate disambila dia Tatu wetu ku muoyo ne badi badiambulula misangu ya bungi, pamu’apa badiambulula dituku dionso. Mu bidimu bidi bishale ebi, bantu ba bungi bambulule disambila edi ne dîyi dikole mu tulasa anyi mu bibilu bikuabu bia patoke. Bua tshinyi bantu ba bungi mbanange disambila dia Tatu wetu edi bikole?

Cyprien mulongeshi wa teoloji wa mu bidimu bia 200 wakafunda ne: “Ndisambila kayi didi mua kuikala dia mu nyuma kupita edi divua Kristo mutupeshe . . . ? Ndisambila kayi ditudi mua kusambila Tatu didi dia bulelela kupita edi divua Muana udi yeye muine muikale Bulelela mutupeshe?”​—Yone 14:6.

Mu kateshisme kende, Ekeleziya Katolike udi wangata disambila dia Tatu wetu bu “disambila dia nshindamenu dia bena Kristo.” Mukanda mukuabu udi uleja ne: disambila edi didi ne muaba munene mu bitendelelu bionso bia mu Bukua-Buena-Kristo, udibikila ne: dimue dia ku “mêyi a nshindamenu a ditabuja dia bena Kristo.”​—The World Book Encyclopedia.

Kadi tshitudi bamanye ntshia ne: bantu ba bungi badi benza disambila dia Tatu wetu  kabatu bumvua tshididi diumvuija to. Tshikandakanda tshikuabu tshia mu Canada tshidi tshiamba ne: “Biwikale uvua kale ni mu tshitendelelu kayi tshia bena Kristo, udi pamu’apa mua kuamba disambila dia Tatu wetu lubilu lubilu kuyi umina mata, kadi udi mua kupeta lutatu bua kudiamba bitekete bitekete ne kumvua tshididi diumvuija.”​—Ottawa Citizen.

Bidiku ne mushinga bua tuetu kumvua masambila atudi tusambila Nzambi anyi? Bua tshinyi Yezu uvua mutupeshe disambila dia Tatu wetu? Didi ne diumvuija kayi buebe wewe? Tuandamunayi nkonko eyi mpindieu.