Tshidi disambila dia Tatu wetu diumvuija buebe wewe

DISAMBILA dia Tatu wetu divua Yezu Kristo mulongeshe bantu mu Muyuki wende wa pa mukuna didi mu Bible mu Matayo nshapita 6, mvese wa 9 too ne ku wa 13. Yezu wakamba kumpala kua kulongeshaye disambila edi ne: “Panudi nusambila, lekelayi kuvudija miaku bu mudi bantu ba bisamba bikuabo benza, bela meji ne: pakulabo miaku mivule, nebabateleje bipite.”​—Matayo 6:7, MMM.

Nunku, bidi bimueneka ne: Yezu kavua musue bua bantu bikale bambulula disambila dia Tatu wetu muaku ku muaku to. Bushuwa, wakambuluila bantu bakuabu disambila edi. (Luka 11:2-4) Kadi miaku idi mu disambila edi mu mukanda wa Matayo mmishilangane kakese ne idi mu mukanda wa Luka. Kabidi, masambila makuabu akenza Yezu ne bayidi bende kaavua ambulula anu mêyi a mu disambila dia tshilejilu edi to.

Bua tshinyi mbafunde Disambila dia Tatu wetu mu Bible? Ku diambuluisha dia tshilejilu etshi, Yezu udi utulongesha mua kuenza masambila adi Nzambi mua kuanyisha. Tudi kabidi tupeta mu disambila edi mandamuna a nkonko minene idi itangila nsombelu wa bantu. Nunku, tukonkononayi tshitupa ne tshitupa tshionso tshia Disambila edi dia Tatu wetu.

Dîna dia Nzambi nganyi?

‘Tatu wetu udi mu diulu, banemeke dîna diebe.’ (Matayo 6:9) Mêyi a ntuadijilu a mu disambila dia tshilejilu edi adi atuambuluisha bua kusemena pabuipi ne Nzambi patudi tumubikila ne: “Tatu wetu.” Anu bu muana udi usemena kudi muledi wende udi mumunange ne umumvuila, tudi mua kusemena kudi Tatu wetu wa mu diulu bamanye ne: mmusue kututeleja. Mukalenge Davidi wakimba ne: ‘Wewe udi umvua milombu, bukua bantu bonso nebufike kuudi.’​—Musambu 65:2.

Yezu udi utulongesha bua kusambila bua dîna dia Nzambi divuijibue dia tshijila anyi dinsantu. Kadi dîna dia Nzambi nganyi? Bible udi wandamuna  ne: ‘Wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’ (Musambu 83:18) Ukadiku mubale dîna dia Yehowa mu Bible anyi?

Bulelela, dîna dia Nzambi Yehowa didi dimueneka misangu yamba kufika ku 7 000 mu mikanda ya ku bianza ya kale ya Bible. Kadi, bamue bakudimunyi mbaye kule bafike too ne ku diumbusha dîna edi mu Bible yabu. Ke bualu kayi mbikumbanyine bua kusambila bua Mufuki wetu avuije dîna diende edi dinsantu anyi dia tshijila. (Yehezekele 36:23) Umue mushindu wa kuenza malu bilondeshile disambila edi ng’wa kutela dîna dia Yehowa patudi tumusambila.

Mamu mukuabu, diende Patricia uvua mu Katolike katshia ku buana buende uvua mumanye mpala ne nyima disambila dia Tatu wetu. Ntshinyi tshiakenzaye pakamuleja Ntemu wa Yehowa mukuabu dîna dia Nzambi mu Bible? Wakamba ukatshila ne: “Tshivua mua kuitaba to! Meme kuangata Bible wanyi, divuamu kabidi. Ke Ntemu au kumbadisha Matayo 6:9, 10 ne kungumvuija ne: dîna dia Nzambi didi diumvuangana ne Disambila dia Tatu wetu. Ngakumvua disanka dia bungi ne kumulomba bua andongeshe Bible.”

Disua dia Nzambi dienzeke pa Buloba

‘Bukalenge buebe bulue. Benze pa buloba muudi musue bu mudibu benza mu diulu.’ (Matayo 6:10) Tshitupa tshia disambila dia Yezu etshi netshikumbane bishi? Bantu ba bungi batu bela meji ne: diulu mmuaba wa ditalala ne bupole. Bible udi wakula bua diulu bu muaba wa Yehowa, muaba wende “wa tshijila ne wa butumbi.” (Yeshaya 63:15) Ke bua tshinyi tudi tusambila ne: disua dia Nzambi dienzeke pa buloba anu bu mudidi dienzeka “mu diulu”! Kadi disua edi nedienzeke kuoku anyi?

Muprofete Danyele wakamanyisha ne: ‘Nzambi wa mu diulu neajadike bukalenge bukuabu budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’ (Danyele 2:44) Mu katupa kîpi emu, Bukalenge bua mu diulu ebu, anyi mbulamatadi eu neabueje ditalala pa buloba bujima ku diambuluisha dia bukokeshi buakane.​—2 Petelo 3:13.

Kusambila bua Bukalenge bua Nzambi bulue ne bua disua diende dienzeke pa buloba kudi kuleja ditabuja didi kadiyi mua kufuishibua bundu. Mupostolo Yone wakafunda ne: ‘Ngakumvua dîyi dikole difuma mu nkuasa wa butumbi diamba ne: Tangilayi, nzubu wa tshilulu wa Nzambi udi munkatshi mua bantu, ne yeye neikale nabu, ne bobu nebikale bantu bende; ne Nzambi muine neikale nabu, neikale Nzambi wabu. Yeye neakupule tshinsonji tshionso ku mêsu kuabu; ne  lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’ Ke Yone kuamba kabidi ne: ‘Yeye udi ushikama pa nkuasa wa butumbi, wakamba ne: Funda; bualu bua mêyi aa adi mêyi a kueyemena ne malelela.’​—Buakabuluibua 21:3-5.

Kusambila bua majinga etu a ku mubidi

Malu avua Yezu muambe mu disambila dia tshilejilu adi aleja ne: patudi tusambila, tudi ne bua kuditatshisha kumpala bua dîna dia Nzambi ne disua diende. Kadi disambila dia tshilejilu didi ditungunuka ne dilomba Yehowa bua majinga etu nkayetu.

Dijinga dia kumpala ndiodi edi: ‘Utupe tshitupa tshia [biakudia] bietu bia buatshia-buatshia lelu.’ (Matayo 6:11) Katuena tulomba bua kupeta bubanji to. Yezu wakatuambila bua kusambila bua ‘tshiakudia tshitudi tukengela ku dituku ku dituku.’ (Luka 11:3, MMV) Mu diumvuangana ne Disambila dia Tatu wetu, tudi mua kulomba Nzambi ne ditekemena dia se: bushuwa neatukumbajile majinga etu a ku dituku ku dituku bituikala bamunange ne tumutumikila.

Kuditatshisha kupitshisha bua mushindu wa kupeta makuta kudi mua kutufikisha ku dilengulula majinga etu a mu nyuma, kutupangisha too ne mua kuenza malu adi Nzambi utulomba. Kadi tuetu bateke ntendelelu wa Nzambi muaba wa kumpala, tudi mua kutekemena tshia bushuwa ne: Yehowa neateleje milombu yetu itudi tumulomba bua kupeta bintu bu mudi biakudia ne bia kuvuala. Yezu wakamba ne: ‘Diambedi kebayi bukalenge [bua Nzambi] ne buakane buende, nunku nebanupe bintu ebi bionso.’ (Matayo 6:26-33) Ki mbipepele bua kukeba buakane bua Nzambi to, bualu tuetu buonso tudi bena mpekatu ne tudi tujinga bua batubuikidile mibi yetu. (Lomo 5:12) Disambila dia Tatu wetu didi kabidi diakula bua bualu ebu.

Kusambila bua batubuikidile mibi

‘Utulekelele mabanza a malu mabi etu bu mutuakumana kulekelela kabidi badi netu mabanza a malu mabi.’ (Matayo 6:12; Luka 11:4) Yehowa udi mua kutubuikidila mibi yetu menemene anyi?

Nansha muvua Mukalenge Davidi wa mu Isalele wa kale muenze mpekatu minene, wakanyingalala e kuyilekelaye, ne kusambilaye ne muoyo mujima ne: ‘Wewe, Mukalenge, udi muimpe ne mutshima webe udi musue kubuikidila bantu mibi yabu; udi muule tente ne luse lujalame kudi bonso badi bakubikila.’ (Musambu 86:5) Bualu ebu budi butukolesha ku muoyo bikole be! Tatu wetu wa mu diulu ‘mmusue kubuikidila’ mibi ya bantu badi bamubila ne banyingalala bua bualu buayi. Anu bu mudibu mua kulekela muntu dibanza dionso, ke mudi Yehowa Nzambi pende mua kutubuikidila mibi yetu yonso.

Kadi Yezu wakaleja tshitudi ne bua kuenza bua Nzambi kutubuikidilaye mibi pakambaye ne: tudi ne bua kubuikidila bakuabu mibi yabu. (Matayo 6:14, 15) Nansha muvua balunda basatu ba Yobo bamukengeshe, yeye wakabafuila luse, kusambilaye too ne bua bualu buabu. (Yobo 42:10) Tuetu tubuikidila bantu badi batuenzela bibi, netusankishe Nzambi ne neatubuikidile petu yetu mibi.

Bu mudi Nzambi mudiakaje bua kutubuikidila mibi, tudi ne bua kuenza muetu muonso bua afike ku dituanyisha. Tudi mua kuenza bualu ebu nansha mutudi bena mpekatu. (Matayo 26:41) Apa kabidi, Yehowa udi mua kutuambuluisha, anu muvua Yezu muleje pakajikijaye disambila diende ne dilomba dia mushinga mukole.

Kusambila bua kuenza malu makane

‘Kutufikishi padi mateyi, kadi utusungile kudi bubi.’ (Matayo 6:13) Yehowa katu utulekela mu mateta anyi utusaka bua kuenza mpekatu to. Dîyi diende didi diamba ne: ‘Nzambi kêna mumanye mua kuteyibua ne malu mabi, ne yeye muine kêna uteya muntu.’ (Yakobo 1:13) Yehowa udi ulekela bua batutete, kadi udi mua kutusungila kudi Mutetshianganyi Munene: Satana Diabolo mukebeshi wa “bubi.”

Mupostolo Petelo wakabela bena Kristo nende ne: ‘Nuikale bapole, nutabale; muena lukuna wenu, Diabolo mene, udi wendakana bu nyama wa ntambue udi ukungula, ukeba bantu ba kudieye.’ (1 Petelo 5:8) Satana wakateta too ne muntu mupuangane Yezu Kristo! Uvua ukeba tshinyi? Uvua ukeba bua Yezu alekele kutendelela Yehowa Nzambi mulelela. (Matayo 4:1-11)  Wewe ujinga kukuatshila Nzambi mudimu, Satana neakebe bua wewe pebe ulekele ntendelelu mulelela!

Diabolo udi mua kusaka bantu badi ku bukokeshi buende bua kutufikisha ku dienza malu adi Nzambi kayi wanyisha to. (1 Yone 5:19) Ke bualu kayi bidi bikengela kuikala ne tshibidilu tshia kulomba Nzambi diambuluisha, nangananga patudi mu diteta didi dinenga. Tuetu tutendelela Yehowa bilondeshile Dîyi diende, neatusungile, neatuambuluishe bua kukandamena Diabolo. Bible udi utuambila ne: ‘Nzambi udi mua kueyemenyibua, kêna witabuja bua nuenu nutetshibue ne diteta didi dinupita bukole.’​—1 Kolinto 10:13.

Kuitabuja Nzambi kudi ne mushinga

Patudi tumanya ne: Tatu wetu wa mu diulu udi uditatshisha bua muntu yonso wa kutudi, bidi bitukolesha ku muoyo bikole be! Muanende Yezu Kristo wakatulongesha too ne mua kusambila. Kakuyi mpata, bualu ebu budi butusaka bua kusankisha Yehowa Nzambi. Mmunyi mutudi mua kumusankisha?

Bible udi wamba ne: ‘Bikalaku kakuyi ditabuja, muntu kêna mua kusankisha [Nzambi]; bualu bua muntu udi ulua kudi Nzambi budiye nabu mbua kuitabuja ne: yeye udiku, ne udi mufutshi wa badi bamukeba.’ (Ebelu 11:6) Mmunyi mutudi mua kupeta ditabuja dia nunku? Bible udi wamba ne: ‘Ditabuja didi difuma ku [bintu bitudi] tumvua.’ (Lomo 10:17) Bantemu ba Yehowa badi ne disanka dia kuyukila malu a mu Bible ne bantu bonso badi basua kukuatshila Nzambi mudimu ne ditabuja dilelela.

Tudi batekemena se: tshiena-bualu etshi ntshikuambuluishe mpindieu bua kumvua bimpe menemene tshidi disambila dia Tatu wetu diumvuija. Udi mua kukolesha ditabuja diebe dia Nzambi wewe utungunuka ne kupeta dimanya dia Yehowa ne dia malu adiye mulaye ‘aba badi bamukeba.’ Suaku ulonga bia bungi pa bidi bitangila Tatu webe wa mu diulu ne malu adiye mulongolole bua malanda ebe nende ikale mimpe kashidi.​—Yone 17:3.

[Lungenyi lunene lua mu dibeji 5]

‘Tatu wetu udi mu diulu, banemeke dîna diebe. Bukalenge buebe bulue. Benze pa buloba muudi musue bu mudibu benza mu diulu. Utupe tshitupa tshia [biakudia] bietu bia buatshia-buatshia lelu. Utulekelele mabanza a malu mabi etu bu mutuakumana kulekelela kabidi badi netu mabanza a malu mabi. Kutufikishi padi mateyi, kadi utusungile kudi bubi.’​—Matayo 6:9-13

[Tshimfuanyi mu dibeji 7]

Yehowa udi ukumbajila bantu badi bamunange majinga abu

[Tshimfuanyi mu dibeji 7]

Nzambi udi utuambuluisha kabidi bua kukandamena Diabolo

[Tshimfuanyi mu dibeji 7]

Anu bu Yobo, tuetu tubuikidila badi batuenzela bibi, Nzambi udi mua kutufuila petu luse