Bumpianyi buudi mua kutekela muoyo

“WEWE mupete mukanda wa kudi muntu kampanda ukuambila ne: kudi bumpianyi buebe muaba kansanga buudi kuyi muanji kuangata, wadimuka! Badi mua kuikala bakushima kudi muena mashimi wa kalanda musenga.”

Edi ke didimuija divuabu bafunde ku Internet kudi Bakontolodi ba Mudimu wa ku Poste ba mu ditunga dia États-Unis. Bua tshinyi didimuija edi didi ne mushinga? Bualu bantu nkama ne nkama bavua bapete mikanda mikale ne mêyi aa: ‘Mulela webe mukuabu mmufue, kadi mmukushile bumpianyi.’ Ke bantu ba bungi kufikabu ku ditumina muena mashimi au dolare 30 anyi mipite apu ivuaye ubalomba bua kumonaye mua kubaleja muaba uvua bumpianyi abu ne mushindu uvuabu mua kubupeta. Diakabi, bakedibua mâyi ku makasa. Bantu bonso bavua bafunde mikanda bakapeta luapolo lua mushindu wa muomumue, ne kakuvua muntu nansha umue wa kudibu uvua mupete tshintu tshia bumpianyi.

Muanda eu udi uleja dijinga dia ku tshilelelu didi nadi bantu dia kupiana tshintu kampanda. Kadi Bible udi wakula bimpe bua bantu badi bafila bumpianyi padiye wamba ne: ‘Muntu muimpe udi ushila bana ba bana bende bumpianyi.’ (Nsumuinu 13:22) Bua kujadika mudibi nanku, Yezu Kristo nkayende wakamba malu atu bantu bamanye bimpe ne banange bikole mu Muyuki wende wa pa Mukuna ne: ‘Badi ne mitshima mipuekele badi ne disanka, bua bobu nebapiane buloba.’​—Matayo 5:5.

Mêyi a Yezu aa adi atuvuluija tshivua Davidi Mukalenge wa Isalele wa kale mufunde ku nyuma wa Nzambi kukadi bidimu bia bungi ne: ‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’​—Musambu 37:11.

Ditekemena dia ‘kupiana buloba’ ki nditekemena dimpe anyi? Kadi tudiku batuishibue ne: ditekemena edi kadiena mushindu mukuabu mulongolola bua kushima bantu anu bu mudibi bileja kulu eku anyi? Eyowa, tudi batuishibue nanku. Bu mudi buloba buikale tshimue tshia ku bifukibua bilenga bia Yehowa, yeye muikale Mubuenji ne Muenabu, udi ne bukenji bua kubufila bu bumpianyi kudi muntu yonso udiye musue kubupesha. Yehowa wakalaya Muanende munanga Yezu Kristo bualu ebu ku butuangaji bua Mukalenge Davidi mu mêyi a tshiprofete aa: ‘Undombe, nenkupe bantu ba bisamba bia bende bu bumpianyi buebe, ne ba ku mfudilu kua buloba bu bantu bebe.’ (Musambu 2:8) Ke bualu kayi mupostolo Paulo wakabikila Yezu ne: muntu ‘wakateka [Nzambi] mupianyi wa bintu bionso.’ (Ebelu 1:2) Ke bua tshinyi tudi ne bua kuikala bashindike bimpe ne: pakamba Yezu ne: bantu badi ne mitshima mipuekele ‘nebapiane buloba,’ uvua wambilamu ne muoyo mujima, ne udi ne bukokeshi bua kukumbaja dilaya diende edi.​—Matayo 28:18.

Kadi lukonko lua mushinga ludi se: Mmunyi muikala dilaya edi mua kukumbana? Miaba yonso itudi tutangila lelu tudi tumona ne:  bena tshikisu ne badisu ke badi batamba kulubuluka ne bapeta bintu bidibu basue. Ntshinyi tshiashala tshikala bena mitshima mipuekele mua kupiana? Bualu bukuabu, mbanyange buloba ne bintu bidi binyangakaja bikuabu, ne biuma bidimu badi benza nabi mudimu anu kudi bena lukuka badi kabayi bamona kule to. Nekuikalaku buloba bukumbane bua bantu kupiana anyi? Tudi tukulomba bua kubala tshiena-bualu tshidi tshilonda bua upete diandamuna ku nkonko yonso eyi ne mikuabu kabidi.

[Tshimfuanyi mu dibeji 3]

Neupete bumpianyi bulelela anyi?