Ki ndinaya patupu to

BANA batu basue kunaya. Kadi mukanda kampanda udi wamba ne: “Ebu ki mbualu budi kabuyi ne mushinga to. Mmuanda udi umueneka wambuluisha muana bua kukolesha dimanya dia bidi bimunyunguluke.” (The Developing Child) Padi bana banaya, badi balonga mua kuenza mudimu ne biumvuilu biabu, bajingulula mudi malu apitakana muaba udibu, ne benza malu pamue ne bakuabu.

Padi bana bakumbaja bidimu binayi anyi bitanu, badi batuadija kuidikija bantu bakole padibu banaya. Yezu wakakula umue musangu bua bana bikale banaya. Bamue bana bakajinga bua kunaya bia bantu benza difesto dia dibaka, bakuabu benza madilu, kadi anu mutu bana benza misangu mivule, bakakokangana bualu bamue ba kudibu bakabenga bua kunaya. (Matayo 11:16, 17) Dinaya dia mushindu’eu didi mua kuambuluisha bua kujadika midimu ya mushinga mu lungenyi lua muana utshidi wenda ukola.

Bana badi mu bimfuanyi ebi badi banaya umue muangate muaba wa mulongeshi wa Bible ne mukuabu muikale bu mulongi. Muaba eu kabena balombola dilonga dia Bible dilelela to, kadi lungenyi lua kuyisha mukenji wa mu Bible ludi mu mitu yabu. Dilongesha edi ndia mushinga, bualu Yezu wakatumina bayidi bende dîyi bua kuvuija bantu bayidi ne kubalongesha mua kutumikila bionso bivuaye mubambile.​—Matayo 28:19, 20.

Baledi badi ne bana badi baleja mudibu balombola malonga a Bible, benza miyuki anyi bayisha ku nzubu ne ku nzubu, badi ne bua kuikala ne disanka. Pa tshibidilu, bana batu bidikija bitubu bamona bantu bakole benza. Manaya a bana a malu a mu Bible adi aleja ne: mbabakoleshe “mu dilongesha ne mu mibelu bia kudi Mfumu.”​—Efeso 6:4, MML.

Yehowa mmusue bua bana bikale pabu benza malu a mu ntendelelu mulelela. Wakambila Mose bua kusangisha ne “bana bakese” pavuabu babala Mikenji. (Dutelonome 31:12) Bana bobu badimona babueja mu malu aa, nebimuenekele pamu’apa mu manaya abu. Nunku muana udi unaya widikija muena mudimu wa Nzambi udi uleja mualuaye muena mudimu wende.