Nkonko ya babadi

Pavua mupostolo Yone mufunde ne: ‘Dinanga diakane tshishiki didi dipata ditshina,’ ‘dinanga diakane tshishiki’ anyi dipuangane didi diumvuija tshinyi? ‘Nditshina’ kayi didi dinanga edi dipata?

Mupostolo Yone wakafunda ne: ‘Kamuena ditshina mu dinanga; kadi dinanga diakane tshishiki didi dipata ditshina, bualu bua ditshina didi ne dikengesha; ne yeye udi utshina kêna muanji kuvuijibua muakane tshishiki mu dinanga.’​—1 Yone 4:18.

Mvese idi pamue ne mvese eu idi ileja ne: Yone uvua wakula bua dikima anyi budikadidi bua kuakula, nangananga bua diumvuangana didi pankatshi pa dinanga dia Nzambi ne budikadidi bua kuakula nende. Tudi mua kumona bualu ebu mu mvese wa 17 mutudi tubala ne: ‘Mu muanda eu dinanga diakakumbajibua kutudi tshishiki, bua tuetu tuikale ne dikima [anyi budikadidi bua kuakula] palua dituku dia dilumbulula.’ Mushindu udi muena Kristo munange Nzambi ne udiye umvua dinanga dia Nzambi, udi ne bukole pa mushindu udiye wakula ne Nzambi ne budikadidi bonso anyi ne ditshina padiye usemena kudiye mu disambila.

Tshiambilu etshi: “dinanga diakane tshishiki” tshidi ne mushinga wa bungi. Patu Bible wakula bua ‘diakane tshishiki’ anyi dipuangane, kêna wakula anu bua bupuangane mu ngumvuilu wabu wa tshishiki to, kadi misangu ya bungi utu wakula bua bupuangane mu mushindu kampanda. Tshilejilu, mu Muyuki wa pa Mukuna Yezu wakamba ne: ‘Nunku nuenu nenuikale bakane [anyi bapuangane] bu mudi Tatu wenu wa mu diulu muakane [anyi mupuangane].’ Yezu uvua wambila bayidi bende ne: bu bobu banange anu bantu bavua babanange, dinanga diabu kadivua mua kuikala dikumbane to, divua mua kuikala dibi anyi dipangile tshintu kampanda. Bavua ne bua kuvuija dinanga diabu dipuangane anyi dikumbane tshishiki pa kunanga too ne baluishi babu. Bia muomumue, pavua Yone mufunde bua “dinanga diakane tshishiki” anyi dipuangane, uvua wakula bua dinanga Nzambi ne muoyo mujima, dikumbane bimpe, dimuenekela mu nsombelu wetu yonso.​—Matayo 5:46-48; 19:20, 21.

Padi muena Kristo usambila Nzambi, mmudimanye bimpe ne: udi muntu mubi, mupange bupuangane. Kadi bikala dinanga diende dia Nzambi ne mushindu udiye umvua mudi Nzambi mumunange bikale bikole menemene, kêna utshina ne: Nzambi neamupishe anyi neabenge kumuteleja to. Kadi, udi wakula ne dikima dionso, uleja bidi mu muoyo wende ne ulomba dilekelela dia mibi yende, mushindamene pa mulambu wa kupikula nawu bantu udi Nzambi mufile ne dinanga dionso ku butuangaji bua Yezu Kristo. Udi ne dishindika dia se: Nzambi udi uteleja masambila ende.

Mmunyi mudi muntu mua ‘kuvuijibua muakane tshishiki mu dinanga’ ne kumusha ditshina dia dipila anyi dia kubenga kumutelejabu? Mupostolo Yone wakamba ne: ‘Muntu utu walama dîyi [dia Nzambi], bulelela, dinanga dia Nzambi diakumana kukumbana munda muende tshishiki.’ (1 Yone 2:5) Tuangatayi tshilejilu: Bu muvua Nzambi mutunange patutshivua bantu babi, kêna mua kutamba kutunanga kabidi patudi tukudimuna mitshima ne ‘tulama dîyi diende’ ne muoyo mujima anyi? (Lomo 5:8; 1 Yone 4:10) Bushuwa, tuetu bashale ne lulamatu, tudi mua kuikala ne dishindika dia buena dia Paulo pakambaye bua Nzambi ne: “Yeye kavua muengeleke Muanende, kadi kumufilaye bualu buetu bonso, mmunyi muabengaye kutupesha bionso pamue nende?”​—Lomo 8:32, MMM.