‘Nunangangane muntu ne muntu’

‘Mu dinanga dia bana benu ba mu Kristo nunangangane muntu ne muntu.’​—LOMO 12:10.

1, 2. Mmalanda kayi avua misionere mukuabu wa matuku etu aa ne mupostolo Paulo badie ne bana babu?

 MU BIDIMU bionso 43 bivua Don muenze mudimu wa bu-misionere ku Extrême-Orient, uvua mumanyike bua musangelu uvuaye nawu bua bantu bavuaye wambuluisha. Pakavuaye upunga ne disama diakalua kumushipa ndekelu wa bionso, bamue bavuaye mulonge nabu Bible kale bakenza luendu lua binunu bia kilometre, kuluabu ku luseke lua bulalu buvuaye bamuambila ne: “Kamsahamnida, kamsahamnida!” Mbuena kuamba ne: “Tuasakidila, tuasakidila!” mu tshiena-Corée. Mushindu uvua Don mubasue bikole uvua mulenge mitshima yabu.

² Kakuena anu tshilejilu etshi tshia Don to. Mu bidimu lukama bia kumpala, mupostolo Paulo wakaleja ne: uvua musue bikole bantu bavuaye ukuatshila mudimu. Paulo wakadifila bua bualu buabu. Nansha muvuaye muntu uvua mutuishibue bikole mu malu avuaye witabuja, uvua kabidi muena malu mimpe ne uditatshisha bua bakuabu ‘bu mudi [mamu] ukuongoloja bana bende.’ Wakafundila tshisumbu tshia mu Tesalonike ne: ‘Bualu bua tuakatamba kunusua, tuakadi ne disanka dimpe bua kunupa, ki ndumu luimpe lua Nzambi nkayalu, kadi mioyo yetu kabidi, bualu bua nuakalua banangibue kutudi.’ (1 Tesalonike 2:7, 8) Pashishe, pakambila Paulo bana babu bena Efeso ne: kabavua ne bua kumumona kabidi, ‘bakadila bikole, bakela Paulo bitupa ku nshingu, bakamutua mishiku.’ (Bienzedi 20:25, 37) Bulelela, malanda avua pankatshi pa Paulo ne bana babu kaavua mimanyine anu pa ditabuja dia muomumue divuabu nadi to. Bavua basuangane bikole muntu ne muntu.

Ditamba kusuangana ne dinanga

3. Mmunyi mudi miaku ya mu Bible idibu bakudimune ne: kusuangana ne dinanga ipetangana?

³ Mu Mukanda wa Nzambi, ditamba kusuangana, luse ne diditeka pa muaba wa muntu mukuabu bidi bipetangana ne ngikadilu mutambe bunene  wa bena Kristo: dinanga. (1 Tesalonike 2:8; 2 Petelo 1:7) Anu bu mudi bibadi bia dibue dimpe dia mbongo, ngikadilu yonso milenga eyi idi ikumbanangana ne ikumbajangana. Idi isemeja bena Kristo umue pabuipi ne mukuabu ne pabuipi ne Tatu wabu wa mu diulu. Ke bualu kayi mupostolo Paulo wakabela bena kuitabuja nende ne: ‘[Dinanga] dikale kadiyi ne lubombo. . . . Mu dinanga dia bana benu ba mu Kristo nunangangane muntu ne muntu.’​—Lomo 12:9, 10.

4. ‘Ditamba kusuangana’ didi diumvuija tshinyi?

⁴ Muaku wa mu tshiena-Greke uvua Paulo muangate bua kuakula bua ‘ditamba kusuangana’ udi ne bitupa bibidi, tshimue tshiumvuija bulunda ne tshikuabu tshiumvuija dinanga dia ku tshilelelu. Anu mudi mushikuluji wa malu a mu Bible wamba, ebi bidi biumvuija se: bena Kristo “badi ne bua kumanyikila ku didifila didi tshimanyinu tshia dîku dia dinanga, didi benamu balamatangane ne bakuatshishangana.” Ke tshiutu umvua bua bana benu bena Kristo balume ne bakaji anyi? Nsombelu wa musangelu ne wa buena-muntu udi ne bua kuikala mu tshisumbu tshia bena Kristo. (Galatia 6:10) Ke bualu kayi Muanda Mulenga Lelu (MML) udi ukudimuna Lomo 12:10 ne: “Nunangangane bikole bu bana ba muntu umue.” Bible mukuabu udi wamba ne: “Nunangangane bu bena muntu.” (MMM) Bulelela, bena Kristo kabena banangangane anu bualu mbimpe kunangangana anyi anu bualu mbenzejibue bua kunangangana to. Tudi ne bua ‘kunangangana mu mitshima yetu bikole ne dinanga dia bana betu ba mu Kristo didi kadiyi ne lubombo.’​—1 Petelo 1:22.

“Bayishibue kudi Nzambi bua kunangangana”

5, 6. (a) Mmunyi mudi Yehowa muyishe bantu bende disuangana dia buena Kristo ku diambuluisha dia mpungilu ya bantu bafumine mu matunga a bungi? (b) Mmunyi mutu malanda adi pankatshi pa bena Kristo enda akola padi matuku enda apita?

⁵ Nansha mudi ‘dinanga dia ba bungi dikepe’ pa buloba lelu, Yehowa udi ulongesha basadidi bende ba matuku etu aa bua “kunangangana.” (Matayo 24:12; 1 Tesalonike 4:9) Mpungilu ya Bantemu ba Yehowa ya bantu bafumine mu matunga a bungi itu bikondo bia pa buabi bia kupeta dilongesha edi. Mu mpungilu eyi, Bantemu ba miaba idiyi yenzekela batu bakidila bana babu ba mu matunga a kule, ne ba bungi batu babaladike mu nzubu yabu. Mu mpungilu mukuabu uvua muenzeke matuku mashale aa, bamue bakafumina mu matunga mutu bantu badilaminyina bua kuleja disanka diabu patoke. Muena Kristo kampanda uvua muakidile bamue bana betu kuende udi wamba ne: “Pakafika bana betu aba bavua balue kubuela mu mpungilu, bavua ne buôwa bua bungi ne kabayi bakula to.” Kadi kunyima kua matuku asambombo patupu pakalayanganabu, bobu ne muanetu eu uvua mubakidile bakelangana mu bitupa benda badila. Bakalejangana dinanga dia buena Kristo dikalabu kabayi mua kupua muoyo to. Kuakidila bana betu bena Kristo, nansha bobu bikale ba muaba kayi, kudi mua kupetesha udi wakidilangana ne udibu bakidila disanka.​—Lomo 12:13.

⁶ Malu a mu mpungilu aa adi enza disanka, kadi nansha nanku, malanda adi ashemakana padi bena Kristo basadila Yehowa pamue mu lupolo kampanda lua tshikondo. Tuetu bamanye bana betu bimpe, tudi mua kutamba kuanyisha ngikadilu yabu milenga bu mudi dikala bena malu malelela, dikala bantu ba kueyemena, bena lulamatu, bena malu  malenga, bena kalolo, badi bangata bakuabu ne mushinga, baditeki pa muaba wa bakuabu ne bena dinanga. (Musambu 15:3-5; Nsumuinu 19:22) Mark uvua muenze mudimu wa bu-misionere mu Afrike wa ku Est wakamba ne: “Dienza mudimu pamue ne bana betu didi ditufikisha ku didia malanda adi kaayi mua kukoseka.”

7. Ntshinyi tshitudi ne bua kuenza bua tuetu kuikala ne disuangana dia buena Kristo mu tshisumbu?

⁷ Bua kudia ne kulama malanda a buena aa mu tshisumbu, bana betu badi ne bua kusemena umue pabuipi ne mukuabu. Patudi tubuela mu bisangilu bia bena Kristo pa tshibidilu, tudi tukolesha malanda etu ne bana betu ba balume ne ba bakaji. Patudi tuya mu bisangilu ne tudifilamu kumpala, munkatshi ne kunyima kuabi, tudi tukankamijangana ne tusakangana ‘ku dinanga ne ku dienza dia bienzedi bimpe.’ (Ebelu 10:24, 25) Mukulu mukuabu wa mu États-Unis udi wamba ne: “Ndi mvuluka ne disanka dionso ne: pantshivua muana, bena dîku dietu bavua anu ba ndekelu ku diumbuka ku Nzubu wa Bukalenge, bavua bashala mutantshi mule bayikila miyuki mimpe idi ikolesha.”

Bidiku bikukengela ‘kudiundishibua mu mutshima webe’ anyi?

8. (a) Ntshinyi tshivua Paulo musue kuamba pakabelaye bena Kolinto bua ‘kudiundishibua mu mitshima’? (b) Ntshinyi tshitudi mua kuenza bua kukolesha dinanga munda mua tshisumbu?

⁸ Bua tuetu kulejangana disuangana edi menemene, tudi ne bua ‘kudiundishibua’ mu mitshima yetu. Mupostolo Paulo wakafundila tshisumbu tshia mu Kolinto ne: ‘Mitshima yetu idi midiundishibue. Kanuena nukepeshibua munda muetu.’ Paulo wakababela bua bobu pabu ‘badiundishibue mu mitshima yabu.’ (2 Kolinto 6:11-13) Udiku pebe mua ‘kudiundishibua’ mu disuangana diebe anyi? Kuena ne bua kuindila bua bakuabu batuadije bobu to. Mu mukanda uvua Paulo mufundile bena Lomo, wakaleja mushinga wa ditamba kusuangana pamue ne mubelu eu wakafilaye wa se: ‘Mu bunême muntu ne muntu ateke mukuabu kumpala.’ (Lomo 12:10) Bua kuleja bakuabu bunême, udi ne bua kudianjila kubela muoyo mu bisangilu. Udi kabidi mua kubalomba bua baye kukufila mu mudimu wa buambi anyi bua kulongolola nabu tshisangilu kampanda. Dienza malu aa didi dikolesha disuangana bikole menemene.

9. Mmalu kayi adi bamue benze bua kudiabu bulunda bukole ne bena Kristo nabu? (Fila bilejilu bia malu a muetu munemu.)

⁹ Bena mu mêku ne bantu bakuabu badi mu tshisumbu badi mua ‘kudiundishibua mu mitshima yabu’ pa kukumbulangana, pamu’apa pa kudia biakudia pamue, ne pa kuenza malu kampanda malenga pamue. (Luka 10:42; 14:12-14) Hakop utu ulongolola imue misangu bua kuyabu kuendakana muaba kampanda ne bakuende mu tusumbu tukese ne biakudia. Udi wamba ne: “Bantu ba milongo yonso batu baya netu, nansha baledi badi badikoleshila bana nkayabu. Muntu yonso utu upingana kumbelu ne malu mimpe adiye muvuluke, ne bonso batu badimona pabuipi ne bakuabu.” Tuetu bena Kristo tudi ne bua kudienzeja bua kubenga kuikala anu bena kuitabuja patupu, kadi kabidi balunda balelela.​—3 Yone 14.

10. Ntshinyi tshitudi mua kuenza patudi bualu ne bana betu bena Kristo?

¹⁰ Kadi minga misangu bilema bia bakuabu bidi mua kutupangisha mua kudia nabu bulunda ne mua kutamba kusuangana nabu. Ntshinyi tshitudi mua kuenza? Tshia kumpala, tudi mua kulomba Nzambi bua atuambuluishe bua kudia bulunda ne bana betu. Disua dia Nzambi ndia se: basadidi bende bikale bumvuangana bimpe, ne neandamune masambila menza ne muoyo mujima a nunku. (1 Yone 4:20, 21; 5:14, 15) Tudi kabidi ne bua kuenza malu mumvuangane ne masambila etu. Ric, musadidi wa Nzambi muena ngendu wa mu Afrike wa ku Est, udi uvuluka muvuaye mutate bua kusomba bimpe ne muanetu kampanda muena malu makole ne uvua kabidi wakula ne luonji. Ric udi wamba ne: “Pamutu pa meme kuepuka muanetu au, ngakapangadika bua kumumanya bimpe. Ngakalua kumvua ne: tatuende wa muanetu eu uvua upesha  bana manyoka ne dîsu dikole menemene. Pangakamanya muvua muanetu eu muluangane bua kutantamena nsombelu eu uvuaye mupete ku buana ne mushindu uvuaye mulue kushintuluka, ngakabanga kumuanyisha. Nunku tuakalua balunda ba dikema.”​—1 Petelo 4:8.

Unzuluila bakuabu mutshima webe!

11. (a) Ntshinyi tshitudi ne bua kuenza bua tuetu kukolesha disuangana mu tshisumbu? (b) Bua tshinyi dishala badilaminyine kumpala kua bakuabu didi mua kutukebela ntatu mu nyuma?

¹¹ Lelu bantu ba bungi batu basomba kabayi bakuata bulunda ne muntu nansha umue to. Ebu mbualu bua dibungama be! Kabiena ne bua kuikala nunku mu tshisumbu tshia bena Kristo nansha. Dinanga dia bana betu dia bushuwa kadiena dishikila anu pa diyukila ne bukalanga to; peshi kadiena diumvuija disankidila bakuabu mu mushindu munekesha. Kadi tudi ne bua kuikala badiakaje bua kunzulula mutshima wetu anu muvua Paulo munzuluile bena Kolinto mutshima, ne kuleja bena kuitabuja netu ne: tudi tuditatshisha menemene bua diakalenga diabu. Nansha mutu muntu yonso kayi muledibue ne meji a bulunda anyi kayi muikale wakula bikole, kutamba kudilaminyina kudi mua kutukebela ntatu. Bible udi utudimuija ne: ‘Udi udipandulula kudi banga bantu udi ukeba anu bualu budiye musue, ne udi upatula mêyi a tshiji tshikole bua kupidia meji makane.’​—Nsumuinu 18:1.

12. Bua tshinyi diyukidishangana dimpe didi diambuluisha bua kudia malanda mashême mu tshisumbu?

¹² Diyukidishangana dilelela ke didi diambuluisha bua kuikale bulunda bulelela. (Yone 15:15) Tuetu bonso tutu dijinga ne balunda batudi mua kukuatshila etu onso a munda. Kabidi, patudi tumanyangana bimpe menemene, tudi tukumbajilangana majinga etu bipepele. Patudi tuditatshisha bua majinga a bakuabu mushindu‘eu, tudi tukolesha disuangana mu tshisumbu, ne netumone mudi mêyi a Yezu aa akumbana: “Disanka dia kupa ndipite dia kupeta.”​—Bienzedi 20:35, MMM; Filipoi 2:1-4.

13. Ntshinyi tshitudi mua kuenza bua kuleja ne: tudi basue bana betu bulelela?

¹³ Bua disuangana dietu kutambadi kuambuluisha bakuabu, tudi ne bua kudileja. (Nsumuinu 27:5) Padi disuangana dietu dikale dilelela, mpala wetu udi mua kuleja bualu ebu ne bidi mua kusaka mutshima wa bakuabu bua kuikala ne disanka. Muena meji wakafunda ne: “Ntangidilu wa musangelu udi usankisha mutshima.” (Nsumuinu 15:30) Malu menza ne meji adi kabidi akolesha ditamba kusuangana. Nansha mudi muntu nansha umue kayi mua kusumba disuangana dilelela, dipa difila ne mutshima mujima didi mua kuikala ne mushinga wa bungi. Karte ka tshilongo kafundapu mêyi kampanda, mukanda mufunda nansha ‘dîyi diamba mu tshikondo tshiakane,’ bionso ebi bidi mua kuleja mutudi batambe kusuangana. (Nsumuinu 25:11; 27:9) Tuetu bamane kudia bulunda ne bakuabu,  tudi ne bua kubulama mu ditungunuka ne kulejangana disuangana didi kadiyi dia kudisankisha tuetu nkayetu. Nangananga mu tshikondo tshia dikenga, netujinge bua kuikala pabuipi bua kuambuluisha balunda betu. Bible udi wamba ne: ‘Mulunda utu wananga mu bikondo bionso, muanetu utu waleja bulela mu tshikondo tshia dikenga.’​—Nsumuinu 17:17.

14. Ntshinyi tshitudi mua kuenza bikala muntu kampanda kayi umueneka musue bua tuetu kudia nende bulunda?

¹⁴ Bushuwa, katuena ne bua kuela meji ne: tudi mua kulamatangana ne muntu yonso mu tshisumbu. Nekuikale anu bamue batudi tudimona balamatangane nabu bikole kupita mutudi ne bakuabu. Nunku padi muntu umueneka kayi muikale nebe luya bu muudi musue, kuambi diakamue ne: kudi bualu pankatshi pebe nende to. Ne kukebi bua kuenza ku bukole bua wewe kudia malanda mashême ne muntu au to. Wewe udienzeja bua kuleja muntu eu bulunda, udi pamu’apa mua kufika ku didia nende bulunda bukole mu matuku atshilualua.

“Udi unsankisha bimpe”

15. Dielangana anyi dibenga kuelangana kalumbandi didi dienzela bakuabu tshinyi?

¹⁵ Elabi meji bua disanka divua Yezu ne bua kuikala mumvue pakatambulaye, ne yeye kumvua dîyi difuma mu diulu diamba ne: “Udi unsankisha bimpe.” (Mâko 1:11) Mêyi aa a dianyisha avua ne bua kuikala makoleshe dishindika divua nadi Yezu dia se: Tatuende uvua mumusue. (Yone 5:20) Diakabi, bamue kabatu banji kumvua bantu badibu banemeka ne badibu banange babela kalumbandi mushindu’eu to. Ann udi wamba ne: “Bansonga ba bungi bu meme kabatu mu ntendelelu umue ne bena mu mêku abu to. Ku nzubu tutu tumvua anu mêyi a ditubipisha nawu. Ebi bitu bitubungamija bikole.” Kadi padibu babuela mu tshisumbu tshia bena Kristo, badi bumvua musangelu wa dîku dia mu nyuma didi dikuatshishangana ne diambuluishangana dienza ne batatu ne bamamu ne bana betu ba balume ne bana betu ba bakaji ba mu ditabuja.​—Mâko 10:29, 30; Galatia 6:10.

16. Bua tshinyi kubipisha bakuabu kakuena kuambuluisha?

¹⁶ Imue miaba, baledi, bantu bakulumpe ne balongeshi kabatu ne tshibidilu tshia kuanyisha aba batshidi bapuekele ne muoyo mujima, bualu badi bela meji ne: dibanyisha nunku didi mua kubela mulu anyi kubapesha lutambishi. Meji a mushindu’eu adi mua kunyanga too ne mêku a bena Kristo ne tshisumbu. Bua muyuki kampanda peshi bualu bukuabu budi nsonga muenze, bantu bakulumpe badi mua kuamba ne: “Bivua bimpe, kadi udi mua kulengeja kupitshisha apu!” Anyi mu mushindu mukuabu badi mua kuleja mudi nsonga kayi muenze bualu kampanda bimpe. Padibu benza nunku, ba bungi badi bela meji ne: badi bakankamija bansonga bua kudienzejabu ne bukole buabu bonso. Kadi ngenzelu wa nunku utu misangu ya bungi upatula bipeta bibi, bualu bansonga badi mua kupingana tshianyima anyi kudimona bu kabayi bakumbane.

17. Bua tshinyi tudi ne bua kukeba mpunga ya kuela bakuabu kalumbandi?

¹⁷ Kadi katuena ne bua kuela muntu kalumbandi anu patudi tujinga kumupesha mubelu nansha. Diela muntu kalumbandi ne muoyo mujima didi dikolesha ditamba kusuangana mu dîku ne mu tshisumbu, ne didi dikankamija bansonga bua kulomba mibelu kudi bana betu ba balume ne ba bakaji bakadi bamonemone malu. Nunku pamutu pa  kulekela bibidilu bia muaba utudi bitulombola mu mushindu utudi tuenzela bakuabu malu, ‘tudivuadikayi muntu mupiamupia wakafukibua mu tshifuanyikiji tshia Nzambi ne buakane ne tshijila bidi bifuma ku malu malelela.’ Ikala welangana kalumbadi mutu Yehowa welangana kalumbandi.​—Efeso 4:24.

18. (a) Bansonga, mmunyi munudi ne bua kuangata mibelu ya kudi bantu bakulumpe? (b) Bua tshinyi bantu bakulumpe batu ne budimu bua mushindu udibu bafila mibelu?

¹⁸ Ku luseke lukuabu, nuenu bansonga kanuambi ne: padi bantu bakulumpe banupesha mibelu mbanukine to. (Muambi 7:9) Tòo, kabiena nanku to! Badi pamu’apa banupeshayi bualu badi banujingila diakalenga ne mbanusue bikole. Biobi kabiyi nanku, bua tshinyi badi mua kuditatshisha bua kuakula nenu bua bualu budibu banubelela abu? Bu mudi bantu bakulumpe, nangananga bakulu, bamanye bukole butu nabu mêyi, batu misangu mivule belangana meji ne basambila munkatshi mua mêba a bungi kumpala kua kufila mibelu, bualu tshipatshila tshiabu tshidi amu kuambuluisha.​—1 Petelo 5:5.

‘Yehowa mmuule tente ne dinanga’

19. Bua tshinyi aba badi bapete malu adi mababungamije badi mua kunyemena kudi Yehowa bua abakuatshishe?

¹⁹ Bipeta bibi bidi bamue mua kuikala bapete pavuabu benzele bakuabu malu mimpe bua kubaleja dinanga dikole bidi mua kuikala bibapeshe meji a se: dileja dinanga didi anu mua kubabungamija kabidi. Bidi bibalomba dikima ne ditabuja dikole bua bobu kunzuluila bakuabu mutshima wabu tshiakabidi. Kadi kabena ne bua kupua muoyo ne: Yehowa ‘kêna netu kule kudi muntu ne muntu.’ Udi utulomba bua kusemena pabuipi nende. (Bienzedi 17:27; Yakobo 4:8) Udi kabidi mumanye mutudi tutshina malu adi mua kutubungamija, ne udi utulaya ne: neikale netu pabuipi bua kutukuatshisha. Davidi mufundi wa Misambu udi utujadikila ne: ‘Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majiya.’​—Musambu 34:18.

20, 21. (a) Ntshinyi tshidi tshituleja ne: tudi mua kudia malanda mashême ne Yehowa? (b) Ntshinyi tshidi tshikengela kuenza bua kudia bulunda ne Yehowa?

²⁰ Bulunda bukole ne Yehowa ke malanda a mushinga mukole menemene atudi mua kudia. Kadi kudi mushindu wa kudia malanda a mushindu’eu anyi? Eyowa. Bible udi umvuija muvua balume ne bakaji ba malu makane badimona pabuipi menemene ne Tatu wetu wa mu diulu. Mêyi abu a musangelu mmashale malama bua kutupesha dishindika dia se: tuetu petu tudi mua kusemena pabuipi ne Yehowa.​—Musambu 23, 34, 139; Yone 16:27; Lomo 15:4.

²¹ Muntu yonso udi mua kukumbaja malu adi Yehowa ulomba bua kudia nende bulunda. Davidi wakakonka ne: ‘Yehowa, mmuntu kayi neashikame mu nzubu webe wa ntenta? Nyeye udi wenda mu buakane, udi wenza malu makane, udi wamba mêyi malelela mu mutshima wende.’ (Musambu 15:1, 2; 25:14) Patudi tumona mudi kusadila Nzambi kupatula bipeta bimpe ne kumusaka bua kutuludika ne kutukuba, tudi tufika ku dimanya ne: ‘[Yehowa] udi muule tente ne dinanga.’​—Yakobo 5:11.

22. Mmalanda a mushindu kayi adi Yehowa musue bua basadidi bende bikale nawu?

²² Bushuwa, tudi ba diakalenga bua mudi Yehowa ujinga kudia malanda a sungasunga a mushindu’eu ne bantu bapange bupuangane! Nunku katuenaku ne bua kulejangana mutudi batambe kunangangana anyi? Bua diambuluisha dia kudi Yehowa, yonso wa kutudi udi mua kuleja ne bobu kumuleja pende dinanga didi tshimanyinu tshia buena-muntu buetu bua bena Kristo. Mu Bukalenge bua Nzambi, muntu yonso wikala pa buloba neikale mua kumona dinanga edi kashidi ne tshiendelele.

Udi mua kumvuija anyi?

• Nnsombelu wa mushindu kayi udi ne bua kuikala mu tshisumbu tshia bena Kristo?

• Mmunyi mudi yonso wa kutudi mua kuambuluisha bua ditamba kusuangana kuikaladi mu tshisumbu?

• Mmunyi mudi dielangana kalumbandi ne muoyo mujima dikolesha disuangana dia bena Kristo?

• Mmunyi mudi ditamba kutusua dia Yehowa ditukolesha ne ditukuatshisha?

[Nkonko ya dilonga]

[Tshimfuanyi mu dibeji 15]

Dinanga munkatshi mua bena Kristo kadiena patupu muanda udibu benzejibue bua kuenza to

[Bimfuanyi mu mabeji 16, 17]

Udiku mua ‘kudiundisha’ disuangana diebe anyi?

[Tshimfuanyi mu dibeji 18]

Utu upepejangana anyi ukankamijangana?