Udi windila Yehowa mu mushindu muimpe anyi?

BANTU ba bungi lelu kabatu ne lutulu lua kuindila muntu kampanda anyi tshintu kansanga to. Pabi, Mukanda wa Nzambi udi ubela basadidi ba Nzambi bua kumanya mua ‘kuindila.’ Muprofete Mika uvua mushilangane ne bantu ba mu tshikondo tshiende, bualu wakamba ne: ‘Nengindile Nzambi wa lupandu luanyi.’​—Mika 7:7; Muadi 3:26.

Kadi kuindila Yehowa kudi kumvuija tshinyi? Mmunyi mudi muena Kristo ne bua kuindila Nzambi? Kudi mushindu muimpe ne mubi wa kuindila anyi? Bualu buakafikila muprofete Yona wa mu bidimu bia 800 kumpala kua bikondo bietu ebi budi butupesha dilongesha pa muanda eu.

Kuindila kubi

Yehowa Nzambi wakatuma Yona bua kuya ku Ninewe (tshimenga tshikulu tshia Bukalenge bua bena Ashû) bua kuyisha bantu bavuamu. Ninewe uvua mumanyike bu ‘musoko uvua umatshisha mashi a bantu panshi’ bualu muvua luonji ne tshikisu bitule bipuwe; bafundi ba Malu a kale ne bakebuludi badi pabu bajadika bualu ebu. (Nahuma 3:1) Kumpala, Yona wakateta bua kubenga kuya ku Ninewe, kadi Yehowa wakenza muende muonso bua muprofete eu kufikaku.​—Yona 1:3–3:2.

‘Yona mumane kuenda luendu lua dituku dimue munda mua musoko, wakabanga kuela dîyi ne: Papita matuku makumi anayi, nebabutule Ninewe.’ (Yona 3:4) Mudimu wa Yona wakapatula bipeta bilenga bia dikema bualu ‘bena Ninewe bakitabuja mêyi a Nzambi; bakajila biakudia, bakaluata bivualu bikayabala, kubangila kudi banême too ne kudi bapuekele.’ (Yona 3:5) Bu mudi Yehowa muikale Nzambi udi kayi ‘musue [bua muntu nansha] umue ajimine, kadi musue bonso balue kukudimuna mitshima yabo,’ wakabenga kubutula tshimenga atshi.​—2 Petelo 3:9.

Ntshinyi tshiakenza Yona? Bible udi wamba ne: “Kadi muanda eu wakafikisha Yona munda bikole, ne yeye wakakuatshika tshiji.” (Yona 4:1) Mbua tshinyi? Misangu mikuabu Yona uvua mua kuikala mumone ne: dipanga kukumbana dia mukenji wa dibutuka dituku divuaye mulaye divua mua kumunyangila lumu. Wakabanga kuditatshisha bikole bua lumu luende lua buprofete kupita muvuaye uditatshisha bua luse ne lupandu lua bakuabu.

Yona kakalekela mudimu wende wa buprofete to. Kadi wakindila bua ‘kumonaye ne: mmalu kayi akuata musoko.’ Bulelela, wakapeta lungenyi lubi luakamufikisha ku dimanyika mudimu wende bua kuindila ne kumona tshienzekela musoko. Pakamonaye ne: malu kaavua enzeka muvuaye mutekemene, wakenza katanda, kusombaye muinshi mua dileji bua kuindila ne kumona ne dibungama dionso tshivua  ne bua kuenzeka. Kadi Yehowa kakanyisha lungenyi lua Yona to, ke kumululamijaye ne dinanga dionso.​—Yona 4:5, 9-11.

Yehowa udi ne lutulu bua tshinyi?

Nansha muvua bena mu Ninewe banyingalale ne bapanduke, bakapingana mu malu abu mabi. Yehowa wakamanyisha dibutuka dia tshimenga etshi mukana mua muprofete Nahuma ne mua muprofete Sefanya. Pavua Yehowa wakula bua ‘musoko udi umatshisha mashi a bantu panshi,’ wakamba ne: uvua ne bua kubutula Ashû ne kushiya Ninewe tshipela. (Nahuma 3:1; Sefanya 2:13) Mu tshidimu tshia 632 kumpala kua bikondo bietu ebi, bakabutula Ninewe musangu umue bua kashidi.

Bia muomumue, bantu ba lelu badi ne dibanza dinene dia mashi kupita divua nadi Ninewe wa kale. Bua bualu ebu ne bua malu makuabu, Yehowa mmupangadije ne: ndongoluelu wa malu eu mubi atue ku nshikidilu kuende mu “dikenga dinene” ditu kadiyi dianji kuenzeka.​—Matayo 24:21, 22.

Kadi Yehowa mmuanji kuindija dibutuka edi bua bantu ba muoyo muimpe, bafuane aba bakakudimuna mitshima mu Ninewe, bakudimune mutshima bua bapande. Mupostolo Petelo wakakula bua lutulu lua Nzambi mu mêyi aa: ‘Mukalenge kêna ujanguluka bua kujikijaye milayi yende, bu mudi bakuabu babala dijanguluka; kadi udi nenu lutulu, kêna musue umue wenu ajimine, kadi udi musue bonso balue kukudimuna mitshima yabu.’​—2 Petelo 3:9, 10, 13.

Kuindila kuimpe

Petelo udi wamba kabidi ne: ‘Bualu bua bintu ebi bionso bidi bijimina nunku, bunudi nabu mbua kuikala bantu ba mushindu kayi mu bienzedi bia tshijila ne bia [ditshina dia] Nzambi, panudi nutekemena [anyi nuindila] ne panudi nuendesha lukasa dilua dia dituku dia Nzambi?’ (2 Petelo 3:11, 12) Umanye ne: patudi tutekemena anyi tuindila dituku dia Yehowa, tudi ne bua kuikala ne ‘bienzedi bia tshijila ne bia ditshina dia Nzambi,’ tuambe ne: mbimpe kuenza bualu anyi mudimu kampanda pamutu pa kuvunga maboko.

Eyowa, dindila dimpe didi ne dieyemena dikole dia ne: dituku dia Yehowa nedilue anu pa dîba didi Yehowa musue. Ditabuja dia nunku didi difikisha muntu ku dikala ne bienzedi bia tshijila ne bia ditshina dia Nzambi. Nangananga diyisha dia lumu luimpe lua Bukalenge bua Nzambi ke tshimue tshia ku bienzedi bidi ne mushinga wa bungi. Yezu wakashiya tshilejilu tshilenga mu diyisha lumu luimpe, wakambila bayidi bende bela manyi ne: ‘Nuele mikaya yenu, minda yenu ikale itema; nuenu kabidi nuikale bu bantu badi batekemena mfumu wabu, udi ufuma kuakudiaye bidia bia dibanji; pafikaye, pakokolaye ku tshibi, nebamunzuluile lubilu. Bapika aba, biabasangana mfumu wabu bamutekemena, nebikale ne disanka.’​—Luka 12:35-37.

Bapika ba mu bidimu lukama bia kumpala bavua ‘bela mikaya’ pavuabu babandisha mizabi yabu too ne mu tshimono, bayisuikila ku mukaba bua kuenza mudimu mukole bimpe. Nunku, muena Kristo udi ne bua kuikala wenza midimu mimpe ne lukunukunu, ne bukole. Udi ne bua kuluisha tshilele tshionso tshia ‘kujanguluka’ mu midimu ya mu nyuma, bu mudi misangu mikuabu kujikijila bukole buende ku  manaya anyi ku dikeba dia bintu bia ku mubidi. Kadi, udi ne bua kuikala ‘ukumbaja mudimu wa Mukalenge misangu yonso’ mu dindila dituku didi dikuatshisha buôwa dia Yehowa.​—Lomo 12:11; 1 Kolinto 15:58.

Tuenze mudimu mu dindila

Bantemu ba Yehowa badi benza mudimu padibu bindila dituku dia Yehowa. Tshilejilu, mu tshidimu tshia mudimu tshia 2003, bavua bapitshishe mêba 3 383 000 dituku dionso mu diyisha dia dîyi dia Yehowa. Tshinka ne: muntu nkayende uvua mua kuikala muyishe bidimu 386 bijima kayi wikisha bua kukumbaja mudimu uvuabu benze mu dituku dimue eu!

Nansha nanku, mbimpe tudiebeje ne: ‘Meme, ndi ngindila Yehowa mushindu kayi?’ Yezu wakafila mufuanu uvua uleja muvua bena Kristo bela manyi ba lulamatu ne bua kuenza mudimu. Wakakula bua bapika basatu ne: ‘Yeye [mukalenge] wakapa mukuabu ntalanta itanu, mukuabu ntalanta ibidi, mukuabu ntalanta umue, muntu bu mu lungenyi luende muntu bu mu lungenyi luende; wakaya ku luendu. Wakadi ne ntalanta itanu wakaya lukasa, wakenda nayi mushinga, wakapeta minga ntalanta itanu. Nunku wakadi ne ntalanta ibidi wakapeta minga ibidi. Kadi wakadi ne ntalanta umue wakaya biende, wakimba tshina mu buloba, wakasokoka ntalanta wa mukalenge wende. Pakalepa musangu mule, mukalenge wa bantu aba wakalua, wakabala nabu bintu.’​—Matayo 25:15-19.

Bapika bonso basatu bavua bindile dipingana dia mukalenge. Pakafika mukalenge, wakambila bapika babidi bavua benze mudimu eku bamuindile ne: “Mbimpe, muena mudimu wanyi muakane ne wa bulamate.” Kadi, bakenzela mukuabu uvua muindile muvunge maboko malu mukuabu mushindu. Mukalenge wakamba ne: ‘Muena mudimu wa tshianana eu, musumbulayi pambelu mu mîdima.’​—Matayo 25:20-30, MMM.

Nansha mudi mufuanu eu wakula bua bena Kristo bela manyi, tuetu bonso tudi mua kupetelaku dilongesha, nansha tuetu bikale ne ditekemena dia kuya mu diulu anyi kushala pa buloba. Mukalenge Yezu Kristo mmutekemene bua yonso wa kutudi enze mudimu wende ne lukunukunu padiye muindile dilua diende mu dituku dinene dia Yehowa. Udi wanyisha mudimu wa muntu ne muntu bilondeshile ‘lungenyi luende’ ne nsombelu wende. Netuikale ne disanka dia bungi dia kumvua Mukalenge utuambila  patuafika ku ndekelu kua dindila dietu ne: “Mbimpe!”

Lutulu lua Mukalenge wetu ndupandu

Netuenze tshinyi bikala ndongoluelu wa malu mubi eu munenge kupita mutuvua tuela meji anyi tutekemena? Ndongoluelu eu ki mmunenge tshianana to. Mupostolo Petelo wakafunda ne: ‘Numanye ne: Lutulu lua Mukalenge wetu ndupandu.’ (2 Petelo 3:15) Kuikala ne dimanya dijalame dia disua dia Nzambi ne kumanya ne: katuena ne mushinga kupita dikumbana dia disua diende nekutuambuluishe bua kuikala ne lutulu anu bu mudi Yehowa muikale ne lutulu bua ndongoluelu eu wa kale.

Yakobo uvua pende mufundi wa Bible wakafila tshilejilu bua kukankamija bena Kristo bua kuikala ne lutulu. Wakafunda ne: ‘Monayi tshidime udi windila mamuma a mushinga mukole a pa buloba, muikale ne lutulu bua bualu buawu too ne palokelawu mvula ya diambedi ne yalua kunyima. Nuikale ne lutulu kabidi, nujadike mitshima yenu, bualu bua dimueneka dia Mukalenge diakulua pabuipi.’​—Yakobo 5:7, 8.

Yehowa Nzambi ki mmusue bua tuetu kupungila anyi kulekela mudimu patudi tuindila to. Mmutupeshe mudimu, ne udi usanka kabidi patudi tuwenza ne tshisumi tshionso mu dindila dituku diende. Mmusue tuikale munkatshi mua bantu bavua mupostolo Paulo muleje mu mukanda uvuaye mutumine bena Ebelu muakafundaye ne: ‘Tudi basue muntu ne muntu wa munkatshi muenu aleje disuminyina diodimue bua kupeta tshiuwidi tshia ditekemena too ne ku nshikidilu; bua kanulu bienu bapungidi, kadi nulue bidikiji ba badi bapiana milayi bua ditabuja ne lutulu.’​—Ebelu 6:11, 12.

Nunku, katupungidi nansha. Kadi, malanda etu ne Yehowa Nzambi, ditabuja dietu mu mulambu wa Yezu wa kutupikula nawu ne ditekemena ditambe bulenga dia matuku atshilualua bikale bitupesha bukole mu nsombelu wetu. Anu bu ‘bena mudimu bakane ne ba bulamate’ ba mu mufuanu wa Yezu, tudileje bakumbanyine kalumbandi ne difutu pa kutungunuka ne kuenza mudimu wa kutumbisha nawu Nzambi. Tuidikije mufundi wa Misambu wakatumbisha Nzambi ne: ‘Kadi meme panyi nengikale ne ditekemena [anyi nengindile] misangu yonso, nennanukile kukutumbisha musangu ne musangu.’​—Musambu 71:14.

[Tshimfuanyi mu dibeji 21]

Yona wakindila ne tshiji bua kumona tshivua ne bua kufikila Ninewe

[Bimfuanyi mu mabeji 22, 23]

Tushalayi bindile ne lulamatu dituku dia Yehowa