Wakamanyisha balongi babu malu avuaye witabuja

UDI musue kuambuluisha balongi benu bua kumvuabu bimpe malu a mu Bible audi witabuja anyi? Magdalena (mulongi wa mu bikadilu wa bidimu 18) utu misangu ya bungi uleja balongi babu malu a mu Bible atu Bantemu ba Yehowa balongesha. Ke bualu kayi batu batamba kumuela nkonko bu mudi eyi: ‘Kuikala Ntemu wa Yehowa kudi kumvuija tshinyi?’ ne ‘Nutu nuitabuja Yezu Kristo anyi?’ Mmunyi muvuaye mua kuambuluisha balongi babu aba? Magdalena wakasambila Yehowa bua kumulombola ne wakenza muende muonso bua kukumbaja tshivuaye mulombele Nzambi atshi.​—Yakobo 1:5.

Dituku dikuabu, Magdalena kulombaye mulongeshi wabu (uvua unemeka Bantemu ba Yehowa) bua kuleja balongi babu bande wa video wa Les Témoins de Jéhovah: un nom, une organisation. * Mulongeshi kumuitabilaye. Ke Magdalena kuambila balongi ba mu kalasa kabu ne: “Ndi ndongolola bua mulunda wanyi mukuabu alue kunuleja malu kampanda mu minite 90. Nenumone bande wa video ne netuyukile pa malu adi atangila Bantemu ba Yehowa. Nenuikalepu anyi?” Balongi bonso bakitaba. Magdalena ne Wojciech (mumanyishi mupiluke wa lumu luimpe wa ku dîba ne ku dîba) kutuadijabu kudilongolola bua programe au.

Programe uvua ne bua kutuadija ne muyuki wa minite 20 muangatshila mu broshire wa Bantemu ba Yehowa​—Mbanganyi? Mmalu kayi adibu balongesha? * ne bavua ne bua kulua kuela nkonko. Pashishe bavua ne bua kuleja bande wa video mu nzubu wa tshitekelu tshia mikanda tshia mu tulasa. Mulongi yonso uvua ne bua kupeta dipa kampanda dia amvelope munene muikale ne ndambu wa broshire, mukanda wa Les jeunes s’interrogent​—Réponses pratiques * ne imue trakte ne bibejibeji.

Dituku dia programe au, kuvua balongi ba ba-Magdalena 14, mulongeshi ne balongi bakuabu banayi bavua mu nzubu wa tshitekelu tshia mikanda. Wojciech wakanji kuleja ne: bamue bafundi ba tusala ne bafundi bakuabu bena Pologne bavua bafunde dîna dia Nzambi (Yehowa) mu mikanda yabu. Wakamba kabidi muvua mikanda ya kateshisme ya kale ya bena Katolike mikale ne dîna dia Nzambi. Mu diumvuija mudimu udi Bantemu ba Yehowa benza lelu, wakaleja broshire idi yakula amu bua filiale kampanda misunguluke ne foto ya imue Nzubu ya Mpuilu.

Pashishe bakalua kuyukila bikole. Magdalena ne Wojciech bakandamuna nkonko ivuabu babela ne Bible. Bualu ebu buakalenga balongi ne mulongeshi, ne buakabasaka bua kuitaba ne: Bantemu ba Yehowa kabatu bayisha ngenyi yabu to. Ng’imue nkonko kayi yakelabu ne mmunyi muakayandamunabu?

Lukonko: Bible mmuule tente ne ngakuilu idi kayiyi mitokesha bimpe ne ya mipinganyi idi bantu mua kumvua mu mishindu mishilangane. Mmunyi mudi muntu mua kuikala ne nsombelu udi umvuangana ne tshidi Bible wamba?

Diandamuna: Bantu bakuabu batu bamba ne: Bible nkela ka nseke ibidi. Kadi anji elayibi meji tung: Nuenu basue kumanya tshidi mufundi kampanda musue kuamba mu tshiambilu tshiende kansanga, kanuena mua kumuebeja anyi? Yehowa Nzambi Muena Bible kêna bu bafundi bakuabu bakadi bafue to; Yeye udi ne muoyo.  (Lomo 1:20; 1 Kolinto 8:5, 6) Mvese idi pamue ne mvese kampanda idi mua kumumvuija bimpe. Bible utu kabidi utamba kuakula bua bualu bumue miaba ya bungi, nunku kutangila mvese idi yakula pa bualu ebu yonso kudi mua kutuambuluisha. Nunku tudi tulekela Nzambi ulombola ngenyi yetu bienza bu se: Yeye muine udi utumvuija mvese eu. Bituikala tuenza nunku, netumanye disua diende didi mu Bible ne netuditumikile mu nsombelu wetu. Ki mmuomu anyi?

Lukonko: Ndishilangana kayi didi pankatshi pa bena Kristo ne Bantemu ba Yehowa?

Diandamuna: Tudi bena Kristo! Kadi Bantemu ba Yehowa kabena anu badiamba mudibu bena Kristo to, badi kabidi benza muabu muonso bua kuikala ne nsombelu udi umvuangana ne malu adibu balongesha ne bidi Nzambi ubalongesha bua diakalenga diabu. (Yeshaya 48:17, 18) Bu mudi malongesha abu onso mangatshila mu Bible, mbamanye ne: badi ne bulelela.​—Matayo 7:13, 14, 21-23.

Lukonko: Bua tshinyi nutu nuya kudi bantu banudi kanuyi bamanye ne nuenza muenu muonso bua kuyukila nabu? Ki nkuenzeja bantu ku bukole bua kuitaba malongesha enu anyi?

Diandamuna: Nudi nuela meji ne: mbibi padi muntu uyukila nenu ne bukalanga buonso mu njila ne unuebeja tshidi meji enu pa bualu kampanda anyi? (Yelemiya 5:1; Sefanya 2:2, 3) (Ke Wojciech ne Magdalena kuenzabu dinaya dia tshilejilu bua kuleja mutubu bakonka bantu badi bapita mu njila bikala Nzambi uditatshisha bua bantu bavua bakenge bua mvula mikole ivua miloke matuku au mu ditunga diabu dia Pologne.) Patudi tumvua lungenyi ludi nalu muntu, tudi tukoka ntema yende ku tshidi Bible wamba. Bikala muntu kayi musue kuyukila netu, tudi tumulaya ne tumushiya. (Matayo 10:11-14) Aku ke kuenzeja bantu ku bukole bua kuyukila nabu anyi? Peshi bantu kabatshiena mua kuyukila ne bakuabu kabidi?

Lukonko: Bua tshinyi kanutu nusekelela mafesto manene?

Diandamuna: Tutu tuenza anu difesto anyi tshibilu tshimuepele tshidi Bible utulomba bua kusekelela, tshibilu atshi ke Tshivulukilu tshia lufu lua Yezu Kristo. (1 Kolinto 11:23-26) Nudi mua kupeta ntuadijilu wa mafesto mu bibungu binene ne mu mikanda mikuabu mimpe. Nuenu benze nanku, nenumone tshitudi katuyi tusekelela mafesto to.​—2 Kolinto 6:14-18.

Bakela Wojciech ne Magdalena nkonko ya bungi, bobu kuyandamuna. Bua mushindu uvua diyukidilangana edi diangate dîba dia bungi, bakalomba bua kuleja bande dituku dikuabu.

Balongi bakamona bualu ebu bishi? Magdalena udi wamba ne: “Mvua mukeme bikole bua kumona bamue balongi batu pa tshibidilu benza malu mapote ne basekangana, bela nkonko mimpe. Nansha muvuabu badiamba muvuabu kabayi bitaba ne: Nzambi utuku, munkatshi mua diyukidilangana bakaleja ne: bavua bitabuja ne: udiku!” Bakanyisha mikanda ivuabu babapeshe, kushalabu ne mikanda 35, broshire 63 ne bibejibeji 34.

Programe wa mu kalasa eu wakapatula bipeta bilenga be! Kavua anu muambuluishe balongi ba ba-Magdalena bua kumanya ne kumvua tshidi Bantemu ba Yehowa bimpe to, kadi wakambuluisha kabidi bansonga ba bungi bua kuela meji a tshidibu bikadile ne muoyo pa buloba. Kuenaku mua kudienzeja bua kuambuluisha pebe balongi benu bua kumanya malu a mu Bible audi mumanye anyi?

[Mêyi adi kuinshi]

[Tshimfuanyi mu dibeji 31]

Magdalena ne Wojciech badi badilongolola bua kuya kuyukila ne balongi