Nkonko ya babadi

Pakambila Yezu bayidi bende bua ‘kusombesha bintu kabayi babitekemena kabidi,’ uvuaku musue kumvuija ne: kabavua ne bua kulomba nansha makuta mine avuabu basombeshangane au anyi?

Mêyi a Yezu adi mu Luka 6:35 adi umvuika bimpe bitambe patudi tuatangidila mu Mikenji ya Mose. Mu Mikenji ayi Nzambi uvua muambile bena Isalele bua kusombesha bana babu bena Isalele bavua bashala bianza bitupu ne bavua bakengela diambuluisha ne bintu kakuyi dibalomba tshia-kasombela to. (Ekesode 22:25; Lewitiki 25:35-37; Matayo 5:42) Bintu ebi bivuabu basombeshangana kabivua ne tshipatshila tshia kuenda mushinga bua kupeta makasa to. Kadi bivua bua kukepeshaku bupele anyi lutatu. Tuamba eku tuela eku, muntu uvua wendulukila muanabu mushinga pambidi bualu uvua mutshiome uvua mubule dinanga menemene. Tshidibi, muntu uvua usombeshangana uvua ne bua kupetulula tshivuaye musombeshangane, imue misangu uvua wangata tshintu kampanda bua kulama.​—Dutelonome 15:7, 8.

Yezu muikale anu ubingisha Mukenji eu, wakaumvuija mu mushindu mualabale pakambaye ne: muntu uvua ufila diambuluisha kêna ne bua ‘kuditekemena kabidi’ to. Anu bu bena Isalele, imue misangu bena Kristo batu bajimija mfranga anyi bapeta nsombelu mikuabu itu ibashiya bianza bitupu kabayi dieya. Bikala muanetu muena Kristo udi mu nsombelu mukole wa mushindu’eu ukeba bua kumuambuluisha ne makuta, kabiakuikalaku bimpe bua kumuambuluisha anyi? Bushuwa, dinanga dilelela nedisake muena Kristo bua kujinga kuambuluisha muanabu udi mu ntatu mikole ya mushindu wa kupeta mfranga kabiyi ku disua diende to. (Nsumuinu 3:27) Bidi mua kuikala bimpe bua kupesha muanetu eu udi mu lutatu dipa, nansha bikala dipa edi dishadile ku bungi bua bidibu mua kumusombesha.​—Musambu 37:21.

Mu bidimu lukama bia kumpala bikondo bietu ebi, bakapesha mupostolo Paulo ne Bânaba mudimu wa kufikisha mapa avua bena Kristo ba mu Asia Mukese bafile bua kuambuluisha bana babu ba mu Yudaya bavua mu tshiyole tshia nzala. (Bienzedi 11:28-30) Bia muomumue lelu, patu bipupu bienzeka, bena Kristo batu misangu mivule batumina bana babu badi mu dikenga mapa bua kubambuluisha. Mu difila mapa aa, badi bayisha bantu bakuabu kabidi. (Matayo 5:16) Bushuwa, badi ne bua kutangila ngikadilu ne nsombelu wa muntu udi dijinga ne diambuluisha. Bua tshinyi udi mu dikenga? Mêyi a Paulo aa adi ne mushinga: ‘Bikala muntu kayi witabuja kuenza mudimu, kadi biende tshintu.’​—2 Tesalonike 3:10.

Bikala muanetu udi ukeba kusomba mfranga kayi mu lutatu lukole to, kadi ujinga anu bua bamupeshe diambuluisha bua matuku makese bua kumonaye mua kujukila kulu mu mushinga wende kampanda, bidi mua kuikala bikumbane bua kumusombesha kakuyi tshia-kasombela to. Mu nsombelu ya mushindu’eu, kusombesha muntu mfranga ne tshipatshila tshia yeye kupingajila muenayi anu bungi buvuaye mufila, kakuena kubengangana ne mêyi a Yezu adi mu Luka 6:35 nansha. Badi ne bua kufunda mukanda wa diumvuangana, ne musombi wa mfranga udi ne bua kuenza muenda muonso bua kuyipingaja bilondeshile mudibu bumvuangane. Bushuwa, dinanga dia buena Kristo didi ne bua kusaka udi musombe mfranga bua kuyipingaja anu muvua diodi dinanga edi disake kabidi eu uvua mumusombeshayi.

Muntu udi witaba bua kusombeshangana mfranga (anyi kufila dipa) udi kabidi ne bua kuanji kukonkonona nsombelu wa dîku diende. Tshilejilu, mmufuanyike kupangila bua kukumbaja majinga a bena mu dîku diende, adi mikale pa muaba wa kumpala bu mudi Bible umulomba anyi? (2 Kolinto 8:12; 1 Timote 5:8) Nansha nanku, bena Kristo batu bakeba mishindu ya kulejangana dinanga, ne kuleja dinanga dia mushindu’eu mu mishindu mimpe idi yumvuangana ne mêyi a mu Bible.​—Yakobo 1:27; 1 Yone 3:18; 4:7-11.