‘Wendakane mu buloba’
‘Wendakane mu buloba’
‘Wendakane mu buloba buonso, mu bule buabu ne mu butshiama buabu.’—GENESE 13:17.
1. Mbualu kayi bua disanka buvua Nzambi mulombe Abalahama bua kuenza?
UTUKU musue kuendakana bua kupita kapepe, pamu’apa wenza kaluendu ku mashinyi ku ndekelu kua lumingu anyi? Bakuabu batu basue dikalu bua kuibidija mubidi ne bua kubandila bimpe bintu bidi mu njila. Bakuabu pabu batu basue kuenda ku makasa bua kubandila ne kumanya bimpe muaba kampanda. Misangu ya bungi tungendu tua nunku katutu tuangata mêba a bungi to. Kadi ela meji muvua Abalahama ne bua kuikala mumvue pavua Nzambi mumuambile ne: ‘Bika biebe, wendakane mu buloba buonso, mu bule buabu ne mu butshiama buabu; bualu bua nenkupebu.’—Genese 13:17.
2. Abalahama wakaya kuepi pakafumaye mu Ejipitu?
2 Tangila nsombelu uvuaku pavua Nzambi muambe mêyi aa. Abalahama ne mukajende ne bantu bakuabu bakenza matuku makese mu Ejipitu. Genese nshapita wa 13 udi utuambila ne: bakumbuka mu Ejipitu ne bimuna biabu batangile ku ‘luseke lua ku Sud’ anyi ku Negebe. Pashishe Abalahama wakabanga kuya ‘wenda wasa pa muaba, umuangalapu, kufikaye mu ditunga dia Negebe, too ne mu tshimenga tshia Betele.’ (MMM) Pakajuka tshilumbu pankatshi pa balami ba bimuna biende ne balami ba bia Lota muana wa muanabu, kumuenekabi ne: bivua bimpe bua bobu kutapulukangana, Abalahama wakambila Lota ne kalolo konso bua kusungulaye kumpala muaba wa kuyaye. Lota wakasungula ‘mpata wa musulu wa Yadene,’ uvua tshibanda tshivua mitshi ne bisosa bivule ‘bu tshibundu [anyi budimi] bua Yehowa.’ Pashishe wakalua kusombela mu Sodoma. Nzambi wakambila Abalahama ne: ‘Bandisha mêsu ebe pa muaba uudi muimane, utangile ku Nord ne ku Sud ne ku Est ne ku Ouest.’ Bu muvua Abalahama pabuipi ne ku Betele pamu’apa pa mukuna, uvua mua kumona bitupa bikuabu bia buloba abu. Kadi, Abalahama kavua anu ubandila buloba abu kujika to. Nzambi wakamuambila bua ‘kuendakana mu buloba buonso’ bua kumanyaye bitupa biabu ne mushindu uvuabu.
3. Bua tshinyi bidi mua kuikala bikole bua kufuanyikija muvua luendu lua Abalahama?
3 Nansha Abalahama muendakane bikole anyi kakese mu buloba abu kumpala kua kufikaye ku Hebelone, wakamanya Buloba Bulaya kupita ba bungi ba kutudi. Tuma meji ku miaba idibu batele mu muyuki eu: Negebe, Betele, mpata ne bibanda bia Yadene, Sodoma ne Hebelone. Mbikole bua wewe kufuanyikija miaba ivua misoko eyi anyi? Bua bantu bavule mbikole, bualu basadidi ba Yehowa bakese ke bakadi baye mu misoko idibu babala mu Bible, bendakane mu bule ne mu butshiama bua buloba abu. Nansha nanku, tudi ne bua kusanka bua kumanya miaba idi Bible utela. Mbua tshinyi?
4, 5. (a) Ndiumvuangana kayi didi pankatshi pa Nsumuinu 18:15 ne dimanya ne dijingulula dia malu a misoko ya mu Bible? (b) Ntshinyi tshidi Sefanya nshapita 2 uleja?
4 Dîyi dia Nzambi didi diamba ne: ‘Mutshima wa mujinguludi wa mianda udi upeta lungenyi; matshi a bena meji adi akeba lungenyi.’ (Nsumuinu 18:15) Kudi malu a bungi atudi mua kumanya, kadi dimanya dijalame didi ditangila Yehowa Nzambi ne malu ende didi ne mushinga mukole. Kakuyi mpata, bitudi tubala mu Bible bidi ne mushinga bua kupeta dimanya adi. (2 Timote 3:16) Nansha nanku, bidi bilomba kujingulula mianda. Kujingulula bualu kudi kumvuija kubumvua, kumona diumvuangana didi pankatshi pa bitupa bia bualu ebu ne bualu buine bujima. Bidi nanku kabidi bua miaba idibu batele mu Bible. Tshilejilu, bavule ba kutudi mbamanye kudi Ejipitu usanganyibua, kadi mmunyi mutudi tumvua padibu bamba ne: Abalahama uvua mumbuke mu Ejipitu muye ‘ku Negebe,’ pashishe ku Betele, ne panyima ku Hebelone? Udi umvua mudi miaba eyi ipetangana anyi?
5 Pamu’apa uvua mua kuikala mubale Sefanya nshapita 2 mu ndongamu wa dibala dia Bible. Wakabalamu mêna a bimenga, a bantu ne a maloba. Miaba bu mudi Gaza, Ashekelona, Ashedodo, Ekelona, Sodoma, Ninewe, kabidi ne Kanâna, Moaba, Amona ne Ashû, yonso eyi mmitela mu nshapita umue au. Uvuaku mukokeshe bua kumona miaba eyi mu lungenyi, miaba ivuabu basombele kudi bantu betu ba tshia bushuwa aba bavua dikumbana dia milayi ya Nzambi ditangila anyi?
6. Bua tshinyi bamue bena Kristo mbafike ku dianyisha tuarte tua matunga a mu Bible? (Bala mu kazubu.)
6 Balongi ba bungi ba Dîyi dia Nzambi badi bapeta dikuatshisha dia bungi mu ditangila tuarte tua matunga a mu Bible. Badi benza nunku, ki mbua padibu banange kutangila tuarte, kadi bualu mbamanye ne: padibu batangila tuarte badi bavudija dimanya diabu dia Dîyi dia Nzambi. Tuarte tudi kabidi mua kubambuluisha bua kuvudija dijingulula dia mianda, bamona mushindu udi malu akadibu bamanye apetangana ne malu makuabu. Paudi ukonkonona bimue bilejilu, pamu’apa neutambe kuanyisha pebe Yehowa ne neumvue bimpe malu adi malonda mu Dîyi diende.—Bala kazubu kadi mu dibeji dia 14.
Kumanya ntanta ya miaba kudi kukolesha lumvu luetu
7, 8. (a) Mbualu kayi bua dikema buvua Shimishona muenze mu Gaza? (b) Ntshinyi tshidi tshileja mushinga wa bualu buvua Shimishona muenze? (c) Mmunyi mudi dimanya ne dijingulula dia bualu buvua Shimishona muenze mua kutuambuluisha?
7 Udi mua kubala mu Balumbuluishi 16:2 muvua Shimishona mu tshimenga tshia Gaza. Lelu tutu tumvua bakula bua Gaza mu ngumu ya ku tudiomba; pamu’apa udi umona muaba uvua Shimishona usanganyibua, mu ditunga dia bena Peleshete pabuipi ne Muelelu wa Mbuu wa Mediterane. [gl 11] Mpindieu tangila tshitudi tubala mu Balumbuluishi 16:3: ‘Shimishona wakalalamu too ne mundankulu, wakabika mundankulu, wakakuata bibi bia ku musoko, ne makunji abi abidi, wakabitula ne biamu bionso, wakabiteka pa [makaya] ende, wakaya nabi too ne ku mutu kua mukuna munene udi kumpala kua Hebelone.’
8 Kakuyi mpata, musoko wa lumbu bu Gaza uvua ne makunji ne biibi binene ne bikale ne bujitu bua bungi kabidi. Difuanyikija uteta bua kubiambula! Shimishona wakabiambula, kadi nkuepi kuvuaye mutangile nabi, ne uvua ne bua kuenza luendu lua mushindu kayi? Bushuwa, Gaza udi ku muelelu wa mâyi bule bumue ne mâyi. [gl 15] Kadi Hebelone udi ku Est kulu pa mukuna wa metre 900: mukuna wa dikema! Katuena bamanye muaba mujalame uvua “mukuna munene udi kumpala kua Hebelone,” kadi musoko eu udi mutantshi wa kilometre 60 ne Gaza pa mukuna! Kumanya ntanta udi pankatshi pa misoko eyi kudi kuvuija bualu buvua Shimishona muenze bualu bua dikema, ki mmuomu anyi? Kupu muoyo bua tshinyi Shimishona uvua muenze malu a nunku: ‘Nyuma wa Yehowa wakamutulukila bikole.’ (Balumbuluishi 14:6, 19; 15:14) Lelu tuetu bena Kristo katuena tutekemena bua nyuma wa Nzambi kutupeshaye bukole bua pa buabu to. Kadi, nyuma wa bukole umue umue eu udi mua kukolesha lumvu luetu lua malu muondoke a mu nyuma ne kukolesha muntu udi munda muetu. (1 Kolinto 2:10-16; 13:8; Efeso 3:16; Kolosai 1:9, 10) Bushuwa, patudi tumvua bimpe muyuki wa Shimishona, tudi tuitaba ne: nyuma wa Nzambi udi mua kutuambuluisha.
9, 10. (a) Mmalu kayi avua menzeke bua Gideona kutshimuna bena Midiana? (b) Mmunyi mudi dimanya dia miaba ivua malu menzekele dituambuluisha bua kumona mushinga wa muyiki eu?
9 Mushindu uvua Gideona mutshimune bena Midiana udi uleja kabidi mushinga wa kumanya ntanta idi pankatshi pa misoko ya mu Bible. Bantu ba bungi batu babala Bible mbamanye ne: Mulumbuluishi Gideona ne bantu bende 300 bavua batshimune basalayi 135 000 ba mu biluilu bisanga bia bena Midiana, bena Amaleka ne bakuabu bavua batudile mu mpata wa Yizelele, pabuipi ne mukuna wa Mole. [gl 18] Bantu ba Gideona bakela mpungi, kutayisha milondo bua kuleja bimunyi biabu, ne kuelabu mbila ne: ‘Muele wa mvita wa Yehowa ne wa Gideona.’ Ebi biakampampakaja baluishi ne kubatshinyisha, e kutuadijabu kushipangana nkayabu. (Balumbuluishi 6:33; 7:1-22) Malu onso aa akenzeka musangu umue mu mîdima ya butuku anyi? Tungunuka ne dibala Balumbuluishi nshapita wa 7 ne wa 8, neumone ne: Gideona wakatungunuka ne kubaluisha. Bua miaba ya bungi idibu batele, imue kayena mimanyike lelu to, ke bualu kayi kayena imueneka mu tuarte tua misoko ya mu Bible to. Nansha nanku, ya bungi mmimanyike bua tuetu kulonda malu avua Gideona muenze.
10 Gideona wakipata bantu bavua bashale mu biluilu bivua bidisange kupita Bete-shita ne pashishe ku Sud mutangile ku Abele-mehola, pabuipi ne Yadene. (Balumbuluishi 7:22-25) Bible udi wamba ne: ‘Gideona ne bantu bende nkama isatu bakadi nende bakalua ku Yadene, bakasabukaku, bapungile, kadi bakatshidi babipata.’ Panyima pa bena Isalele bamane kusabuka Yadene, bakipata baluishi babu batangile ku Sud lua ku Sukota ne Penuele, pabuipi ne Yaboka, pashishe mu mikuna ku Yogebeha (pabuipi ne musoko wa mpindieu wa Amman, mu ditunga dia Jordanie). Bakabipata ne kubaluisha mutantshi wa kilometre bu 80. Gideona wakakuata ne kushipa bakalenge ba bena Midiana babidi; pashishe kupinganaye mu musoko wabu wa Ofela, pabuipi ne muaba uvua mvita mituadijile. (Balumbuluishi 8:4-12, 21-27) Bidi bimueneka patoke ne: diluangana dia Gideona kadivua anu dia minite mikese ya diela mpungi, diela bimunyi mulu ne diela mbila to. Ela meji mudibi bifila bukole ku mêyi adi atangila bantu ba ditabuja a ne: ‘Nengambe tshinyi kabidi? Bua musangu neunkepe pa kulonda bua Gideona [ne bakuabu bavua] mu butekete bandamuke bakole, balue bakole mu mvita.’ (Ebelu 11:32-34) Bena Kristo pabu badi mua kupungila ku mubidi, kadi kabiena bia mushinga bua tuetu kutungunuka ne kuenza disua dia Nzambi anyi?—2 Kolinto 4:1, 16; Galatia 6:9.
Mutu bantu bela meji ne benza malu
11. Nduendu kayi luvua bena Isalele ne bua kuenza kumpala ne panyima pa bamane kufika ku Kadeshe?
11 Bamue bantu badi mua kutangila tuarte tua mu Bible bua kumanya miaba kampanda, kadi udi wela meji ne: tuarte tudi mua kufila butoke pa mmuenenu uvua nende bantu anyi? Angata tshilejilu tshia bena Isalele bavua bumbukila ku Mukuna wa Sinai batangile mu Buloba Bulaya. Benda bimana mu njila, bakafika ndekelu wa bionso ku Kadeshe (anyi Kadeshe-bânea). [gl 9] Dutelonome 1:2 udi uleja ne: luvua luendu lua matuku 11, ntanta wa kilometre mitue ku 270. Bavua muaba au pakatuma Mose batentekedi 12 mu Buloba Bulaya. (Nomba 10:12, 33; 11:34, 35; 12:16; 13:1-3, 25, 26) Batentekedi bakaya batangile ku Nord bapitshila mu Negebe, pamu’apa kupitshilabu kabidi mu Bê-sheba, pashishe mu Hebelone ne kufikabu ku mikalu ya ku Nord ya Buloba Bulaya. (Nomba 13:21-24) Bu muvua bena Isalele bitabe luapolo lubi lua batentekedi 10, bavua ne bua kutambakana bidimu 40 mu tshipela. (Nomba 14:1-34) Bualu ebu budi buleja tshinyi pa bidi bitangila ditabuja diabu ne dieyemena Yehowa?—Dutelonome 1:19-33; Musambu 78:22, 32-43; Yuda 5.
12. Ntshinyi tshitudi mua kuamba bua ditabuja dia bena Isalele, ne bua tshinyi mbualu butudi ne bua kuelela meji?
12 Ela meji pa bualu ebu muikale ne miaba eyi mu mutu. Bu bena Isalele bikale ne ditabuja ne balonde mibelu ya Yoshua ne Kaleba, bavua mua kuenza luendu lule nanku bua kufika mu Buloba Bulaya anyi? Kadeshe uvua mutantshi wa kilometre bu 16 ne Bê-laha-loi, muaba uvua Isaka ne Lebeka basombelaku musangu kampanda. [gl 7] Uvua mutantshi wa kilometre mishadile ku 95 ne Bê-sheba uvuabu baleje bu uvua ku mikalu ya ku Sud ya Buloba Bulaya. (Genese 24:62; 25:11; 2 Samuele 3:10) Bamane kumbuka mu Ejipitu too ne ku Mukuna wa Sinai ne pashishe bende kilometre 270 too ne ku Kadesha, bavua anu bu ku tshiibi tshia Buloba Bulaya. Tuetu petu tudi ku tshiibi tshia Mparadizu wa pa buloba. Ndilongesha kayi ditudi tupeta? Mupostolo Paulo wakasuikakaja nsombelu wa bena Isalele ne mubelu eu: ‘Nunku tutshintayi bietu bua kubuela mu dikisha adi, bua muntu kaponyi mu kulonda kua tshifuanyikiji tshiotshimue tshia bupidia.’—Ebelu 3:16–4:11.
13, 14. (a) Mmu nsombelu kayi muvua bena Gibeona benze bualu bua mushinga mukole? (b) Ntshinyi tshidi lungenyi lua bena Gibeona luleja ne ntshinyi tshitudi mua kulongela kudibu?
13 Mmuenenu mushilangane wa dieyemena Nzambi bua kukumbajaye disua diende udi umueneka mu muyuki wa mu Bible wa bena Gibeona. Kunyima kua Yoshua mumane kusabuisha bena Isalele Musulu wa Yadene ne babuele mu buloba buvua Nzambi mulaye dîku dia Abalahama, tshikondo tshiakakumbana tshia kumbusha bena Kânana mu buloba. (Dutelonome 7:1-3) Bavua ne bua kubutula kabidi bena Gibeona. Bena Isalele kubutulabu Yeleko ne Ai ne kuasabu tshitudilu pabuipi ne Gilegala. Bena Gibeona kabavua basue kufua bu bena Kânana bela mulawu to, ke kutumabu baleji mpala kudi Yoshua ku Gilegala. Bakamba muvuabu kabayi ba mu buloba bua bena Kânana bua kumonabu mua kuenza tshipungidi tshia ditalala ne bena Ebelu.
14 Baleji mpala abu bakamba ne: ‘Bapika bebe bakalua kule ku buloba bukuabu bualu bua dîna dia Yehowa, Nzambi webe.’ (Yoshua 9:3-9) Bilamba ne biakudia bivuabu nabi bivua bileja anu bu bafumine kule, pabi Gibeona muikale mutantshi wa kilometre mitue ku 30 ne Gilegala. [gl 19] Bu muvua Yoshua ne bantu bavua ku mutu kua bena Isalele batuishibue nanku, bakenza tshipungidi tshia ditalala ne bena Gibeona ne misoko mikuabu ya ku mutumba ivua midisange nabu. Bena Gibeona bakenza mayele aa anu bua kuepuka lufu patupu anyi? Too, bualu ebu buakaleja dijinga diabu dia kuanyishibua kudi Nzambi wa bena Isalele. Yehowa wakanyisha bua bena Gibeona bikale ‘bapandi ba nkunyi ne basunyi ba mâyi ba bena Isalele ne ba tshioshelu tshia Yehowa,’ batuala nkunyi bua tshioshelu tshia milambu. (Yoshua 9:11-27) Bena Gibeona bakatungunuka ne kuleja dianyisha diabu dia kuenza midimu mipuekele mu mudimu wa Yehowa. Pamu’apa, bamue ba kudibu bavua munkatshi mua bena Netinima bakapatuka mu Babulona ne bakambuluisha mu diasulula dia ntempelo. (Ezela 2:1, 2, 43-54; 8:20) Tudi mua kuidikija lungenyi luabu patudi tudienzeja bua kulama ditalala ne Nzambi ne kuanyisha bua kuenza too ne midimu mipuekele mu mudimu wende.
Tuikale tudipangisha bimue bintu
15. Bua tshinyi tudi ne bua kutangila miaba idi mu Mifundu ya tshiena-Greke ya bena Kristo?
15 Mbatele misoko mivule ya mu Bible mu Mifundu ya tshiena-Greke ya bena Kristo, bu mudi bua ngendu ne mudimu wa Yezu ne wa mupostolo Paulo. (Mâko 1:38; 7:24, 31; 10:1; Luka 8:1; 13:22; 2 Kolinto 11:25, 26) Mu miyuki idi ilonda eyi, teta kutshinka ngendu ivuabu benze.
16. Mmunyi muvua bena Kristo ba ku Beloya baleje dianyisha bua Paulo?
16 Mu luendu luibidi luakenza Paulo lua bumisionere (mushonyi wa viole pa karte), wafika mu Filipoi udi mpindieu musoko wa mu ditunga dia Grèce. [gl 33] Wakayisha muinamu, kumuelabu mu buloko ne pashishe kumupatulabu, e kuyaye ku Tesalonika. (Bienzedi 16:6–17:1) Pakajula bena Yuda tshimvundu, bana betu ba mu Tesalonika bakambila Paulo bua kuya ku Beloya, mutantshi wa kilometre 65. Paulo wakapatula bipeta bilenga mu mudimu wende mu Beloya, kadi bena Yuda bakalua kusaka bantu ku meji mabi. Ke ‘bana babu ba mu Kristo kutuma Paulo lubilu bua kuyaye too ne ku mâyi manene,’ ne ‘bafidi ba Paulo bakamulombola too ne ku Atena.’ (Bienzedi 17:5-15) Bidi bimueneka ne: bamue bantu bavua bakudimune mutshima matuku makese au bavua bitabe bua kuenda kilometre 40 too ne ku Mbuu wa Égée, kufuta mazuwa ne kuenza luendu lua kilometre mitue ku 500. Luendu lua nunku luvua ne njiwu, kadi bana betu abu bakitaba njiwu ayi ne kupitshishabu tshikondo tshile ne muleji mpala muena ngendu wa Nzambi eu.
17. Ntshinyi tshitudi tumvua bimpe patudi tumanya ntanta udi pankatshi pa Mileto ne Efeso?
17 Mu luendu luende luisatu (mushonyi wa mâyi a matamba pa karte), Paulo wakafika ku dibungu dia Mileto. Kubikidishaye bakulu ba mu tshisumbu tshia Efeso, ntanta wa kilometre bu 50. Elabi meji, bakulu abu balekela midimu yabu mikuabu bua kuya kudi Paulo. Kakuyi mpata pavuabu benda baya, bavua bayukila ne disanka bua tshisangilu tshivuabu baya kuenza ne Paulo. Bamane kupetangana ne Paulo ne bumvue disambila diende, ‘buonso buabo bakadila bikole, bakela Paulo bitupa ku nshingu, bakamutua mishiku.’ Pashishe ‘bakamushindikija ku buatu’ bua kuyaye ku Yelushalema. (Bienzedi 20:14-38) Bavua ne bua kuikala ne bia bungi bia kuelela meji ne kuyukila mu dipingana diabu ku Efeso. Kabienaku bikulenga ku muoyo pa kumona dianyisha divuabu baleje bua kuenda ntanta bule nunku bua kupetangana ne musadidi muena ngendu uvua mua kubamanyisha amue malu ne kubakolesha anyi? Udi umona mu muanda eu bualu kampanda buudi mua kutumikila mu nsombelu webe ne kuelelapu meji anyi?
Longa malu adi atangila Buloba Bulaya ne malu adi matuindile
18. Ntshinyi tshitudi mua kudisuika bua kuenza pa bidi bitangila misoko ya mu Bible?
18 Bilejilu bitudi tufuma ku dimona ebi bidi bileja mushinga wa kumanya buloba buvua Nzambi mupeshe bena Isalele ne budi ne mushinga mu miyuki ya bungi ya mu Bible. (Tudi kabidi mua kualabaja dimona dietu dia mu lungenyi bua kumanya matunga makuabu avua nabu mutumba adi mu miyuki ya mu Bible.) Patudi tuvudija dimanya dietu dia Buloba Bulaya ne tubujingulula mu mushindu wa pa buawu, tudi mua kuvuluka bualu bua mushinga buvua bena Isalele ne bua kukumbaja bua kubuela ne kusanka mu buloba ‘budi buule tente ne mabele ne buitshi.’ Bavua ne bua kutshina Yehowa ne kulama mikenji yende.—Dutelonome 6:1, 2; 27:3.
19. Mmparadizu kayi ibidi itudi ne bua kutungunuka ne kutabalela?
19 Bia muomumue lelu, tudi ne bua kukumbaja tshitudi ne bua kuenza ku luetu luseke: kutshina Yehowa ne kulonda njila yende. Tuetu tuenza nunku, netulengeje mparadizu wa mu nyuma udiku mpindieu mu tshisumbu tshia bena Kristo ba buloba bujima. Netuvudije dimanya dia malu adi mu mparadizu eu ne masanka adi afuminaku. Tudi bamanye ne: nekuikale masanka a bungi. Yoshua wakalombola bena Isalele dia muomua dia Yadene, mu buloba bulengele bua bufuke. Mpindieu tudi ne malu mashindame adi atusaka bua kutekemena ne dishindika Mparadizu wa pa buloba, buloba buimpe budi butuindile.
Udi muvuluke anyi?
• Bua tshinyi tudi ne bua kujinga kuvudija dimanya dietu ne lumvu luetu lua miaba ya mu Bible?
• Mmalu kayi adi atangila miaba ya mu Bible atudi bakonkonone mu tshiena-bualu etshi adi makuambuluishe bikole?
• Mmalongesha kayi avua matokeshibue pauvua mulonge malu adi atangila miaba idibu batele mu imue miyuki?
[Nkonko ya dilonga]
[Kazubu/Tshimfuanyi mu dibeji 14]
‘Voyez le bon pays’
Mu mpungilu ya distrike ivua mienzeke mu tshidimu tshia 2003 ne 2004, Bantemu ba Yehowa bavua ne disanka dia kupeta broshire wa ‘Voyez le bon pays.’ Broshire mupiamupia eu udi mu miakulu mitue ku 80, mmuule tente ne tuarte tua mekala a bungi tudi tuleja miaba mishilashilangane ya mu Bible, nangananga ya mu Buloba Bulaya mu bikondo bishilangane.
Tshiena-bualu tshia dilonga tshidi ne kazubu aka tshidi tshiakula bua tuarte kampanda ku diambuluisha dia nomba ya mabeji mifikisha, bu mudi [gl 15]. Wewe muikale ne broshire mupiamupia eu, disumbila dîba dia kuibidilangana ne bimue bitupa bidi mua kukuambuluisha bua kuvudija dimanya ne dijingulula diebe dia Dîyi dia Nzambi.
(1) Tuarte tua bungi tudi ne miaku idi itumvuija anyi kazubu kadi kumvuija bimfuanyi kampanda bidi pa karte [gl 18]. (2) Tuarte tua bungi tudi ne tshidikijilu mu kilometre tshiakuambuluisha bua kumanya bule anyi ntanta idi pankatshi pa miaba [gl 26]. (3) Pa tshibidilu kamuketa kadi kaleja luseke lua ku Nord bua kukuambuluisha bua kumanya nseke mikuabu [gl 19]. (4) Misangu mikuabu tuarte tudi ne mekala adi aleja mushindu udi maloba matumbuke [gl 12]. (5) Ku mielelu kua karte kudi mua kuikala maleta ne bishiferi bidi bikuambuluisha bua kumona pa lukasa misoko anyi mêna ayi [gl 23]. (6) Mu mabeji abidi adi ne mêna a miaba [gl 34-5], udi mua kumona nomba wa dibeji mufikisha, mulonda kudi kamanyinu kampanda (bu mudi E2) bua wewe kupeta muaba uudi ukeba bimpe. Wewe muenze mudimu ne bintu ebi misangu ya bungi, neumone ne: bidi bikuambuluisha menemene bua kumanya ne kukolesha dijingulula diebe dia Bible.
[Tablo/Karte mu mabeji 16, 17]
KARTE KA BITUPA BIA BULOBA
(Bua kumona malu bimpe, tangila mu mukanda)
A. Muelelu wa Mbuu Munene
B. Mpata ya ku Ouest kua Yadene
1. Mpata wa Ashê
2. Kabuloba ka ku muelelu wa mâyi ku Dô
3. Maloba a kudishila bimuna a mu Shalona
4. Mpata wa buloba bua bena Peleshete
5. Tshibandabanda tshia pankatshi pa Est ne Ouest
a. Mpata wa Megido
b. Tshibanda tshia Yizelele
C. Mikuna ya ku Ouest kua Yadene
1. Mikuna ya mu Galela
2. Mikuna ya Kâmele
3. Mikuna ya mu Samalea
4. Shefela (mikuna mikese)
5. Mikuna ya Yuda
6. Tshipela tshia mu Yuda
7. Negebe
8. Tshipela tshia Palana
D. Alabâ (Tshibatabata)
1. Tshibandabanda tshia Houlé
2. Buloba bua ku Mbuu wa Galela
3. Tshibandabanda tshia Yadene
4. Mbuu wa Mukela (Mbuu Mufue)
5. Alabâ (ku Sud kua Mbuu wa Mukela)
E. Mikuna/Mpata ya ku Est kua Yadene
1. Bashana
2. Gilada
3. Amona ne Moaba
4. Mukuna wa Edome
F. Mikuna ya ku Lebanona
[Karte]
Mukuna wa Hêmona
Moliya
Abele-mehola
Sukota
Yogebeha
Betele
Gilegala
Gibeona
Yelushalema
Hebelone
Gaza
Bê-sheba
Sodoma?
Kadesha
[Karte/Tshimfuanyi mu dibeji 15]
(Bua kumona malu bimpe, tangila mu mukanda)
KANÂNA
Megido
GILADA
Dotana
Shekeme
Betele (Luze)
Ai
Yelushalema (Salema)
Beteleheme (Efelata)
Mamale
Hebelone (Makapela)
Gelâ
Bê-sheba
Sodoma?
NEGEBE
Lehobota?
Mikuna
Moliya
[Majiba a mayi]
Mbuu wa Luepu
Musulu
Yadene
[Tshimfuanyi]
Abalahama wakendakana mu buloba ebu
[Karte mu dibeji 18]
(Bua kumona malu bimpe, tangila mu mukanda)
Toa
SAMOTAKA
Neapoli
Filipoi
Amfipoli
Tesalonike
Beloya
Atena
Kolinto
Efeso
Mileto
LODO