Badi ne disanka nansha mudibu babakengesha

‘Panupendabu ne panukengeshabu ne panushiminyinabu mashimi onso, bua bualu buanyi, nenuikale ne disanka.’​—MATAYO 5:11.

1. Mbualu kayi buvua Yezu mujadikile bayidi bende bua disanka ne dibakengesha?

 PAKATUMA Yezu bapostolo bende musangu wa kumpala bua kuyabu kuyisha Bukalenge, wakabamanyisha ne: bavua ne bua kupeta buluishi. Wakabambila ne: ‘Bantu bonso nebikale nenu lukuna bua dîna dianyi.’ (Matayo 10:5-18, 22) Kadi kumpala mu Muyuki wende wa pa Mukuna, wakajadikila bapostolo bende ne bantu bakuabu bualu ebu ne: buluishi ebu kabuvua menemene mua kuteka disanka divule divuabu nadi mu njiwu to. Bushuwa, Yezu wakaleja mene mudiku diumvuangana pankatshi pa disanka ne dikengeshibua dia bena Kristo! Mmunyi muvua dibakengesha mua kubapesha disanka?

Badi bakenga bua buakane

2. Bilondeshile Yezu ne mupostolo Petelo, ndikenga dia mushindu kayi didi difila disanka?

² Disanka dia muanda mukulu diakamba Yezu didi ne: ‘Bakakengeshibua bua buakane  buabu badi ne disanka, bua bukalenge bua mu diulu budi buabu.’ (Matayo 5:10) Padi muntu ukenga ki mbualu bua kumuelela kalumbandi to. Mupostolo Petelo wakafunda ne: ‘Butumbi budi penyi binuadikankamika panuenza bualu bubi ne badi banukuma? Kadi binuadikankamika panuenza bualu buimpe ne nudi nukenga, bualu ebu budi bua kusakidila ku mêsu kua Nzambi.’ Wakamba kabidi ne: ‘Kadi umue wenu kakengeshibu bu mushipianganyi, anyi bu muibi, anyi bu muenji wa malu mabi, anyi bu mudibueji wa mu malu a bantu bakuabu; kadi biakenga muntu bu muena Kristo, kikadi biende ne bundu, kadi atumbishe biende Nzambi bua dîna edi.’ (1 Petelo 2:20; 4:15, 16) Bilondeshile mêyi a Yezu, dikenga didi difila disanka patudi tuditantamena bua buakane.

3. (a) Kukengeshibua bua buakane kudi kumvuija tshinyi? (b) Dikengeshibua dia bena Kristo ba kumpala diakabenzela tshinyi?

³ Buakane bulelela budi bumuenekela ku dikumbaja dia disua dia Nzambi ne dia mikenji yende. Nunku kukenga bua buakane kudi kumvuija ne: muntu udi ukenga bualu udi ukandamena malu adibu bamusaka bua kuenza adi ashipa mikenji anyi mêyi a Nzambi. Balombodi bena Yuda bakakengesha bapostolo bualu bakabenga bua kulekela mudimu wa diyisha mu dîna dia Yezu. (Bienzedi 4:18-20; 5:27-29, 40) Bualu ebu buakakepesha disanka diabu ne kuimanyika mudimu wabu wa diyisha anyi? Nansha kakese! ‘Bakumuka kumpala kua bena tshilumbuluidi basanka bualu bua bakabadibua ne: mbakane bua kufuishibuabu bundu bualu bua dîna dia Yezu. Ku dituku ku dituku, mu ntempelo ne mu nzubu yabu, kabakalekela kuyisha bantu ne kubambila lumu luimpe ne: Yezu udi Kristo.’ (Bienzedi 5:41, 42) Pavuabu bakengesha bayidi nunku biakabapesha disanka ne biakavudija lukunukunu luabu mu mudimu wa diyisha. Pashishe, bakalua kukengesha bena Kristo ba kumpala kudi bena Lomo bualu bavua babenga kutendelela mukalenge wabu.

4. Ng’amue malu kayi adibu bakengeshila bena Kristo?

⁴ Mu bikondo bietu ebi, batu bakengeshe Bantemu ba Yehowa bualu badi babenga bua kulekela diyisha ‘lumu luimpe lua bukalenge.’ (Matayo 24:14) Padibu bakandika bisangilu biabu bia bena Kristo, badi bitaba bua kukenga pamutu pa kulekela kudisangisha mudi Bible ubambila bua kuenza. (Ebelu 10:24, 25) Mbabakengeshe bua dibenga kubuelakana mu malu a panu anyi bualu badi babenga mashi. (Yone 17:14; Bienzedi 15:28, 29) Nansha nanku, dilamata buakane mushindu’eu didi lelu dipesha basadidi ba Nzambi ditalala ne disanka divule dia mu mutshima.​—1 Petelo 3:14.

Badi babapenda bua bualu bua Kristo

5. Mbua bualu kayi bunene budibu bakengeshila basadidi ba Yehowa lelu?

⁵ Disanka dia tshitema divua Yezu muleje mu Muyuki wende wa pa Mukuna didi ditangila kabidi dikengesha dia bayidi. Wakamba ne: ‘Panupendabu ne panukengeshabu ne panushiminyinabu mashimi onso, bua bualu buanyi, nenuikale ne disanka.’ (Matayo 5:11) Bualu bunene budibu bakengeshila basadidi ba Yehowa budi se: kabena ba pa buloba ebu to. Yezu wakambila bayidi bende ne: ‘Bu nuenu bikale ba pa buloba, ba pa buloba bakadi kusua bantu babu; kadi bualu bua nuenu kanuena ba pa buloba, ngakunusungula mu ba pa buloba, nunku ba pa buloba badi nenu lukuna.’ (Yone 15:19) Bia muomumue, mupostolo Petelo wakamba ne: ‘Mu malu aa badi bakema bualu bua nuenu kanuena nuenda nabu too ne ku dipitshibua diodimue dia malu manyanguke, badi banupenda.’​—1 Petelo 4:4.

6. (a) Bua tshinyi badi bapenda ne bakengesha bashadile bela manyi ne balunda babu? (b) Bipendu ebi bidiku bikepesha disanka dietu anyi?

⁶ Tukadi bamone ne: bavua bakengesha bena Kristo ba kumpala bualu bavua babenga kulekela diyisha mu dîna dia Yezu. Kristo wakapesha bayidi bende mudimu eu: ‘Nenuikale bamanyi banyi [too] ne kumfudilu kua buloba.’ (Bienzedi 1:8) Bashadile bela manyi ba lulamatu bana babu ne Kristo, bambuluisha kudi balunda babu ba lulamatu ba mu ‘musumba munene,’ mbenze mudimu eu ne lukunukunu  luonso. (Buakabuluibua 7:9) Ke bualu kayi Satana udi uluangana mvita ne ‘tunkanunuina tuende tuakashala [tua “mukaji,” udi bulongolodi bua Nzambi bua mu diulu], tudi tutumikila mikenji ya Nzambi, ne tudi ne bumanyishi bua Yezu.’ (Buakabuluibua 12:9, 17) Tuetu Bantemu ba Yehowa tudi tumanyisha malu a Yezu, Mukalenge udi ukokesha mpindieu wa Bukalenge buikala mua kubutula mbulamatadi ya bantu idi itshiamakana bulongolodi bupiabupia bua Nzambi kumpala. (Danyele 2:44; 2 Petelo 3:13) Badi batupenda ne batukengesha bua bualu ebu, kadi tudi tudimona bena disanka bua kukenga bua dîna dia Kristo.​—1 Petelo 4:14.

7, 8. Mmalu kayi avua baluishi bashiminyina bena Kristo ba kumpala?

⁷ Yezu wakamba ne: bayidi bende badi ne bua kuikala anu bena disanka nansha padi bantu ‘babashiminyina mashimi onso’ bua bualu buende. (Matayo 5:11) Ke tshivua tshienzekele bena Kristo ba kumpala. Pavuabu bakuate mupostolo Paulo mu Lomo bu mu 59-61 bikondo bietu ebi, balombodi ba bena Yuda bavuamu bakamba bua bena Kristo ne: ‘Bualu bua tshisumbu etshi, tudi bamanye ne: badi batshibanda kuonso.’ (Bienzedi 28:22) Bakabanda Paulo ne Sila babamba muvuabu ‘batombuesha bonso ba pa buloba’ ne ‘benza malu adi ashipa mikenji ya Kaisa.’​—Bienzedi 17:6, 7.

⁸ Kenneth Scott Latourette mufundi wa miyuki ya kale wakamba bua bena Kristo ba mu tshikondo tshia Ampire wa bena Lomo wamba ne: “Bavua bababanda ne malu mashilangane. Bu muvua bena Kristo babenga kubuelakana mu malu a mikiya ya bantu bavua kabayi bena Kristo, bavua babamba muvuabu kabayi bitaba ne: Nzambi udiku. Bu muvuabu babenga kubuelakana mu malu a bungi avua bantu benza bu mudi mafesto a bantu bavua kabayi bena Kristo, manaya a mu tshibungi . . . , bavua babaseka bamba ne: mbakinyi ba bantu. . . . Bavua bamba ne: bena Kristo balume ne bakaji bavua badisangisha butuku . . . ne pashishe bavua benda masandi. . . . Bu muvua [Tshivulukilu tshia lufu lua Kristo] tshienzeka anu kumpala kua bena kuitabuja, biakasaka bantu bua kuendesha manungenyi ne: bena Kristo bavua pa tshibidilu balambula muana ne banua mashi ne badia munyinyi wende.” Kabidi, bu muvua bena Kristo ba kumpala babenga kutendelela mukalenge wa bena Lomo, bavua babamba muvuabu baluishi ba Mbulamatadi.

9. Ntshinyi tshiakenza bena Kristo ba mu bidimu lukama bia kumpala bua malu avuabu babashiminyina, ne nsombelu kayi udiku lelu?

⁹ Malu aa avuabu babashiminyine kaakapangisha bena Kristo ba kumpala bua kuenza mudimu uvuabu babapeshe wa kuyisha lumu luimpe lua Bukalenge to. Mu 60-61 bikondo bietu ebi, Paulo wakafika ku diamba bua ‘lumu luimpe’ luvua “lukuama mamuma ne ludiundadiunda” mu buloba bujima ne luvua ‘luambibue munkatshi mua bifukibua bionso muinshi mua diulu.’ (Kolosai 1:5, 6, 23) Bualu bua muomumue budi buenzeka lelu’eu. Badi babanda Bantemu ba Yehowa ne malu a dishima anu muvuabu babande bena Kristo ba mu bidimu lukama bia kumpala. Nansha nanku, lelu mudimu wa diyisha mukenji wa Bukalenge udi udiunda ne upesha aba badi bawenza disanka divule.

Badi basanka mudibu babakengesha anu muakenzabu baprofete

10, 11. (a) Mmunyi muakajikija Yezu diumvuija divuaye ufila bua disanka dia tshitema? (b) Bua tshinyi bavua bakengesha baprofete? Fila bilejilu.

¹⁰ Yezu wakajikija diumvuija divuaye ufila bua disanka dia tshitema ne mêyi aa: ‘Nusanke, bakakengesha baprofete nunku bakadi kumpala kuenu.’ (Matayo 5:12) Baprofete bavua Yehowa utuma bua kudimuija bena Isalele bapange lulamatu kabavua babakidila bimpe to, ne misangu mivule bavua babakengesha. (Yelemiya 7:25, 26) Mupostolo Paulo wakajadika bualu ebu pakafundaye ne: ‘Nengambe tshinyi kabidi? Bua musangu neunkepe [bua] kulonda bua [bakuabu] baprofete, bua ditabuja bakangata diteta dia tuseku ne mikumu, ne dia nkanu ne nzubu ya nkanu pa mutu.’​—Ebelu 11:32-38.

¹¹ Mu bukokeshi bua Ahaba Mukalenge mubi ne mukajende Izebele, bakashipa baprofete ba Yehowa ba bungi ku muele wa  mvita. (1 Bakelenge 18:4, 13; 19:10) Bakela muprofete Yelemiya mu tshikunyi ne panyima bakalua kumuela mu tshina tshia bitotshi. (Yelemiya 20:1, 2; 38:6) Bakela muprofete Danyele mu buina bua ntambue. (Danyele 6:16, 17) Bakakengesha baprofete bonso aba ba kumpala kua Buena-Kristo bualu bavua babingisha ntendelelu mulelela wa Yehowa. Balombodi ba malu a ntendelelu bena Yuda ke bakakengesha baprofete ba bungi. Yezu wakabikila bafundi ne Bafalese ne: ‘bana ba bashipi ba baprofete.’​—Matayo 23:31.

12. Bua tshinyi tuetu Bantemu ba Yehowa tudi tumona bu diakalenga padibu batukengesha anu muakenzabu baprofete kale?

¹² Lelu, tuetu Bantemu ba Yehowa batu misangu mivule batukengesha bualu tudi tuyisha lumu luimpe lua Bukalenge ne lukunukunu. Baluishi betu badi batubanda mutudi “tushintuluisha bantu ditabuja ku bukole,” kadi tudi bamanye ne: bakamba batendeledi ba Yehowa ba lulamatu bavua kumpala kuetu malu a muomumue. (Yelemiya 11:21; 20:8, 11) Buetu tuetu ndiakalenga bua kukenga bua bualu bua muomumue buvuabu bakengeshile baprofete ba lulamatu ba kale. Muyidi Yakobo wakafunda ne: ‘Bana betu, nutangile baprofete bakamba [malu] mu dîna dia Mukalenge bu tshimanyinu tshia ditantamana dia mu makenga ne tshia lutulu. Monayi, tudi tuidika bantu bakadikankamika ne: badi ne disanka.’​—Yakobo 5:10, 11.

Malu manene atudi tusankila

13. (a) Bua tshinyi katuena tuteketa mu mikolo padibu batukengesha? (b) Ntshinyi tshidi tshituambuluisha bua kushala bashindame, ne bualu ebu budi bujadika tshinyi?

¹³ Pamutu pa tuetu kuteketa mu mikolo bua mudibu batukengesha, tudi tukola ku muoyo patudi tuvuluka ne: tudi tulonda mu makasa a baprofete, a bena Kristo ba kumpala ne a Kristo Yezu nkayende. (1 Petelo 2:21) Tudi tupeta disanka divule mu Mifundu, bu mudi mu mêyi adi alonda aa a mupostolo Petelo: ‘Bananga, kanukemi bua dikenga didi bu kapia munkatshi muenu diakaluila kunudi bu diteta, bu bualu bupiabupia buakanukuata. Bianupendabu bua dîna dia Kristo, nudi ne disanka; bualu bua nyuma wa butumbi ne nyuma wa Nzambi udi unuikila pambidi penu.’ (1 Petelo 4:12, 14) Malu atukadi bamone adi atujadikila ne: tudi ne mushindu wa kushala bashindame padibu batukengesha anu bualu nyuma wa Yehowa udi pambidi petu ne udi utukolesha. Dikuatshisha dia nyuma muimpe didi tshijadiki tshia se: Yehowa udi utubenesha, ne bualu ebu budi butupesha disanka divule.​—Musambu 5:12; Filipoi 1:27-29.

14. Mmalu kayi adi atusaka bua kusanka padibu batukengesha bua buakane?

¹⁴ Bualu bukuabu budi buenza bua se: tuikale ne disanka padibu batuluisha ne batukengesha bua buakane budi ne: bidi bijadika mutudi ne nsombelu wa bena Kristo balelela badi balamate Nzambi. Mupostolo Paulo wakafunda ne: ‘Bonso badi basue kulamata [Nzambi mu buobumue] ne Yezu Kristo nebakengeshibue.’ (2 Timote 3:12, MML) Tudi ne disanka dia bungi  menemene bua kuikala bamanye ne: patudi tushala ne lulamatu mu mateta tudi tufila kabidi diandamuna bua tshilumbu tshivua Satana mujule tshia se: bifukibua bionso bia Yehowa bidi bimusadila anu bua kupetabi masanka. (Yobo 1:9-11; 2:3, 4) Tudi tusanka bua mutudi petu tubingisha nansha kakese menemene bukokeshi buakane bua Yehowa.​—Nsumuinu 27:11.

Nutumpike ne disanka bua difutu

15, 16. (a) Mbualu kayi buakamba Yezu butudi ne bua ‘kusankila ne kutumpikila ne disanka’? (b) Ndifutu kayi didibu balamine bena Kristo bela manyi mu diulu, ne ntshinyi tshiafutabu balunda babu “mikoko mikuabo”?

¹⁵ Yezu wakamba bualu bukuabu butudi ne bua kusankila padibu batushiminyina malu ne batukengesha muakenzabu baprofete ba kale. Pabuipi ne ku ndekelu kua disanka dia tshitema, wakamba ne: ‘Nusanke, [nutumpike ne disanka], bualu bua difutu dienu didi mu diulu ndinene.’ (Matayo 5:12) Mupostolo Paulo wakafunda ne: ‘Difutu dia bubi ndufu, kadi dipa dia luse dia Nzambi mmuoyo wa tshiendelele mu Kristo Yezu Mukalenge wetu.’ (Lomo 6:23) Bulelela, ‘difutu dinene’ ndia muoyo, ne ki ndifutu ditudi tudipetela ku bukole buetu to. Ndipa dia luse. Yezu wakamba ne: difutu didi “mu diulu” bualu didi difumina kudi Yehowa.

¹⁶ Bela manyi badi bapeta “tshifulu tshia muoyo,” buabu bobu mmumue ne: muoyo udi kauyi ujimina mu diulu pamue ne Kristo. (Yakobo 1:12, 17) Aba badi ne ditekemena dia kupeta muoyo pa buloba, “mikoko mikuabo,” mbatekemene bua kupiana muoyo wa kashidi pa buloba bukudimuna mparadizu. (Yone 10:16; Buakabuluibua 21:3-5) Bua bisumbu ebi bionso bibidi, “difutu” edi ki ntshintu tshidibu badipetela ku bukole buabu to. Bela manyi ne “mikoko mikuabo” badi bapeta difutu diabu bua ‘[bulenga butambe bunene budi kabuyi butuakanyine]’ bua Yehowa, buakasaka mupostolo Paulo bua kuamba ne: ‘Tuasakidila kudi Nzambi bua kupa kuende kudi kakuyi mua kuambibua.’​—2 Kolinto 9:14, 15.

17. Bua tshinyi tudi mua kusanka padibu batukengesha ne mu ngakuilu wa tshimfuanyi ‘tutumpika ne disanka’?

 ¹⁷ Mupostolo Paulo wakafundila bena Kristo, bamue ba kudibu bavua ne bua kubakengesha mu tshitupa tshîpi amu kudi Amperere Néron, wamba ne: ‘Tutumbile bietu mu ntatu, tumanye ne: Ntatu idi yenzeja ditantamana, ne ditantamana didi dienzeja dijadikibua, ne dijadikibua didi dienzeja ditekemena ne ditekemena kadiena difuisha bundu.’ Kuambaye kabidi ne: “Nusanke mu ditekemena dienu; nuikale ne ditantamana mu makenga.” (Lomo 5:3-5; 12:12) Nansha bituikala ne ditekemena dia kupeta muoyo mu diulu anyi pa buloba, difutu ditudi tupeta bua lulamatu luetu mu ntatu ndinene kupita tshintu tshikuabu tshionso tshitudi mua kuikala bakanyine. Disanka ditudi nadi bua ditekemena dia kuikala ne muoyo wa kashidi ne dia kutumbisha ne kusadila Yehowa Tatu wetu wa dinanga ku bulombodi bua Mukalenge wetu Yezu Kristo kadiena kumvuija. Mu ngakuilu wa tshimfuanyi tudi ‘tutumpika ne disanka.’

18. Ntshinyi tshitudi mua kutekemena kudi bisamba bu mudi nshikidilu usemena pabuipi, ne ntshinyi tshienza Yehowa?

¹⁸ Mu amue matunga, batu bakengeshe Bantemu ba Yehowa ne batshitu anu babakengesha kabidi. Mu mulayi wende uvua utangila nshikidilu wa tshikondo etshi, Yezu wakamanyisha bena Kristo balelela ne: ‘Bisamba bionso nebikale nenu lukuna bua dîna dianyi.’ (Matayo 24:9) Bu mutudi tusemena pabuipi ne nshikidilu, Satana neasake bisamba bua kujudila basadidi ba Yehowa lukuna luabi. (Yehezekele 38:10-12, 14-16) Bualu ebu nebuikale tshimanyinu tshia dîba dikala Yehowa mua kukosa tshilumbu etshi. ‘Nemmueneshe bunene buanyi ne tshijila tshianyi, nendimanyishe ku mêsu kua bisamba bia bungi bia bantu. Nunku nebamanye ne: Meme ndi Yehowa.’ (Yehezekele 38:23) Yehowa neatumbishe dîna diende dinene ne neapandishe bantu bende ku makenga adibu babakengesha. Ke bualu kayi “muntu udi utantamana mu mateyi udi ne disanka.” —Yakobo 1:12.

19. Ntshinyi tshitudi ne bua kuenza patudi bindile ‘dituku dinene dia Yehowa’?

¹⁹ Bu mudi “dituku [dinene adi dia Yehowa]” ditamba kusemena pabuipi, tusankayi bualu tudi ‘babadibue bakane bua kufuishibua bundu’ bua dîna dia Yezu. (2 Petelo 3:10-13; Bienzedi 5:41) Anu bu bena Kristo ba kumpala, tutungunukayi katuyi ‘tulekela kuyisha bantu ne kubambila lumu luimpe [bua] Kristo’ ne Bukalenge buende patudi bindile difutu dietu mu bulongolodi bupiabupia ne buakane bua Yehowa.​—Bienzedi 5:42; Yakobo 5:11.

Diambulula

• Kukenga bua buakane kudi kumvuija tshinyi?

• Dikengesha dia bena Kristo ba kumpala diakabasaka ku tshinyi?

• Bua tshinyi tudi mua kuamba ne: badi bakengesha Bantemu ba Yehowa anu muakenzabu baprofete kale?

• Bua tshinyi tudi mua ‘kusanka ne kutumpika ne disanka’ padibu batukengesha?

[Nkonko ya dilonga]

[Bimfuanyi mu mabeji 16, 17]

‘Panupendabu ne panukengeshabu nenuikale ne disanka’

[Mêyi a dianyisha]

Bantu tshisumbu mu buloko: Chicago Herald-American