Nkonko ya babadi

Mmunyi mudi tshisumbu tshia bena Kristo tshimona budiavi?

Dîyi dia Nzambi didi dikandika dikuatshika dia maluvu ne budiavi bualu ntshikadilu tshidi katshiyi tshikumbanyine basadidi ba Nzambi. Ke bualu kayi tshisumbu tshia bena Kristo tshidi tshimona mudiavi mushindu wa muomumue ne mukuatshiki wa maluvu wa tshibidilu. Ni mmukuatshiki wa maluvu peshi mudiavi kabena ne mua kuikala mu tshisumbu tshia bena Kristo nansha.

Nsumuinu 23:20, 21 udi wamba ne: ‘Kuikadi munkatshi mua banu ba maluvu anyi munkatshi mua bena lumpukusu. Bualu bua mukuatshiki wa maluvu ne muena lumpukusu nebabuele mu bupele; tulu netuluatshishe muntu bilulu bisunsuke.’ Dutelonome 21:20 udi wamba ne: muntu uvua ne ‘tshitshu ne bupidia’ uvua muakanyine tshibawu tshia lufu mu Mikenji ya Mose. Bilondeshile mvese eu, ngikadilu ibidi ya ntomboji eu uvua kayi ushintuluka ivua se: uvua “muena lumpukusu ne mukuatshiki wa maluvu.” Bulelela, mu Isalele wa kale bavua bangata budiavi anyi lumpukusu bu tshilele tshivua katshiyi tshianyishibue bua bantu bavua basue kusadila Nzambi.

Kadi mudiavi nnganyi, ne ntshinyi tshidi Mifundu ya bena Kristo ya tshiena-Gelika yamba bua muanda eu? Mudiavi “mmuntu udi ne tshibidilu tshia kudia ne kunua ne lukuka lukole kayi ukuta to.” Nanku, budiavi ng’umue mushindu wa lukuka, pabi Dîyi dia Nzambi didi dituambila ne: “bena lukuka” kabakupiana Bukalenge bua Nzambi to. (1 Kolinto 6:9, 10; Filipoi 3:18, 19; 1 Petelo 4:3)  Kabidi, pavua mupostolo Paulo wambila bena Kristo bua kudimukilabu ‘malu a mubidi’ wakatela “bukuatshiki bua maluvu, manaya a bundu ne malu aa onso.” (Galatia 5:19-20) Kudia kupitshisha kutu misangu mivule kuenda pamue ne bukuatshiki bua maluvu ne manaya a bundu. Kabidi, budiavi budi munkatshi mua “malu aa onso” avua Paulo wamba. Anu mudibi bua ‘malu [makuabu] a mubidi,’ muena Kristo udi mumanyike bikole bua budiavi ne ubenga ne tshitunu tshionso bua kushintulula ngikadilu eu wa lukuka, udi ne bua kuipatshibua mu tshisumbu.​—1 Kolinto 5:11, 13. *

Nansha mudi Dîyi dia Nzambi diteka mukuatshiki wa maluvu ne mudiavi mu mulongo umue, mbitekete menemene bua kumanya mukuatshiki wa maluvu kupite mudiavi. Bimanyinu bia mukuatshiki wa maluvu bitu pa tshibidilu bimueneka patoke. Kadi bitu bikole menemene bua kujadika dîba didi muntu ulua mudiavi wa kalandamusenga bualu kabiena mua kumanyikila anu ku tshimuenekelu tshiende patupu to. Nunku, bidi bikengela bua bakulu ba tshisumbu bikale ne budimu ne bujinguludi bua bungi padibu bakosa bilumbu bidi bitangila muanda eu.

Tshilejilu, didiunda dipitshisha didi mua kuikala tshimanyinu tshia budiavi, kadi kabitu nanku misangu yonso to. Didiunda dipitshisha didi mua kuikala dikebesha kudi disama. Ngikadilu ya bena mu dîku idi muntu mupiane idi kabidi mua kumufikisha ku didiunda dipitshisha. Tudi ne bua kuikala bamanye kabidi ne: didiunda dipitshisha mbualu budi ku mubidi patupu, kadi budiavi mbualu budi mu lungenyi. Muntu udi mudiunde mupitshishe mmunene bikole menemene, kadi mudiavi udi udia ne lukuka luonso upitshisha. Nunku budiavi kabuena bumuenekela ku bunene bua muntu to, kadi ku mushindu udiye wangata biakudia. Muntu udi mua kuikala wa bunene bukumbanyine anyi mene mukese mukese kadi eku muikale mudiavi. Kabidi, bunene anyi bujitu bua muntu budi bantu bamona bu buimpe budi bushilangana bilondeshile muaba ne muaba.

Nku malu kayi kutudi mua kumanyina mudiavi? Pa tshibidilu mudiavi katu ne didikanda ne utu mene udia usukumina, ufika too ku dishala ne difu dikuyila peshi ubanga kusama. Bu mudiye kayi ne didikanda bidi bileja ne: kêna utshiuka nansha kakese bipendu bidiye upendeshisha Yehowa ne unyangisha lumu lua basadidi bende. (1 Kolinto 10:31) Ku lukuabu luseke, katuena mua kuangata diakamue muntu udi udia upitshisha mu mpukampuka bu “muena lukuka” to. (Efeso 5:5) Nansha nanku, bilondeshile lungenyi ludi mu Galatia 6:1, muena Kristo wa mushindu’eu udi mua kuikala dijinga ne diambuluisha. Paulo udi wamba ne: ‘Bana betu, bikala muntu mutulukile ku bualu bubi, nuenu badi [bakumbaje ngikadilu milomba ya] nyuma numupingaje kudi Nzambi ne mutshima wa kalolo.’

Bua tshinyi mubelu udi Bible ufila bua kuepuka didia dipitshisha udi ne mushinga wa bungi nangananga mu tshikondo tshietu etshi? Bualu Yezu wakadimuija nangananga bua mu matuku etu aa ne: ‘Nudilame bimpe, bua mitshima yenu kayinemi ne mudiu ne dibuluka dia maluvu ne malu a pa buloba, ne bua dituku adi kadilu kunudi lukasa bu buteyi.’ (Luka 21:34, 35) Kuepuka didia dipitshisha ke mushindu muimpe wa kuepuka nsombelu udi mua kutukebela ntatu ya mu nyuma.

Kuikala kudia pa ndilu anyi kunua pa nnuinu ngikadilu muimpe wa bena Kristo. (1 Timote 3:2, 11) Pa nanku, Yehowa neambuluishe bushuwa aba bonso badi bakeba ne muoyo mujima bua kutumikila mibelu ya mu Bible idi ilomba bua kuikala ne tshibidilu tshia kudia pa ndilu ne kunua pa nnuinu.​—Ebelu 4:16.

[Mêyi adi kuinshi]