Tshidi budipuekeshi bua Yehowa bumvuija buetu tuetu

DAVIDI uvua muntu wakapeta ntatu ya bungi. Bakamukengesha kudi Mukalenge Shaula tatuende muenu wa mukawu. Misangu isatu mijima Shaula wakakeba bua kushipa Davidi ne difuma, ne wakashala wenda wipatangana nende munkatshi mua bidimu bia bungi, ke Davidi kushala unyema anu kunyema. (1 Samuele 18:11; 19:10; 26:20) Kadi Yehowa uvua ne Davidi. Yehowa wakamusungila ki nganu kudi Shaula, kadi ne kudi baluishi bende bakuabu. Nunku tudi mua kujingulula meji avua nawu Davidi munda muende, akumvuijaye mu musambu ne: ‘Yehowa udi dibue dianyi, ne musoko wanyi wa lumbu ne musungidi wanyi mene. Wewe [Yehowa] wakumpa ngabu wa lupandu luebe; [budipuekeshi] buebe buakumvuija munene.’ (2 Samuele 22:2, 36) Davidi wakalua muntu munene mu Isalele. Kadi mmunyi mudi bualu ebu butangila budipuekeshi bua Yehowa?

Padi Mifundu yakula bua Yehowa bu muena budipuekeshi, kayena isua kuamba ne: udi ne mikalu mu malu kampanda anyi udi ukokela bantu bakuabu to. Kadi ngikadilu eu mulenga udi uleja ne: uvua ne luse lua bungi kudi bantu badi badienzeja ne muoyo mujima bua se: abanyishe ne yeye udi ubafua luse. Mu Musambu 113:6, 7, tudi tubala ne: ‘[Yehowa] udi winangila panshi bua kumona diulu ne buloba, udi ubisha mupele mu dimfuenkenya.’ Padiyi ‘winangila’ panshi bidi biumvuija ne: “udi winama bua kumona” anyi ne: “udi udipuekesha bua kutangila.” (MMM; Young’s Literal Translation of the Holy Bible) Nunku Yehowa mu diulu ‘wakinama’ yeye nkayende anyi ‘wakadipuekesha’ bua kutabalela Davidi, muntu mupange bupuangane kadi muena budipuekeshi uvua musue kusadila Nzambi. Ke bua tshinyi Davidi udi utujadikila ne: ‘Yehowa udi mubandishibue mulu, kadi udi umona bantu [badipuekeshi].’ (Musambu 138:6) Mushindu uvua Yehowa muenzele Davidi malu ne luse ne lutulu udi ukankamija bantu bonso badi bakeba kuenza disua dia Nzambi.

Nansha mudi Yehowa muikale Mukalenge udi ku mutu kua bionso ne muikale ne muanzu udi upita yonso mu diulu ne pa buloba, udi musue kudia malanda ne yonso wa kutudi. Muanda eu udi utupesha dishindika dia se: tudi mua kutekemena kudiye bua kupeta diambuluisha diende didi kadiyi mua kupangika nansha mu ntatu mitambe bukole. Kakuena  bualu bua kutshinyina se: neatupue muoyo to. Bua bidi bitangila tshisamba tshiende tshia Isalele wa kale, badi bamba bimpe bua Yehowa ne: ‘wakabavuluka pakadibu bantu bapuekele, bua luse luende ludi lujalame tshiendelele.’​—Musambu 136:23.

Tuetu basadidi ba Yehowa ba lelu tudi mua kupeta malu makole anu bu Davidi. Bidi mua kuikala ne: badi batuseka kudi bantu badi kabayi bamanye Nzambi, anyi pamu’apa tudi tuluangana ne masama peshi tudi bafuishe. Nansha tuetu mu nsombelu kayi, bikala mutshima wetu muimpe, tudi mua kusemena kudi Yehowa mu disambila bua kumulomba luse. Yehowa ‘neiname’ bua kututangila ne bua kuteleja masambila etu. Mufundi wa Misambu muenzeja kudi nyuma wa Nzambi wakafunda ne: ‘Mêsu a Yehowa adi kudi bakane, ne matshi ende adi buashi ku kudila kuabu.’ (Musambu 34:15) Kabienaku bilenga mutshima webe bua kuelangana meji bua ngikadilu eu mulenga wa budipuekeshi udi nende Yehowa anyi?

[Bimfuanyi mu dibeji 30]

Anu muvuaye uteleja masambila a Davidi, Yehowa mmusue kuteleja masambila etu lelu