Malu a mu nsombelu

Tuakangata dipangadika dikole dia kulamata bukokeshi bua Nzambi

MALONDA KUDI MICHAL ŽOBRÁK

Meme mumane kuenza ngondo mujima mu buloko bua nkayanyi, bakampatula bua kungela nkonko. Mutantshi eu, luonji kubandalu muntu uvua ungela nkonko au kuelayi dîyi dikole ne: “Batentekedi! Batentekedi ba bena Amerike!” Ntshinyi tshiakamujula tshiji tshikole nunku? Uvua ufuma ku dingebeja ne: udi muena tshitendelelu kayi? Meme kumuandamuna ne: “Ndi Ntemu wa Yehowa.”

BUALU ebu buvua buenzeke kukadi bidimu bipite pa makumi atanu. Tshikondo atshi ditunga dimvua musombele divua ku bukokeshi bua Ba-Koministe. Kadi kumpala kua tshikondo atshi, bakavua bamone muvuabu baluishe bikole mudimu wetu wa bena Kristo wa dilongesha.

Dikenga kutukuata bua bualu bua mvita

Mvua ne bidimu muanda mukulu pakatuadija Mvita ya Kumpala ya Buloba bujima mu 1914. Dîba adi, musoko wetu wa Zálužice uvua ku bukokeshi bua Ampire wa bena Autriche ne bena Hongrie. Mvita kayivua anu minyange malu pa buloba, kadi ivua kabidi mimfikishe meme muana mutekete ku ditata ne midimu ya bantu bakole. Muvua tatuanyi musalayi, wakafua anu mu tshidimu tshia ntuadijilu tshia mvita ayi. Tuakashala mu bupele bukole ne mamu ne bakunyi banyi ba bakaji babidi. Bu mumvua muan’abute wa balume nkayanyi, ngakashala ne malu a bungi a kuenza ku nzubu ne mu budimi bukese butuvua nabu. Katshia ku buana buanyi, mvua munange malu a Nzambi bikole. Mpasata wa mu tshitendelelu tshietu tshia Mishonyi uvua undomba bua kuangata muaba wende bua kulongesha balongi nanyi pavuaye kayiku.

Mvita ya Kumpala ya Buloba bujima yakajika mu 1918, tuetu kupetaku disulakana. Bakakulula Ampire wa bena Austriche ne bena Hongrie, tuetu kulua bena ditunga dia Tchécoslovaquie. Matuku makese, bantu ba bungi ba mu ditunga dietu bavua bamuangale baye mu États-Unis kutuadijabu kupingana. Umue wa kudibu uvua Michal Petrík uvua  mulue mu musoko wetu mu 1922. Pakaluaye kumona bena mutumba netu, bakatubikila petu meme ne mamu kumbelu kuabu.

Bukokeshi bua Nzambi budi bulua bualu bulelela kutudi

Michal uvua Mulongi wa Bible (muvuabu babikila Bantemu ba Yehowa tshikondo atshi), kuakulaye malu a mushinga mukole a mu Bible akakoka ntema yanyi. Mu malu aa muvua bualu bua dilua dia Bukalenge bua Yehowa. (Danyele 2:44) Pakambaye ne: kuvua tshisangilu bia bena Kristo mu musoko wa Záhor mu Dia lumingu divua kumpala, ngakangata dipangadika dia kuyamu. Ngakajuka pa dîba 4:00 wa dinda, meme kuenda mutantshi wa kilometre bu muanda mukulu too ne kua muana wa muanabu ne muledi wanyi bua kusomba dikalu. Pangakajikija kulongolola ndundu wa dikalu uvua mufue, ngakenda kilometre mikuabu 24 bua kufika ku Záhor. Tshivua mumanye muaba uvua tshisangilu mua kuenzekela to, ke meme kutuadija kuenda bitekete bitekete ndonda njila umue. Pashishe meme kumvua bimba musambu mukuabu wa Bukalenge mu nzubu kampanda. Mutshima wanyi kusanka bikole. Meme kuapuka kubuela mu nzubu au e kumvuija tshimvua mubuelelamu. Bena kumbelu aku kumbikilabu bua meme kunua nabu tshiayi tshia mu dinda, ke bobu kuya nanyi mu bisangilu. Nansha mumvua ne bua kuenda ne dikalu ne ku makasa mutantshi wa kilometre mikuabu 32 bua kupingana kuetu, tshiakadiumvua mutshioke to.​—Yeshaya 40:31.

Mvua ne disanka dikole bua diumvuija ditoke divua Bantemu ba Yehowa bafile pa malongesha a mu Bible. Ditekemena dia kuikala ne nsombelu muimpe muule tente ne disanka mu bukokeshi bua Nzambi diakalenga mutshima wanyi bikole. (Musambu 104:28) Meme ne Mamu tuakangata dipangadika dia kutumina tshitendelelu tshietu mukanda wa diumbukamu. Bualu abu buakajudija dikokangana dikole mu musoko wetu mujima. Bamue bantu bakatujila matuku ndambu, kadi tuvua bulunda bukole ne Bantemu ba bungi ba tshitupa tshietu atshi. (Matayo 5:11, 12) Matuku makese kunyima kua bualu ebu, meme kutambula mu Musulu wa Uh.

Mudimu wa buambi udi ulua nsombelu wetu mujima

Tuvua tuyisha Bukalenge bua Yehowa dîba dionso pavuaku mpunga. (Matayo 24:14) Tuvua tupita kuenza nangananga mudimu wa diyisha wa mu Dia lumingu dionso uvuabu balongolole bimpe. Tshikondo atshi bu muvua bantu bavua ne tshibidilu tshia kujuka patshiatshia bua kuenza midimu, tuvua tutuadija kuyisha kumpala kua dîba. Ku dilolo tuvua tubuela mu tshisangilu tshivua bantu bonso mua kubuela. Bantu bavua balongeshamu malu a mu Bible bavua batamba kuakula kabayi benda babala pa mabeji to. Bavua batangila bungi bua bantu bavua banange bulelela, bitendelelu bivuabu bafumine, ne malu avuabu nawu dijinga.

Bulelela bua mu Bible butuvua balongeshe buakatabeja mêsu a bantu ba bungi bavua ne mutshima muakane. Matuku makese kunyima kua ditambula dianyi, ngakatuadija kuyisha mu musoko wa Trhovište. Ku nzubu mukuabu nunku, meme kuyukila ne mukaji mukuabu malu mimpe ne wa bulunda, Inabanza Zuzana Moskál. Yeye ne ba mu dîku diende bavua bena Mishonyi ya Calvin mumvua kumpala. Nansha muvuaye muibidilangane ne Bible, uvua ne nkonko ya bungi pa malu a mu Bible ivuabu kabayi banji kumuandamuna to. Tuakayukila nende dîba dijima, meme kumupesha mukanda wa Lunkombe lua Nzambi (Angl.). *

Diakamue bena mu dîku dia Moskal kubangabu kuikala babala mukanda wa Lunkombe mu ndongamu wabu wa dibala dia Bible dia tshibidilu. Mêku a bungi a mu musoko au akapeta dijinga dia kumanya bivule ne kutuadijawu kubuela mu bisangilu bietu. Mpasata wabu muena Mishonyi wakabadimuija bikole bua bualu buetu ne bua mikanda yetu. Pashishe bamue bantu bavua ne dijinga dia kumanya bivule bakalomba mpasata eu bua kuluaye mu bisangilu bietu bua kuleja patoke muvua malongesha etu mikale a dishima.

Mpasata kuluaye, kadi kakaleja bualu nansha bumue bua mu Bible bua kubingisha malongesha ende nansha. Bua kudibingisha wakamba ne: “Katuena mua kuitaba malu onso a mu Bible to. Bakamufunda kudi bantu, ne malu a Nzambi badi mua kuumvuija mu mishindu mishilashilangane.” Bualu ebu buakafikisha bantu ba bungi ku dishintuluka. Bamue kuambila mpasata ne: yeye kayi muitabe Bible, kabena mua kuya kuteleja kabidi mayisha ende to. Ke bualu kayi bakakosa makasa mu Mishonyi, ne bantu bu 30 ba mu musoko au kulamatabu bulelela bua mu Bible ne muoyo mujima.

 Diyisha dia lumu luimpe lua Bukalenge diakalua nsombelu wetu mujima, nunku bu mumvua nkeba mukaji wa kusela, mvua nkeba mukaji uvua mu dîku divua dishindame mu nyuma. Umue wa ku benzejanganyi nanyi ba mudimu uvua Ján Petruška uvua mulongele bulelela mu États-unis. Muanende wa bakaji Mária uvua unkemesha bua mushindu uvuaye mudiakaje bua kuyisha muntu yonso, anu muvua tatuende wenza. Mu 1936 ngakasela Mária, kuluaye muenzejanganyi nanyi wa mudimu muena lulamatu mu bidimu 50 bijima too ne ku lufu luende mu 1986. Eduard muanetu umuepele wa balume wakaledibua mu 1938. Kadi tshikondo atshi, bivua bimueneka ne: mvita mikuabu ikavua pa kubudika ku Mputu. Mmushindu kayi uvuayi mua kushintulula mudimu wetu wa buambi?

Tudi tutetshibua bua dibenga kubuelakana dietu mu malu a panu

Pakatuadija Mvita Mibidi ya Buloba bujima, tshitupa tshia Slovaquie (tshiakalua ditunga ditapuluke) tshivua ku bukokeshi bua bena Nazi. Kadi, mbulamatadi kavua muanji kuangatshila bulongolodi bua Bantemu ba Yehowa dipangadika kampanda dibi nansha. Nansha nanku, tuvua tuenza mudimu wetu mu musokoko, ne bavua bakonkonona kabidi mikanda yetu bua kumona ni muvua bualu bubi. Tshibi tuvua batungunuke anu ne kuenza midimu yetu ne budimu buonso.​—Matayo 10:16.

Pakakola mvita, bakankuata bua kumbueja mu busalayi ku bukole nansha munkavua ne bidimu bipite pa 35. Bu mumvua muena Kristo, ngakabenga kuditua mu mvita bua kubenga kubuelakana mu malu a panu. (Yeshaya 2:2-4) Diakalenga, kumpala kua bamfumu kungangatshilabu dipangadika, bakalekela bantu bonso ba bukole buanyi!

Tuakamona muvuabi bikole bua bana betu bavua mu bimenga kupetabu bintu bia kudikuatshishabu nabi kupita tuetu bavua ku misoko. Tuakajinga bua kupeshangana bintu bituvua nabi. (2 Kolinto 8:14) Ke bualu kayi tuvua tuambula biakudia bungi butuvua mua kukokesha, tuenda mutantshi wa kilometre mipite pa 500, tupitshila mu misoko batangile ku Bratislava. Bulunda buetu bua bena Kristo ne dinanga diakatusuika tshikondo tshia mvita biakatuambuluisha mu bikondo bikole bivua ne bua kulua.

Tuakapeta dikankamija dituvua tukengela

Kunyima kua Mvita Mibidi ya Buloba bujima, Slovaquie wakalua kabidi tshitupa tshia ditunga dia Tchécoslovaquie. Kumbukila mu 1946 too ne mu 1948 mpungilu ya Bantemu ba Yehowa ba ditunga dijima ivua yenzekela mu Brno anyi mu Prague tshidimu tshionso. Tuetu bavua bumbukila ku Est kua Slovaquie tuvua tuya ne tuwulu tua pa buatu tulongolola bua bavua baya ku mpungilu. Udi mua kubikila tuwulu atu ne: ntuwulu tudi tuimba, bualu tuvua tuimba misambu njila mujima.​—Bienzedi 16:25.

Mpungilu undi ntamba kuvuluka ngua mu 1947 uvua muenzeke mu Brno muvua muanetu Nathan Knorr munkatshi mua batangidi bena Kristo basatu  bakabuelemu, bafumine ku biro bidi bilombola midimu yetu pa buloba bujima. Bua kumanyisha bantu bualu bua muyuki wa patoke, ba bungi ba kutudi bakenda mu tshimenga atshi benda baleja mabaya mafunda tshiena-bualu atshi. Eduard muananyi wa balume utshivua pin’apu ne bidimu tshitema wakanyingalala bikole pavuaye kayi mupete diende dibaya. Ke bana betu bena Kristo kuenzelabu Eduard ne bana bakese bakuabu ba bungi tuabu tubaya tua mu bukese. Bana aba bakenza mudimu muimpe wa dikema wa dimanyisha bualu bua muyuki au!

Mu ngondo muibidi wa tshidimu tshia 1948 Ba-Koministe bakangata bukalenge. Tuvua bamanye ne: kamana kamana mbulamatadi neakandike mudimu wetu. Tuakenza mpungilu mu tshimenga tshia Prague mu ngondo wa tshitema wa 1948, kadi tuakumvua bibi menemene bua mushindu ukavuabu pa kutukandika bisangilu bietu bia patoke anu panyima pa bidimu bisatu patupu bia dituanyishila bua kuenza bisangilu. Kumpala kua kupatuka mu mpungilu eu, tuakangata dipangadika divua munda muadi ne mêyi aa: “Tuetu Bantemu ba Yehowa badi badisangishe pamue . . . tudi bangate dipangadika dia kuvudija mudimu wa disanka eu bikole menemene, ne bua luse lua Mukalenge, tudi ne dipangadika dia kutungunuka nansha mu bitshia ne bikondo bikole ne kuyisha lumu luimpe lua bukalenge bua Nzambi ne lukunukunu lua bungi menemene.”

“Baluishi ba mbulamatadi”

Ngondo ibidi patupu kunyima kua mpungilu wa ku Prague, bampulushi batu benza mudimu wabu muinshimuinshi bakabuelela bena ku Betele uvua pabuipi ne Prague. Kunyengabu nzubu, mikanda yonso ivuabu bapete ne kukuatabu bena dîku dia Betele bonso ne bana betu bakuabu. Kadi malu makuabu avua ne bua kulua.

Butuku bua dia matuku 3 bua kutshia dia matuku 4 a ngondo muibidi 1952, bampulushi bakasapalala mu ditunga dijima e kukuatabu Bantemu bapite pa 100. Mvua panyi munkatshi mua Bantemu abu. Pa dîba isatu patshiatshia, bampulushi bakatubisha bonso dîku dianyi dijima. Kadi kabayi bamba bualu bukuabu, kungambilabu bua meme kuya nabu. Bakangela minyote e kunsuikabu kalamba ku mêsu, bobu kutukupa ne bantu bakuabu ndambu mu tshisasa tshia mashinyi. Kuyabu kungela mu buloko bua nkayanyi.

Ngakenza ngondo mujima kakuyi muntu ungakuisha. Muntu umuepele umvua mmona uvua anu njamu uvua umfunyikila tubiakudia tukese pa disoso divua ku tshiibi. Pashishe bakambikila kudi muntu wakangela nkonko umvua muambe bualu buende ku mbangilu au. Pavuaye mumbikile mutentekedi apu, wakamba kabidi ne: “Malu a nzambi ndipanga kumanya patupu. Nzambi kênaku to! Katuena mua kukulekela udinga bena mudimu betu to. Pikalabu kabayi bakukudika ku muonji, neubolele anu mu buloko emu. Bu Nzambi webe au mua kufika muaba eu, tuvua kumushipa kabidi!”

Bu muvua bamfumu bamanye ne: kakuvua mukenji musunguluke uvua ukandika midimu yetu ya buena Kristo, bakajinga bua kubikila midimu yetu mushindu mukuabu bua kupetanganabi ne mikenji ivuaku, batubikila ne: “baluishi ba Mbulamatadi” ne batentekedi batuma kudi ditunga dikuabu. Bua kukumbajabu meji abu au, bavua ne bua kuanji kutekesha dipangadika dietu ne kutufikisha ku “ditonda” malu a dishima avuabu bobu batubanda nawu. Pakajikijabu nkonko butuku abu, bakabenga bua meme kulala. Mu mutantshi wa mêba makese, kungelabu kabidi nkonko. Dîba adi mungedi wa nkonko au uvua ujinga bua meme kutua tshiala pa mukanda uvua ne mêyi amba ne: “Meme muluishi wa ditunga dia Tchécoslovaquie wa Mungalata ne wa Bantu tshivua muye ku [madimi a mbulamatadi] bualu mvua muindile bena Amerike.” Pangakabenga bua kutua tshiala pa mukanda wa dishima au, bakangela mu kazubu ka dinyokelangana.

 Bakankandika bua kulala anyi kusomba. Mvua ne bua kushala anu muimane kulu anyi kuenda. Pangakapungila, ngakadiadija panshi mu sima. Ke banjamu kumpingaja kabidi mu biro bia uvua ungela nkonko. Au kungebeja ne: “Mpindieu udi utua tshiala pa mukanda anyi?” Pangakabenga tshiakabidi, wakantuta tshintu mu mpala. Mashi kubanga kumpatuka. Ke kubulukilaye banjamu ne: “Mmusue kudishipa. Mulamayi bua kadishipi to!” Bobu kumpingaja kabidi mu buloko bua nkayanyi. Bakambulula mayele abu a dingela nkonko au misangu ne misangu munda mua ngondo isambombo. Lungenyi nansha lumue lua mua kungitabijija malu a tshididi anyi mayele a kumfikisha ku ditaba mumvua muluishi wa Mbulamatadi kabiakatekesha dipangadika dianyi dia kushala ne muoyo mutoke kumpala kua Yehowa nansha.

Ngondo umue kumpala kua meme kupita ku tshilumbuluidi, mulumbuluidi wa mbulamatadi (procureur) mukuabu mufume ku Prague wakalua kuela yonso wa kutudi tuetu bantu 12 nkonko. Wakangebeja ne: “Matunga a ku Ouest owu madisange bua kuluisha ditunga dietu, ntshinyi tshiudi mua kuenza?” Meme ne: “Anu tshimvua muenze pavua Hitler ne bena ditunga edi baluishe ditunga dia URSS atshi. Tshikondo atshi tshiakaluangana to, nansha mpindieu kabidi tshiena mua kuluangana to, bualu ndi muena Kristo ne tshitu mbuelakana mu mvita to.” Ke kungambilaye ne: “Katuena mua kuanyisha Bantemu ba Yehowa nansha. Matunga a ku Ouest owu madisange bua kutuela mvita, netuikale dijinga ne basalayi, kabidi tudi dijinga ne basalayi bua kupikula bena mudimu badi mu matunga a ku Ouest.”

Dia 24 ngondo wa muanda mutekete 1953, bakatupitshisha ku tshilumbuluidi. Bakatubikila bonso buetu 12, umue ku umue, kumpala kua kasumbu ka banzuji. Tuakabamanyisha bualu bua ditabuja dietu mutuvua bapete mpunga au. Patuakafila mandamuna etu bua malu onso avuabu batushiminyine, mulumbuluidianganyi mukuabu wakajuka e kuamba ne: “Nkadi muenze mudimu misangu ya bungi ku kabadi aka. Pa tshibidilu bantu ba bungi batu batonda malu abu mabi, banyingalala bualu buawu, badila too ne miadi. Kadi bantu aba bayaya bikale ne bukole bupite ne bua pavuabu bafike muaba eu.” Pashishe, bakamba ne: tuetu bonso 12 tuvua ne tshibawu tshia batungidi ba Mbulamatadi. Bakankosela buloko bua bidimu bisatu ne kunnyengabu bintu bianyi bionso kudi Mbulamatadi.

Bukulakaje ki mbumpangishe mudimu nansha

Pangakapingana kumbelu, bampulushi ba malu a muinshi muinshi bavua anu benda bambutamina. Nansha nanku, ngakabanga kabidi midimu yanyi ya mu nyuma, kuntekabu mutangidi mu tshisumbu tshietu. Nansha muvuabu batuanyishile bua kusomba mu nzubu ukavuabu batunyenge au, mbulamatadi wakatupingajilaye anu kunyima kua bidimu bitue ku 40 pakavua bukokeshi bua Ba-Koministe bukuluke.

Tshivua nkayanyi mu dîku dianyi uvua mubuele mu buloko to. Pangakenza bidimu bisatu patupu kumbelu, bakajinga kubueja Eduard ku busalayi ku bukole. Bua kuondo kende ka muoyo kavua kalongesha kudi Bible, wakabenga ne kumuelabu mu buloko. Kunyima kua bidimu, munkananyi Peter wakapetangana pende ne lutatu lua muomumue elu nansha muvuaye muena masama.

Mu 1989 bukalenge bua Ba-Koministe bua mu Tchécoslovaquie buakakuluka. Ndisankapu kayi bunene dimvua nadi dia kuyisha dîba adi ne budikadidi buonso ku nzubu ne ku nzubu kunyima kua bidimu makumi anayi bivuabu batukandike! (Bienzedi 20:20) Pamvua ne makanda a mubidi mvua ngenza mudimu eu ne disanka. Mpindieu unkadi ne bidimu 98, tshitshiena ne bukole bumvua nabu kuonso eku to, kadi ndi ne disanka bua mundiku anu mua kumanyisha bantu malu a dikema adi Yehowa mulaye bua matuku atshilualua.

Ndi mua kubala balombodi 12 ba matunga atanu akalombola tshimenga tshietu. Munkatshi muabu muvua batshikokesha-nkaya, bamfumu ba matunga, ne mukalenge. Nansha umue wa kudibu kakajikija bua musangu mule malu avua atatshisha bantu mu bukokeshi buende to. (Musambu 146:3, 4) Ndi ne dianyisha kudi Yehowa bua muvuaye muanyishe bua meme kumumanya ku buana buanyi. Nunku ngakafika ku dijingulula mushindu waluaye kujikija ntatu yonso ku diambuluisha dia Bukalenge bua Masiya ne kuepuka nsombelu wa patupu udi nende badi kabayi bamanye Nzambi. Ndi muyishe lumu ludi lutambe buimpe ne tshisumi tshionso munkatshi mua bidimu bipite pa 75 ne ndumpeshe nsombelu udi ne tshipatshila, disanka ne ditekemena dimpe dia muoyo wa tshiendelele pa buloba. Tshikuabu ntshinyi tshimvua mua kukeba kabidi? *

[Mêyi adi kuinshi]

[Tshimfuanyi mu dibeji 26]

Matuku makese kunyima kua diselangana

[Tshimfuanyi mu dibeji 27]

Meme ne Eduard ku mbangilu kua bidimu bia 1940

[Tshimfuanyi mu dibeji 27]

Dimanyisha dia mpungilu mu Brno mu 1947