Udi mumanye disanka didi difumina ku dipa anyi?

MMUANETU wa bakaji wa lulamatu ukavua muenze bidimu bitue ku 50 mu mudimu wa bena Kristo. Nansha mukavua bukulakaje bumutekeshe mubidi, uvua mupangadije bua kuya ku Nzubu wa Bukalenge uvuabu bafuma ku diasa. Bu muvuaye wenda bamukuata ku diboko kudi muanetu mukuabu wa balume, wakabuela mu nzubu eu ne kuyaye bitekete bitekete mutangile buludiludi too ne ku kashete ka mapa a budisuile. Wakelamu makuta makese avuaye mulame bua kufila bua Nzubu wa Bukalenge eu mupiamupia. Nansha muvuaye kayi mua kuenza mudimu wa kuibaka nzubu eu, tshivuaye uvua musue kufila diende diambuluisha.

Muanetu wa bakaji eu udi mua kukuvuluija muntu mukaji mukuabu wa lulamatu, ‘mukaji mupele wa mu lufuila’ uvua Yezu mumone wela tukuta tubidi tukese mu tshibutshilu tshia mu ntempelo. Bible ki mmutuambile bua nsombelu wende to, kadi mukaji uvua kayi ne mulume tshikondo atshi uvua ne bua kuikala ne lutatu lukole lua kupeta mfranga. Bushuwa Yezu wakamumvuila luse bualu wakajingulula bimpe lutatu luende. Pakamulejaye bu tshilejilu kudi bayidi bende, wakamba ne: dipa diende dikese edi ke ‘bintu biakadiye nabi bualu, biende bionso bia kudia menemene.’​—Mâko 12:41-44.

Bua tshinyi mukaji muena dikenga bu mudi mukaji mukamba ne mupele eu wakafila kende konso kavuaye naku? Mbimueneke patoke se: mbualu uvua mudifile bikole kudi Yehowa Nzambi, uvua ne ntempelo mu Yelushalema. Nansha muvuaye kayi mua kufila bia bungi, wakajinga bua kutungunuja mudimu wa tshijila ne kabidi uvua ne bua kuikala mumvue disanka dilelela bua muvuaye mufile tshiende tshivuaye natshi.

Kufila mapa bua mudimu wa Yehowa

Kufila bintu anyi mfranga kutu misangu yonso bumue bua ku malu a mushinga a mu ntendelelu mulelela, ne kutu kupetesha disanka dia bungi. (1 Kulondolola 29:9) Mu Isalele wa kale bavua bangata mapa avuabu bafila bua kulengeja ntempelo ne kabidi bua malu onso a ntendelelu wa Yehowa kuikalawu enda bimpe ku dituku ne ku dituku dionso edi. Mikenji ivua ileja patoke ne: bena Isalele bavua ne bua kufila tshia dikumi tshia bintu bivuabu bapeta bua kukuatshisha bena Lewi bavua benza midimu ya mu ntempelo. Kadi bena Lewi pabu bavua ne bua kupesha Yehowa tshia dikumi tshia bintu bivuabu babapesha.​—Nomba 18:21-29.

Nansha muvua bena Kristo kabatshiyi balombibue bua kulonda malu avua tshipungidi tshia Mikenji tshilomba, dîyi divua dilomba  basadidi ba Nzambi bua bafile mapa bua ntendelelu mulelela kadiakashintuluka to. (Galatia 5:1) Kabidi, bena Kristo ba mu bidimu lukama bia kumpala bavua bangata bualu ebu bu disanka pavuabu bafila bintu biabu bua kukumbaja majinga a bana babu. (Bienzedi 2:45, 46) Mupostolo Paulo wakavuluija bena Kristo ne: anu muvua Nzambi mubapeshe bintu bilenga ne kalolo, nunku bobu pabu bavua ne bua kuleja bakuabu kalolo. Wakafunda ne: ‘Udimuije bantu badi babanji mu tshikondo tshia mpindieu, bua bobu kabadisu, kabateki ditekemena diabu kudi bubanji budi mua kujimina tshitupa tshîpi; kadi batekemene Nzambi, udi utupa bintu bionso bivule bua tuetu kusanka nabi. Bobu benzele bakuabu bimpe, bikale ne bubanji bua bienzedi bimpe; badilongolole bua kupangana bintu; basue kuikala ne bakuabu luse; badibutshile bidi bitekibue bimpe bua matuku alualua, bua bobu balamate muoyo udi muoyo wa bushuwa mene.’ (1 Timote 6:17-19; 2 Kolinto 9:11) Bushuwa, malu avua Paulo mudimuenene akamusaka bua kujadika mêyi a Yezu a ne: ‘Kupa kudi kutamba kuangata kusankisha muntu.’​—Bienzedi 20:35.

Mapa adi bena Kristo bafila lelu

Lelu, basadidi ba Yehowa badi batungunuka ne kuambuluishangana ne bintu biabu ne bafila mapa kabidi bua mudimu wa Nzambi. Nansha aba badi ne bintu bikese badi pabu bafila tshidibu natshi. “Mupika wa lulamatu ne wa budimu” udi udimona ne bujitu ku mêsu kua Nzambi bua kutula mfranga idibu bafila eyi bimpe menemene. (Matayo 24:45, NW) Makuta aa badi baatula bua midimu idi yenzeka ku biro bia filiale, ya dikudimuna ne dipatula Bible ne mikanda yetu mikuabu, kulongolola bisangilu binene bia bena Kristo, kulongesha ne kutuma batangidi bena-ngendu ne ba-misionere, kuambuluisha badi bipupu bikuata, ne bua malu makuabu adi akengedibua. Tuimanyinayi pa bumue bua ku malu aa: kufila mfualanga bua kuibakisha miaba ya ntendelelu.

Bantemu ba Yehowa batu badisangisha misangu ya bungi ku lumingu mu Nzubu yabu ya Bukalenge bua kulonga malu a mu nyuma ne kulejangana buwetu. Kadi mu matunga a bungi, bua ntatu ya mfualanga, Bantemu ba miaba eyi kabena ne makuta makumbane a kuibakisha Nzubu ya Bukalenge bobu kabayi babakuatshishe ne mfranga kumpala. Ke bualu kayi mu 1999 Bantemu ba Yehowa bakatuadija ndongamu wa kutula mfranga idi ifumina mu matunga mabanji bua kuibakisha Nzubu ya Bukalenge mu matunga mapele. Kabidi, bena budisuile binunu ne binunu mbafile dîba diabu ne mamanya abu mu mudimu eu, utubu baya kuenza misangu ya bungi mu misoko ya kulekule mu matunga aa. Patubu bibaka nzubu  eyi, Bantemu ba muaba udibu benza mudimu eu batu balonga mua kuibaka ne kulongolola nzubu, ne batu basumba biamu bia mudimu ne bintu bikuabu bidi bikengedibua bia kuibaka nabi ku makuta a mu Tshibutshilu tshia mfranga ya Nzubu ya Bukalenge. Bantemu badi badisangishila mpindieu mu nzubu eyi mipiamipia badi ne dianyisha dia bungi bua mudi bena kuitabuja nabu bafile dîba diabu ne mfranga yabu. Badi kabidi bafila mfranga ku ngondo yonso bua yambuluishe bua kulama Nzubu wa Bukalenge mupiamupia bimpe ne bua kupingaja makuta pa adi matuke bua kuibaka. Padibu benza nunku badi bambuluisha bua kuibakabu Nzubu ya Bukalenge mikuabu ya bungi.

Batu bibaka Nzubu ya Bukalenge bilondeshile ngibakilu ne bintu bia kuibaka nabi bitu tshitupa atshi. Nansha mudi nzubu eyi kayiyi ya tuyayi tukamone, kadi mmimpe, ne badi badisangishilamu kakuyi lutatu to. Pakatuadija ndongamu wa dibaka mu 1999, matunga adi ne bubanji bukese matue ku 40 avua mu ndongamu eu. Biangatshile ku tshikondo atshi, mbadiundishe ndongamu eu wa luibaku bua enzeke mu matunga a buena aa 116, mmumue ne: mu bisumbu bia Bantemu ba Yehowa bidi pa buloba bujima bipite pa tshia bibidi tshimue. Ku diambuluisha dia ndongamu eu, mbase Nzubu ya Bukalenge mipite pa 9 000 mu bidimu bitanu bishale ebi, ne muayene wa nzubu mipite pa 5 ku dituku dionso! Nansha nanku, mu matunga aa 116 kutshidi dijinga dia Nzubu ya Bukalenge mipiamipia 14 500. Bua dibenesha dia kudi Yehowa ne bua muoyo wa budisuile ne wa kalolo wa Bantemu ba pa buloba bujima, tudi batekemene se: nekumueneke mfranga mikumbane bua kukumbaja dijinga edi!​—Musambu 127:1.

Nzubu ya Bukalenge idi ikebesha didiunda

Ntshipeta kayi tshidi mudimu munenanenayi eu mupatuile Bantemu ne mudimu wa diyisha dia Bukalenge? Miaba mivule bungi bua bantu badi babuela mu bisangilu butu buvula bikole kunyima kua dibaka dia Nzubu wa Bukalenge mupiamupia. Tshilejilu tshia muanda eu tshidi mu bualu budibu batufundile bua mu ditunga dia Burundi: “Padibu anu bajikija kuasa Nzubu wa Bukalenge, udi uula musangu umue. Tshilejilu, bakibaka Nzubu wa Bukalenge bua tshimue tshisumbu tshivua ne bantu batue ku 100 babuela mu bisangilu pa tshibidilu. Nzubu wabu wa Bukalenge mupiamupia uvua ne miaba ya kusomba ya bantu 150. Pakajikijabu kumuasa, bantu 250 bavua babuela mu bisangilu.”

Bua tshinyi didiunda dia mushindu’eu didi dienzeka? Tshilejilu, batu imue misangu belela tusumbu tua bamanyishi ba Bukalenge badi  kabayi ne muaba mumanyike wa kudisangishila meji mabi, padibu babamona badisangishila muinshi mua mutshi anyi muaba kampanda wa tshibuashibuashi. Mu dimue ditunga, bantu batu bela meji ne: tusumbu tua nzambi tukese tua mushindu’eu tutu tubuelakana mu malu a tshikisu adi bisamba bienzelangana, ne mikenji ya ditunga idi ilomba ne: bitendelelu bionso bikale bidisangishila munda mua nzubu wa ntendelelu.

Padi Bantemu ba Yehowa ne yabu nzubu bidi bibambuluisha bua kuleja bantu ne: kabena bayidi ba muntu kampanda anyi mpasata kansanga. Biro bia Bantemu ba Yehowa bia mu ditunga dia Zimbabwe bidi bifunda biamba ne: “Matuku mashale munemu bana betu bavua badisangishila mu nzubu ya bamue ba kutudi, ne bantu bavua babikila tshisumbu mu dîna dia muena nzubu uvuabu badisangishila. Bavua babikila bana betu ne: aba mba mu nzambi wa ‘Kampanda.’ Bionso ebi mbishintuluke mpindieu padi bantu bamone bimanyinu bidi bileja patoke nzubu yonso ne: ‘Nzubu wa Bukalenge wa Bantemu ba Yehowa.’”

Badi bafila ne disanka

Mupostolo Paulo wakafunda ne: ‘Nzambi udi musue muena kupa udi ufila ne disanka.’ (2 Kolinto 9:7)  Mapa a mfranga ya bungi adi bushuwa ambuluisha bikole. Kadi tshitupa tshinene tshia makuta adibu bafila bua mudimu wa Bantemu ba Yehowa tshitu tshifuma mu tushete tua mapa tua mu Nzubu wa Bukalenge. Mapa onso adi ne mushinga ne ki ng’a kulengulula to, nansha wowo manene anyi makese. Vuluka ne: Yezu wakamona mukaji mukamba mupele au ufila tukuta tuende tukese tubidi. Yehowa ne banjelu bavua bamumone kabidi. Katuena nansha bamanye dîna dia mukaji mukamba eu to, kadi Yehowa wakenza bua se: tshienzedi tshivua mukaji eu muenze ne muoyo muimpe batshifunde mu Bible bua kashidi.

Mapa atudi tufila adi ambuluisha bua dibaka dia Nzubu ya Bukalenge ne bua bitupa bionso bikuabu bia mudimu wa Bukalenge wa mushinga mukole. Patudi tufila dikuatshisha mushindu’eu tudi tumona pa kusankila ne tupeta mêyi a kuela nawu ‘[tuasakidila] wa bungi kudi Nzambi.’ (2 Kolinto 9:12) Bana betu ba mu ditunga dia Bénin mbatufundile ne: “Dituku dionso masambila a bungi a dianyisha adi abanda kudi Yehowa bua mfranga idibu batuambuluisha nayi kudi bana betu ba pa buloba bujima.” Ne tuetu bonso badi bambuluisha mudimu wa Bukalenge ne mapa etu tudi tupeta disanka didi difumina ku difila dia mapa a bena Kristo!

[Kazubu/​Tshimfuanyi mu mabeji 22, 23]

Mishindu idi bamue bafila mapa

MAPA BUA MUDIMU WA PA BULOBA BUJIMA

Bantu bavule batu bateka anyi badibutshila ndambu wa mfranga itubu bela mu tushete tua mapa tudi ne miaku eyi: “Mapa bua mudimu wa pa buloba bujima wa Bantemu ba Yehowa​—Matayo 24:14.”

Ku ngondo yonso bisumbu bitu bituma mfranga eyi ku biro bia Bantemu ba Yehowa bidi mu matunga adibu basombele. Nudi mua kutuma mfranga inudi bafile ku budisuile buludiludi ku Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, anyi ku biro bia Bantemu bidi mu ditunga dienu. Nudi mua kutuma sheke ya mfranga yenu kudi “Watch Tower.” Nudi mua kufila nansha bilengejilu peshi bintu bikuabu bia mushinga. Tudi tunulomba bua kutuma mapa aa pamue ne mukanda mufunda mu tshikoso udi uleja ne: aa mmapa mmafila kakuyi dîyi dikuabu ditentekapu.

MAPA MAFILA NE DÎYI DITENTEKAPU

Muntu udi mua kupesha Société Watch Tower dipa dia mfranga ne kumvuangana nende bua se: udi mua kumupingajilayi pikalaye nayi dijinga. Bua kupeta mumvuija makuabu, suaku ufundila biro bia Sekretere ne Mulami wa tshibutshilu mu adrese udi kulu eku.

MAPA MALONGOLOLA

Pa kumbusha mapa a mfranga mifila kakuyi dîyi ditentekapu, kudi mishindu mikuabu ya kufila bintu bua kuendesha mudimu wa Bukalenge udi wenzeka pa buloba bujima. Mona imue mishindu:

Mfranga ya tshieya: Muntu udi mua kuenzela Société Watch Tower mikanda bua kuikalaye ne bukenji bua kuangata mfranga yende ya tshieya anyi ya pansio.

Konte ya ku banke: Muntu udi mua kufundisha konte yende ya ku banke, mikanda ya mfranga mitekesha ku banke anyi konte yende ya mfranga ya pansio mu dîna dia Société Watch Tower anyi kufunda bua kuyifutabu Société eu dîba dia lufu luende, bilondeshile mikenji ya banke ya muaba udiye.

Bukenji bua kuangata bintu ne mfranga misombesha: Tudi mua kupesha Société bukenji bua kuangata bintu ne mfranga itudi basombeshe bantu bakuabu bu dipa didi kadiyi ne dîyi ditentekapu.

Mpangu ne nzubu: Muntu udi mua kufila lupangu anyi nzubu wende bidibu mua kupana bipepele bu dipa didi kadiyi ne dîyi ditentekapu, anyi padibi bua nzubu udiye musombele, udi mua kutungunuka ne kusombelamu patshidiye ne muoyo. Bidi bikengela kumanyisha biro bia Société bia mu ditunga dienu kumpala kua kumupesha lupangu anyi nzubu.

Dipa dia kufuta ku tshidimu: Dipa dia kufuta ku tshidimu mbuena kuamba ne: muntu udi upesha Société Watch Tower makuta anyi mikanda (idi ileja bukenji budiye nabu bua kuangata mfranga anyi bintu). Pashishe muntu eu (anyi mukuabu udiye musungule) udi utuadija kuangata difutu kampanda ku tshidimu ku tshidimu patshidiye ne muoyo. Tshidimu tshidi muntu ufila dipa dia mushindu’eu badi bamupuekeshila mushinga wa bitadi bidiye ufuta bua lupetu luende.

Bintu bia bumpianyi ne bintu bitekesha: Muntu udi mua kufundisha dîna dia Société Watch Tower ku mikanda ya bumpianyi bua kuangataye bintu anyi mfranga yende, peshi kufundisha Société ku mikanda ya tshipungidi bua kumupesha bukenji bua kuangata bintu bitekesha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi “mapa malongolola” ileja, mapa a mushindu’eu atu alomba bua muafidi adianjile kudilongolola. Bua kuambuluisha bantu badi bajinga kufila mapa malongolola a mushindu kampanda bua mudimu udi Bantemu ba Yehowa benza pa buloba bujima, Société mmupatule kakanda ka mu Anglais ne mu tshiena-Espagne kadi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde kakanda aka bua kufila mumvuija pa mishindu kabukabu ya kufila mapa mpindieu anyi kushila Société bintu dîba dia lufu. Kunyima kua bamane kubala kakanda aka ne bayukile ne bantu batu babapesha mibelu mu malu a bitadi anyi a mikenji, bantu ba bungi mbafike ku diambuluisha Bantemu ba Yehowa mu mudimu wabu wa pa buloba bujima, ne mbakepeshe kabidi bungi bua makuta a bitadi bidibu bafuta padibu bafile diambuluisha edi. Udi mua kupeta kakanda aka wewe mukalombe buludiludi ku Biro bia Mapa Malongolola (Charitable Planning Office).

Bua kumanya malu makuabu pa muanda eu, udi mua kufundila Biro bia Mapa Malongolola anyi kuela nshinga mu adrese udi kuinshi eku, peshi ku biro bia Bantemu ba Yehowa bia mu ditunga dienu.

Biro bia Mapa Malongolola

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telefone: (845) 306-0707

[Bimfuanyi mu mabeji 20, 21]

Miaba ya kudisangishila ya kale ne mipiamipia ya Bantemu ba Yehowa

Zambie

République centrafricaine