Nkonko ya babadi

Bademon nebikale penyi tshikondo tshia Bukokeshi bua Bidimu Tshinunu bua Kristo?

Bible kêna wandamuna lukonko elu buludiludi to. Kadi tudi mua kufika ku diandamuna diumvuike bua muaba wikala bademon tshikondo tshia Bukokeshi bua Kristo bua Bidimu Tshinunu.

Udianjila kuleja tshienzeka ku ntuadijilu ne ku ndekelu kua Bidimu Tshinunu, mupostolo Yone udi wamba ne: ‘Ngakatangila muanjelo upueka panshi ufuma mu diulu, muikale ne luvungula lua ku tshina tshidi katshiyi ne tshishikidilu, ne lukanu lunene mu tshianza tshiende. Yeye wakakuata dragon, nyoka au wa kale, udi Diabolo ne Satana, wakamusuika bidimu tshinunu, ne wakamuela mu tshina tshidi katshiyi ne tshishikidilu, ne wakatshinjila, ne wakamutekelapu tshimanyishilu pa mutu pende, bua yeye kadingi bisamba bia bantu kabidi, too ne pajika bidimu tshinunu; kunyima kua bualu ebu budiye nabu mbua kusuludibua tshitupa tshipi.’ (Buakabuluibua 20:1-3) Mvese eyi idi yakula anu bua muelabu Satana mu tshina tshidi katshiyi ne nshikidilu ne muamulekelabu kunyima bua tshitupa tshipi. Nansha mudibu kabayi batele bademon, bidi bimueneka bia meji bua se: padi muanjelu udi ne nsapi wa ku tshina tshidi katshiyi ne nshikidilu (anyi Yezu Kristo mutumbishibue) ukuata Diabolo umuelamu, neenze bia muomumue ne bademon kabidi.​—Buakabuluibua 9:11.

Pakalua Yezu Kristo Mukalenge mu diulu mu 1914, wakenza bualu buakashintulula bikole nsombelu wa Satana ne bademon. Buakabuluibua 12:7-9 udi wamba ne: ‘Mvita minene yakadi mu diulu; Mikaele ne banjelo bende bakaya kuluangana mvita ne dragon; ne dragon ne banjelo bende [bademon] bakaluangana nabu; ne kabakabapita bukole, ne kabakasangana muaba wabu mu diulu. Dragon munene wakedibua panshi, nyoka au wa kale, yeye udi muinyikibue ne: Diabolo ne Satana, mudingi wa ba pa buloba bonso; wakedibua panshi pa buloba, ne banjelo bende bakedibua nende panshi.’ Biangatshile anu ku tshikondo atshi too ne lelu, Satana ne bademon bende mbalamina anu lua panshi pa buloba apa. Nunku tudi mua kumona bikumbane bua kuamba ne: padi Yezu Kristo ulua kukandika kabidi Satana bidiye wenza bua kupikula buloba ku buenzeji buende bubi, neenze bia muomumue ne bademon kabidi.

Tangila kabidi mulayi wa kumpala wa mu Bible. Udi wamba ne: “[Mene Nzambi] nenteke lukuna pankatshi pebe [Satana] ne mukaji [bulongolodi bua Nzambi bua mu diulu], ne pankatshi pa dimiinu diebe [dia Satana] ne dimiinu diende [Yezu Kristo]. Yeye neakuboze ku mutu ne wewe neumusume ku tshikankanyi.” (Genese 3:15, NW) Bumue bua ku malu adi diboza nyoka ku mutu diumvuija ndiela dia Satana mu tshina tshidi katshiyi ne nshikidilu mu tshikondo tshia Bukokeshi bua Kristo bua Bidimu Tshinunu. Mulayi eu udi kabidi wamba ne: kudi lukuna pankatshi pa Eu udi uboza nyoka ku mutu ne dimiinu dia Satana. Mu dimiinu edi (anyi bulongolodi), mudi kabidi ne tshitupa tshidi katshiyi tshimueneka tshienza ne banjelu babi peshi bademon. Nunku mbia meji bua kufika ku nkomenu wa ne: padi Yezu wela Satana mu tshina tshidi katshiyi ne nshikidilu, udi kabidi usuika bademon ubelamu. Muvua nyuma mibi miumvue buôwa bua bungi pa bualu bua tshina etshi bidi bileja ne: mmimanye bimpe muakandikabu bidiye yenza.​—Luka 8:31.

Kadi tudi mua kuamba se: Buakabuluibua 20:1-3 kêna utela bualu bua bademon bualu nebikale  bamane kubutudibua ku Armagedone pamue ne tshitupa tshidi tshimueneka tshia dimiinu dia Satana anyi? Bible udi uleja ne: lungenyi elu kaluena pamu’apa mua kuikala lulelela to. Udi uleja tshienzekela Satana ku ndekelu, wamba ne: ‘Diabolo wakadi ubadinga wakedibua mu dijiba dia kapia ne sufre, mudi nyama wa luonji ne muprofete wa mashimi kabidi, nebakengeshibue munya ne bufuku tshiendelele.’ (Buakabuluibua 20:10) Nyama wa luonji ne muprofete wa dishima nnsangilu ya malu a tshididi ne idi mu bulongolodi bua Satana budi bumueneka. (Buakabuluibua 13:1, 2, 11-14; 16:13, 14) Badi babibutula ku Armagedone padi Bukalenge bua Nzambi busunsula ne butshibula makalenge onso a panu bitupa bitupa. (Danyele 2:44) Bible udi wakula bua ‘kapia ka tshiendelele kadi katemeshila Diabolo ne banjelu bende.’ (Matayo 25:41) Satana ne bademon bende nebabele mu ‘dijiba dia kapia ne sufre’ dimue dimue dikalabu bamane kuela nyama wa luonji ne muprofete wa dishima mu ngumvuilu wa se: bobu pabu nebabutudibue kashidi. Bu tshitupa tshidi katshiyi tshimueneka tshia dimiinu dia Satana (anyi bademon badi ne bukole bua bungi kupita tshitupa tshia dimiinu diende tshidi tshimueneka) ne bua kubutudibua ku Armagedone, bavua bushuwa mua kutela bademon aba bu bamane kuikala mu dijiba dia mu tshimfuanyi pamue ne nyama wa luonji ne muprofete wa dishima. Mudibu kabayi babatele mu Buakabuluibua 20:10, bidi bileja ne: bademon kabena bababutula ku Armagedone to.

Anu mudibu kabayi bambe patoke muelabu bademon mu tshina tshidi katshiyi ne nshikidilu, ke mudibu kabayi baleje kabidi mu mushindu musunguluke muabapatulabu mu tshina atshi. Kadi tshiabenzekela ntshia muomumue ne tshienzekela Diabolo. Panyima pa bamane kubalekela bobu ne Diabolo ne beleshangane nende diboko tshikondo tshia diteta dia ndekelu dia bukua-bantu ku nshikidilu kua bidimu tshinunu, bademon pabu nebabele mu dijiba dia kapia muabutukabu tshiendelele.​—Buakabuluibua 20:7-9.

Nunku, nansha mudi Buakabuluibua 20:1-3 wakula anu bua dikuata dia Satana ne dimuela dia mu tshina tshidi katshiyi ne nshikidilu mudiyi kayi mua kuenza kabidi bualu nansha bumue, bidi anu mua kukumbana bua tuetu kukomesha ne: banjelu bende pabu nebabasuike pabu ne kubelamu. Kabakulekela ni n’Satana ni mmisumba yende ya bademon bua kupangishabu disua dia Nzambi dia kukudimuna buloba mparadizu ne kupingajilula bantu ku bupuangane mu Bukokeshi bua Kristo bua Bidimu Tshinunu bua kadikumbanyi nansha.