Utu ujinga buloba budi bantu mua kusomba kabayi ne buôwa anyi?

“Tudi mu tshikondo tshidi ‘bantu bashale babawule matshi kabayi ne dikisha, . . . bapangile ne tshidibu mua kuenza’ bua ‘njiwu . . . idi kayiyi mimanyike bimpe idi mua kulua dîba dionso ne mu mishindu yonso kakuyi didimuija.’”

MÊYI aa matela mu tshikandakanda kampanda tshidimu tshishale, adi aleja mudi bantu bavule bumvua mu tshikondo tshia lukutukutu etshi. (Newsweek) Yezu Kristo wakamba muvua bantu mua kutamba kupampakana nunku mu matuku makese avua ne bua kulua. Wakakula bua tshikondo tshivua bisamba mua kukengakana bikole bipanga ne tshia kuenza ne bantu bafua ne buôwa bua ditekemena dia malu avua ne bua kulua pa buloba. Kadi tuetu katuena ne bua kutshina anyi kudiumvua katuyi ne tshia kuenza to, bualu Yezu wakasakidila kabidi ne: ‘Pabanga malu aa kulua, nubanduluke, nutangile mulu, bualu bua bunupikudi buenu budi pabuipi.’​—Luka 21:25-28.

Yehowa Nzambi wakumvuija muikala nsombelu wa bantu bende pa buloba panyima pa dipikudibua edi, wamba ne: ‘Bantu banyi nebashikame mu miaba ya ditalala, ne mu nzubu idi kayiyi ne njiwu pepi, ne mu bikishilu bia ditalala.’ (Yeshaya 32:18) Yehowa wakamba ku butuangaji bua muprofete wende Mika ne: ‘Nebashikame muntu ne muntu, muinshi mua muonji wende wa tumuma tua mvinyo ne muinshi mua mutshi wende wa mfigi; kakuena muntu wabakuatshisha buôwa.’​—Mika 4:4.

Nsombelu eu neikale mushilangane bikole ne udiku lelu’eu! Kakuakuikala kabidi mpukapuka yatshingisha bantu nansha. Pamutu pa bantu kushala ne matshi mabawula dîba dionso kabayi ne dikisha, bapangile ne tshidibu mua kuenza, nebikale mu ditalala ne disanka kadiyi ndekelu.