Malu manene a mu mukanda wa Yoshua
Dîyi dia Yehowa didi ne muoyo
Malu manene a mu mukanda wa Yoshua
BENA Isalele badi mu Mpata wa Moaba mu tshidimu tshia 1473 kumpala kua bikondo bietu ebi ne badi ne bua kuikala ne disanka dia bungi dia kumvua mêyi aa: ‘Dilongoluelayi biakudia, bualu bua papita matuku asatu, nenusabuke Yadene eu, bua kuya kuangata buloba, budi Yehowa, Nzambi wenu, munupe bua nuenu kubuangata.’ (Yoshua 1:11) Luendu luabu lua bidimu 40 lukadi pa kutua ku ndekelu.
Bidimu bitue ku 20 pashishe, mulombodi Yoshua udi wimana munkatshi mua buloba bua Kanâna ne wambila bakulu ba mu Isalele ne: ‘Monayi, meme ngakanupa bisamba ebi bidi bishala bu bumpianyi bua bisamba bienu, kutuadijila ku Yadene, ne bisamba bionso bingakatamba bukole, too ne ku mâyi manene kudi kubuelela dîba. Yehowa, Nzambi wenu, neabumushe kumpala kuenu, neabipate ku mêsu kuenu: nuenu nenunyenge buloba buabu bu muakanuambila Yehowa, Nzambi wenu.’—Yoshua 23:4, 5.
Mukanda wa Yoshua mmufunda kudi Yoshua mu tshidimu tshia 1450 kumpala kua bikondo bietu ebi ne udi ulonda malu a dikema avua menzeke munkatshi mua bidimu 22 abi. Bu mutudi ku tshiibi tshia bulongolodi bupiabupia budibu batulaya, nsombelu wetu mmufuane wa bena Isalele bakavua badiakaje bua kuangata Buloba Bulaya. Nunku, tukonkononayi mukanda wa Yoshua ne ntema ya bungi.—Ebelu 4:12.
BATANGILE ‘MU MPATA YA YELEKO’
Mmudimu kayipu uvua Yoshua mupete pakamuambila Yehowa ne: ‘Mose, muntu wanyi, udi mufue; nunku bika biebe, usabuke musulu eu wa Yadene, wewe ne bantu aba bonso, uye mu buloba bundi mpa bena Isalele’! (Yoshua 1:2) Yoshua udi ne bua kulombola tshisamba tshia bantu miliyo mivule mu Buloba Bulaya. Bua kudilongolola, udi utuma batentekedi babidi ku Yeleko, musoko uvuabu ne bua kukuata kumpala. Mu musoko amu mudi Lahaba (mukaji mudisombele), udi mumvue bua bishima binene bivua Yehowa muenze bua tshisamba tshiende. Udi ukuba ne wambuluisha batentekedi ne bobu pabu badi bamulaya bua kumusungila.
Padi batentekedi bapingana, Yoshua ne bena Isalele badi badilongolola bua kutuadija luendu ne kusabuka Yadene. Nansha muvua mâyi muwule bikole, musulu kawena ubapumbisha bua kusabuka, bualu Yehowa wakenza bua mâyi avua ku mutu kubandawu muulu bu tshimanu ne mâyi avua kuinshi kupuekawu mu Mbuu Mufue. Padibu basabuka Yadene, bena Isalele badi batudila ku Gilegala, pabuipi ne Yeleko. Matuku anayi panyima, mu dituku dia 14 dia ngondo wa Abiba ku dilolo, badi basekelela Kupita kua Yehowa (anyi Pasaka) mu mpata ya Yeleko. (Yoshua 5:10) Dituku didi dilonda badi batuadija kudia bimue bintu bia mu buloba bua Kanâna, ne mana adi alekela kumata. Mu matuku au, Yoshua udi utengula bantu balume bonso bavua baledibue mu tshipela.
Mandamuna a nkonko ya mu Bible:
2:4, 5—Bua tshinyi Lahaba udi udinga bantu ba mukalenge bavua balue kukeba batentekedi? Lahaba udi ukuba batentekedi, witaba nansha lufu bualu ukadi witabuja Yehowa. Nunku, kêna muenzejibue bua kuambila bantu badi bakeba kuenzela tshisamba tshia Yehowa bibi muaba udi batentekedi to. (Matayo 7:6; 21:23-27; Yone 7:3-10) Nunku, Lahaba ‘wakabingishibua ku kuenza kuende’; tshilejilu, wakashima batumibue ba mukalenge.—Yakobo 2:24-26.
5:14, 15—‘Mukalenge wa musumba wa Yehowa’ nnganyi? Mukalenge udi ulua kukolesha Yoshua padiye utuadija dikuata Buloba Bulaya udi mua kuikala anu ‘Dîyi’ anyi Yezu Kristo kumpala kua kuluaye pa buloba. (Yone 1:1; Danyele 10:13) Mmunyipu mudibi bitukolesha mu mikolo patudi tumanya ne: Yezu Kristo udi ne basadidi ba Nzambi lelu padibu baluangana mvita ya mu nyuma!
Malongesha adi atutangila:
1:7-9. Kubala Bible dituku dionso, kuelela meji pa malu adi mafundamu ne kutumikila bitudi tubalamu kudi kutuambuluisha bua tuetu kukumbaja malu etu a mu nyuma bimpe.
1:11. Yoshua udi ulomba bantu bua kulongolola biakudia ne bintu bikuabu ne bua kabikadi bindile ne lulengu bua Nzambi kubapeshabi to. Mubelu wa Yezu wa kubenga kutata ne muoyo wa munda bua nsombelu wetu, pamue ne mêyi ende a ne: ‘Nebanupe bintu bionso ebi,’ kabiena bitukandika bua kuenza mudimu bua kukumbaja majinga etu to.—Matayo 6:25, 33.
2:4-13. Lahaba udi wangata dipangadika dia kuambuluisha batendeledi ba Yehowa bualu wakumvua bua bishima bivuaye mubenzele ne umona muvua tshikondo tshikale tshikole. Biwikala ulonga Bible kukadi matuku a bungi ne udi witaba mutudi mu ‘matuku a ku nshikidilu,’ kuena umona ne: udi ne bua kuangata dipangadika dia kuenzela Nzambi mudimu anyi?—2 Timote 3:1.
3:15. Bu mudi malu adi batentekedi bavua baye ku Yeleko bambila Yoshua mikale mimpe, udi wenza malu ne lukasa luonso, kayi windila bua mâyi a mu Yadene akepele to. Pa bidi bitangila malu adi a ntendelelu mulelela, tudi ne bua kuenza malu ne dikima ne mitalu pamutu pa kuindila bua nsombelu alengele.
4:4-8, 20-24. Mabue 12 adibu bangata mu musulu wa Yadene adi ne bua kuikala tshivulukilu bua bena Isalele. Malu adi Yehowa wenza lelu bua kusungila basadidi bende kudi baluishi babu adi kabidi tshivulukilu tshidi tshileja mudiye nabu.
DIKUATA BULOBA DIDI DITUNGUNUKA
Biibi bionso bia musoko wa Yeleko ‘mbikanga, kakuena muntu udi upatukamu, kakuena muntu udi ubuelamu.’ (Yoshua 6:1) Mmunyi muvuabu mua kukuata musoko? Yehowa udi upesha Yoshua lungenyi. Mu matuku makese, bimanu bia musoko bidi panshi ne badi babutula musoko. Anu Lahaba ne ba kuabu ke badi bapanduka.
Mpindieu badi baya bua kukuata tshimenga tshia Ai. Batentekedi bavuabu batume badi baleja ne: mu musoko kamuena bantu ba bungi to, nunku bidi bikengela anu bantu bakese bua kuukuata. Kadi, basalayi batue ku 3 000 badibu batume bua kukuata musoko badi banyema kumpala kua bantu ba mu Ai. Bua tshinyi? Yehowa kêna ne bena Isalele to. Akana wa mu tshisa tshia Yuda wakenza bualu bubi pavuabu bakuate Yeleko. Padi Yoshua ujikija kulongolola tshilumbu etshi, udi uya kabidi kuluisha bena tshimenga tshia Ai. Bu muvua mukalenge wa Ai mutshimune bena Isalele musangu wa kumpala, udi ujinga kubaluisha kabidi. Kadi Yoshua udi wenza mayele adi aleja bena Ai mudibu ne bukole bua bungi ne udi ukuata tshimenga etshi.
Gibeona ‘mmusoko munene, mutambe Ai bunene, ne balume bonso badi ne bukitu.’ (Yoshua 10:2) Kadi, padi bantu ba mu Gibeona bumvua bua mushindu udi bena Isalele batshimune Yeleko ne Ai, badi bashima Yoshua ne badia nende tshipungidi tshia ditalala. Bisamba bidi bibanyunguluke bidi biumvua buôwa bua bualu ebu. Bakalenge batanu ba ku bisamba ebi badi bumvuangana bua kuluisha bena Gibeona. Bena Isalele badi bambuluisha bena Gibeona bua kubutula baluishi aba. Ku bulombodi bua Yoshua, bena Isalele badi batshimuna kabidi misoko ya ku Sud ne ku Ouest pamue ne bakalenge bavua badisange ku luseke lua Nord. Badi batshimuna bakalenge 31 ku Ouest kua Yadene.
Mandamuna a nkonko ya mu Bible:
10:13—Mmunyi mudi bualu ebu mua kuenzeka? ‘Kudi tshintu tshidi mua kupita Yehowa bukole,’ yeye Mufuki wa diulu ne buloba anyi? (Genese 18:14) Bikala Yehowa musue, udi mua kushintulula mudi buloba bunyunguluka bua dîba ne ngondo bimueneke kabiyi binyunga ku mêsu kua muntu udi pa buloba. Anyi udi mua kulekela buloba ne ngondo binyunguluka bu pa tshibidilu kadi kutumaye nsese ya dîba ne ya ngondo mu mushindu wa se: butoke bua ku bintu bibidi ebi butungunuke ne kukenkesha. Nansha biobi bienzeke mushindu kayi, kakutu kuanji ‘kuikala dituku dikuabu bu dituku edi kumpala kuadi anyi kunyima kuadi.’—Yoshua 10:14.
10:13—Mukanda wa Yashâ ntshinyi? Mbatele kabidi mukanda eu mu 2 Samuele 1:18 padibu bakula bua musambu kampanda udibu babikila ne: “Buta bua mikete,” musambu wa kanyinganyinga ka Mukalenge Shaula ne muanende Yonatana. Mukanda eu uvua mua kuikala ne misambu ne tusala tuvua tuakula bua malu manene a kale ne uvua mua kuikala mumanyike bikole kudi bena Ebelu.
Malongesha adi atutangila:
6:26; 9:22, 23. Mulawu uvua Yoshua muele tshikondo tshiakabutulabu Yeleko wakalua kukumbana bidimu bitue ku 500 kunyima. (1 Bakelenge 16:34) Mulawu uvua Noa muele munkana wende Kanâna wakakumbana tshikondo tshivua bena Gibeona balue bena mudimu ba bena Isalele. (Genese 9:25, 26) Dîyi dia Yehowa ditu anu dikumbana misangu yonso.
7:20-25. Bamue bantu badi mua kuangata buivi bua Akana bu tshilema tshikese, bela meji pamuapa ne: katshivua tshienzela bakuabu bibi to. Badi mua kumona buivi bukese ne bilema bikese bikuabu bu ne: ki mmalu mabi to. Kadi, tuetu tudi ne bua kuikala anu bu Yoshua mu dipangadika dietu dia kukandamena mateta a kuenza malu mabi adi ashipa mikenji.
9:15, 26, 27. Tudi ne bua kuangata ne mushinga malu atudi bumvuangane bua kuenza ne kuakumbaja.
YOSHUA UDI WENZA MUDIMU WENDE MUNENE WA NDEKELU
Mpindieu Yoshua ukadi mukulakaje wa bidimu bitue ku 90 ne udi utuadija kuabanya buloba. Mmudimu mukole be! Bisa bia Lubena ne Gada ne tshitupa tshia tshisa tshia Manashe bikadi bipete bumpianyi buabi ku Est kua Yadene. Bisa bidi bishale ebi bidi bipeta mpindieu bumpianyi ku luseke lua Ouest ku diela dia nshobo.
Badi basa tabernakle ku Shilo mu buloba bua bena Efelayima. Kaleba udi upeta musoko wa Hebelone ne Yoshua yeye udi upeta Timena-tasela. Badi bapesha bena Lewi misoko 48, muikale 6 ya kunyemena. Padibu bapingana mu bumpianyi buabu ku Est kua Yadene, basalayi ba bena Lubena, bena Gada ne tshitupa tshia tshisa tshia bena Manashe badi bibaka tshioshelu “tshinene tshia dikema.” (Yoshua 22:10) Bisa bidi ku Ouest kua Yadene bidi bimona bualu ebu bu ditombokela Yehowa, ne mvita idi isua kubudika, kadi kayena yenzeka to bualu badi bafika ku diyukidilangana bilenga.
Yoshua mumane kusomba matuku ndambu mu Timena-tasela, udi ubikidisha bakulu, bamfumu ba mêku, balumbuluishi ne banene ba mu Isalele bua kubambila bua kuikala ne dikima ne kushala ne lulamatu kudi Yehowa. Pashishe, Yoshua udi usangisha bisamba bionso bia bena Isalele ku Shekeme. Udi wambulula malu onso adi Yehowa muenze katshia ku tshikondo tshia Abalahama, udi ubasaka bua ‘kutshina Yehowa, kumukuatshila mudimu ne muoyo wonso udi kauyi ne lubombo.’ Bantu badi bandamuna ne: ‘Netukuatshile Yehowa, Nzambi wetu mudimu, netutumikile dîyi diende.’ (Yoshua 24:14, 15, 24) Panyima pa malu aa, Yoshua udi ufua ne bidimu 110.
Mandamuna a nkonko ya mu Bible:
13:1—Bualu ebu kabuena bubengangana ne budi mu Yoshua 11:23 anyi? Tòo, bualu dikuata dia Buloba Bulaya divua ne bua kuenzeka mu bitupa bibidi. Tshia kumpala, bavua ne bua kuluisha bisamba, kutshimuna bakalenge 31 ba mu buloba bua Kanâna ne mvita ayi yakakepesha bukole bua bena Kanâna. Tshibidi, tshisa kampanda anyi muntu kansanga uvua ne bua kuangata buloba ne kusombelamu. (Yoshua 17:14-18; 18:3) Nansha muvua bena Isalele kabayi bumbushe bena Kanâna bonso munkatshi muabu, bavua bashale abu kabavua njiwu bua bena Isalele to. (Yoshua 16:10; 17:12) Yoshua 21:44 udi wamba ne: ‘Yehowa wakabapa dikisha ku nseke yonso.’
24:2—Tela tatuende wa Abalahama uvua mutendeledi wa mpingu anyi? Kumpala, Tela kavua mutendeledi wa Yehowa Nzambi to. Uvua pamuapa utendelela nzambi-ngondo uvuabu babikila ne: Sin, nzambi uvuabu batendelela bikole mu tshimenga tshia Ula. Bilondeshile mianu ya bena Yuda, Tela uvua mua kuikala muenji wa mpingu. Kadi, dîba divua Abalahama mumbuke mu Ula ku dilomba dia Nzambi, Tela wakaya nende ku Halana.—Genese 11:31.
Malongesha adi atutangila:
14:10-13. Nansha mukadi Kaleba ne bidimu 85, udi ulomba mudimu mukole wa kuipata bantu ba mu buloba bua Hebelone. Mu buloba amu mudi bena Anaka, bantu ba mpolondo. Musalayi wa kale eu udi ubatshimuna ne diambuluisha dia Yehowa, ne Hebelone udi ulua musoko wa kunyemena. (Yoshua 15:13-19; 21:11-13) Tshilejilu tshia Kaleba tshidi tshitukankamija bua kubenga kunyema midimu mikole mu malu a mu nyuma.
22:9-12, 21-33. Tudi ne bua kudimuka bua kubenga kuelela bakuabu meji mabi.
‘Kanuakapanga tshintu nansha tshimue’
Pakavua Yoshua mukulakaje, wakambila bantu bavua ku mutu kua bena Isalele ne: ‘Kanuakapanga tshintu tshimpe tshimue tshiakanulaya Yehowa, Nzambi wenu; nuakapeta bintu bionso.’ (Yoshua 23:14) Mmunyipu mudi muyuki wa Yoshua ujadika bualu ebu!
Mupostolo Paulo wakafunda ne: ‘Malu onso akafundabu diambedi akafundibua bua kutuyisha, bua tuetu tuikale ne ditekemena bua ditantamana dietu ne bua busambi bua mu Mukanda wa Nzambi.’ (Lomo 15:4) Tudi ne bua kuikala bashindike ne: ditekemena dietu mu malu adi Nzambi mulaye ki ndia patupu to. Kakuena tshintu tshidiye mulaye tshiapanga kukumbana; bionso nebikumbane.
[Karte mu dibeji 10]
(Bua kumona malu bimpe, tangila mu mukanda)
Buloba buvua bena Isalele bakuate ku bulombodi bua Yoshua
BASHANA
GILADA
ALABA
NEGEBE
Musulu wa Yadene
Mbuu wa Luepu
Kasulu ka Yaboka
Kasulu ka Alenona
Hazola
Madona
Lasahalona
Shimelona
Yokeneama
Dola
Megido
Kadeshe
Tanaka
Hefela
Tileza
Afeke
Tapua
Betele
Ai
Gilegala
Yeleko
Gezela
Yelushalema
Makeda
Yalamuta
Adulama
Libena
Lakisha
Egelona
Hebelone
Debila
Alada
[Tshimfuanyi mu dibeji 9]
Udi mumanye bua tshinyi bavua bangate Lahaba (mukaji mudisombele) bu muntu muakane anyi?
[Tshimfuanyi mu dibeji 10]
Yoshua wakabela bena Isalele bua ‘kutshina Yehowa ne kumukuatshila mudimu’
[Tshimfuanyi mu dibeji 12]
Buivi bua Akana kabuvua tshilema tshikese to; buakalela bipeta bibi bitambe
[Tshimfuanyi mu dibeji 12]
‘Bua ditabuja ngumbu ya Yeleko yakashimbuka.’—Ebelu 11:30