Mubelu muimpe wa Solomo bua malu audi mua kubala

“KAKUENA ndekelu wa kufunda kua mikanda ya bungi; kutamba kuyila kudi kutekesha mubidi.” (Muambi 12:12) Pakafunda Solomo Mukalenge wa meji wa Isalele mêyi au kukadi bidimu bipite pa 3 000, kavua usua kutekesha bantu ku muoyo bua dibala to. Tshidibi, uvua wakula bua mushinga wa kusungula bia kubala. Divuluija edi ndiakanyine menemene lelu’eu udibu bapatula ku tshidimu tshionso miliyare ne miliyare ya bintu bia kubala mu matanda kabukabu a buloba bujima.

Bidi bimueneka ne: “mikanda ya bungi” ivua Solomo utela kayivua ne dikuatshisha anyi kayivua ikoleshangana to. Ke bualu kayi wakela meji ne: kutamba kuyila mikanda ayi kudi “kutekesha mubidi” pamutu pa kupetesha mubadi masanka adi anenga musangu mule.

Kadi, Solomo uvuaku wamba ne: kakuena mikanda idi ifila mibelu mimpe ne ya kueyemena idi mua kuambuluisha mubadi anyi? Tòo, bualu wakafunda kabidi ne: ‘Mêyi a bena meji adi bu misongolo; adi masangishibue bu misumadi mikumina bikole kudi mulami umue.’ (Muambi 12:11) Bushuwa, kudi mêyi adibu bafunde “adi bu misongolo” adi mua kusonsola majinga mimpe munda mua muntu, adi mua kumusaka mu njila muakane. Kabidi, ‘anu bu misumadi mikuma bikole,’ mêyi au adi mua kuambuluisha bua kukolesha dipangadika didi muntu muangate ne kushalaye mushindame.

Nkuepi kutudi mua kupeta mêyi a meji aa? Bilondeshile Solomo, mêyi adi mapite makuabu onso, ng’aa adi afumina kudi Mulami umue, Yehowa. (Musambu 23:1) Nunku, mukanda mutambe buimpe udi muntu mua kubala bua kupeta mêyi a meji aa m’Bible, udi Nzambi mufundishe ku nyuma wende. Kubala pa tshibidilu mêyi mafundisha ku nyuma kudi mua kuambuluisha muntu bua kulua ‘mukumbajibue, mulongolola tshishiki bua midimu yonso mimpe.’​—2 Timote 3:16, 17.