Nkonko ya babadi

Bua tshinyi Yezu wakambila Toma bua amulenge eku pende ukavua mukandike Mariya wa ku Magadala bua kamulengi?

Imue nkudimuinu ya Bible ya kale idi isua kumuenesha ne: Yezu wakambila Mariya wa ku Magadala bua kamulengi to. Tshilejilu, Mukanda wa Nzambi udi wandamuna mêyi a Yezu nunku: ‘Kundengi tshianza, bualu bua tshiena muanji kuya kuulu kudi Tatu.’ (Yone 20:17) Kadi, muaku wa pa muanda wa tshiena-Greke tshia ntuadijilu, udibu bakudimune pa tshibidilu ne: “kulenga,” udi umvuija kabidi “kulamata, kulembeleja ku, kukuata bikole, kutua tshianza pa, kukuata, kubabata.” Mbia meji bua kuamba ne: Yezu kavua ubenga bua Mariya wa ku Magadala kumulengaye to, bualu wakalekela bakaji bakuabu bavua ku lukita ‘bamukuata ku makasa.’​—Matayo 28:9.

Nkudimuinu ya bungi ya ngakuilu wa lelu, bu mudi eu wa Traduction du monde nouveau, La Nouvelle Bible de Jérusalem ne wa The New English Bible, idi ituambuluisha bua kujingulula tshivua mêyi au a Yezu asua kumvuija pa kuakudimuna ne: “Kunkuatshi to.” Bua tshinyi Yezu wakambila Mariya wa ku Magadala nanku, pende muikale mulunda wende?​—Luka 8:1-3.

Bidi bimueneka ne: Mariya wa ku Magadala uvua ne buôwa wela meji ne: Yezu ukavua pa kumbuka pa buloba ne kubanda mu diulu. Bu muvuaye ne dijinga dikole dia kuikala ne Mukalenge wende, Mariya wakakuata Yezu bikole, kayi musue kumulekela bua yeye kuya to. Bua kumujadikila ne: utshivuaku, Yezu wakambila Mariya bua alekele kumukuata, kadi aye ne amanyishe bayidi bende lumu lua dibishibua diende.​—Yone 20:17.

Kadi diyukidilangana dia Yezu ne Toma divua dishilangane diodi. Pakamuenekela Yezu bamue bayidi bende, Toma kavuapu to. Pashishe, Toma wakela mpata bua dibika dia Yezu ku lufu, wamba ne: kavua mua kuitaba bualu abu to, amba anu bu yeye mumone bibangu bia milonda ivuabu bapopele Yezu ne kubueja tshianza muaba uvuabu bamutue difuma mu lubadi. Matuku muanda mukulu pashishe, Yezu wakamuenekela tshiakabidi bayidi. Musangu eu, Toma uvuapu ne Yezu kumuambilaye bua kulenga mputa yende.​—Yone 20:24-27.

Nunku bua Mariya wa ku Magadala, Yezu uvua muambe nanku bua dijinga dia mukaji eu divua kadiyi diakane dia kumulama bua kayi to; kadi bua Toma, Yezu uvua wambuluisha muntu uvua ne mpata. Bua yonso wa kudibu, Yezu wakenza malu mushindu wakenzaye au ne kenzela.