Nkudimuinu “muimpe mutambe”

 LUAPOLO kampanda ludi luleja ne: kumbukila mu tshidimu tshia 1952 too ne mu tshia 1990, mbapatule nkudimuinu mipiamipia ya mu Anglais ya Mifundu ya tshiena-Greke ya bena Kristo mitue ku 55. Bakudimunyi kabavua bakudimune mifundu mu mushindu umue to. Bua kumanya nkudimuinu muimpe wa kueyemena, Jason BeDuhn mulongeshi wa malu a Nzambi wa mu iniversite kampanda (Northern Arizona University, mu Flagstaff, ku Arizona, mu États-Unis) wakakonkonona ne kufuanyikija nkudimuinu minene muanda mukulu bua kumanya bujalame buayi (munkatshi muayi muvua eu wa Les Saintes Écritures​—Traduction du monde nouveau [wa mu Anglais] mupatula kudi Bantemu ba Yehowa). Ntshinyi tshiakapetaye?

Nansha muakaleja BeDuhn ne: bavua bakudimune imue miaba bibi mu Traduction du monde nouveau, wakamubikila ne: nkudimuinu “muimpe mutambe,” nkudimuinu “mulenga wa dikema,” “mukudimuna ne miaku ya mushindu umue bimpe be” kupita mikuabu yonso ivuaye mukonkonone. Mu tshikoso, BeDuhn wakamba ne: Traduction du monde nouveau ke “umue wa ku nkudimuinu ya mu Anglais idi ne bujalame bua bungi menemene idiku lelu’eu bua Dipungila Dipiadipia” ne “yeye ke udi ne bujalame bua bungi menemene patudi tumufuanyikija ne mikuabu eyi.”​—Truth in Translation: Accuracy and Bias in English Translations of the New Testament.

BeDuhn wakamona kabidi ne: bakudimunyi ba bungi “mbakepeshe anyi mbavudije malu adi Bible wamba bilondeshile tshitu babadi ba matuku etu aa basue anyi tshidibu mua kuamba.” BeDuhn wakamba kabidi bua Traduction du monde nouveau ne: mmushilangane ne mikuabu nkudimuinu bualu “NW udi ne bujalame butambe bungi, mmukudimuna bimpe ku muaku ku muaku ne mmulamate bikole ku mifundu ya ntuadijilu ya bafundi ba Dipungila Dipiadipia.”

Anu bu mudi Komite wa bakudimunyi ba Traduction du monde nouveau wamba, “mbujitu bukole” bua kukudimuna Mifundu Minsantu mu muakulu uvuabu bayifunde kumpala mu miakulu idi bantu bakula lelu’eu. Komite eu udi wamba kabidi ne: “Bakudimunyi bavua benze mudimu eu (badi batshina ne banange Nzambi Muena Mifundu Minsantu) badi badimona ne bujitu bukole bua kusambuluja meji ne mêyi ende ne bujalame buonso.”

Bakapatula Les Saintes Écritures​—Traduction du monde nouveau mujima bua musangu wa kumpala mu tshidimu tshia 1961 ne mpindieu udi mu miakulu 32 ne udi kabidi mu mfundilu wa bampofu mu miakulu ibidi. Mifundu ya tshiena-Greke ya bena Kristo (anyi “Dipungila Dipiadipia”) bua Traduction du monde nouveau idi mu miakulu 18 ne mu mfundilu wa bampofu mu muakulu umue. Tudi tukulomba bua kubala Dîyi dia Nzambi mu nkudimuinu eu “muimpe mutambe” wa mu matuku etu aa. Pamuapa udi mua kuikala mu muakulu uudi mumanye.