Balunda ba Nzambi mu bidiila bia Tonga

Mu 1932 mazuwa a mâyi akafikisha mamiinu a mushinga mukole mu bidila bia Tonga. Kapitene ka mazuwa aa kakapesha Charles Vete kakanda kavua ne tshiena-bualu ne: “Bafue batu penyi?” Charles kushindikaye ne: uvua mupete bulelela. Kupita matuku, biro bidi bilombola mudimu wa Bantemu ba Yehowa biakanyishila Charles bua kukudimuna kakanda aka mu muakulu wa kuabu. Pakajikijaye kukakudimuna eku, bakakapatula e kumutumina tukanda 1 000, yeye kubanga dituabanya. Ke muakatuadijabu kumiamina mamiinu a bulelela bua Bukalenge bua Yehowa mu bukalenge bua Tonga nanku.

TANGILA pa karte ka matunga lua ku manda kua Mbuu wa Pasifike, neusangane bidiila bia Tonga lua ku Ouest menemene kua muaba udi mushonyi utubu babanga kubadila mêba usangila ne mukuabu utubu babikila ne: Tropique du Capricorne. Tongatapu ke tshidiila tshitambe bunene mu Tonga, tshikale mutantshi wa kilometre mitue ku 2 000 paudi umbukila mu tshimenga tshia Auckland, mu Nouvelle-Zélande, mutangile lua ku Nord-Est. Mu Tonga mutu bisanga 171, kadi mu bidiila 45 ke mutu bantu base. James Cook (muena ngendu ya bukebuludi muende lumu wa mu bidimu bia 1700 wa mu Grande-Bretagne) wakinyika bidiila ebi ne: m’Bidiila bia Balunda (îles des Amis).

Mu Tonga mudi bantu batue ku 106 000 ne bidiila bidimu bidi mu bitupa bisatu, bidi binene ngebi: tshia Tongatapu, tshia Ha’apai ne tshia Vava’u. Pa bisumbu bitanu bia Bantemu ba Yehowa bidimu, bisatu bidi mu Tongatapu udi mupite bisanga bikuabu ku bungi bua bantu, tshisumbu tshimue mu Ha’apai, ne tshikuabu mu Vava’u. Bua kuambuluisha bantu bua balue balunda ba Nzambi, Bantemu ba Yehowa mbatekamu nzubu wa ba-misionere ne biro bia dikudimuina mikanda pabuipi ne tshimenga tshikulu tshia Nuku’alofa.​—Yeshaya 41:8.

Mu bidimu bia 1930, Charles Vete ke muntu uvua mumanyike bikole bu Ntemu wa Yehowa nansha muvuaye kayi muanji kutambula too ne mu 1964. Bantu bakuabu bakamutua mu nyima mu mudimu wa diyisha, ke kuibakabu Nzubu wa Bukalenge uvua ubuela bantu 30 mu 1966. Bakenza tshisumbu tshia bamanyishi ba Bukalenge 20 mu Nuku’alofa mu 1970.

 Kubangila anu pinapu, mêyi a muprofete Yeshaya mmakumbane patoke mu bidila bia Tonga: ‘Batumbishe Yehowa, bambile ba mu maloba a ku muelelu wa mâyi manene [anyi bidila] butumbi buende.’ (Yeshaya 42:12) Mudimu wa Bukalenge mmutungunuke anu ne kutanta, ufikisha bantu ba bungi ku didia malanda ne Yehowa. Mu mpungilu wa distrike wa mu 2003 uvua muenzekele mu tshimenga tshia Nuku’alofa, bantu 407 bavua babuelamu, ne bantu 5 kutambulabu. Bantu 621 bavua babuelamu mu Tshivulukilu mu 2004, bileja ne: bamanyishi nebavulanganamu.

Nsombelu wabu ki mmukutakaja ne bintu

Kadi pa kumbusha mu tshimenga tshikulu, miaba mikuabu itshidi dijinga dikole dia bayishi ba Bukalenge. Tshilejilu, bantu 8 500 badi mu bidila 16 bidi ne bantu bia mu Ha’apai badi ne dijinga dikole dia kumvua bulelela bua mu Bible. Bidila bia Ha’apai mbidila bidi nangananga bia tshipanshipanshi, bikale ne mabue matolokamu a bungi, ne miaba mimpe mialabale ya ku muelelu wa mâyi idi ne nsenga mitoke. Mâyi a mbuu a muomu atu matoke too; wewe mutangilemu udi umona muinshi muawu nansha kupita pa metre 30. Mbualu bua disanka dia dikema bua kuowelamu munkatshi mua bibuabuabua ne mishipa ya mekala ya mishindu mipite pa lukama. Misoku ya muomu itu anu mikese pa tshibidilu. Nansha mudibu ne nzubu mikumbanyinaku, mbayase mushindu wa kabayi mua kuyishimbula kudi bipepele bia mvunda mukole ne mvula nansha.

Mitshi ya tshiombe tshia batoke ne ya mangeya idi ifilamu dileji ne biakudia kabidi. Dikeba biakudia ne dibilamba ditu mudimu utu wangata benamu tshitupa tshinene tshia malu abu a ku dituku. Pa kumusha munyinyi wa ngulube, bena mu bidila ebi batu kabidi batunka ne minyinyi ya mu mbuu ya bungi. Mêku atu ne tumadimi tutu tupatula biakudia bitu bimena kuinshi ne bisekiseki. Mitshi ya madima idi iditolokela tshianana; mabue a misa ya koko ne bibote bidimu bitule bipuwe. Batu balongesha bana ba bipungu ne bipungu mua kuondapa ne bisonsa, ne mabeji ne bipatu bia mitshi, ne miji kabidi.

Bulelela, tshitu tshitamba kusankisha mu Ha’apai mbantu badimu batu balejangana bulunda badi bakanyine muaba wabu wa ditalala eu. Wabu nsombelu ki mmukutaja ne bintu bipite bungi to. Bakaji ba bungi batu benza midimu ya bianza, bu mudi kuluka bitunga, kuenza bilamba ne bizubu bia mitshi bizaza, ne tapi. Patu bakaji ba mu Tonga benza midimu eyi, batu basombela pamue mu dileji dia mutshi, bayikila, bimba misambu, baseka, ne misangu mivule bana bakese ne ba pambidi batu banayila anyi baladila anu muaba au. Kabidi dîba ditu mâyi a mu misulu akepela bantu bakaji ke batu pa tshibidilu baya kukeba nkala ne nshisha mu mabue ne minyinyi mikuabu ya mu mâyi bia kudia, ne nzaula kabidi wa muenya wa bungi utubu badia mubishi.

Balume ba bungi batu badifila anu ku budimi, ku diloba, ku disonga dia bintu, dienza dia matu ne dilongolola dia makondo. Balume, bakaji ne bana, batu batambakana ku tshidila ne tshidila mu tu-matu tukese tua kuloba natu tujika bimpe pa mutu bua kukumbula balela babu, kukeba wa kubondopa ne kusumba anyi kusumbisha bintu.

Lumu luimpe ludi lufika too ne mu miaba ya kule

Muaba muimpe wa mushindu eu ke wakafika ba-misionere babidi ne bampanda-njila babidi tshikondo tshia Tshivulukilu tshia mu 2002. Bantemu bakavua bayikilaku umue musangu kumpala ne bantu ba mu Ha’apai, ke kupetabu mikanda ya Bantemu ba Yehowa, kubangabu kulonga nabu Bible.

Balongeshi ba Bible banayi bapiabapia aba bavua badifundile malu asatu: kuabanya mikanda ya malu a mu Bible, kutuadija dilonga Bible ne bantu ku mabu, ne kubikila badi basue bua kusekelela Didia dia dilolo dia Mukalenge. Bakakumbaja malu  onso asatu aa. Bantu 97 bakalua kubuela mu Tshivulukilu tshia lufu lua Yezu. Bamue ba kudibu bavua balue ku matu nansha muvuaku mvula mubi ne bipepele bikole. Bu muvua kulu kubi, ba bungi bakalala muaba wa Tshivulukilu e kupingana ku mabu pakatshiabu.

Biakalomba uvua muele muyuki mu Tshivulukilu bua kudikolesha menemene. Misionere uvua muenze muyuki au udi wamba ne: “Tshiena ne bualu bua kunuambila mudibi mvita mikole bua kuenza miyuki ibidi ya Tshivulukilu mu dilolo dimuepele mu muakulu wa ku ba bende nansha. Nuenu nkayenu nudi mua kufuanyikija disumpakana dimvua nadi. Disambila diakangambuluisha bikole! Ngakabanga kuvuluka miaku ne biambilu bimvua tshiyi nansha ngelela meji ne: nkavua mubimanye to.”

Bu tshipeta tshia muvua bayishi aba bakoleshe dijinga dia bantu dia dîyi dia Nzambi mu bidila bia Ha’apai, balume babidi ba mu Ha’apai ne bakaji babu bakatambula. Mulume umue wa ku babidi aba uvua mutuadije kuanyisha mikanda ya Bantemu pavuaye ulonda malongesha bua kulua mpasata mu tshitendelelu tshia muaba uvuaye.

Nansha muvua muntu au mupele, yeye ne mukajende bavua kumpala ne tshibidilu tshia kuela makuta a bungi mu tshitanda pavuabu batelamu mêna abu tshikondo tshia disangishila ekeleziya makuta dia ku tshidimu tshionso. Ntemu mukuabu ukavua muyukile nabu kumpala wakalomba mulume bua kubulula Bible wende ne kubalaye 1 Timote 5:8. Mupostolo Paulo wakafundamu ne: ‘Kadi bikala muntu kayi usubula [anyi utangila] badi bende ne ba mu nzubu muende mene, yeye wakadiula ditabuja diende ne udi mutambe muntu udi upidia kuitabuja bubi.’ Dîyi dia mu Bible edi diakalenga muoyo wa muntu au. Yeye kumvua ne: pavuaye ufila makuta avuabu bamulomba mapite bungi mu tshitanda tshiende, uvua upangila mua kukumbaja majinga manene a ba mu dîku diende. Dîba dia kusangisha makuta tshidimu tshiakalonda, kakapanga kuvuluka 1 Timote 5:8 to, nansha muvuaye ne makuta mu mpaya. Pakatelabu dîna diende, wakambila muakuidi ne dikima dionso ne: majinga a dîku diende ke avuaye ne bua kuanji kukumbaja kumpala. Ke bakulu ba ekeleziya au kubangabu kupepeja mulume au ne mukajende bibi, babatandisha ne tshiji tshikole mu mêsu a bantu.

Pakalongabu Bible ne Bantemu ba Yehowa, bakalua bubidi buabu bambi ba lumu luimpe. Mulume udi wamba ne: “Bulelela bua mu Bible mbunshintulule. Tshiena kabidi ne luonji ne malu makole kudi ba mu dîku dianyi to. Tshitshiena nnua kabidi maluvu mpitshisha to. Bantu ba mu musoko undi mbamone mudi bulelela bukudimune nsombelu wanyi. Ndi ntekemena se: nebafike pabu ku dinanga bulelela mundi mubunange emu.”

Badi benda bakeba bantu ne mazuwa

Ngondo mikese panyima pa Tshivulukilu tshia mu 2002, mazuwa makuabu a mâyi akafikisha bujitu kampanda bua mushinga kauyi kuamba kule menemene mu bidila bia Ha’apai. Mazuwa a metre 18 (avuabu babikila ne: Quest) a mu Nouvelle-Zélande avua ne tshibidilu tshia kupitshila mu bidila bia Tonga. Mu mazuwa au muvua Gary ne mukajende Hetty, pamue ne muanabu wa bakaji Katie. Bana betu tshitema ba mu Tonga balume ne bakaji, ne ba-misionere babidi, bakenza nabu ngendu misangu ibidi. Bantemu ba mu bidila ebi bakabambuluisha bua kuludika mazuwa au bimpe, nangananga miaba ivua mabue avuabu kabayi baleje pa karte. Tshipatshila tshia ngendu yabu katshivua tshia kupitshisha kapepe to. Bavua baya bua kulongesha bulelela bua mu Bible. Bakenda tshitupa tshinene tshia mbuu tshivuabu bayishe mu bidila 14. Lumu luimpe lua Bukalenge kaluvua luanji kuyishibua mu bimue bia ku bidila abi to.

Bantu ba mu bidila ebi bakenza tshinyi? Bakakidila bena ngendu ya pa mâyi aba misangu mivule ne ngakidilu wa tshiena kuabu ne disanka ne musangelu, baleja dijinga dia kumanya. Pavua bena mu bidila ebi bajingulula kendela ka bana betu, bavua baleja dianyisha  dia bungi. Bantemu bavua babendele abu bavua bamona patoke muvua bantu ba mu bidila ebi banemeka Dîyi dia Nzambi ne bikale dijinga ne malu a mu nyuma.​—Matayo 5:3.

Misangu mivule, Bantemu aba bavua basomba muinshi mua mitshi babanyunguluke kudi bantu bavua ne nkonko kabukabu ya malu a mu Bible. Pavua panshi pafika, bavua babuelela mu nzubu batungunuka ne kuyikila malu a mu Bible. Bantu ba mu tshidila tshikuabu bakasengelela Bantemu pakavuabu baya ne: “Kanuyi to! Panudi numbuka apa nnganyi watuandamuna kabidi nkonko yetu?” Ntemu mukuabu wakaleja ne: “Bivua bikole misangu yonso bua kushiyangana ne bantu bungi tshianana bavua bafuane mikoko bavua ne nzala ya bulelela. Tudi bakune mamiinu a bungi a bulelela.” Pakafika mazuwa mu tshidila tshikuabu, Bantemu bakasangana bantu bonso bavuale bilamba bia madilu. Mukaji wa munene wa mbulamatadi wa tshimenga atshi utshivua ufuminaku ku difua. Munene au yeye nkayende wakela bana betu abu tuasakidila bua muvuabu babatuadile mukenji wa busambi wa mu Bible.

Kadi bivua lutatu bua kufika mu bimue bidila. Hetty udi uleja ne: “Tshidila tshikuabu katshivua ne muaba muimpe wa kutudila ne mazuwa to, anu bibungubungu bibande mulu bule bua metre mujima anyi kupita apu. Tuvua mua kubuela mu tshidila anu ne kabuatu ketu kakese ka kuita ne bianza. Tshia kumpala, tuakakupila bantu bavua ku mukuna bavua basue kutuambuluisha bibuta bietu. Pashishe pakalelema kabuatu ketu bule bua bimabue bia ku tshibungubungu, tuakatumpika kumpala kua kukakokabu mu mâyi kudi mavuala a mbuu.”

Kadi bakuabu batuvua nabu mu mazuwa au kabavua bibidile kuenda pa mâyi to. Panyima pa luendu lua mbingu ibidi, kapitene ka mazuwa kakafunda bua dipingana dia mu tshidila tshinene tshia Tongatapu ne: “Mêba 18 a luendu mmatuindile. Katuena mua kuluenza katuyi tuimanaku mu njila to, bualu kudi bakadi basama bua luendu lua pa mâyi. Tudi tusanka bua kupingana kuetu, kadi tunyingalala kabidi bikole bua kushiya bantu bungi nunku badi bateleje mukenji wa Bukalenge. Tudi tubashiya anu mu bianza bia Yehowa, ne nyuma wende muimpe ne banjelu bende bua babambuluishe bakole mu nyuma.”

Nebipatule balunda ba Nzambi ba bungi

Pabuipi ne ngondo isambombo kunyima kua diumuka dia bakaya mu bidila ebi ne mazuwa a mâyi, bakatuma bambi ba lumu luimpe babidi, Stephen ne Malaki, bavua bampanda-njila ba pa buabu mu bidila bia Ha’apai bua kuyishamu. Bafikamu, kudituabu pamue ne balume babidi ne bakaji babu batshivua bafuminaku ku ditambula mu dilongesha dia Bible. Batu bayikila ne bantu pa malongesha manene, bambi ba lumu luimpe balongesha Bible bimpe.

Mu dia 1 ngondo wa 12 mu 2003, bakenza tshisumbu mu Haʹapai: tshisumbu tshitanu mu bidila bia Tonga. Bana batu pabu babuelamu ba bungi. Mbamanye mua kuteleja ne ntema mu bisangilu. Batu basomba talalaa, bajinga pabu bua kuandamuna dîba dia kufila mandamuna. Mutangidi wa tshijengu wakaleja ne: “Dimanya diabu dia Miyuki ya mu Mukanda wa Nzambi didi dileja mudi baledi bakumbaja bujitu buabu bua kubueja bulelela bua mu Bible munda mua bana babu ne muoyo mujima.” Bushuwa, bidiila ebi mbimueneke ne: nebipatule kabidi balunda bakuabu ba Yehowa ba bungi.

Bidimu bimane kupita pa 70 mpindieu katshia Charles Vete wakudimuna kakanda ka Bafue batu penyi? mu muakulu wabu wa tshiena-Tonga, kavua nansha mumanye bungi bua bantu ba mu ditunga diabu bavua mamiinu a Bukalenge mua kuela mija mu mioyo yabu nansha. Kumbukila anu ku ntuadijilu mukese au, Yehowa mmutungunuke ne kubenesha mudimu udi wenda anu utanta wa dimanyisha dia lumu luimpe mu tshitupa atshi tshia kulekule tshia buloba. Lelu’eu, tudi mua kuamba mu bulelela ne: Tonga mmubadila pende mu bidila bia kulekule bia mu mbuu bidi binyemena kudi Yehowa. (Musambu 97:1; Yeshaya 51:5) Bidila bia Tonga mbilue mpindieu muaba udi balunda ba bungi ba Yehowa.

[Tshimfuanyi mu dibeji 8]

Charles Vete mu 1983

[Tshimfuanyi mu dibeji 9]

Dienza bilamba ne bizubu bia mitshi

[Tshimfuanyi mu dibeji 10]

Mazuwa a “Quest” avuabu benda batangalaja nawu lumu luimpe mu Tonga

[Tshimfuanyi mu dibeji 11]

Kasumbu ka bakudimunyi mu Nukuʹalofa

[Mêyi a dianyisha bua bimfuanyi mu dibeji 9]

Dienza bilamba ne bizubu bia mitshi: © Jack Fields/​CORBIS; munda mua dibeji dia 8 ne dia 9, ne diloba: © Fred J. Eckert