‘Ndi ne disanka bua mudibu bandongeshe’

KAZUNA wakapapuka pakamupesha mulongeshi wabu lungenyi lua kuenza diteta dia kuenza muyuki mu Anglais. Diteta edi divua dilongolola bua bena tulasa tua bikadilu bonso ba mu tshidila tshinene tshia ku Nord tshia Hokkaido, mu ditunga dia Japon. Kadi mulongi nansha umue wa mu tulasa tuabu kavua muanji kuenza diteta adi to. Dituku dia diteta, Kazuna wakumvua buôwa bualu uvua ne bua kudienza ne balongi bakuabu batue ku 50. Wakatamba kumvua buôwa bua bungi pakamonaye bantu babidi bavua babela mpue bikale bena muakulu wa Anglais.

Bakatela bavua bakuate, batuadija ne uvua mupete difutu dikese menemene. Pakaluabu kubikila Kazuna ku ndekelu kua bonso, wakakema. Yeye ne mulongeshi wabu uvua musombe ku luseke luende bakatangilangana bakatshila. Kazuna wakaya ku tshiakuidi ne dipampakana, kumupeshabu difutu dipite a bakuabu onso.

Kazuna wakumvuija ne disanka dionso ne: “Bualu ebu mbuenzeke anu bua dilongesha dindi mupete mu bulongolodi bua Yehowa mu Kalasa ka Mudimu wa Nzambi. Ndi ne disanka dia bungi bua mundi mupete dilongesha edi.” Kazuna mmudifundishe mu kalasa aka utshidi muana ne kadi tshimue tshia ku bisangilu bia Bantemu ba Yehowa. Pavuaye udilongolola bua diteta edi, wakatabalela malu bu mudi mushindu wa kuakula ku mikro, wa kuakula ne bulenga ne musangelu, kuenza jeste, ditangilangana ne bateleji ne makuabu malu atubu balongesha mu Kalasa ka Mudimu wa Nzambi.

Anyishaku ulue kudimuenena mudi kalasa aka kenzeka. Badi bakalombola lumingu luonso ku Nzubu wa Bukalenge wa Bantemu ba Yehowa wa muaba unudi. Luaku udimuenene mudi bana ne bakulumpe bapeta diambuluisha. Tshisangilu etshi ntshia bantu bonso. Bua kumanya malu makuabu adi atangila kalasa kadi kenzekela pabuipi nenu, suaku upetangane ne Bantemu ba Yehowa ba muaba uudi musombele.