Yehowa mmukuatshishi wetu

“Dikuatshisha dianyi didi difuma kudi Yehowa, wakafuka diulu ne buloba.”​—MUSAMBU 121:2.

1, 2. (a) Bua tshinyi tudi mua kuamba ne: tuetu bonso tutu imue misangu dijinga ne dikuatshisha? (b) Yehowa mmukuatshishi wa mushindu kayi?

 NNGANYI utu kayi ne dijinga ne dikuatshisha? Bushuwa, tuetu bonso tutu imue misangu dijinga ne dikuatshisha bua kujikija bualu budi bututonda, bua kukolesha muoyo patudi bafuishe muntu peshi patudi tukandamena lutatu kampanda lukole. Patu muntu dijinga ne dikuatshisha, utu misangu ya bungi uya kudi mulunda muimpe. Kukuatshila mulunda wa mushindu’eu lutatu lutudi nalu kudi mua kuenza se: tulutantamene bipepele. Kadi diambuluisha didi mua kufumina kudi muntu netu ditu ne mikalu. Kabidi bantu bakuabu kabena mua kuikala dîba dionso ne mushindu wa kutuambuluisha patudi nabu dijinga to.

² Kadi kudi Mukuatshishi udi ne bukole kabuyi mikalu ne udi ne bionso. Udi utujadikila kabidi ne: kakutulekela nansha kakese. Yeye ke Eu udi mufundi wa Misambu utela ne dishindika dionso wamba ne: “Dikuatshisha dianyi didi difuma kudi Yehowa.” (Musambu 121:2) Bua tshinyi mufundi wa Misambu uvua mutuishibue ne: Yehowa uvua mua kumuambuluisha? Bua kuandamuna lukonko elu, tukonkononayi Musambu wa 121. Dikonkonona Musambu eu nedituambuluishe bua kumvua bua tshinyi tuetu petu tudi mua kumona ne dieyemena dionso Yehowa bu Mukuatshishi wetu.

Kua kupetela dikuatshisha misangu yonso

3. Nku mikuna kayi kuvua pamuapa mufundi wa Misambu mubandishe mêsu ende, ne mbua tshinyi?

³ Ku ntuadijilu mufundi wa Misambu wakaleja ne: udi ne dieyemena kudi Yehowa bualu yeye ke mufuki wa bintu bionso. Wakamba ne: “Ndi mbandisha mesu anyi ku mikuna mile. Dikuatshisha dianyi didi difuma kudi kunyi? Dikuatshisha dianyi didi difuma kudi Yehowa, wakafuka diulu ne buloba.” (Musambu 121:1, 2) Mufundi wa Misambu kavua mubandishe mêsu ende ku mukuna kayi onso to. Pakafundabu mêyi aa, ntempelo wa Yehowa uvua ku Yelushalema. Musoko au uvua muaba mutumbuke mu mikuna ya Yuda, uvua muaba uvua Yehowa muenze bu musombele. (Musambu 135:21) Mufundi wa Misambu uvua mua kuikala mubandishe mêsu ende ku mikuna ya Yelushalema kuvuabu bibake ntempelo wa Yehowa, mutangile ne dishindika dionso kudi Yehowa bua kupeta dikuatshisha. Bua tshinyi uvua mushindike ne: Yehowa uvua mua kumuambuluisha? Bualu Udi “Mufuki wa diulu ne buloba.” Ke bua tshinyi mufundi wa Misambu uvua anu bu uvua wamba ne: ‘Bushuwa, kakuena tshintu nansha tshimue tshidi mua kupangisha Mufuki wa bukole bonso bua kungambuluisha!’​—Yeshaya 40:26.

4. Mmunyi muvua mufundi wa Misambu muleje ne: Yehowa utu anu utabalela majinga a bantu bende, ne bua tshinyi bualu ebu budi bukolesha ku muoyo?

⁴ Pashishe mufundi wa Misambu wakumvuija  ne: Yehowa utu utabalela majinga a basadidi bende misangu yonso. Wakamba ne: ‘Yeye kêna witabuja bua dikasa diebe diselemuke; utu wakulama kêna ulala tulu. Mona, udi ulama bena Isalele kêna ulala tulu, kêna ubunga tulu.’ (Musambu 121:3, 4) Kabiena mua kuenzekela Nzambi bua alekele bantu badi bamueyemena ‘baselemuka’ anyi badishinde mu mushindu udibu kabayi mua kujuka nansha. (Nsumuinu 24:16) Bua tshinyi kabiena mua kumuenzekela nanku? Bualu Yehowa udi bu mulami wa mikoko utu anu mutabale menemene bua kulama mikoko yende. Lungenyi elu kaluena lukolesha ku muoyo anyi? Kakupanga kumona majinga a bantu bende nansha bua katupa kîpi to. Udi ubalama munya ne butuku.

5. Bua tshinyi badi bamba ne: Yehowa udi ku “tshianza tshia balume”?

⁵ Mufundi wa Misambu uvua ne dishindika dia se: Yehowa udi Mukubi wa bantu bende ne lulamatu luonso. Ke bua tshinyi wakafunda ne: ‘Yehowa udi mulami webe; Yehowa udi dileji diebe ku tshianza tshiebe tshia balume. Dîba kadiena dikuenzela bualu mu munya, nansha ngondo butuku.’ (Musambu 121:5, 6) Bua muntu udi wenda ku makasa mu tshitupa tshia Asia wa ku Est ne wa pankatshi, muaba utu dileji utu ukuba bantu padi dîba diosha bikole. Yehowa udi bu dileji bua bantu bende, ubakuba ku makenga adi mua kubosha bu munya wa kafiondola mbua makoba. Tangila mudibu bamba bua Yehowa ne: udi ku ‘tshianza tshia balume.’ Mu mvita ya kale, tshianza tshia balume tshia musalayi katshivua tshilama bimpe kudi ngabu to, bualu bavua bamukuata ku tshianza tshia bakaji. Mulunda wa lulamatu uvua mua kulama musalayi nende pa kuimana ne kuluangena ku dia balume diende. Anu bu mulunda wa mushindu’eu, Yehowa udi wimana ku luseke lua batendeledi bende ne lulamatu luonso, mudiakaje misangu yonso bua kubakuatshisha.

6, 7. (a) Mmunyi mudi mufundi wa Misambu utujadikila ne: Yehowa kakulekela kukuatshisha bantu bende to? (b) Bua tshinyi tudi mua kuikala petu ne dishindika bu dia mufundi wa Misambu?

⁶ Yehowa udiku mua kulekela kukuatshisha bantu bende anyi? Kabiena mua kuenzeka nansha. Mufundi wa Misambu wakafika ku diamba ne: ‘Yehowa neakulame ku malu makole onso; yeye nealame muoyo webe. Yehowa neakulame pawapatuka ne pawabuela, ku dituku edi too ne tshiendelele.’ (Musambu 121:7, 8) Tangila bua ne: mufundi wa Misambu udi ulekela kuakula bua mpindieu wakula bua malu atshilualua. Kumpala mu mvese 5, uvua muambe ne: “Yehowa udi mulami webe.” Kadi mu mvese eyi mufundi wa Misambu wakamba ne: “Yehowa neakulame.” Nunku badi bajadikila batendeledi balelela ne: dikuatshisha dia Yehowa neditungunuke too ne mu matuku atshilualua. Nansha bobu baya penyi, nansha dikenga dia mushindu kayi mua kubakuata, tshianza tshia Nzambi katshiakupanga nansha kakese bua kubakuatshisha to.​—Nsumuinu 12:21.

⁷ Bushuwa mufundi wa Musambu wa 121 uvua mushindike ne: Mufuki wa bukole buonso udi ulama basadidi bende ne bulenga butu nabu mulami wa mikoko udi uditatshisha bua mikoko yende, ne kayi ubuikila dîsu anu bu nsentedi muimpe. Tudi ne bionso bidi bikengedibua bua kuikala ne dishindika bu dia mufundi wa Misambu bualu Yehowa katu ushintuluka to. (Malaki 3:6) Ebi bidi biumvuija ne: neatukube ku mubidi misangu yonso anyi? Tòo. Kadi bituikala tutangila kudiye bu Mukuatshishi wetu, neatulame ku malu onso adi mua kutuenzela bibi mu nyuma. Mbiakanyine bua tuetu kuebeja ne: ‘Mmunyi mudi Yehowa utukuatshisha?’ Tutangilayi mishindu inayi idiye utuambuluisha. Mu tshiena-bualu etshi netumone muvuaye mukuatshishe basadidi bende bikondo bia kale. Mu tshiena-bualu tshialonda netumone mudiye ukuatshisha bantu bende lelu’eu.

Dikuatshisha dia banjelu

8. Bua tshinyi kabiena bikemesha bua mudi banjelu basue bikole bua basadidi ba Nzambi badi ba pa buloba bikale ne diakalenga?

⁸ Yehowa udi ne banjelu miliyo ne miliyo ku bukokeshi buende. (Danyele 7:9, 10) Bana bende ba mu nyuma aba batu benza disua diende ne lulamatu luonso. (Musambu 103:20) Mbamanye bimpe ne: Yehowa mmunange bantu badi bamutendelela bikole ne mmusue kubambuluisha. Nunku kabiena bitukemesha bua mudi banjelu basue bua basadidi ba Nzambi badi pa buloba bikale ne diakalenga. (Luka 15:10) Ke bua tshinyi banjelu badi bushuwa basanka padi Yehowa ukuata nabu mudimu bua kuambuluisha bantu. Mmu mishindu kayi muvua Yehowa mukuate mudimu ne banjelu bua kukuatshisha basadidi bende mu bikondo bia kale?

9. Fila tshilejilu tshia muvua Nzambi mupeshe banjelu bukenji ne bukole bua kukuba bantu bena lulamatu.

 ⁹ Nzambi wakapesha banjelu bukenji ne bukole bua kukuba ne kusungila bantu bena lulamatu. Banjelu babidi bakambuluisha Lota ne bana bende ba bakaji bua kuepuka kabutu ka Sodoma ne Amola. (Genese 19:1, 15-17) Muanjelu umuepele wakashipa basalayi bena Ashû 185 000 bavua bamba kubunda musoko wa Yelushalema. (2 Bakelenge 19:35) Pavuabu bele Danyele mu buina bua ntambue, Yehowa ‘wakatuma muanjelu wende, wakasuika mbanga ya ntambue.’ (Danyele 6:21, 22) Muanjelu mukuabu wakapatula mupostolo Petelo mu buloko. (Bienzedi 12:6-11) Bible udi utela bilejilu bikuabu bivule bia muvua banjelu bakuba bantu ne bidi bijadika tshidi Musambu wa 34:7 wamba ne: ‘Muanjelu wa Yehowa udi wasa tshitudilu tshiende tshinyunguluke badi bamutshina, udi ubasungila.’

10. Mmunyi muvua Yehowa mukuate mudimu ne muanjelu bua kukankamija muprofete Danyele?

¹⁰ Imue misangu, Yehowa wakakuata mudimu ne banjelu bua kukankamija ne kukolesha bantu bena lulamatu. Mu Danyele nshapita 10 mudi tshilejilu tshidi tshilenga ku muoyo. Tshikondo atshi Danyele uvua pamuapa ne bidimu pabuipi ne 100. Muprofete eu uvua mutekete ku muoyo bikole, bimueneka ne: mbua muvua Yelushalema mupula ne dibakulula dia ntempelo dikale dijanguluka. Wakapampakana kabidi pakamonaye tshikena-kumona tshikuate buôwa. (Danyele 10:2, 3, 8) Ne dinanga dionso Nzambi wakatuma muanjelu bua kumukankamija. Misangu mipite pa umue, muanjelu eu wakavuluija Danyele ne: uvua “munangibue bikole” ku mêsu kua Nzambi. Mmunyi muakadiumvua Danyele? Muprofete mukulakaje eu wakambila muanjelu ne: “Wakunkolesha.”​—Danyele 10:11, 19.

11. Ntshilejilu kayi tshidi tshileja muvuabu bakuata mudimu ne banjelu bua kulombola mudimu wa diyisha lumu luimpe?

¹¹ Yehowa wakakuata kabidi mudimu ne banjelu bua kulombola mudimu wa buambi bua lumu luimpe. Muanjelu kampanda wakalombola Filipo bua aye kuyisha bualu bua Kristo kudi muntu mutungula wa mu Atiopa wakatambula pashishe. (Bienzedi 8:26, 27, 36, 38) Matuku makese pashishe, disua dia Nzambi divua dia se: bayishe lumu luimpe kudi bantu ba bisamba bia bende bavua kabayi batengula. Mu tshikena-kumona tshikuabu, muanjelu wakamuenekela Kônelio, muntu wa tshisamba tshia bende uvua utshina Nzambi, ne kumuambilaye bua kubikidisha mupostolo Petelo kuende. Pakapetangana bantu bavua Kônelio mutume ne Petelo, bakamuambila ne: ‘Nzambi wakadimuija Kônelio kudi muanjelu wa tshijila bua kukubikilaye ulue mu nzubu muende ne bua kumvuaye mêyi ebe.’ Petelo wakitaba bua kuya, nunku bantu ba bisamba bia bende ba kumpala bavua kabayi batengula bakabuela mu tshisumbu tshia bena Kristo. (Bienzedi 10:22, 44-48) Elabi meji muudi mua kudiumvua biwamanya ne: muanjelu uvua mukuambuluishe bua kupetangana ne muntu wa muoyo muakane!

Dikuatshisha ku diambuluisha dia nyuma muimpe

12, 13. (a) Bua tshinyi bapostolo ba Yezu bavua bitaba ne: nyuma muimpe uvua mua kubakuatshisha? (b) Mmushindu kayi uvua nyuma muimpe mupeshe bena Kristo ba mu bidimu lukama bia kumpala bukole?

¹² Katupa kakese kumpala kua Yezu kufuaye, wakashindikila bapostolo bende ne: kabakushala kabayi ne dikuatshisha to. Tatu uvua ne bua kubapesha ‘musambi [anyi mukuatshishi], nyuma muimpe.’ (Yone 14:26) Kuvua malu avua mua kuitabijija bapostolo ne: nyuma muimpe uvua mua kubakuatshisha. Bushuwa, Mifundu mifundisha ku nyuma mmiule ne bilejilu bia muvua Yehowa mukuate mudimu ne nyuma muimpe, bukole bunene butambe bua kuambuluisha bantu bende.

¹³ Misangu mivule, Yehowa wakenza mudimu ne nyuma muimpe bua kupesha bantu bukole ne bukenji bua kuenza disua diende. Nyuma muimpe wakapesha Balumbuluishi bukole bua kusungila Isalele. (Balumbuluishi 3:9, 10; 6:34) Anu yeye nyuma eu wakapesha bena Kristo ba mu bidimu lukama bia kumpala bukole bua kutungunuka ne kuyisha ne dikima nansha muvuaku buluishi bua mishindu yonso. (Bienzedi 1:8; 4:31) Bu muvuabu bakumbaje mudimu wabu wa buambi bimpe, ebi bivua tshijadiki tshia se: nyuma muimpe udi wenza mudimu. Ntshinyi tshikuabu tshivuaku mua kumvuija mudi bantu ‘badi kabayi bamanye mikanda, bantu patupu’ mua kumuangalaja mukenji wa Bukalenge mu buloba bujima buvua bumanyike tshikondo atshi?​—Bienzedi 4:13; Kolosai 1:23.

14. Mmunyi mudi Yehowa muenze mudimu ne nyuma muimpe wende bua kupesha bantu bende butoke?

 ¹⁴ Yehowa wakakuata kabidi mudimu ne nyuma muimpe wende bua kupesha bantu bende butoke. Ku diambuluisha dia nyuma wa Nzambi, Yosefe wakafika ku diumvuija bilota bia Palô bivua bileja malu. (Genese 41:16, 38, 39) Ku butuangaji bua nyuma wende, Yehowa wakenza bua se: malu adiye mulongolole baasokolole kudi bena budipuekeshi ne ikale masokome kudi bena lutambishi. (Matayo 11:25) Nunku bua malu adi Yehowa mulongoluele “badi bamunanga,” mupostolo Paulo wakamba ne: ‘Kadi Nzambi wakatubuluila malu aa mu nyuma muimpe.’ (1 Kolinto 2:7-10) Muntu udi mua kufika ku dijingulula bushuwa disua dia Nzambi anu yeye ne dikuatshisha dia nyuma muimpe.

Dikuatshisha dia Dîyi dia Nzambi

15, 16. Ntshinyi tshiakambilabu Yoshua bua kuenza bua kufikaye ku dienza malu ne meji?

¹⁵ Dîyi difundisha ku nyuma wa Yehowa didi “ne mudimu muimpe wa kuyisha bantu,” ne didi diambuluisha basadidi ba Nzambi bua bikale ‘bakumbajibue, balongolola tshishiki bua midimu yonso mimpe.’ (2 Timote 3:16, 17) Mu Bible mudi bilejilu bia bungi bia mushindu uvua bantu ba Nzambi ba bikondo bia kale bapete dikuatshisha mu bitupa bia Dîyi diende bikavua bimana kufunda.

¹⁶ Mifundu yakambuluisha bua kupetesha batendeledi ba Nzambi buludiki buimpe. Pakapeshabu Yoshua bujitu bua kulombola tshisamba tshia Isalele, bakamuambila ne: ‘Mukanda eu wa mikenji yanyi [uvuabu bafunde kudi Mose] kaumuki mukana muebe; kadi welangane meji a mukanda eu munya ne butuku, udimuke mua kuenza malu onso adi mafundamu; pashishe neutute dikasa dimpe, newikale ne diakalengele.’ Nzambi kavua mulaye Yoshua bua kumupesha meji mu tshishima. Kadi bu Yoshua mua kubala “mukanda wa mikenji” ne kuelanganapu meji, uvua mua kuenza malu ne meji.​—Yoshua 1:8; Musambu 1:1-3.

17. Mmunyi muvua Danyele ne Mukalenge Yoshiya bapete dikuatshisha mu Mifundu ivuaku tshikondo tshiabu?

¹⁷ Dîyi dia Nzambi difunda ndiambuluishe kabidi bua kusokolola disua diende ne malu adiye mulongolole. Tshilejilu, Danyele wakajingulula mu mikanda ya Yelemiya bungi bua bidimu bivua Yelushalema mua kushala kayi muasa. (Yelemiya 25:11; Danyele 9:2) Tangila kabidi tshiakenzeka tshikondo tshia bukokeshi bua Yoshiya Mukalenge wa Yuda. Tshikondo atshi, tshisamba tshikavua tshisesuke kule ne Yehowa, ne bidi bimueneka ne: bakalenge kabavua kabidi baditentuila mukanda wa mikenji ne bayilonda to. (Dutelonome 17:18-20) Kadi pavuabu balongolola ntempelo, bakangula ‘mukanda wa mikenji’ mufunda pamuapa kudi Mose. Mukanda eu uvua pamuapa wa ku tshifundilu, bavua bajikije kuufunda bidimu bitue ku 800 kumpala. Panyima pa bobu bamane kubadila Yoshiya malu avua mu mukanda eu, wakajingulula muvua tshisamba tshisesuke bikole ku disua dia Yehowa, ne mukalenge eu wakangata mapangadika bua kuenza tshivua tshifunda mu mukanda au. (2 Bakelenge 22:8; 23:1-7) Ki mbimueneke patoke bua se: bantu ba Nzambi ba bikondo bia kale bakapeta dikuatshisha mu bitupa bia Mifundu Minsantu bivuaku tshikondo tshiabu anyi?

Dikuatshisha dia bena Kristo netu

18. Bua tshinyi tudi mua kuamba ne: padi mutendeledi mulelela wambuluisha mukuabu, Yehowa ke udi muenze bualu ebu?

¹⁸ Dikuatshisha didi Yehowa ufila ditu dilua misangu mivule ku butuangaji bua bena kuitabuja netu. Bushuwa, Nzambi ke mpokolo wa dikuatshisha dionso didi mutendeledi mulelela ufila kudi mukuabu. Bua tshinyi tudi tuamba nanku? Kudi malu abidi. Tshia kumpala, nyuma muimpe ke utu ubasonsola. Nyuma eu udi ukuamisha mamuma bu mudi dinanga ne buimpe munda mua aba badi bakeba bulombodi buende. (Galatia 5:22, 23) Nunku padi umue wa ku basadidi ba Nzambi musakibue bua kuambuluisha mukuabu,  ntshijadiki tshia mudimu udi nyuma wa Yehowa wenza. Tshibidi, tudi bafuka mu tshimfuanyi tshia Nzambi. (Genese 1:26) Ebi bidi biumvuija ne: tudi mua kuleja ngikadilu yende bu mudi bulenga ne luse. Nunku padi musadidi kampanda wa Yehowa wambuluisha mukuabu, Mpokolo mulelela wa dikuatshisha adi nyeye muena ngikadilu idibu baleje.

19. Bilondeshile malu adi mafunda mu Bible, mmunyi muvua Yehowa mufile dikuatshisha ku butuangaji bua bena kuitabuja?

¹⁹ Mmunyi muvua Yehowa mufile dikuatshisha ku butuangaji bua bena kuitabuja mu bikondo bia kale? Misangu mivule Yehowa uvua usaka umue wa ku basadidi bende bua kubela mukuabu, bu pavua Yelemiya mupeshe Baluka mibelu yakamupandisha. (Yelemiya 45:1-5) Misangu mikuabu, batendeledi balelela bavua basakibue bua kuambuluisha bena kuitabuja nabu ne bintu. Tshilejilu, bena Kristo ba ku Makedonia ne Akai bakaleje lukunukunu bua kuambuluisha bana babu ba ku Yelushalema bavua mu dikenga. Mupostolo Paulo wakamona ne: kalolo ka mushindu’eu kakafikisha ku “disakidila kudi Nzambi.”​—2 Kolinto 9:11.

20, 21. Mmu nsombelu kayi muvua bana betu ba ku Lomo bakoleshe mupostolo Paulo?

²⁰ Tshidi tshilenga ku muoyo nangananga mmiyuki ya muvua basadidi ba Yehowa badienzeje bua kukoleshangana ne kukankamijangana. Tutangile tshilejilu tshia bualu buvua bufikile mupostolo Paulo. Pavuaye mu njila mutangile ku Lomo bu muena buloko, wakayila mu tshibeba tshia bena Lomo tshivuabu babikila ne: Njila wa Apio. Tshitupa tshia ndekelu tshia luendu elu ke tshivua nangananga tshibi, bualu bavua ne bua kupitshila mu tshibanda tshivua ne bitotshi. * Bana betu ba mu tshisumbu tshia ku Lomo bakumvua ne: Paulo uvua ulua. Ntshinyi tshiakenzabu? Bavua mua kusomba bateka mukolo pa mukuabu ku nzubu yabu bindile difika dia Paulo bua kuya kumuela muoyo anyi?

²¹ Mufundi wa Bible Luka wakenza luendu pamue ne Paulo udi utuambila tshiakenzeka: ‘Pakumvua bana betu ba mu Lomo lumu luetu, bakalua kutuakidila ku Tshisalu tshia Apio ne pa Nzubu Isatu ya Tshilala benyi.’ Udiku mua kumona bualu ebu mu lungenyi luebe anyi? Pakamanyabu ne:  Paulo uvua ulua, bakatuma bana betu bakuabu bumbukile ku Lomo bua kulua kumuakidila. Bamue ba kudibu bakamuindila pa Tshisalu tshia Apio, muaba uvua mumanyike bikole uvua bena ngendu bikishila, uvua mu kilometre mitue ku 74 ne Lomo. Bana betu bakuabu bakindila pa Nzubu Isatu ya Tshilala Benyi, muaba wa kuikishila uvua mu kilometre 58 ne tshimenga tshia Lomo. Ntshinyi tshiakenza Paulo? Luka udi wamba ne: ‘Pakabamona Paulo, wakasakidila Nzambi, mutshima wende wakakankamana.’ (Bienzedi 28:15) Tuelayiku meji: Pakamona Paulo patupu bana betu abu bavua baditatshishe bua kuenza luendu luonso alu wakapeta bukole ne biakamusamba! Ne nganyi uvua Paulo muele tuasakidila bua dikuatshisha edi? Wakela eu uvua mufile dikuatshisha adi, tuambe ne: Yehowa Nzambi.

22. Mvese wetu wa tshidimu tshia 2005 mvese kayi, ne ntshinyi tshituakonkonona mu tshiena-bualu tshidi tshilonda?

²² Kabiyi mpata, miyuki mifundisha ku nyuma wa Nzambi idi ileja ne: Nzambi utu wambuluisha bantu bende. Mmukuatshishanganyi udi kayi kuelekeja. Mbikumbanyine mudi mêyi adi mu Musambu wa 121:2 mikale mvese wa tshidimu tshia 2005 bua Bantemu ba Yehowa. Mêyi aa adi ne: “Dikuatshisha dianyi didi difuma kudi Yehowa.” Mmunyi mudi Yehowa utukuatshisha lelu’eu? Netukonkonone bualu ebu mu tshiena-bualu tshidi tshilonda.

[Mêyi adi kuinshi]

Udi muvuluke anyi?

Mmu mishindu kayi muvua Yehowa mufile dikuatshisha:

• ku butuangaji bua banjelu?

• ku diambuluisha dia nyuma wende muimpe?

• ku diambuluisha dia Dîyi diende difundisha ku nyuma?

• ku butuangaji bua bena Kristo?

[Nkonko ya dilonga]

[Lungenyi lunene lua mu dibeji 15]

Mvese wa tshidimu tshia 2005 udi ne: “Dikuatshisha dianyi didi difuma kudi Yehowa.”​—Musambu 121:2.

[Tshimfuanyi mu dibeji 16]

Paulo wakela Nzambi tuasakidila bua dikuatshisha diakapetaye kudi bana betu ba mu Lomo