Dinanga dia Nzambi didi dibasanga

PAVUA tshisumbu tshia bena Kristo tshituadija mu bidimu lukama bia kumpala Bikondo Bietu ebi, tshimue tshia ku bimanyinu binene biatshi tshivua buobumue nansha muvua bantu bavuamu bashilangane. Batendeledi ba Nzambi mulelela abu bavua ba mu bisamba bia mu Asia, ku Mputu ne mu Afrike. Bavua ne nsombelu mishilangane kumpala: bamue bavua bakuidi, basalayi, bapika, bena tshimuangi, bena midimu ya bianza ne bangenda mushinga. Bamue bavua bena Yuda, bakuabu bavua bantu ba bisamba bia bende. Ba bungi bavua benda masandi, bamanyangana balume ne balume anyi bakaji ne bakaji, bakuatshika maluvu, biba ne banyengangana bintu. Kadi, pakaluabu bena Kristo, bakalekela bikadilu biabu bibi ne kudisangabu pamue mu ditabuja.

Ntshinyi tshiakafikishe Buena-Kristo bua kumpala bua kusanga bantu bonso aba mu buobumue? Bua tshinyi bavua mu ditalala munkatshi muabu ne kabidi ne bakuabu bantu bonso? Bua tshinyi kabavua babuelakana mu ndululu ne mvita? Bua tshinyi Buena-Kristo bua kumpala mbushilangane bikole ne bitendelelu binene bia lelu?

Ntshinyi tshivua tshisanga bena tshisumbu?

Dinanga dia Nzambi ke bualu bua kumpalampala buvua basanga bena kuitabuja mu bidimu lukama bia kumpala. Bena Kristo abu bavua bamanye dibanza diabu dia kumpala dia kunanga  Yehowa Nzambi mulelela ne mutshima wabu onso, ne anyima wabu yonso ne lungenyi luabu luonso. Tshilejilu, bakambila mupostolo Petelo uvua muena Yuda bua kukumbula muntu wa tshisamba tshia bende, muntu uvuaye kayi nansha mua kutantshila to. Tshiakamusaka bua kutumikila tshivua dinanga dia Yehowa. Petelo ne bena Kristo bakuabu bavua ne malanda masheme ne Nzambi mashila pa dimanya dijalame dia bumuntu Buende, dia bidiye musue ne dia bidiye kayi musue. Mu tshikondo tshivuabi biakanyine, batendeledi bonso bakajingulula ne: bivua disua dia Nzambi kudibu bua ‘babakaje tshishiki mu meji amue ne mu lungenyi lumue.’​—1 Kolinto 1:10; Matayo 22:37; Bienzedi 10:1-35.

Tshivua tshisanga kabidi bena kuitabuja tshivua ditabuja Yezu Kristo. Bavua basue kulonda bidia biende bimpe menemene. Wakabatumina dîyi ne: ‘Nusuangane; nusuangane bu munakunusua. Bua bualu ebu bantu bonso nebamanye ne: Nudi bayidi banyi, binuasuangana nunku.’ (Yone 13:34, 35) Katshivua dinanga dia pamutupamutu to, kadi ndinanga dilelela. Tshipeta tshivua ne bua kuikala tshinyi? Yezu wakasambila bua bantu bavua bamuitabuja ne: ‘Ndi ndomba bua buonso buabo bikale bamue; Tatu, bu mûdi munda muanyi ne meme munda muebe, bobo kabidi bikale munda muetu.’​—Yone 17:20, 21; 1 Petelo 2:21.

Yehowa wakapesha basadidi bende nyuma wende muimpe anyi bukole buenzeji. Nyuma eu wakabambuluisha bua buobumue kuikalabu munkatshi muabu. Wakabambuluisha bua kumvua malongesha a mu Bible avua bisumbu bionso bitaba. Batendeledi ba Yehowa bavua balongesha mukenji umue umue eu wa ditumbisha dîna dia Yehowa ku butuangaji bua Bukalenge bua Nzambi bulombola kudi Masiya budi buikale mbulamatadi wa mu diulu buakokesha bantu. Bena Kristo ba kumpala bakajingulula mudibu kabayi ne bua ‘kuikala ba pa buloba.’ Nunku padi ndululu ijuka pankatshi pa bena ditunga anyi mvita ya basalayi, bena Kristo kabavua babuelakanamu to. Mbasue kusomba mu ditalala ne muntu yonso.​—Yone 14:26; 18:36; Matayo 6:9, 10; Bienzedi 2:1-4; Lomo 12:17-21.

Bena kuitabuja bonso bavua benza muabu muonso bua buobumue kuikalabu munkatshi muabu. Mmunyi muvuabu benza nanku? Pa kuikala bashindike se: bienzedi biabu bivua mu diumvuangana ne Bible. Nunku mupostolo Paulo wakafundila bena Kristo ne: “Numushe bienu muntu au wa kale, bu muakadi tshikadilu tshienu tshia diambedi,” ne ‘nudivuadike muntu mupiamupia.’​—Efeso 4:22-32.

Bavua bashale mu buobumue

Bushuwa bena kuitabuja mu bidimu lukama bia kumpala bavua bapange bupuangane ne kuakamueneka malu akateka buobumue buabu mu njiwu. Tshilejilu, mukanda wa Bienzedi 6:1-6 udi utulondela tshilumbu tshivua tshijuke pankatshi pa bena Kristo bena Yuda bavua bakula tshiena-Greke ne aba bavua bakula tshiena-Ebelu bualu aba bavua bakula tshiena-Greke bavua bamona se: bavua babasungulula. Kadi pakumvua bapostolo muanda eu, bakajikija tshilumbu etshi ne mitalu ne kakuyi kansungasunga to. Kunyima kua matuku, dikokangana diakajuka bua dilongesha kampanda divua dileja malu avua bantu bavua kabayi bena Yuda mu tshisumbu tshia bena Kristo ne bua kuenza. Bakangata dipangadika divua mu diumvuangana ne mêyi a mu Bible, ne bisumbu bionso biakitaba dipangadika edi.​—Bienzedi 15:1-29.

Bilejilu ebi bidi bileja ne: dikokangana kadiakabafikisha ku kansungasunga ka bisamba anyi ku dibenga kupetangana pa amue malongesha to. Bua tshinyi kabiakenzeka nanku? Bualu malu avua abasanga bonso abu pamue avua:  dinanga dia Yehowa, ditabuja Yezu Kristo, dinanga dilelela munkatshi muabu, ditaba buludiki bua nyuma muimpe, ngumvuilu wa muomumue wa malongesha a mu Bible ne dikala badiakaje bua kushintulula bienzedi. Bionso ebi biakasaka bena mu tshisumbu tshia kumpala bua kushala mu buobumue ne mu ditalala.

Badi mu buobumue lelu

Bantu badiku mua kufika ku buobumue mu mushindu umue umue awu lelu eu anyi? Malu aa adiku mua kusanga bena kuitabuja pamue ne kubambuluisha bua kuikala mu ditalala ne bantu ba dikoba dionso mu bitupa bionso bia buloba anyi? Eyowa! Bantemu ba Yehowa mbadisange bu bana ba muntu pa buloba bujima mu matunga mapite pa 230. Malu amue amue akasanga bena Kristo ba mu bidimu lukama bia kumpala ke adi abasanga pabu mu buobumue.

Bualu bua kumpala budi bufikishe Bantemu ba Yehowa ku dikala mu buobumue ndilamata diabu kudi Yehowa Nzambi. Ebi bidi biumvuija ne: badi badienzeja bua kushala bamulamate mu nsombelu yonso. Bantemu ba Yehowa badi kabidi bitabuja Yezu Kristo ne malongesha ende. Bena Kristo aba badi baleja dinanga dilelela kudi bena kuitabuja nabu ne badi bayisha lumu luimpe lumue lumue elu lua Bukalenge bua Nzambi mu matunga onso adibu. Mbasue kuyikila malu a Bukalenge ebu ne bantu ba bitendelelu bionso, dikoba dionso, bisamba ne nsombelu yonso. Bantemu ba Yehowa kabena kabidi babuelakana mu malu a pa buloba to, ne bualu ebu budi bubambuluisha bua kudikanda ku malu a tshididi, bilele bia bantu, bibidilu ne malu a bungenda mushinga adi atapulula bantu bikole. Bantemu bonso mbamanye ne: badi ne bua kuenza muabu muonso bua buobumue kuikalabu munkatshi muabu pa kuikala ne bienzedi bidi biumvuangana ne mikenji ya mu Bible.

Buobumue budi bukoka bantu bakuabu

Buobumue ebu butu misangu mivule bukoka ntema ya bantu badi kabayi Bantemu. Tshilejilu, Ilse * uvua mansere muena Katolike mu nzubu wa badiambike mu ditunga dia Allemagne. Ntshinyi tshivua tshimukoke kudi Bantenu ba Yehowa? Ilse wakamba ne: “Tshitu muanji kupetangana ne bantu bimpe bu bobu. Kabatu baya mu mvita, kabatu benzela muntu nansha umue bibi to. Batu basue kuambuluisha bantu bua bapeta muoyo ne disanka mu mparadizu wakokeshabu kudi Bukalenge bua Nzambi.”

Tshilejilu tshikuabu ntshia Günther uvua musalayi muena Allemagne mutuma mu ditunga dia France mu mvita mibidi ya buloba bujima. Dimue edi munga mpasata muena Mishonyi wakenza masangisha ne basalayi ba tshisumbu tshivuaye. Mpasata wakasambila bua Nzambi abeneshe basalayi abu, abakube batshimune mvita. Panyima pa masangisha, Günther wakaya pa muaba wende wa bunjamu. Utua jimele anyi tulondo tuende, kumonaye basalayi baluishi luseke lukuabu batendelela pamue ne mpasata mukuabu. Günther wakamba kunyima ne: “Mpasata au uvua pamuapa usambila pende bua Nzambi abeneshe basalayi, abalame ne batshimune. Ngakadiebeja muvua bitendelelu bia bena Kristo mua kuluangana mvita.” Malu aa akashala mu lungenyi lua Günther. Pavua Günther mupetangane ne Bantemu ba Yehowa (batu kabayi babuelakana mu mvita) wakabuela mu buena muntu buabu bua pa buloba bujima.

Ashok ne Feema bavua mu tshitendelelu kampanda tshia mu Asia. Mu nzubu muabu muvua kaba kavuabu batendelela nzambi wabu. Pakabuela disama dinene mu dîku diabu, bakakonkonona tshitendelelu tshiabu. Pakayikilabu ne Bantemu ba Yehowa, malongesha a mu Bible ne dinanga divua munkatshi mua Bantemu biakabakemesha. Ne badi mpindieu bambi ba lumu luimpe lua Bukalenge bua Yehowa ba lukunukunu.

Ilse, Günther, Ashok ne Feema mbadisange ne Bantemu ba Yehowa mu buena muntu bua pa buloba bujima. Badi bitabuja dilaya dia mu Bible dia se: malu amue amue adi mabasange pamue mu ntendelelu lelu eu neikale mu tshitupa tshîpi emu mua kusanga bantu bonso bena butumike. Dîba adi kakuikala kabidi dishipangana, ditapulukangana ne diabulukangana mu dîna dia tshitendelelu to. Buloba bujima nebudisange pamue mu ntendelelu wa Yehowa Nzambi mulelela.​—Buakabuluibua 21:4, 5.

[Mêyi adi kuinshi]

[Bimfuanyi mu mabeji 4, 5]

Nansha muvuabu bafuma mu nsombelu mishilashilangane, bena Kristo ba kumpala bavua mu buobumue