Dîyi dia Yehowa didi ne muoyo

Malu manene a mu mukanda wa Balumbuluishi

NTSHINYI tshitu Yehowa wenza padi bantu bende bamuela nyima ne batuadija kutendelela nzambi ya dishima? Ntshinyi tshituye wenza misangu yonso idibu babenga kumutumikila ne bamulomba diambuluisha anu padibu mu dikenga? Yehowa mmulongolole njila kampanda bua kubepula ku makenga anyi? Mukanda wa Balumbuluishi udi wandamuna nkonko eyi ne mikuabu kabidi ya mushinga. Bakaufunda kudi muprofete Samuele bu mu 1100 kumpala kua bikondo bietu ebi, ne malu adibu balondamu avua menzeke mu bidimu 330 kumbukila ku lufu lua Yoshua too ne ku ditekibua dia mukalenge wa kumpala wa Isalele mu nkuasa.

Bu mudi mukanda wa Balumbuluishi muikale tshitupa tshia dîyi dia Nzambi didi ne bukole, udi ne mushinga wa bungi kutudi. (Ebelu 4:12) Miyuki mimpe idimu idi ituleja bumuntu bua Nzambi. Malongesha atudi tupetamu adi akolesha ditabuja dietu ne atuambuluisha bua kulamata ku ‘muoyo udi muoyo wa bushuwa mene,’ muoyo wa tshiendelele mu bulongolodi bupiabupia bulaya kudi Nzambi. (1 Timote 6:12, 19; 2 Petelo 3:13) Bienzedi bia lupandu bidi Yehowa ukumbaja bua bantu bende bidi mundidimbi wa lupandu lunene luakumbaja Muanende Yezu Kristo mu matuku atshilualua.

BUA TSHINYI BALUMBULUISHI BAVUA NE MUSHINGA?

(Balumbuluishi 1:1–3:6)

Kunyima kua bamane kutshimuna bakalenge ba mu buloba bua Kanâna ku bulombodi bua Yoshua, tshisamba ne tshisamba tshionso tshia Isalele tshidi tshiya kupiana bumpianyi buatshi mu buloba abu. Kadi bena Isalele badi bapangila bua kuipata bena mu buloba abu bonso. Dipangila edi didi dilua buteyi bunene kudi Isalele.

Bantu ba tshipungu tshidi tshilonda kunyima kua matuku a Yoshua ‘ki mbamanye Yehowa anyi mudimu munene udiye muenzele bena Isalele.’ (Balumbuluishi 2:10) Kabidi, bantu badi batuadija kuselangana ne bena Kanâna ne kuenzela nzambi yabu mudimu. Ke bua tshinyi Yehowa udi ufila bena Isalele mu bianza bia bena lukuna babu. Kadi padi dikenga dikola, bana ba Isalele badi balomba diambuluisha kudi Nzambi mulelela. Mu nsombelu eu wa malu a ntendelelu, a bantu ne a ditunga ke mudi muyuki wa dilondangana dia balumbuluishi badi Yehowa ujula bua kusungila bantu bende mu bianza bia baluishi babu utuadija.

Mandamuna a nkonko ya mu Bible:

1:2, 4​—Bua tshinyi badi basungula tshisamba tshia Yuda bua tshikale tshia kumpala bua kupiana buloba? Dipa edi divua diakanyine bua kuya kudi tshisamba tshia Lubena, muanabute wa Yakoba. Kadi mu mulayi wa Yakoba ukavua ne mikolo ku tshina, wakamba ne: Lubena kavua ne bua kukokesha ku mutu kua bantu to, bualu wakajimija bukenji buende bua muanabute. Shimeona ne Lewi, bu muvuabu benze malu mabi a tshikisu, bavua ne bua kubamuangalaja mu Isalele. (Genese 49:3-5, 7) Nunku muana uvua ulonda uvua mua kuangata dipa edi uvua anu Yuda, muana muinayi wa Yakoba. Shimeona wakaya ne Yuda wakapeta tutupa tukese tua buloba tuvua tutangalake mu tshitupa tshialabale tshia Yuda. *​—Yoshua 19:9.

1:6, 7​—Bua tshinyi bavua bakosa bakalenge bavuabu bakuata biala ne bana ba nkasa banene? Bidi bimueneka ne: muntu uvua kayi ne biala ne bana bende ba nkasa banene kavua mukumbane bua kuenza mudimu wa busalayi to. Musalayi kayi ne biala udiku mua kukuata muele peshi difuma anyi? Dijimija bana ba nkasa banene divua mua kupangisha muntu mua kuimana anyi kuenda bimpe.

Malongesha adi atutangila:

2:10-12. Tudi ne bua kuikala tulonga Bible dituku dionso bua ‘katupu muoyo bienzedi bia Yehowa.’  (Musambu 103:2, NW) Baledi badi ne bua kubueja bulelela bua mu Dîyi dia Nzambi mu mitshima ya bana babu.​—Dutelonome 6:6-9.

2:14, 21, 22. Yehowa udi mua kulekela malu mabi afikila bantu bende bena bupidia bua tshipatshila kampanda: bua kubanyoka, bua kubalengeja ne kubasaka ku dipingana kudiye.

YEHOWA UDI UJULA BALUMBULUISHI

(Balumbuluishi 3:7–16:31)

Muyuki muimpe udi ulonda muvua balumbuluishi bashilashilangane batshimune udi utuadija ne Oteniele udi utuisha ku ndekelu dikuatshibua dia bena Isalele ku bupika munkatshi mua bidimu muanda mukulu kudi mukalenge wa Mesopotamia. Ne dikima ne budimu buonso, Mulumbuluishi Ehuda udi ushipa Egelona mukalenge wa Moaba uvua ne mafuta a bungi. Muntu wa bukitu Shamagâ udi ushipa yeye nkayende bena Peleshete 600 ne mutshi utubu basaka nawu ngombe. Ku diambuluisha dia Yehowa ne ku dikankamija dia Debola udi usadila bu muprofete mukaji ne mulumbuluishi, Balaka ne tshiluilu tshiende tshia bantu binunu dikumi katshiyi ne bia mvita bia nsongo badi batshimuna tshiluilu tshikole tshia Sisela. Yehowa udi ujula Gideona ne udi umuambuluisha yeye ne bantu bende 300 bua kutshimuna bena Midiyana.

Ku butuangaji bua Yefeta, Yehowa udi usungila bena Isalele kudi bena Amona. Tola, Yaî, Ibisana, Elona ne Abidona badi pabu munkatshi mua bantu 12 badi balumbuluishe bena Isalele. Tshikondo tshia balumbuluishi tshidi tshijika ne Shimishona udi uluangana ne bena Peleshete.

Mandamuna a nkonko ya mu Bible:

4:8​—Bua tshinyi Balaka wakasuminyina bua muprofete mukaji Debola aye kumufila mu mvita? Bidi bimueneka ne: Balaka wakadimona kayi mukumbane bua kuya kuluangana yeye nkayende ne tshiluilu tshia Sisela. Dikala dia muprofete mukaji ku luseke luende divua mua kumujadikila yeye ne masalayi ende ne: bavua ne buludiki bua Nzambi ne divua mua kubapesha dieyemena. Nunku disuminyina dia Balaka bua baye ne Debola, kadivua tshimanyinu tshia butekete to, kadi tshia ditabuja dikole.

5:20​—Mmu mushindu kayi muvua mitoto ya mu diulu miluangane bua Balaka? Bible kêna wamba bikala bualu ebu buvua buenzeke ku diambuluisha dia banjelu, ni buvua dikuluka dia bintu bia mu diulu pa buloba diakangatabu kudi bena meji ba Sisela bu tshimanyinu tshia dikenga, anyi pamuapa malu mamanyisha kudi bena lubuku lua mitoto ba Sisela akamueneka a dishima. Nansha nanku, Nzambi uvua mua kuikala mumuambuluishe mu mushindu kampanda anyi kansanga.

7:1-3; 8:10​—Bua tshinyi Yehowa wakamba ne: bantu 32 000 ba Gideona bavua bapite bungi bua kuluanganabu ne baluishi ba  bukole 135 000? Bualu Yehowa uvua ne bua kupesha Gideona ne bantu bende ditshimuna. Nzambi kavua musue bua bele meji ne: bavua batshimune bena Midiyana ku bukole buabu to.

11:30, 31​—Pavua Yefeta wenza mutshipu, uvuaku muele meji ne: uvua ne bua kufila muntu bu mulambu anyi? Yefeta kavua mua kuikala ne bualu bua mushindu’eu mu lungenyi to, bualu Mikenji ivua yamba ne: ‘Muntu kikadi munkatshi muenu udi usambuisha muanende wa balume anyi muanende wa bakaji mu kapia.’ (Dutelonome 18:10) Nansha nanku, Yefeta uvua muele meji ku muntu kampanda kadi ki nku nyama to. Nyama ivuabu balambula kabavua mua kuyilama mu nzubu ya bena Isalele to. Ne mulambu wa nyama kauvua dipa dia pa buadi divua Yefeta mua kuenzela mutshipu nansha. Yefeta uvua mumanye ne: muntu uvua mua kupatuka mu nzubu muende bua kusambakena nende uvua mua kuikala pamuapa muanende wa bakaji. Yeye eu ke uvuabu mua kufila ‘bu mulambu wa kuosha pa kapia’ mu ngumvuilu wa se: uvua ne bua kudifila ne muoyo wende mujima mu mudimu wa Yehowa ku ntempelo wende.

Malongesha adi atutangila:

3:10. Didiunda mu malu a mu nyuma kadiena ku meji a bantu, kadi nku diambuluisha dia nyuma wa Yehowa.​—Musambu 127:1.

3:21. Ehuda wakenza mudimu ne muele wende wa mvita ne mbabi ne dikima. Tudi ne bua kuenza mudimu bimpe ne ‘muele wa nyuma udi dîyi dia Nzambi.’ Mbuena kuamba ne: tudi ne bua kukuata mudimu ne Bible ne dikima dionso mu mudimu wetu wa buambi.​—Efeso 6:17; 2 Timote 2:15.

6:11-15; 8:1-3, 22, 23. Budipuekeshi bua Gideona budi butulongesha malu asatu a mushinga: (1) Padibu batupesha dipa kampanda dia mudimu, tudi ne bua kuela meji ku bujitu budi dipa edi ditutuadila pamutu pa kuimanyina anu pa butumbi anyi lumu lutudi mua kupetelaku. (2) Paudi bualu ne bantu badi basue kukokangana, kuleja budipuekeshi ke njila wa meji. (3) Budipuekeshi budi butukuba ku dikeba butumbi.

6:17-22, 36-40. Tuetu petu tudi ne bua kuikala badimuke ne ‘kubenga kuitabuja nyuma yonso.’ Kadi, tudi ne bua ‘kuteta nyuma ne idi ya Nzambi.’ (1 Yone 4:1) Bua muntu udibu bafuma ku diteka mukulu mu tshisumbu tshia bena Kristo kujadikaye ne: mubelu udiye usua kufila mmuimanyine anu pa Dîyi dia Nzambi, mbia meji bua yeye kuanji kuyukila ne mukulu udi mumonemone malu.

6:25-27. Gideona wakenza malu ne budimu bua kubenga kufuisha bena lukuna bende tshiji patupu. Patudi tuyisha lumu luimpe, tudi ne bua kutangila bua se: katunyingalaji bantu patupu ku ngakuilu wetu to.

7:6. Pa bidi bitangila dikuatshila Yehowa mudimu, tudi ne bua kuikala batabale ne badimuke bu bantu ba Gideona 300.

 9:8-15. Bulelela ndipanga dia lungenyi pa kuenza malu ne lutambishi ne kulama dijinga dia kupeta muanzu anyi bukokeshi!

11:35-37. Kakuyi mpata, tshilejilu tshimpe tshia Yefeta tshiakambuluisha muanende wa bakaji bua kuikalaye ne ditabuja dikole ne lungenyi lua didifila. Lelu’eu baledi badi mua kufila tshilejilu tshimpe bua bana babu.

11:40. Diela muntu udi uleja lungenyi lua budisuile mu mudimu wa Yehowa kalumbandi didi dimukankamija.

13:8. Baledi badi ne bua kulomba Yehowa buludiki ne kulonda mibelu yende mu dilongesha bana babu.​—2 Timote 3:16.

14:16, 17; 16:16. Kusaka muntu mukuabu ku dienza bualu kampanda pa kumudidila ne midiabakenu misangu yonso kudi mua kunyanga malanda.​—Nsumuinu 19:13; 21:19.

BILEMA BIKUABU MU ISALELE

(Balumbuluishi 17:1–21:25)

Tshitupa tshia ndekelu tshia mukanda wa Balumbuluishi tshidi ne malu abidi a pa buawu. Bua kumpala budi butangila Mika, udi muteke lupingu mu nzubu muende ne muangate muena Lewi kampanda bu muakuidi wende. Kunyima kua bamane kubutula tshimenga tshia Layisha anyi Leshema, bena Dana badi basa tshiabu tshimenga batshibikila ne: Dana. Mu dienza mudimu ne lupingu lua Mika ne muakuidi wende, badi bapatula ntendelelu wa mushindu mukuabu mu Dana. Bidi bimueneka ne: bakakuata tshimenga tshia Layisha kumpala kua lufu lua Yoshua.​—Yoshua 19:47.

Bualu buibidi budi buenzeka matuku makese kunyima kua lufu lua Yoshua. Dienda dia masandi dibi dia mu tshibungi kudi bamue balume ba mu tshimenga tshia Gibea tshia bena Benyamina didi diamba kubutuisha tshisamba tshionso tshia Benyamina, anu balume 600 ke badi bapanduka. Kadi badi balongolola bua balume aba bapete bakaji ne bungi buabu budi buvula bafika ku baluanganyi ba mvita 60 000 mu matuku a mukalenge Davidi.​—1 Kulondolola 7:6-11.

Mandamuna a nkonko ya mu Bible:

17:6; 21:25​—Nansha muvua ‘muntu yonso wenza anu malu akadi mimpe ku mêsu kuende,’ bivuaku bisaka bantu ku dinyangakaja malu anyi? Kabivua ne bua kuikala nanku to, bualu Yehowa uvua muenze ndongoluelu mimpe bua kulombola bantu bende. Wakabapesha Mikenji ne bakuidi bua kubalongesha njila yende. Ku diambuluisha dia mabue a Ulima ne Tumima, muakuidi munene uvua mua kuebeja Nzambi pavuaku malu manene. (Ekesode 28:30) Mu bimenga bionso muvua kabidi bakulu bakumbane mua kufila mibelu mimpe. Pavua muena Isalele wenza mudimu ne ndongoluelu eyi, uvua upeta buludiki buimpe bua kondo kende ka muoyo. Mu mushindu’eu dienza ‘dia malu adi mimpe ku mêsu kuende’ divua dimpe. Ku lukuabu luseke, muntu uvua ulengulula mikenji ne wangata ende mapangadika pa bidi bitangila bikadilu ne ntendelelu uvua upatula bipeta bibi.

20:17-48​—Bua tshinyi Yehowa wakalekela bena Benyamina batshimuna bisamba bikuabu misangu ibidi nansha muvuabu bakanyine dinyoka? Mu dilekela bisa bia lulamatu bijimija bantu ba bungi kumpala, Yehowa uvua uteta dipangadika diabu dia kumbusha malu mabi mu Isalele.

Malongesha adi atutangila:

19:14, 15. Dibenga kuakidila benyi dia bena mu Gibea didi dileja mukavua bikadilu biabu binyanguke. Badi balomba bena Kristo bua ‘kusankidila benyi misangu yonso.’​—Lomo 12:13.

Lupandu lutshidi kumpala

Mu katupa kîpi emu, Bukalenge bua Nzambi budi Yezu Kristo ulombola nebubutule bantu babi ne nebutuadile bantu bakane ne badi ne mutshima mutoke lupandu lunene. (Nsumuinu 2:21, 22; Danyele 2:44) ‘Bantu bonso badi lukuna ne Yehowa nebafue nunku, kadi badi bamusue nebikale bu dîba padidi dibanda ne bukole buadi buonso.’ (Balumbuluishi 5:31) Tulejayi mutudi munkatshi mua bantu badi banange Yehowa mu ditumikila malu atudi balonge mu mukanda wa Balumbuluishi.

Bulelela bua nshindamenu budibu baleje misangu ne misangu mu miyuki ya Balumbuluishi mbobu ebu: Ditumikila Yehowa didi dituala mabenesha a bungi, ne dibenga kumutumikila didi difikisha ku bipeta bibi menemene. (Dutelonome 11:26-28) Mbia mushinga mukole bua tuetu “kutumikila mu mitshima” bua kuenza disua dia Nzambi didiye mutuleje.​—Lomo 6:17; 1 Yone 2:17.

[Mêyi adi kuinshi]

[Karte mu dibeji 25]

(Bua kumona malu bimpe, tangila mu mukanda)

‘Yehowa wakabisha balumbu-luishi, bakabasungila mu bianza bia bakadi babapawula.’​—Balumbuluishi 2:16

BALUMBULUISHI

1. Oteniele (Tshisamba tshia Manashe)

2. Ehuda (Tshisamba tshia Yuda)

3. Shamgâ (Tshisamba tshia Yuda)

4. Balaka (Tshisamba tshia Nafatale)

5. Gideona (Tshisamba tshia Isakâ)

6. Tola (Tshisamba tshia Manashe)

7. Yaî (Tshisamba tshia Manashe)

8. Yefeta (Tshisamba tshia Gada)

9. Ibisana (Tshisamba tshia Ashê)

10. Elone (Tshisamba tshia Zebuluna)

11. Abidona (Tshisamba tshia Efelayima)

12. Shimishona (Tshisamba tshia Yuda)

DANA

MANASHE

NAFATALE

ASHÊ

ZEBULUNA

ISAKÂ

MANASHE

GADA

EFELAYIMA

DANA

BENYAMINA

LUBENA

YUDA

[Tshimfuanyi mu dibeji 26]

Ndilongesha kayi diudi mupete bua disuminyina dia Balaka dia kuya anu ne Debola mu mvita?