Nkonko ya babadi

Mmunyi muvua Shimishona mua kulenga bitalu bia bantu bavuaye mushipe, kadi kushalaye anu Munazi?

Mu Isalele wa kale muntu uvua mua kuenza mutshipu ku budisuile ne kulua Munazi bua tshikondo kampanda. * Umue wa ku mikenji mielela muntu uvua wenza mutshipu eu uvua wamba ne: ‘Mu matuku onso adiye mudijidile kudi Yehowa yeye kêna mumanye mua kulua pabuipi ne muntu mufue. Kêna mumanye mua kudiona bualu bua tatuende anyi bua mamuende anyi bua muanabu mulume anyi bua muanabu mukaji pafuabu.’ Kadi bikala ‘muntu mukusuke [mufue lufu lua tshikoso] pabuipi nende’? Dilenga tshitalu dia mushindu’eu divua mua kunyanga Bunazi buende. Ke bualu kayi mukenji uvua wamba ne: ‘Matuku a diambedi neikale patupu.’ Uvua ne bua kuya kudikezula ne kutuadijilula matuku makuabu a Bunazi.​—Nomba 6:6-12.

Nansha nanku, Bunazi bua Shimishona buvua bua mushindu mukuabu. Kumpala kua kulelabu Shimishona, muanjelu wa Yehowa wakambila mamuende ne: ‘Mona, wewe newimite difu, neulele muana wa balume; dipaya kadibeyi ku mutu kuende; bualu bua muana eu neikale Munazi kudi Nzambi ku difu dia mamu wende, yeye neabange kusungila bena Isalele mu bianza bia bena Peleshete.’ (Balumbuluishi 13:5) Shimishona kavua muenze mutshipu wa Bunazi to. Nzambi ke uvua mumuteke Munazi, ne Bunazi buende buvua bua matuku ende onso a muoyo. Mukenji wa kubenga kulenga tshitalu kauvua umutangila to. Bu yeye ne bua kuulonda ne bu yeye mulenge tshitalu mu mpukampuka, mmunyi muvuaye mua kutuadijilula mudimu wa Bunazi bua matuku ende onso a muoyo uvua mutuadije katshia ku diledibua diende? Bulelela, malu malomba bua bantu bavua benza Bunazi bua matuku abu onso a muoyo avua mashilangane mu imue nsombelu ne a bantu bavua benza Bunazi bua ku budisuile.

Tangila mêyi avua Yehowa mutumine bantu basatu aba badibu batele mu Bible bavua Banazi mu matuku abu onso a muoyo: Shimishona, Samuele ne Yone Mubatiji. Bu mutukavua baleje, kabavua ne bua kukosa nsuki ya ku mutu wa Shimishona to. Bua muana uvuaye ne bua kuimita (Samuele), Hana wakenza mutshipu eu: ‘Meme nemmufile kudi Yehowa matuku ende onso a muoyo wende: dipaya kadiena dibeya ku mutu wende.’ (1 Samuele 1:11) Bua Yone Mubatiji, muanjelu wa Yehowa wakamba ne: ‘Kanu biende mvinyo ne bintu bidi bikuatangana.’ (Luka 1:15) Kabidi, ‘Yone uvua ne tshikowelu tshiende tshia miosa ya kamelu, wakadi kabidi ne mukaba wa tshiseba mu tshimono tshiende; biakudia biende biakadi mikumbi ne  buitshi.’ (Matayo 3:4) Kabavua belele umue wa ku bantu basatu aba mukenji wa kubenga kufika pabuipi ne muntu mufue to.

Nansha muvua Shimishona Munazi, uvua munkatshi mua balumbuluishi bavua Yehowa mujule bua kusungila bena Isalele mu bianza bia bantu bavua babapawula. (Balumbuluishi 2:16) Pavuaye wenza mudimu eu, uvua ufika ku dilenga bitalu. Musangu mukuabu, Shimishona wakashipa bena Peleshete 30 ne kuangataye bilamba biabu. Pashishe, wakaya kutapa baluishi, ‘wakabakosolola bitupa bitupa ne kushipa kukole.’ Wakangata kabidi mufuba mubishi wa lubanga lua mpunda e kushipa nawu bantu tshinunu. (Balumbuluishi 14:19; 15:8, 15) Shimishona wakenza malu onso aa ne dianyisha ne diambuluisha dia Yehowa. Bible udi wakula bua Shimishona bu muntu wa ditabuja dia tshilejilu.​—Ebelu 11:32; 12:1.

Tshiambilu tshia ne: Shimishona wakapanda ntambue ‘bu mudibu bapanda kana ka mbuji’ tshidi tshisua kuleja ne: bantu bavua ne tshibidilu tshia kupanda tuana tua mbuji mu tshikondo tshiende anyi?

Kakuena tshidi tshileja ne: mu tshikondo tshia Balumbuluishi ba mu Isalele, bantu bavua ne tshibidilu tshia kupanda tuana tua mbuji nansha. Balumbuluishi 14:6 udi wamba ne: ‘Nyuma wa Yehowa wakatulukila bikole [Shimishona] ne yeye wakapanda [muana wa ntambue wa buoya], bu muakadiye mua kupanda kana ka mbuji; yeye kakadi ne tshintu mu tshianza tshiende.’ Diumvuija edi didi mua kuikala pamuapa difuanyikija dia bualu.

Ngakuilu wa se: ‘wakamupanda’ mu bitupa bididi tudi mua kumumvua mu mishindu ibidi. Shimishona uvua mua kuikala mupande mbanga ya ntambue anyi mumupandulule ku tshibelu ne ku tshibelu mu mushindu kampanda. Bu bikala ngakuilu eu umvuija kupanda mbanga ya ntambue, nunku kupanda muana wa mbuji mbualu bupepele kudi muntu udi ne bukole. Mu ngumvuilu eu, difuanyikija dia bualu ne bukuabu didi dileja ne: mushindu uvua Shimishona mutshimune nyama wa ntambue bianza bitupu uvua mupepele kudiye bienze anu bu uvua ushipa kana ka mbuji ketu aka. Kadi bidi munyi bu bikala Shimishona uvua mushipe ntambue pa kumupandulula ku tshibelu ne ku tshibelu? Mêyi aa kaena mua kuangatshibua anu bu difuanyikija dia bualu ne bukuabu patupu to. Bualu budi ne mushinga mu difuanyikija edi budi ne: nyuma wa Yehowa wakapesha Shimishona bukole bua kuenza mudimu uvua ulomba makanda a mubidi a bungi. Mu mishindu yonso, difuanyikija dia malu didi mu Balumbuluishi 14:6 didi dileja ne: ku diambuluisha dia Yehowa nyama wa ntambue wa bukole kavua nansha mukuatshishe Shimishona buôwa anu bu mudi kana ka mbuji kakayi mua kutshinyisha muntu yonso eu.

[Mêyi adi kuinshi]