“Dikuatshisha dianyi didi difuma kudi Yehowa”

Padi bukulakaje bulua “tshifulu tshia butumbi”

MURIEL, muntu mukaji mukulakaje wa bidimu 101 wakamba bua nsombelu wende ne: “Eu udi nsombelu muimpe mutambe.” Theodoros mukulakaje mukuabu wa bidimu 70 wakamba ne: “Bulelela edi ndiakalenga dia pa buadi!” Ne Maria mukaji mukulakaje wa bidimu 73 wakamba pende ne: “Tshivuaku mua kuikala mupitshishe matuku anyi a muoyo mu mushindu mukuabu mutambe buimpe kupita mundi muenze emu to.” Buonso buabu bavua bapitshishe matuku a muoyo mu mudimu wa Yehowa Nzambi.

Bakulakaje aba badi tshilejilu bua bantu ba bungi badi batendelela Yehowa pa buloba bujima. Nansha mukadibu ne bidimu bia bungi, bikale basama ne mu nsombelu mikuabu mikole, batshidi anu basadila Nzambi ne muoyo mujima. Mu tshisumbu tshia bena Kristo, badi banemeka bakulakaje aba bua lulamatu luabu kudi Nzambi. Yehowa udi wangata mudimu wa bakulakaje aba ne mushinga wa bungi, nansha mudibu kabatshiyi ne bukole bua kuenza malu onso adibu basue kuenza bua nsombelu idibu nayi. *—2 Kolinto 8:12.

Mukanda wa Misambu udi uleja bumue bualu bukumbanyine nsombelu mulenga udi bakulakaje ba lulamatu mua kutekemena bua kuikala nende. Badi mua kuikala bu mudi mutshi wa matuku a bungi ne udi anu muimane tendee utungunuka ne kupatula mamuma. Mufundi wa Misambu wakimba bua bakulakaje ba lulamatu wamba ne: ‘Nebakuame mamuma too ne mu bununu buabu, nebikale mitshi miule tente ne mâyi ne idi mibishi tshiendelele.’​—Musambu 92:14.

Bamue badi mua kuikala ne buôwa bua ne: mbafuane kubalekela ne kubenga kubatangila pikalabu kabatshiyi ne makanda bua bukulakaje. Davidi wakasengelela Nzambi wamba ne: ‘Kungumushi kuudi mu tshikondo tshia bununu buanyi; kunshiyi patupu papanga bukole buanyi.’ (Musambu 71:9) Ntshinyi tshidi tshienza bua muntu kutanta pamutu pa kupanga ku bukulakaje? Nngikadilu eu muimpe wa buakane. Mufundi wa Misambu wakimba ne: ‘Bantu bakane badi bakola bu dibue dia ngaji.’​—Musambu 92:12.

Bantu badi bakuatshila Nzambi mudimu ne lulamatu mu matuku abu onso a muoyo batu batungunuka ne kukuama mamuma mimpe too ne ku bukulakaje. Bushuwa, ntete ya bungi idibu bakune mu nsombelu wabu bua kuambuluisha bakuabu idi ikola ne ipia, ne badi balua kunowa buimpe. (Galatia 6:7-10; Kolosai 1:10) Bulelela, bantu badi bapitshishe matuku abu a muoyo mu dikeba anu malu abu nkayabu adi kaayi atangila njila ya Nzambi, batu bafika misangu ya bungi ku dikala anu ne mushinga mukese padibu bakulakaja.

Mukanda wa mu Bible wa Nsumuinu udi pawu uleja mudi buakane buikale bu tshilenga bua bukulakaje. Tudi tubalamu ne: ‘Nsuki mitoke tô idi tshifulu tshia butumbi padibu bayipeta mu njila wa buakane.’ (Nsumuinu 16:31) Eyowa, buakane budi tshimuenekelu tshia bulengele bua munda. Badi banemeka muntu udi ulonda njila wa buakane mu matuku ende a muoyo. (Lewitiki 19:32) Padi muntu muikale ne nsuki mitoke ne muikale kabidi ne meji ne ngikadilu mulenga udi upeta butumbi.​—Yobo 12:12.

Ku mêsu kua Yehowa, nsombelu muakane mupitshisha mu mudimu wende udi mulengele. Mifundu minsantu idi yamba ne: ‘Too ne ku bununu buenu meme [Yehowa] ndi anu mundi emu; too ne palua nsuki yenu mitoke, ngakanufuka, nennutuale, nennutuale, nennusungile.’ (Yeshaya 46:4) Bushuwa  bidi bikankamija pa kumanya ne: Tatu wetu wa mu diulu muena dinanga mmulaye bua kukuatshisha ne kuambuluisha bantu badi ne lulamatu kudiye pakulakajabu!​—Musambu 48:14.

Bu mudi bantu badi bapitshishe matuku abu a muoyo mu disadila Yehowa ne lulamatu bikale balengele ku mêsu kuende, kabenaku bakanyine kanemu kudi bakuabu anyi? Bua kuleja mmuenenu wa Nzambi, tudi ne bua kuangata ne mushinga bena Kristo netu bakadi bakulakaje. (1 Timote 5:1, 2) Nanku tukebayi mishindu miakanyine itudi mua kuleja dinanga dietu dia buena Kristo mu ditabalela majinga abu.

Dibuela mu njila wa buakane ku bukalakaje

Solomo udi utujadikila ne: ‘Mu njila wa buakane mudi muoyo.’ (Nsumuinu 12:28) Bukulakaje kabuena bupangisha muntu ukadi ne mikolo ku tshina bua kumata mu njila eu to. Tshilejilu mu ditunga dia Moldavie, muntu kampanda ukavua ne bidimu 99 uvua mudifile bikole patshivuaye nsonga mu dimuangalaja ngenyi ya ba-Koministe. Uvua uditambisha bua muvuaye muyukilangane mpala ne mpala ne bamfumu ba ba-Koministe bende lumu, bu muvua Vladimir Ilitch Lénine. Kadi pakatutuka Kominisme ne kuponaye, muntu mukulakaje eu wakajimija tshipatshila ne bulombodi mu nsombelu wende. Nunku pakamuleja Bantemu ba Yehowa ne: Bukalenge bua Nzambi ke njila umuepele mulelela wa kujikijila ntatu ya bantu, wakitaba bulelela bua mu Bible ne wakalua mulongi wa tshisumi wa Mifundu minsantu. Diakabi wakafua kumpala kua kuluaye musadidi wa Yehowa mutambule.

Pakamanya muntu mukaji mukuabu wa bidimu 81 wa mu ditunga dia Hongrie malu adi Nzambi ulomba bua nsombelu wa tshitembu, wakamona ne: uvua ne bua kuakaja dibaka diende ne mulume uvuabu basombe nende kukavua bidimu bia bungi. Biakamulomba dikima bushuwa bua yeye kumvuija muinende eu mmuenenu wende muashila pa Bible. Bualu bua dikema ne bua disanka, mulume eu wakitaba bua kumusela. Bamane kuelesha dibaka diabu ku mikanda ya mbulamatadi, muntu mukaji eu wakadiunda lukasa mu nyuma. Kunyima kua ngondo muanda mukulu ya dilonga Bible, wakalua mumanyishi udi kayi muanji kutambula, ne wakatambula kunyima kua matuku makese. Bushuwa, buakane budi mua kuvuija bukulakaje buimpe butambe!

Eyowa, bena Kristo bakadi balale bidimu bia bungi badi ne bua kuikala bajadike ne: Nzambi udi uditatshisha bua bualu buabu. Yehowa kakulekela nansha kakese aba badi bashala ne lulamatu kudiye. Kadi udi ubalaya bua kubalombola, kubambuluisha ne kubakuatshisha too ne ku bukulakaje buabu. Ne badi bajadika bulelela bua mêyi a mufundi wa Misambu aa: “Dikuatshisha dianyi didi difuma kudi Yehowa.”​—Musambu 121:2.

[Mêyi adi kuinshi]

[Lungenyi lunene lua mu dibeji 9]

‘Nsuki mitoke tô idi tshifulu tshia butumbi padibu bayipeta mu njila wa buakane.’​—NSUMUINU 16:31.

[Kazubu mu dibeji 8]

YEHOWA UDI UTABALELA BASADIDI BENDE BAKADI BAKULAKAJE

“Ujuke ne kanemu kumpala kua muntu udi ne nsuki mitoke, unemeke muntu mununu.”​—Lewitiki 19:32, MMM.

‘Too ne ku bununu buenu meme ndi anu mundi emu; too ne palua nsuki yenu mitoke nennutuale.’​—Yeshaya 46:4.