Bulelela budiku bukuama mamuma munda mua baudi ulongesha anyi?

PAVUA nsonga Eric mumanyishe baledi bende ne: kavua kabidi musue kuikala Ntemu wa Yehowa, biakabatonda bikole. Kabavua nansha bamone pavua Eric wenda ushintuluka to. Patshivuaye muana, uvua ubuela mu dilonga dia Bible dia mu dîku, mu bisangilu bia bena Kristo ne uvua wenza mudimu wa buambi pamue ne tshisumbu tshiabu. Uvua umueneka bu uvua mu bulelela. Kadi mpindieu ukavuaye mumbuke ku nzubu kuabu, baledi bende bakajingulula ne: bulelela bua mu Bible kabuvua munda muende to. Pakajingululabu bualu ebu, biakabatonda ne kubela mâyi ku makasa.

Bakuabu bavua bapete tunyinganyinga tua muomumue pavua muntu kampanda uvuabu balongesha Bible mulekele kulonga Bible mu tshimpitshimpi. Dîba dia buena edi, bantu batu pa tshibidilu badiebeja ne: ‘Bua tshinyi tshivua mumone bualu ebu kumpala kua dîba?’ Bushuwa, kudiku mushindu wa kumanya bikala bulelela bukuama mamuma munda mua batudi tulongesha kumpala kua tshipupu tshia mu nyuma kudituta anyi? Bua bualu ebu, mmunyi mutudi mua kuikala bajadike ne: bulelela budi buenza mudimu munda muetu ne mua batudi tulongesha? Mu mufuanu wa Yezu utudi bamanye bimpe wa mumiaminyi wa maminu, wakaleja mushindu wa kupeta diandamuna ku nkonko eyi.

Bulelela budi ne bua kulenga mutshima

Yezu wakamba ne: ‘Maminu adi dîyi dia Nzambi. Au a mu buloba buimpe adi bu bantu bakumvua dîyi mu mitshima mimpe ne ya kalolo, badi badilama bikole, badi bavudija maminu bua dinanukila diabu.’ (Luka 8:11, 15) Nunku kumpala kua bulelela bua Bukalenge kupatula bipeta kayi bionso munda mua balongi betu, budi ne bua kuela miji mu mutshima wabu wa mu tshimfuanyi. Yezu udi utujadikila ne: anu mutu maminu mimpe enza mu buloba buimpe, diakamue padi bulelela bua Nzambi bulenga mutshima muimpe, budi bukuata mudimu musangu umue ne bukuama maminu. Ntshinyi tshitudi ne bua kukeba?

Tudi ne bua kumona ngikadilu ya mu mutshima, ki nya pamutu pamutu to. Kuenza patupu malu a tshibidilu a ntendelelu kakutu kuleja misangu yonso tshidi mu bulelela tshienda tshienzeka mu mutshima wa muntu to. (Yelemiya 17:9, 10; Matayo 15:7-9) Tudi ne bua kutangila malu mu buondoke buawu. Kudi ne bua kuikala dishintuluka kampanda disunguluke mu majinga a muntu, mu meji ende ne mu malu adiye wangata ne mushinga. Muntu udi ne bua kuleja bumuntu bupiabupia budi bumvuangana ne disua dia Nzambi. (Efeso 4:20-24) Tshilejilu: Pavua bena Tesalonike bumvue lumu luimpe, Paulo wakamba ne: bakaluitabuja musangu umue bu dîyi dia Nzambi. Kadi dinanukila, lulamatu ne dinanga biakalejabu pashishe biakamujadikila kabidi ne: bulelela buvua ‘budienzeja munda [muabu].’​—1 Tesalonike 2:13, 14; 3:6.

Bushuwa, nansha ku tototo, nansha ku ndandanda, tshidi mu mutshima wa muntu netshilue kumueneka mu bienzedi biende anu mudi tshilejilu tshia Eric tshibileja. (Mâko 7:21, 22; Yakobo 1:14, 15) Diakabi, padi bimue bikadilu bibi bimueneka patoke ku malu adi muntu wenza, pamuapa kakutshiena tshia kuenza bua muntu kapambuki. Nunku lutatu ludiku ndua kukeba bua kumanya matekete masunguluke kumpala kua kuluawu mabue a tshilenduishi a mu nyuma. Tudi ne bua kukeba mushindu wa kukonkonona mutshima wa mu tshimfuanyi. Mmunyi mutudi mua kuukonkonona?

 Londa tshilejilu tshia Yezu

Bulelela, Yezu uvua ne mushindu wa kumona malu adi mu mitshima ya bantu kayi utupakana to. (Matayo 12:25) Kakuena muntu nansha umue wa kutudi udi mua kuenza nanku to. Kadi wakatuleja ne: tuetu petu tudi mua kujingulula majinga a muntu, meji ende ne malu ende a mushinga. Anu mudi munganga mupiluke wenza mateta mashilashilangane bua kumanya tshidi mutshima wa mubedi usama, Yezu wakenza mudimu ne Dîyi dia Nzambi bua ‘kupatula’ ‘meji ne malu adi mutshima musue kuenza’ ne kualeja patoke, nansha patshivuawu masokome.​—Nsumuinu 20:5; Ebelu 4:12.

Tshilejilu, dimue dituku Yezu wakambuluisha Petelo bua kujingulula butekete buvua bulue kulua dibue dia tshiluenduishi kunyima. Yezu uvua mumanye bimpe ne: Petelo uvua mumunange. Ke bualu kayi wakamupesha ‘mvungula ya bukalenge.’ (Matayo 13-19) Kadi uvua kabidi mumanye ne: Satana uvua mutue bapostolo mutu. Matuku avua alua kumpala, bavua ne bua kubuela mu diteta dikole dia kujimija lulamatu luabu. Yezu wakajingulula bimpe ne: bamue ba ku bayidi bende bavua ne butekete mu ditabuja diabu. Nunku kakelakana bua kuleja tshivuabu ne bua kuenza bua kudilengeja to. Tangila muakelaye bualu abu mu tshialu.

Matayo 16:21 udi wamba ne: ‘Ku tshikondo atshi Yezu wakabanga kuleja bayidi bende ne: bundi nabu mbua kukengeshibua ne bua kushipibua.’ Tabalela muanda eu: Yezu wakabaleja tshivua ne bua kumuenzekela, kavua anu mubambilatshi patupu to. Wakenza mudimu pamuapa ne mvese ya mu Bible bu mudi Musambu wa 22:14-18 anyi Yeshaya 53:10-12, idi ileja ne: Masiya uvua ne bua kukenga ne kufua. Bulelela, Yezu wakapesha Petelo ne bakuabu mushindu wa kuandamuna tshivua mu mitshima yabu pa kubala anyi kutela buludiludi mêyi a mu Mukanda wa Nzambi. Ntshinyi tshivuabu ne bua kuenza pavua dikenga ne bua kubakuata?

Bia dikema, nansha muvua Petelo mudileje muena dikima ne lukunukunu, diandamuna diende dia lukasa lukasa musangu au diakaleja tshilema tshinene tshivuaye natshi mu meji ende. Wakamba ne: ‘[Diumvuileku luse], Mukalenge; bualu ebu kabuena bulua kuudi.’ Ngelelu wa meji wa Petelo uvua mudimuenekele mukonyangale, bualu anu muakaleja Yezu, ‘kavua welangana meji a malu a Nzambi, uvua welangana meji anu a malu a bantu,’ tshilema tshinene tshivua mua kupatula bipeta bibi. Nunku ntshinyi tshiakenza Yezu? Kunyima kua yeye mumane kukanyina Petelo, wakamuambila yeye ne bayidi bakuabu ne: ‘Biasua muntu kundonda adipidie, ambule mutshi wende, andonde.’ Mushindamene pa ngenyi idi mu Musambu wa 49:8 ne wa 62:12, wakabavuluija ne bulenga buonso ne: ditekemena diabu dia muoyo wa tshiendelele didi kudi Nzambi, ki nkudi bantu, badi kabayi nansha mua kufila lupandu to.​—Matayo 16:22-28.

Nansha muakalua Petelo kupeta buôwa bua mutantshi mukese ne kuvilaye Yezu misangu isatu, pamuapa muyuki au ne mikuabu yakambuluisha bua kumuvuija mukumbane bua kupetulula makanda a mu nyuma ne lukasa luonso. (Yone 21:15-19) Kunyima kua matuku 50 patupu, Petelo wakimana kulu ne dikima dionso kumpala kua misumba ya bantu ya mu Yelushalema bua kujadika dibishibua dia Yezu. Mu mbingu, ngondo ne bidimu biakalonda, bakamukuata, kumukumabu ne kumuelabu mu lukanu misangu ne misangu kadi uvua anu ne dikima. Wakashiya tshilejilu tshimpe tshia lulamatu kaluyi buôwa.​—Bienzedi 2:14-36; 4:18-21; 5:29-32, 40-42; 12:3-5.

Bualu ebu budi butulongesha tshinyi? Udiku mua kumona tshiakenza Yezu bua kupatula malu avua mu mutshima wa Petelo ne kuela patoke anyi? Tshia kumpala, wakasungula mêyi makumbanyine a mu Bible bua kukoka ntema ya Petelo  pa bualu busunguluke. Pashishe, wakapesha Petelo mushindu wa kuandamuna tshivua mu mutshima wende. Ndekelu wa bionso, wakafila mibelu mikuabu ya mu Mukanda wa Nzambi bua kuambuluisha Petelo bua kushintulula ngelelu wende wa meji ne malu avua mu mutshima wende. Bumue udi mua kumona ne: ndongeshilu wa mushindu eu mmukukolele, kadi tukonkononayi malu abidi adi aleja mudi didilongolola ne dieyemena Yehowa mua kuambuluisha yonso wa kutudi bua kulonda tshilejilu tshia Yezu.

Tupatulayi malu adi mu mutshima

Pavua tatu kampanda muena Kristo mumvue ne: bana bende babidi ba balume (umue ne bidimu bitue ku 6 ne mukuabu ku 7) bavua bangate bonbon pa tshibasa tshia mulongeshi, wakabasombesha panshi ne kubeleshaye meji. Pamutu pa kumona muanda eu bu kalu kakese kadi kakayi ne njiwu anyi bu bualu bua bana batekete, udi ulonda ne: “Ngakakeba kupatula tshivua mu mitshima yabu tshivua tshibasaka bua kuenza bualu bubi abu.”

Tatu eu wakambila bana bende ba balume bua kuvuluka tshiakenzekela Akana bilondeshile muyuki udi mu Yoshua nshapita 7. Muyuki au wakatua diakamue bana aba ku muoyo ne kuitababu tshilema tshiabu. Kondo kabu ka muoyo kakavua kamane kutuadija kulubakana. Pashishe tatuabu wakababadisha Efeso 4:28, udi wamba ne: ‘Muntu wakuiba alekele kuiba; akuate mudimu bua yeye ikale ne tshia kupeye udi utshikengela.’ Tatu eu wakasaka bana bende bua kupingaja bonbon au pa kusumba mukuabu. Pakapeshabu mulongeshi bonbon au, biakakolesha mushinga wa mibelu ya mu Mukanda wa Nzambi.

Tatu au udi wamba ne: “Tuvua tukeba kushimbula meji mabi onso avua mu mutshima diakamue patuvua tuajingulula, ne tuvua tupingaja meji mimpe ne makezuke pa muaba wawu pa kuelesha bana betu meji.” Pa kuidikija Yezu pavuabu balongesha bana babu, baledi aba bakapeta bipeta bimpe mu bule bua matuku. Ndekelu wa bionso, bakalua kubikila bana babidi ba balume abu ku biro bidi bilombola mudimu wetu buloba bujima, ku Betele wa Brooklyn, kudi umue wa kudibu musadile mpindieu bidimu 25.

Tangila muvua muena Kristo mukuabu mufike ku diambuluisha mulongi wende wa Bible. Mulongi eu uvua ubuela mu bisangilu, uyisha ne ukavua mumane kuleja dijinga diende dia kutambula. Kadi biakamueneka ne: uvua udieyemena bikole pamutu pa kueyemena Yehowa. Ntemu eu udi uvuluka wamba ne: “Bu muvuaye mukaji uvua kayi mu dibaka, wakabanga kuenza malu ne budikadidi bupite kayi umanya to. Mvua ne buôwa bua se: uvua mufuane kusama anyi kupona mu nyuma.”

Nunku Ntemu eu wakelangana meji ne mulongi au pa Matayo 6:33, umukankamija bua ashintulule malu avuaye wangata ne mushinga, ateke Bukalenge pa muaba wa kumpala ne eyemene Yehowa bua se: nealombole malu bimpe. Wakamukonka ne bululame buonso ne: “Didienzela malu ditu minga misangu dikupangisha bua kueyemena bantu bakuabu, nansha Yehowa anyi?” Mulongi au wakamba ne: katshivua kabidi utamba kusambila to. Nunku mumanyishi au wakamukankamija bua kulonda mubelu udi mu Musambu wa 55:22 ne kupuila Yehowa bujitu buende bualu, bu mudi 1 Petelo 5:7 utujadikila ne: ‘Yeye udi unulama.’ (MMM) Mêyi aa akalenga mutshima wende. Ntemu au udi wamba ne: “Au uvua umue wa ku misangu mikese ingakamumona udila muadi.”

Lama bulelela mu mutshima webe

Patudi tumona batudi tulongesha bitaba bulelela bua mu Bible, bidi bitupesha disanka dia bungi. Kadi bua madikolela atudi tuenza bua kuambuluisha bakuabu kupatula bipeta bimpe, tudi ne bua kufila tshilejilu tshiakane. (Yuda 22, 23)  Tuetu bonso tudi ne bua ‘kukuata mudimu wa lupandu luetu, ne buôwa ne luzakalu.’ (Filipoi 2:12, MMM) Ebi bidi bilomba kabidi kuenza pa tshibidilu bua butoke bua mu Mukanda wa Nzambi butokeshe mu mitshima yetu, tukeba meji, majinga ne malu atudi banange adi akengela kuakaja.​—2 Petelo 1:19.

Tshilejilu, lukunukunu luebe mu midimu ya bena Kristo ndukepe matuku mashale aa anyi? Bikalabi nanku, mbua tshinyi? Pamuapa bidi mua kuikala bualu udi utamba kudieyemena bikole menemene. Mmunyi muudi mua kumanya ni udi udieyemena mushindu eu? Bala Hagai 1:2-11, ne elangana meji bimpe pa tshivua meji a Yehowa bua bena Yuda bavua bapingane mu ditunga diabu. Pashishe diebeje ne: ‘Ndi mpita kuditatshisha bua kupeta mfranga ne bintu bia bungi anyi? Ndi ngeyemena Yehowa bulelela, mutuishibue ne: neatabalele dîku dianyi bingateka malu a mu nyuma pa muaba wa kumpala anyi? Anyi ndi ngela meji ne: ndi ne bua kuanji kuditabalela meme kumpala kua bionso?’ Bikalabi bikengela kulengeja meji ebe ne malu adi mu mutshima webe, kuelakanyi bua kualengeja to. Mibelu ya mu Bible bu mudi eyi idi mu Matayo 6:25-33, Luka 12:13-21 ne 1 Timote 6:6-12 idi yumvuija bua tshinyi kuikala ne mmuenenu wa nkatshinkatshi bua majinga a mubidi ne bintu, mmuenenu udi usaka Yehowa bua kutungunuka ne kutubenesha.​—Malaki 3:10.

Didikonkonona ne bujalame buonso mushindu eu mbualu bua nsongo. Kuitaba mateketa etu kampanda masunguluke padibu batulejawu kudi mua kutunyingalaja. Kadi paudi ukeba ne dinanga dionso bua kuambuluisha muanebe, mulongi webe wa Bible anyi mene kudiambuluisha wewe nkayebe (nansha pa bualu budi butangila muntu nkayende anyi budi bukole) udi mua kuela tshidia tshia kumpala bua kusungila muoyo wende anyi webe wewe.​—Galatia 6:1.

Kadi pikala madikolela ebe amueneka kaayi apatula bipeta bimpe? Kupinganyi tshianyima lukasa lukasa to. Kululamija mutshima mupange bupuangane kudi mua kulomba mbabi, dîba dia bungi ne kudi mua kutonda minga misangu. Kadi kudi kabidi mua kupatula bipeta bimpe.

Nsonga Eric utudi batele ku ntuadijilu wakalua kupetulula meji mimpe ne kutuadija tshiakabidi ‘kuenda mu bulelela.’ (2 Yone 4) Udi wamba ne: “Pangakajingulula tshimvua mujimije ngakapingana kudi Yehowa.” Bua diambuluisha dia baledi bende, Eric udi mpindieu usadila Nzambi ne lulamatu. Nansha muvuabi bimutonda musangu au pavua baledi bende badienzeja misangu ne misangu bua kumusaka ku dikonkonona mutshima wende, mpindieu udi wanyisha bikole tshiakenzabu atshi. Udi wamba ne: “Baledi banyi mbantu bimpe be! Kabakalekela kunnanga nansha.”

Ditokesha butoke bua Dîyi dia Nzambi mu mitshima ya batudi tulongesha mmushindu wa kuleja luse lujalame. (Musambu 141:5) Tungunuka ne kukonkonona mitshima ya bana bebe ne ya balongi bebe ba Bible bua kujadika bikala bumuntu bupiabupia bua bena Kristo munda muabu bushuwa. Tungunuka ne kuenza bua bulelela bukuate mudimu munda mua bakuabu ne muebe wewe mene pa ‘kuludikila bantu njila mululame mu dîyi dia Nzambi dia bushuwa.’​—2 Timote 2:15.

[Tshimfuanyi mu dibeji 29]

Mêyi a Yezu akaleja butekete buvua munda mua Petelo

[Tshimfuanyi mu dibeji 31]

Enza mudimu ne Bible bua kupatula malu adi mu mutshima