Muoyo webe udi ne mushinga kayi?

PAVUABU benda bashipa bantu bungi kabuyi kubala ku Mputu mu Mvita ya Kumpala ya Buloba bujima, muntu mukuabu wakakemesha bantu bua muvuaye mudienzeje bua kusungila mioyo ya bantu mu tshitupa tshia buloba tshia Antarctique. Muntu eu uvua mukebuludi Shackleton uvua ne bena mudimu nende. Wakapeta lutatu lukole pavua mazuwa abu (avuabu babikila ne: Endurance) matshibukile pabuipi ne mabue a mashika ne madine mu mâyi. Kuditatshishaye bua kufikisha bantu bende muaba uvuabu mua kupanda, mu tshidiila tshia Elephant ku Sud kua Mbuu wa Atlantike. Kadi bantu aba batshivua anu mu njiwu mikole.

Shackleton wakamona ne: mushindu umuepele uvuabu mua kupanda uvua wa kutuma bamue bantu bua kukeba diambuluisha ku tshitudilu tshia mazuwa a kukuata nawu nyama ya mu mâyi ya balene mu tshidiila tshia Géorgie wa ku Sud. Bivua mutantshi wa kilometre 1 100, ne uvua mushale anu ne buatu bukese bua metre 7 buvuaye mupete mushindu wa kupatula mu mazuwa avua madine au. Bivua bimueneka bikole bua kupandabu.

 Kadi mu dia 10 ngondo muitanu 1916, kunyima kua bobu bamane kutata matuku 17, Shackleton ne kasumbu kakese ka bantu bakafika mu Géorgie wa ku Sud, kadi njiwu ivua pa mâyi yakabasaka bua kutudila ku luseke lukuabu lua tshidiila. Bavua ne bua kuenza luendu lua kilometre 30 mu mikuna mibuikila kudi dibungi ivuabu kabayi bamanye pa karte, bua kufika kuvuabu baya. Nansha muvuabi bimueneka bikole mua kuenzekabi, muntu eu ne bena diende bakapitshila miaba ya mashika makole, kabayi ne biamu bia kubanda nabi mikuna, kufikabu kuvuabu baya. Ndekelu wa bionso, wakaya kuangata bantu bende bonso bavua bashale mu njiwu abu. Bua tshinyi wakadienzeja bikole nunku? Mufundi wa miyuki ya nsombelu wa bantu Roland Huntford udi ufunda ne: “Tshipatshila tshiende” tshivua tshia “kusungila yonso wa ku bantu bende.”

‘Kakuena umue wabi udi upanga kumueneka’

Ntshinyi tshiakambuluisha bantu ba Shackleton bua kubenga kujimija ditekemena dionso pavuabu badikungije pamue ne bindile muaba “wa mashika makole uvua kauyi bubuedi uvua amu lubuebue ne mabue a mashika ne wa bule bua kilometre 30 eku ne kuaka”? Ndituishibua diabu dia se: mfumuabu uvua ne bua kukumbaja dilaya diende dia kubasungila.

Lelu bukua-bantu budi anu bu bantu abu bakashala nkayabu mu tshidiila. Ba bungi badi ne ntatu mikole ya dikema ne baluangana anu bua kupeta tshiakudia. Kadi badi ne bua kuikala ne dishindika dikole dia se: Nzambi ‘neapandishe bakengi’ ku tshinyangu ne makenga. (Yobo 36:15) Ikala mutuishibue ne: Nzambi udi wangata muoyo wa muntu yonso ne mushinga. Yehowa Nzambi Mufuki udi wamba ne: ‘Umbikile mu dituku dia makenga, nenkupandishe.’​—Musambu 50:15.

Udi umona bikukolele bua kuitaba ne: Mufuki udi ukuangata wewe muntu umue munkatshi mua miliyare ya bantu badi pa buloba ne mushinga anyi? Nunku mona tshiakafunda muprofete Yeshaya pa bidi bitangila miliyare ya mitoto idi payi mu galaksi miliyare idi mitunyunguluke. Tudi tubala ne: ‘Bandishayi mêsu enu kulu, numone bienu! Wakafuka bintu ebi nganyi? Nyeye udi upatula misumba yabi, ubala bungi buabi, ne udi ubibikila buonso buabi mêna abi; ne bualu bua bunene bua bukole buende ne bualu bua bukole bua bukokeshi buende, kakuena umue wabi udi upanga kumueneka.’​—Yeshaya 40:26.

Udiku mujingulule tshidi mêyi aa umvuija anyi? Mu galaksi wetu wa Voie lactée, mudi mabulunga onso adi anyunguluka ku dîba, mudi mitoto mitue ku miliyare 100. Kadi kudi galaksi mikuabu bungi munyi? Kakuena muntu udi mujadike bungi buayi to, kadi bamue badi batshinka ne: idi miliyare 125. Munda muayi mudi ne bua kuikala mitoto bungi tshianana, ki mmuomu anyi? Kadi Bible udi utuambila ne: Mufuki wa diulu ne buloba mmumanye mêna a mitoto yonso.

“Nsuki ya ku mitu yenu mene mene idi mibala yonso”

Muntu kampanda udi mua kuamba ne: ‘Kadi kumanya patupu mêna a miliyare ya mitoto anyi miliyare ya bantu kakuena kumvuija dibatabalela muntu ne muntu to.’ Ordinatere udi mukumbane udi mua kukuata mêna a miliyare ya bantu. Pabi kakuena muntu nansha umue udi mua kuamba mudi ordinatere wetu eu uditatshisha bua bualu buende to. Kadi Bible udi uleja ne: Yehowa Nzambi kêna anu mumanye mêna a miliyare ya bantu, kadi udi kabidi uditatshisha bua bualu buabu, muntu ne muntu pa nkayende. Mupostolo Petelo wakafunda ne: “Mupuilayi ntatu yenu yonso bualu yeye ke udi unulama.”​—1 Petelo 5:7, MMM.

Yezu Kristo wakamba ne: ‘Kabatu bapana mishamisha ibidi ku dikuta dikese anyi? Mushamusha umue kawena upona panshi, anu pitabuja Tatu wenu. Nsuki ya ku mitu yenu mene mene idi mibala yonso. Nunku kanutshinyi, mushinga wenu udi mutambe wa mishamisha ya bungi.’ (Matayo 10:29-31) Yezu kakamba ne: Nzambi uvua ne bua kumanya anu tshivua tshienzekela mishamisha ne bantu to. Wakamba ne: “Mushinga wenu udi mutambe wa mishamisha ya  bungi.” Bua tshinyi udi ne mushinga wa bungi? Mbualu udi mufukibue ‘ne tshifuanyikiji tshia Nzambi’ muikale ne mushindu wa kukuama ne kuleja bikadilu, lungenyi ne ngikadilu ya mu nyuma idi ileja ngikadilu mitumbuke ya Nzambi.​—Genese 1:26, 27.

“Muoyo mmufumine ku mudimu muenza ne lungenyi”

Kabakudingi kudi meji a bantu badi bela mpata ne: Mufuki kênaku. Buabu bobu, makole kampanda a mu mpukapuka ne a patupu ke avua makufuke. Badi bamba ne: kuena mufukibue ‘ne tshifuanyikiji tshia Nzambi’ to, kuena mushilangane ne nyama yonso ya pa buloba apa nansha mene mishamisha.

Udi witaba ne: muoyo mmulue ku mpukapuka panuapa anyi? Bilondeshile mumanyi wa bintu bidi ne muoyo Michael J. Behe, “malu makole mua kuajingulula adi mu bintu bia muoyo” adi alombola muoyo adi avuija lungenyi alu kaluyi lua meji nansha makese. Udi wamba ne: bijadiki bia malu a bintu bia muoyo bidi bifikisha ku mmuenenu udi kayi kuela mpata wa se: “Nansha bintu bitambe bukese bidi ne muoyo pa buloba bidi bileja ne: muoyo mmufumine ku mudimu muenza ne lungenyi.”​—Darwin’s Black Box—​The Biochemical Challenge to Evolution.

Bible udi utuambila ne: muoyo pa buloba mu mishindu yawu yonso mmufumine ku mudimu muenza ne lungenyi. Ne udi utuambila ne: Udi muenze mudimu wonso wa lungenyi eu udi Yehowa Nzambi, Mufuki wa diulu ne buloba.​—Musambu 36:9; Buakabuluibua 4:11.

Kulekedi lungenyi lua se: tudi ne bua kunanukila mu buloba ebu budi buule tente ne makenga ne ntatu lukusaka ku dibenga kuitaba ne: kudi Mufuki ne Muenji wa buloba ne bintu bia muoyo bionso bidipu. Ikala mulame malu malelela abidi aa mu lungenyi luebe. Bua kumpala mbua se: Nzambi kavua muenze malu mabi onso atudi tumona aa to. Bukuabu mbua se: Mufuki wetu udi ne tshidiye mulekeele malu aa bua tshitupa tshîpi. Anu mutu tshibejibeji etshi tshileja misangu ya bungi, Yehowa Nzambi mmulekele makenga bua ikaleku bua tshitupa tshîpi bua kujikija kashidi ne tshiendelele bilumbu bivua bijuke tshikondo tshivua bantu babenge bumfumu buende butambe bunene bua musangu wa kumpala. *​—Genese 3:1-7; Dutelonome 32:4, 5; Muambi 7:29; 2 Petelo 3:8, 9.

‘Neapandishe mukengedi wa bintu padilaye kudiye’

Bushuwa, nansha tuetu bikale tukenga mudi bantu ba bungi bakenga lelu, muoyo udi amu dipa dimpe dia dikema. Ne tudi tuenza muetu muonso bua kuulama. Muoyo udi Nzambi mutulaye mmuimpe mutambe kawuyi bu mvita itudi tuluangana amu bua kuikala ne muoyo mu ntatu ne makenga bu bantu ba Shackleton mu tshidiila tshia Elephant. Disua dia Nzambi ndia kutupandisha ku nsombelu wetu wa mpindieu wa makenga ne malu a patupu bua tumone mua ‘kulamata muoyo wa bushuwa’ uvuaye mulongoluele bantu bende ku ntuadijilu.​—1 Timote 6:19.

Nzambi neenze malu onso aa bualu yonso wa kutudi udi ne mushinga mukole ku mêsu kuende. Wakalongolola bua Muanende Yezu Kristo kufila mulambu wa kupikula nawu bantu uvua ukengedibua bua kutukuula ku mpekatu, dipanga bupuangane ne lufu bituvua bapiane kudi baledi betu ba kumpala Adama ne Eva. (Matayo 20:28) Yezu Kristo wakamba ne: ‘Nzambi wakatamba kusua ba pa buloba, yeye wakabapa  Muanende umuepele mulela bua muntu yonso wamuitabuja ikale ne muoyo wa tshiendelele.’​—Yone 3:16.

Ntshinyi tshikala Nzambi ne bua kuenzela aba badi ne muoyo lelu mu lutatu ne tshinyangu? Dîyi dia Nzambi difundisha ku nyuma muimpe didi dituambila bua Muanende ne: ‘Neapandishe mukengedi wa bintu padilaye kudiye, neapandishe muntu mupele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi. Neapikule mioyo yabu ku tshinyangu ne malu makole.’ Bua tshinyi neenze nanku? Bualu ‘mashi abu [anyi muoyo wabu] neikale tshintu tshia mushinga mukole ku mêsu kuende.’​—Musambu 72:12-14.

Bikondo ne bitshia, bantu mbakenge bikole bua mpekatu ne dipanga bupuangane, bienze anu bu badi ‘batua mikemu’ mu ntatu ne makenga bikole. Nzambi wakalekela bua bienzeke nanku anu bualu uvua mumanye se: uvua ne bua kulongolola malu onso mabi avua ntatu ne makenga ebi mua kukebesha. (Lomo 8:18-22) Mu katupa kîpi emu neikale ne bua ‘kujadika tshiakabidi malu onso’ ku butuangaji bua mbulamatadi wa Bukalenge buende budi mu bianza bia Muanende Yezu Kristo.​—Bienzedi 3:21; Matayo 6:9, 10.

Neabishe kabidi bantu bavua bakenge ne bafue kale ku lufu. Bantu aba badi balamibue mu meji a Nzambi. (Yone 5:28, 29; Bienzedi 24:15) Mu katupa kîpi emu nebapete muoyo “muvule,” muoyo wa tshiendelele mu bupuangane pa buloba bukudimuna mparadizu, kabuyi ntatu kabuyi makenga. (Yone 10:10; buakabuluibua 21:3-5) Muntu yonso udi ne muoyo neikale nawu menemene ne neapete ngikadilu ne mamanya mimpe adi bantu badi bafuka ‘ne tshimfuanyikiji tshia Nzambi’ ne bua kuikala nabi.

Newikale ne muoyo bua kupeta muoyo udi Yehowa mulaye anyi? Dipangadika didi kuudi. Tudi tukulomba bua ukebe mua kupeta dikuatshisha ku malu adi Nzambi mulongolole bua bantu basune mabenesha onso aa. Bafundi ba tshibejibeji etshi nebikale ne disanka bua kukuambuluisha bua kuenza nunku.

[Mêyi adi kuinshi]

[Tshimfuanyi mu mabeji 4, 5]

Bantu ba Shackleton bavua bashale muaba mubi bavua batuishibue ne: uvua ne bua kukumbaja dilaya diende dia kubasungila

[Mêyi a dianyisha]

© CORBIS

[Tshimfuanyi mu dibeji 6]

“Mushinga wenu udi mutambe wa mishamisha ya bungi”