Mushindu udibu bakeba ‘dibue dia busanga dia mushinga mukole’ lelu
Mushindu udibu bakeba ‘dibue dia busanga dia mushinga mukole’ lelu
‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu.’—MATAYO 24:14.
1, 2. (a) Mmunyi muvua bena Yuda bamona Bukalenge bua Nzambi mu tshikondo tshia Yezu? (b) Ntshinyi tshivua Yezu muenze bua kufila ngumvuilu muimpe wa Bukalenge, ne mbipeta kayi bidi bimueneke?
BUKALENGE bua Nzambi buvua tshiena-bualu tshinene tshivua tshitamba kukoka ntema ya bena Yuda pavua Yezu mulue pa buloba. (Matayo 3:1, 2; 4:23-25; Yone 1:49) Kadi tshia kumpala, ba bungi ba kudibu kabavua bamanye bimpe bunene bua bukalenge ebu ne muvuabu ne bua kukokesha; kabavua bamanye ne: mmbulamatadi wa mu diulu to. (Yone 3:1-5) Nansha bamue bakalua bayidi ba Yezu kabakumvua bimpe tshidi Bukalenge bua Nzambi bumvuija anyi tshivuabu bobu ne bua kuenza bua kupeta mabenesha a kulua bakokeshi pamue ne Kristo.—Matayo 20:20-22; Luka 19:11; Bienzedi 1:6.
2 Mu bungi bua matuku, Yezu uvua ulongesha bayidi bende malu a bungi ne lutulu luonso, kubalondelaye ne mufuanu wa dibue dia busanga dia mushinga mukole udi mumvuija mu tshiena-bualu tshishale, ubaleja mushinga wa kudienzejabu bikole bua kukeba Bukalenge bua mu diulu. (Matayo 6:33; 13:45, 46; Luka 13:23, 24) Mufuanu eu uvua ne bua kuikala mulenge mitshima yabu bikole, bualu bakalua mu mutantshi muipi bamanyishi ba lumu luimpe lua Bukalenge bavua kabayi bazengele ne ba dikima, mu bitupa bia kule bia buloba. Mukanda wa Bienzedi udi ujadika bualu ebu bimpe.—Bienzedi 1:8; Kolosai 1:23.
3. Pa bidi bitangila tshikondo tshietu etshi, ntshinyi tshiakamba Yezu bua Bukalenge?
3 Kadi netuambe tshinyi bua lelu? Badi bayisha bantu miliyo mivule bualu bua mabenesha ikala mu mparadizu wa pa buloba mu Bukalenge ebu. Mu mulayi munene wa Yezu udi utangila ‘nshikidilu wa tshikondo etshi,’ uvua mushindike ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe nshikidilu nealue.’ (Matayo 24:3, 14; Mâko 13:10) Wakumvuija kabidi ne: mudimu eu munene udi ne bua kuenzeka nansha kuikale bipumbishi bia dikema ne ntatu mikole anyi mene dikengeshibua. Nansha nanku, wakajadika ne: ‘Wananukila too ne ku nshikidilu neasungidibue.’ (Matayo 24:9-13) Bionso ebi bidi bilomba didifila divua ngenda-mushinga wa mu mufuanu wa Yezu au muleje. Kudiku bantu lelu badi baleja ditabuja ne lukunukunu bia buena ebi bua Bukalenge anyi?
Disanka dia kusokolola bulelela
4. Mbuenzeji kayi budi nabu bulelela bua Bukalenge kudi bantu lelu’eu?
4 Ngenda-mushinga wa mu mufuanu wa Yezu uvua ne disanka divule pakapetaye tshiakamonaye bu “dibue dia busanga dia mushinga mukole.” Disanka adi diakamusaka bua kuenza muende muonso bua kupeta dibue adi. (Ebelu 12:1) Lelu’eu kabidi, bulelela budi butangila Nzambi ne Bukalenge buende budi bukoka bantu ne bubasonsola. Bualu ebu budi butuvuluija mêyi a muanetu Alexander Macmillan, wakafunda mu mukanda kampanda bua mushindu uvuaye mukebe Nzambi ne tshidiye mulongolole bua bukua-bantu. Wakamba ne: “Tshindi mupete, bantu binunu ne binunu batshidi batshipeta pabu tshidimu tshionso. Ne mbantu anu bu wewe anyi bu meme, bualu badi bafumine mu matunga onso, makoba onso, nsombelu yonso ne badi ba mvula yonso. Bulelela kabuena ne kansungasunga to. Budi bukoka bantu ba mishindu yonso.”—Faith on the March.
5. Mbipeta kayi bimpe bidi bimueneka mu luapolo lua mudimu lua tshidimu tshia 2004?
5 Bulelela bua mêyi aa budi bumueneka tshidimu tshionso. Lumu luimpe lua Bukalenge bua Nzambi ndusake nkama ya binunu bia bantu ba muoyo muimpe ku dilambula mioyo yabu kudi Yehowa ne ku dienza disua diende. Ke tshivua tshienzeke mu tshidimu tshia mudimu tshia 2004, tshivua tshituadije mu Kabitende 2003 too ne mu Tshimungu 2004. Mu ngondo eyi 12, bantu 262 416 bakaleja didilambula diabu kudi Yehowa patoke pa kutambula mu mâyi. Bivua bienzeke nanku mu matunga 235, mudi Bantemu ba Yehowa balombola malonga a Bible 6 085 387 lumingu luonso bua kuambuluisha bantu ba mishindu yonso ne ba mu matunga onso, bisa ne miakulu ya bungi bua kupeta bulelela bua mu Dîyi dia Nzambi budi bufila muoyo.—Buakabuluibua 7:9.
6. Mmunyi mudi didiunda dinene difike ku dienzeka munkatshi mua bidimu?
6 Nganyi uvua muenzeje bionso ebi? Kakuena mpata nansha mikese bua se: Yehowa ke udi ukoka bena muoyo muakane aba kudiye. (Yone 6:65; Bienzedi 13:48) Kadi katuena ne bua kulengulula lungenyi lua didifila ne muoyo umue ne madikolela a bungi a bavua badienzeje bikole bua Bukalenge. Pavua muanetu Macmillan ne bidimu 79, wakafunda ne: “Kubangila dîba dingakamanya musangu wa kumpala malu adibu balaye bukua-bantu budi busama ne bupunga ne lufu, ditekemena dianyi mu tshidi mukenji au wa mu Bible muambe ki ndikepele to. Anu dîba adi, ngakadisuika bua kumanya malu a bungi pa tshidi Bible ulongesha bua meme kumona mua kuambuluisha bantu anu bu meme badi bakeba dimanya didi ditangila Nzambi Wa-Bukole-Buonso Yehowa, ne malu mimpe adiye mulongoluele bukua-bantu.”
7. Mbualu kayi budi buleja disanka ne lukunukunu bia badi bapeta bulelela bua mu Bible?
7 Lukunukunu ludi kabidi lumueneka munkatshi mua basadidi ba Yehowa lelu’eu. Tuangate tshilejilu tshia Daniela wa mu tshimenga tshia Vienne, mu ditunga dia Autriche. Wakamba ne: “Katshia ku buana buanyi, Nzambi utu mulunda wanyi wa pa muoyo. Mvua musue misangu yonso kumanya dîna diende bualu ku mêsu kuanyi tshivua mmuona mbikidilu ‘Nzambi’ mukumbanyine muntu to. Pangakakumbaja bidimu 17, ngakapetangana ne Bantemu ba Yehowa. Bakangumvuija malu onso amvua musue kumanya pa bidi bitangila Nzambi. Ndekelu wa bionso, ngakapeta bulelela, ne buvua buimpe butambe! Ngakumvua disanka dia bungi be, meme kubanga kuyisha bantu bonso.” Disanka dia kuyisha divuaye nadi diakasaka diakamue balongi babu bua kumuseka. Daniela wakamba kabidi ne: “Kadi buanyi meme, bivua anu bu mvua mmona milayi ya mu Bible yenda ikumbana, bualu mvua mumanye ne: Yezu wakamba ne: bavua ne bua kukina bayidi bende ne kubakengesha bua dîna diende. Biakangenza disanka dia bungi.” Abidi mmale asatu mmîpi, Daniela wakalambula Yehowa muoyo wende, kutambulaye ne kutuadijaye kulumbila mudimu wa bumisionere. Kunyima kua dibaka diende, Daniela ne bayende Helmut bakatuadija kuyisha bena mu Afrike, mu Chine, mu Philippines ne bantu ba mu Inde bavua mu tshimenga tshia Vienne. Mpindieu Daniela ne Helmut badi bamisionere mu Afrike wa ku Sud-Ouest.
Kabena balekela to
8. Mmushindu kayi muimpe umue udi bamue baleje dinanga diabu dia Nzambi ne lulamatu ku Bukalenge buende?
8 Bushuwa, mudimu wa bumisionere ngumue wa ku mishindu idi bantu ba Yehowa ba lelu baleja dinanga diabu dia Nzambi ne lulamatu luabu ku Bukalenge. Anu bu ngenda-mushinga wa mu mufuanu wa Yezu au, aba badi baditua mu mudimu eu mbadiakaje bua kuenza ngendu miaba ya kule bua Bukalenge. Bulelela, bamisionere aba kabena benza ngendu bua kukeba lumu luimpe lua Bukalenge to, kadi badi baya nalu kudi bantu badi basombele mu bitupa bia kule bia buloba, babayisha ne babambuluisha bua kuluabu bayidi ba Yezu Kristo. (Matayo 28:19, 20) Mu matunga a bungi, batu bapeta ntatu ya dikema. Kadi ditantamana diabu didi dibapetesha masanka mavule.
9, 10. Mmalu kayi malenga adi bamisionere bamone miaba ya kule bu mudi mu République Centrafricaine?
9 Angata tshilejilu tshia mu ditunga dia République Centrafricaine, muvua bantu badisangishe 16 184 tshidimu tshishale mu Tshivulukilu tshia lufu lua Kristo, bungi bupite bua bamanyishi ba Bukalenge ba mu ditunga adi misangu mitue ku muanda mutekete. Bu mudi mu bitupa bia bungi bia ditunga edi kamuyi nzembu, bantu batu ne tshibidilu tshia kuenza midimu yabu ya ku ditutu ku dituku pambelu mu dileji dia mutshi. Ke bualu kayi bamisionere batu pabu benza mudimu wabu mushindu wa muomumue: balombola malonga a Bible pambelu muinshi mua mitshi. Pambelu patu kapepa ne patoke bimpe kadi patu kabidi pimpe bua bualu bukuabu. Bantu batu basue Bible, ne diyukila malu a nzambi nditangalake anu mutu bantu bakula bua manaya a ndundu. Misangu ya bungi, bapitshi ba mu njila batu bamona mutu dilonga edi dienzeka ne balua pabu kubuelamu.
10 Dimue dituku pavua misionere mukuabu ulombola dilonga dia Bible pambelu, munga nsongalume uvua usombela dinsambu dia njila wakaya kudiye, kumuambilaye ne: bu muvua muntu nansha umue kayi muanji kulua kumuyisha, misionere au aye kumutangila ne kulonga pende nende Bible. Bushuwa, misionere au uvua ne disanka dia kukumbaja bualu abu, ne nsongalume eu udi ulubuluka bimpe. Mu ditunga edi, bampulushi batu pa tshibidilu bimanyika Bantemu ba Yehowa mu njila, kabiyi bua kubafutshisha makuta, kadi bua kubalomba nimero mipiamipia ya tshibejibeji tshia Tshibumba tshia Nsentedi ne tshia Réveillez-vous! peshi bua kubela tuasakidila bua tshiena-bualu kampanda tshivua tshibasankishe bikole menemene.
11. Nansha mudiku ntatu, mmunyi mudi bamisionere ba matuku a bungi bangata mudimu wabu?
11 Ba bungi ba ku bakatuadija mudimu wa bumisionere kukadi bidimu 40 anyi 50 mpindieu batshidi basadila Nzambi ne lulamatu mu budimi. Ntshilejilupu kayi tshia ditabuja ne dinanukila buetu tuetu bonso! Munkatshi mua bidimu 42 bidi bipite, mulume mukuabu ne mukajende mbenze mudimu wa bumisionere pamue mu matunga asatu. Mulume udi wamba ne: “Kuvua kumueneke ntatu. Tshilejilu, tuakaluangana ne malaria bidimu 35. Kadi, katutu banji kunyingalala nansha kakese bua dipangadika dietu dia kuikala bamisionere to.” Mukajende udi usakidila ne: “Misangu yonso, kudi malu a bungi adi atusaka bua kuikala ne dianyisha. Mudimu wa budimi udi ufila disanka dia bungi, ne bidi bipepele bua kutuadija malonga a Bible. Paudi umona balongi balua mu bisangilu ne bamanyangana ne bakuabu bidi anu bu dîku didisangisha kaba kamue misangu yonso.”
Badi ‘babala bintu bionso bu tshintu tshijimine’
12. Mmunyi mudi muntu uleja ne: udi bulelela wangata Bukalenge ne mushinga?
12 Pavua ngenda-mushinga muenji wa ngendu au mupete dibue dia busanga dia mushinga mukole, ‘wakaya, wakapana bintu biende bionso ne wakadisumba.’ (Matayo 13:46) Kuikala mudiakaje bua kulekela tshidibu mua kuangata bu tshintu tshia mushinga ntshimanyinu tshia bantu badi bamona bulelela mushinga udi nawu Bukalenge. Mupostolo Paulo umue wa ku bavua ne diakalenga dia kulua kupeta butumbi bua Bukalenge pamue ne Kristo wakamba ne: ‘Ndi mbala bintu bionso bu tshintu tshijimine bualu bua bulengele butambe bua kumanya kua Kristo Yezu, Mukalenge wanyi ungakajimijila bintu bionso bua bualu buende, ne ndi mbibala bu bintu bia kuela ku diala bua meme mpete Kristo.’—Filipoi 3:8.
13. Mmunyi muvua muntu mukuabu wa mu République tchèque muleje dinanga diende bua Bukalenge?
13 Mu mushindu wa muomumue, bantu ba bungi lelu mbasue kuenza mashintuluka manene mu nsombelu wabu bua kupeta mabenesha a Bukalenge. Tshilejilu, mu Kasuamansense 2003, mutangidi wa tshilongelu kampanda wa bidimu 60 wa mu ditunga dia République tchèque wakapeta mukanda wa kulonga nawu Bible wa Dimanya didi difikisha ku muoyo wa kashidi. Kunyima kua diubala, wakakeba diakamue Bantemu ba Yehowa ba mu tshitupa tshiabu bua kulonga Bible. Wakalubuluka bimpe mu nyuma ne kutuadija lukasa kubuela mu bisangilu bionso. Kadi wakenza tshinyi bua tshipatshila tshiende tshia kumusungulabu bu mulombodi wa tshimenga ne pashishe kulumbila kabidi bua bamusungule bu tshipuita-munua-mfuanka? Wakapangadija bua kulumbila bualu bua mukuabu mushindu, mbuena kuamba ne: kulumbila muoyo bu mumanyishi wa Bukalenge. Wakamba ne: “Ngakabanyina balongi mikanda ya bungi ya malu a mu Bible.” Wakaleja didilambula diende kudi Yehowa pakatambulaye mu mâyi mu mpungilu kampanda mu Kashipu 2004.
14. (a) Lumu luimpe lua Bukalenge ndusake miliyo mivule ya bantu ku dienza tshinyi? (b) Nnkonko kayi ya mushinga idi yonso wa kutudi ne bua kudiela?
14 Bantu bakuabu miliyo mivule mu buloba bujima mbitabe lumu luimpe lua Bukalenge mu mushindu wa muomumue. Mbapatuke munkatshi mua bantu babi, balekele bumuntu buabu bukulukulu ne balunda babu ba kale ne bipatshila biabu mu malu a panu. (Yone 15:19; Efeso 4:22-24; Yakobo 4:4; 1 Yone 2:15-17) Bua tshinyi badi benza bionso ebi? Bualu badi bangata mabenesha a Bukalenge bua Nzambi ne mushinga mupite wa bintu bionso bidi buloba ebu mua kubapesha. Ke muudi wangata pebe lumu luimpe lua Bukalenge anyi? Ludiku lukusaka bua kuenza mashintuluka adi akengedibua bua nsombelu webe ne bua malu audi wangata ne mushinga ne bipatshila biebe bikale mu diumvuangana ne tshidi Yehowa ulomba anyi? Kuenza nunku nekukupeteshe mabenesha a bungi mpindieu ne mu matuku atshilualua.
Dinowa didi difika ku ndekelu kuadi
15. Ntshinyi tshivuabu badianjile kumanyisha ne: bantu ba Nzambi bavua ne bua kuenza mu matuku a ku nshikidilu?
15 Mufundi wa Misambu wakamba ne: ‘Bantu bebe badi badifila kuudi ne disanka mu dituku diudi ukungija misumba ya masalayi ebe.’ Munkatshi mua badi badifile mudi ‘bansongalume badi bu mume’ ne “tshisumbu tshinene” tshia ‘bakaji badi bambila bantu lumu’ luimpe. (Musambu 68:11; 110:3) Ntshipeta kayi tshidi tshisumi ne didifila bia bantu ba Yehowa balume ne bakaji, bana ne bakole bipatule mu matuku aa a ku nshikidilu?
16. Fila tshilejilu tshia mudi basadidi ba Nzambi badifila bua diambuluisha bantu bua kulonga malu a Bukalenge.
16 Mpanda-njila mukuabu (mumanyishi wa Bukalenge wa ku dîba ne ku dîba) wa mu ditunga dia Inde uvua udikonka bua muvua tumama tupite pa miliyo ibidi tua mu ditunga adi mua kupeta mushindu wa kumanya malu a Bukalenge. (Yeshaya 35:5) Wakadifundisha mu tshilongelu kampanda mu tshimenga tshia Bangalore bua kulonga muakulu wa tumama. Wakamanyisha tumama tua bungi ditekemena dia Bukalenge mu tshilongelu atshi, kuenzabu tusumbu tua dilonga dia Bible. Munkatshi mua mbingu mikese, bantu bapite pa 12 bakatuadija kulua mu bisangilu ku Nzubu wa Bukalenge. Pashishe, mu difesto kansanga dia dibaka, mpanda-njila eu wakapetangana ne nsonga mukuabu uvua kamama uvua ufumina mu tshimenga tshia Calcutta. Kamama aka kavua ne nkonko ya bungi ne kakaleja dijinga dikole dia kumanya malu a bungi avua atangila Yehowa. Kadi kuakamueneka lutatu lukuabu. Nsonga eu uvua ne bua kupingana mu Calcutta mutantshi wa kilometre 1 600 bua kutuadija kulonga mu tulasa tubandile, kadi muomu amu kamuvua Bantemu bavua bamanye muakulu wa tumama to. Wakadienzeja bikole, kuitabijijaye tatuende bua kumuanyishila bua kulonga mu Bangalore bua apete mushindu wa kutungunuka ne dilonga diende dia Bible. Wakalubuluka bimpe, ne kunyima kua bu tshidimu tshijima, wakalambula muoyo wende kudi Yehowa. Yeye pende wakalonga Bible ne tumama tua bungi, too ne mulunda wende mukuabu wa ku buana. Biro bia filiale wa mu Inde bidi mpindieu bilongolola bua bampanda-njila kulonga muakulu wa tumama bua kuambuluisha mu budimi abu.
17. Londa tshiudi umona tshikukankamija bikole mu luapolo lua mudimu lua tshidimu tshia 2004 ludi mu dibeji dia 19 too ne dia 22.
17 Mu dibeji dia 19 too ne dia 22 mu tshibejibeji etshi neupete luapolo lua buloba bujima lua mudimu wa budimi wa Bantemu ba Yehowa bua tshidimu tshia mudimu tshia 2004. Ditekelaku dîba dikese bua kumukonkonona, ne keba wewe nkayebe tshijadiki tshia se: bantu ba Yehowa mu buloba bujima mbadine ne kasuki mu didienzeja bua kupeta ‘dibue dia busanga dia mushinga mukole’ lelu’eu.
Tungunuka ne ‘kukeba Bukalenge diambedi’
18. Mbualu kayi buvua Yezu kayi muleje mu mufuanu wende wa ngenda-mushinga, ne mbua tshinyi?
18 Tuetu bapingane kabidi ku mufuanu wa Yezu wa ngenda-mushinga uvua wenza ngendu au, tudi tumona ne: Yezu kakamba bualu nansha bumue bua mushindu uvua ngenda-mushinga au mua kutungunuka ne kudiambuluisha bua kudia kunyima kua yeye mumane kupana bionso bivuaye nabi. Kadi bamue badi mua kujula nkonko eyi: ‘Mmunyi muvua ngenda-mushinga eu mua kupeta biakudia, bia kuvuala ne muaba wa kulala mpindieu uvuaye kayi mushale ne tshintu tshidi mua kumuambuluisha? Dibue adi dia busanga dia mushinga mukole divua mua kumuambuluisha ku tshinyi?’ Eyi nnkonko idi muntu wa mashi ne mâyi mua kuebeja. Kadi Yezu kakapeshaku bayidi bende mubelu wa se: ‘Diambedi kebayi bukalenge buende ne buakane buende, nunku nebanupe bintu ebi bionso’ anyi? (Matayo 6:31-33) Bualu bunene bua mu mufuanu au ndidifila ne muoyo mujima kudi Nzambi ne kuikala ne lukunukunu bua Bukalenge. Muanda eu udi mua kutulongesha tshinyi?
19. Ndilongesha kayi dinene ditudi mua kupeta mu mufuanu wa Yezu wa dibue dia busanga dia mushinga mukole?
19 Nansha bituikala tufuma ku diumvua lumu luimpe lutambe peshi bikale batungunuke ne kulonda Bukalenge ne tumanyisha bakuabu mabenesha abu munkatshi mua bidimu bia bungi, tudi ne bua kutungunuka ne kuvuija Bukalenge tshipatshila tshietu tshinene ne kutumaku ntema. Tudi mu bikondo bikole, kadi tudi ne malu a bungi adi ne bua kutusaka bua kuitaba ne: tshitudi tuipatshila ntshilelela ne katshiena kuelekeja anu bu dibue dia busanga dia mushinga mukole divua ngenda mushinga mupete. Mianda idi yenzeka pa buloba ne milayi ya mu Bible ikadi mikumbane idi itutuisha ne itujadikila ne: tudi ku ‘nshikidilu wa tshikondo etshi.’ (Matayo 24:3) Anu bu ngenda-mushinga muenji wa ngendu au, tulejayi lukunukunu ne muoyo mujima bua Bukalenge bua Nzambi ne tusankayi bua diakalenga ditudi nadi dia kumanyisha lumu luimpe.—Musambu 9:1, 2.
Udi muvuluke anyi?
• Ntshinyi tshidi tshiambuluishe bua kumueneke didiunda munkatshi mua batendeledi balelela mu bungi bua bidimu?
• Ndungenyi kayi ludi lumueneka munkatshi mua badi benza mudimu wa bumisionere?
• Mmashintuluka kayi adi bantu benze bua lumu luimpe lua Bukalenge?
• Ndilongesha kayi dinene ditudi mua kupeta mu mufuanu wa Yezu wa dibue dia busanga dia mushinga mukole?
[Nkonko ya dilonga]
[Tablo mu mabeji 19-22]
LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU 2004
(Bua kumona malu bimpe, tangila mu mukanda)
[Tshimfuanyi mu dibeji 14]
“Bulelela . . . budi bukoka bantu ba mishindu yonso.”—A. H. Macmillan
[Tshimfuanyi mu dibeji 15]
Daniela ne Helmut bakayisha muaba uvuabu bakula muakulu muenyi mu Vienne
[Bimfuanyi mu mabeji 16, 17]
Anu bu ngenda-mushinga, bamisionere badi bapeta mabenesha a bungi lelu
[Tshimfuanyi mu dibeji 17]
“Bantu bebe badi badifila kûdi ne disanka”