Bishima biudi mumone!

MUAKU “tshishima” udi ne diumvuija dibidi edi: “muanda, tshintu peshi bualu bua pa buabu menemene anyi budi kabuyi bua pa tshibidilu.” Tuetu bonso tukadi bamone bishima bia mushindu eu, bidi kabiyi bienzeja kudi Nzambi to.

Bu mudi bantu bapete dimanya divule dia mikenji idi mu bintu bifuka, mbafike ku dienza malu avua bavule bela meji kale ne: kaavua mua kuenzeka to. Tshilejilu, kukadi bidimu lukama, pamuapa bantu ba bungi bavua bela meji ne: malu adibu benza ne ordinatere, TV, biamu biteka mu tshibuashibuashi ne bintu bia muomumue bidibu benze lelu miaba ya bungi kabivua mua kuenzeka to.

Bamue bena meji badi bitaba ne: badi anu ne dimanya dikese dia bintu bia dikema bidi mu bifukibua bia Nzambi, badi bamba ne: kabena kabidi mua kuamba ne dishindika dionso ne: kudi bualu budi kabuyi mua kuenzeka to. Batu bitaba bua kuamba ne: bualu kampanda kabuena bufuane kuenzeka to. Nunku badi bashala  batekemene “bishima” bikuabu bidi mua kuenzeka matuku adi alua kumpala.

Nansha tuetu tuakula bua diumvuija dia kumpala dia muaku “tshishima,” didi ditangila malu “menza ku bukole budi bupite bua bantu,” tudi mua kuamba ne: yonso wa kutudi ukadi mumone bishima. Tshilejilu, tudi tumona dîba, ngondo ne mitoto, bionso bikale bintu bienza kudi “bukole budi bupite bua bantu,” mbuena kuamba ne: Mufuki yeye nkayende. Kabidi, nganyi udi mua kumvuija luendu lua mubidi wetu mu bule ne mu butshiama? mudi buongo buenza mudimu? anyi mudi mukuji wa muana wenzeka? Mukanda kampanda udi wamba ne: “Mubidi wa muntu, udi mulombola ne muludika kudi nsangilu wa mifungu ya buongo, ntshiamu tshia dikema tshidi ne biumvuilu, mmashinyi adi adiendesha wowu nkayawu, ng’ordinatere udi mumanye mua kudilela: tshifukibua tshilenga ne tshidi katshiyi kujingulula mu mishindu ya bungi.” Bushuwa, Nzambi wakafuka “mubidi wa muntu” wakenza tshishima tshidi tshitungunuka ne kutukemesha. Kudi kabidi bishima bia mushindu mukuabu biukadi mumone nansha muudi mua kuikala kuyi mubijingulule.​—The Body Machine.

Mukanda udi mua kuikala tshishima anyi?

Kakuena mukanda udi mutangalake buloba bujima bu mudi Bible to. Utu umumona bu tshishima anyi? Tudi mua kuamba ne: udiku bua “bukole budi bupite bua bantu” anyi? Bulelela, Bible mmukanda mufunda kudi bantu, kadi bantu aba bakamba ne: ngenyi ya Nzambi ke idibu bafunde, ki nyabu bobu to. (2 Samuele 23:1, 2; 2 Petelo 1:20, 21) Anji elabi meji. Bantu aba bavua batue ku 40, bavua ne muoyo munkatshi mua bidimu 1 600. Munkatshi muabu muvua bantu ba nsombelu mishilangane bu mudi balami ba mikoko, basalayi, balobi, bena mudimu ba mbulamatadi, baminganga, bakuidi ne bakalenge. Kadi mbafike ku difunda mukenji umue wa lupandu, udi mulelela ne mujalame.

Bu mudi Bantemu ba Yehowa balonge Bible ne lubatshi luonso, badi bitaba Bible ‘ki mbu dîyi dia bantu, kadi bu mudidi bushuwa dîyi dia Nzambi mene,’ anu muakafunda mupostolo Paulo. (1 Tesalonike 2:13) Munkatshi mua bidimu bia bungi mikanda yabu mmiumvuije mudi malu a mu Bible adi bantu bamona bu adi abenga kumvuangana mua kupetangana ne mukenji mujima udimu. Diumvuangana dia malu adi munda muende didi mene tshijadiki tshia se: mmufundisha kudi Nzambi. *

Kakuena mukanda mukuabu ukadibu bakebe ne muoyo mujima bua kuubutula bu mudi Bible to. Kadi utshidiku. Ne udiku mujima anyi bimue bitupa biende mu miakulu mipite pa 2 000. Dikubibua dia mukanda eu mu bujima buawu ne dia malu adimu didi dileja ne: Nzambi ke udi muulame. Bushuwa, Bible ntshishima!

Tshishima ‘tshidi ne muoyo ne bukole’

Bishima bia kale (bia bantu bavuabu buondape ne babishe ku lufu) kabiena bienzeka kabidi lelu to. Kadi tudi ne bua kuikala batuishibue ne: mu buloba bupiabupia bua Nzambi bukadi pa kulua, bishima ebi nebienzeke kabidi, musangu au nebienzeke buloba bujima. Nebituadile bantu disulakana dia kashidi ne nebipite malu onso atudi mua kujingulula mpindieu.

Bible (udi mufike kutudi mu tshishima) udi  mua kuenza mene malu adi muomumue ne bishima padiye usaka bantu bua kulengeja bumuntu buabu. (Bala tshilejilu tshidi mu kazubu kadi ne tshiena-bualu ne: “Bukole budi nabu Dîyi dia Nzambi,” mu dibeji 8.) Ebelu 4:12 udi wamba ne: ‘Dîyi dia Nzambi didi ne muoyo ne bukole, didi dipita muele wonso musakisha nseke ibidi kutua, didi ditubula too ne ku dipandulula dia muoyo ne nyuma, ne dia manungu ne buongo bua mifuba, didi dijingulula lukasa meji ne malu adi mutshima musue kuenza.’ Bulelela, Bible mmuambuluishe bua kushintulula nsombelu ya bantu bapite pa miliyo isambombo mu buloba bujima, mmupeshe mioyo yabu tshipatshila ne mmubapeshe ditekemena dilenga bua matuku atshilualua.

Bua tshinyi kubenga kulekela Bible wenza tshishima mu nsombelu webe?

[Mêyi adi kuinshi]

[Kazubu/​Tshimfuanyi mu dibeji 7]

UKAVUA MUFUE ANYI UTSHIVUA NE MUOYO?

Bilondeshile Yone 19:33, 34, Yezu ukavua mumane kufua pavua ‘dinga disalayi dimutue difuma mu lubadi, mashi ne mâyi kupatukabi.’ Kadi mu imue Bible, Matayo 27:49, 50 udi uleja ne: Yezu utshivua ne muoyo pakamutuabu difuma nunku. Bua tshinyi dishilangana edi?

Mikenji ya Mose ivua mikandike bua kabalekedi muena tshibawu mupopela pa mutshi uvuabu bamushipele butuku bujima. (Dutelonome 21:22, 23) Ke bualu kayi mu matuku a Yezu, pavua muena tshibawu uvuabu bapopele pa mutshi ushala ne muoyo too ne ku dilolo, bavua ne tshilele tshia kutshibula mikolo yende bua afue lukasa. Kavua mua kudiolola kabidi kululama bua kumonaye mua kueyela bimpe to. Bu muvua basalayi batshibule mikolo ya benji ba malu mabi babidi bavua bapopela pa mitshi pamue ne Yezu, kadi kabayi batshibule yende yeye, bidi bileja ne: bavua bela meji ne: ukavua mufue. Pamuapa musalayi au wakamutua difuma mu lubadi anu bua kumbusha mpata yonso ne kupumbisha bua kapetuludi makanda bua bantu kabalu kumanyisha bia dishima ne: uvua mubike ku lufu.

Mvese wa Matayo 27:49, 50 (NW) udi uleja dilondangana dikuabu dia malu avua menzeke. Udi wamba ne: “Muntu mukuabu wakangata difuma ne kumutua mu luseke, ne mashi ne mâyi kupatukabi. Yezu wakela kabidi lubila ne dîyi dikole ne wakakula muoyo.” Kadi tshiambilu tshitudi baladike maleta etshi katshiena mu mikanda mifunda ku bianza yonso ya kale ya Bible to. Mikanda ya bungi idi ileja ne: bavua basakidile mêyi aa mangatshila mu Evanjeliyo wa Yone ne baateke muaba uvua kauyi muakanyine to. Ke bualu kayi mu Bible ya bungi batu bela mêyi aa mu tuboko, bafila diumvuija kuinshi kua dibeji anyi mene babenga kuafunda.

Dipungila dipiadipia dia mu tshiena-Gelika (dia Westcott ne Hort) didibu benze nadi mudimu bikole bua kukudimuna Traduction du monde nouveau didi diela tshiambilu etshi mu tuboko tunayi. Mbafilemu diumvuija edi: tshiambilu etshi “bavua pamuapa ne bua kuikala batshisakidile kudi bafundi.”

Nunku bijadiki bipite bungi bidi bileja ne: Yone 19:33, 34 udi wamba bulelela, Yezu uvua mufue pavua musalayi muena Lomo au mumutue difuma.

 [Kazubu/​Tshimfuanyi mu dibeji 8]

BUKOLE BUDI NABU DÎYI DIA NZAMBI

Nsonga Detlef mufumine mu dîku muvua baledi bakavua babengangane wakaditua mu dinua dia diamba ne maluvu ne mu mijiki ya heavy metal. * Wakalua tshidibu babikila miaba ya bungi ne: mutu mukungula, ne mpindieu tshikisu tshiende tshiakamulelela bilumbu ne bampulushi.

Mu 1992, bena mitu mikungula 60 bakaluangana mvita ne banangi ba mijiki ya rock batue ku 35 mu tshinuinu tshia maluvu muvuabu bapanyisha ne biakudia, pankatshi pa ku nord ne est kua ditunga dia Allemagne. Bavua bakume bikole umue wa ku banangi ba mijiki ya rock, diende uvua Thomas, yeye kufua bua mputa ivuaye mutapike. Bakela bantunga-mulongo ba bungi ba tshimvundu atshi mu buloko, pamue ne Detlef kunyima kua dibalumbuluisha ku kabadi divua tudiomba tuakule bualu buadi bikole.

Matuku makese kunyima kua Detlef mumane kupatuka mu buloko, bakamupesha dibeji kampanda kudi Bantemu ba Yehowa. Dibeji adi divua ne tshiena-bualu tshia se: “Bua tshinyi muoyo mmuwule ne ntatu nunku?” Detlef wakajingulula diakamue bulelela bua malu avuabu bambe mu dibeji adi ne wakabanga kulonga Bible ne Bantemu. Dilonga edi diakashintulula nsombelu wende yonso. Udi Ntemu wa Yehowa wa lukunukunu katshia mu 1996.

Siegfried, uvua munangi wa mijiki ya rock kale, uvua mulunda munene wa Thomas, nsonga uvuabu bashipe au; yeye pende wakalua Ntemu ne udi mpindieu mukulu mu tshisumbu. Pakaya Siegfried mu tshisumbu tshia ba Detlef bua kuenza muyuki wa malu a mu Bible (mamuende wa Thomas uvua mubuele mu bisangilu mu tshisumbu atshi mu mpukapuka), Detlef wakamubikila kuende bua kuyabu kudia biakudia. Bidimu bitue ku dikumi kumpala, kakuvua muntu uvua mua kukanda lukuna luvua pankatshi pabu. Kadi lelu eu, dinanga diabu dia buena-muntu didi dimueneka patoke.

Detlef ne Siegfried mbashale bindile ne muoyo kulu kulu bua kuakidila Thomas papetululaye muoyo mu buloba bukudimuna mparadizu. Detlef udi wamba ne: “Pandi anu ngela meji pa bualu ebu, binsonji bidi bimpueka. Ndi ne kanyinganyinga kakole bua tshingakenza.” Dijinga diabu bonso ndia kulua kuambuluisha Thomas anu mudibu bambuluisha bantu bakuabu lelu bua bafike ku dimanya Yehowa ne kusanka mu ditekemena didi Bible ufila.

Bulelela, ebu mbukole budi nabu Dîyi dia Nzambi!

[Mêyi adi kuinshi]

[Tshimfuanyi mu dibeji 6]

Mubidi wa muntu ntshifukibua tshia dikema

[Mêyi a dianyisha]

Anatomy Improved and Illustrated, London, 1723, Bernardino Genga