Nnganyi wadisha bukua-bantu?

BILONDESHILE tshidibu bamone kudi tshibambalu tshia Bulongolodi bua Matunga Masanga (tshia Ndongamu wa Biakudia pa Buloba bujima) tshitu tshiluisha nzala, bantu miliyo 800, nangananga bana, badi pabuipi ne kubuela mu tshiyole tshia nzala. Matuku adi panshi aa, tshibambalu etshi tshivua tshileje ne: matunga mabanji a bungi mmatangije ntema yawu anu ku malu makuabu bu mudi tshinyangu ne adi atula mfranga bua malu aa, mfranga ivua mua kuikala mitula bua tshilumbu tshia nzala. Ditampakana dia masama adi afuma ku tuishi ndikoleshe lutatu elu lua nzala. Tshibambalu etshi tshiakamba mu luapolo kampanda bua matunga a mu Afrike mudi disama dia SIDA ditape bu meshi ne: “Tshipungu tshijima tshia baledi tshidi tshienda tshifua. Bana badibu bashiya badi misangu mivule bashala ne bujitu bua kudidisha, pabi ba bungi ki mbamanye mua kudima ne mua kuenza midimu mikuabu ya mu nsombelu wa buatshia buila, midimu itu baledi balongesha bana babu ba bipungu ne bipungu.”​—Global School Feeding Report.

Tshibambalu etshi tshidi tshiambuluisha ndongamu mukuabu udi ne tshipatshila tshia kuabanya biakudia musangu umue ku dituku mu tulasa. Lungenyi ludiku ndua kukepesha nzala ne kuenza ndongamu mikuabu idi ne tshipatshila tshia kubabidila disama dia SIDA munkatshi mua bana ku diambuluisha dia malongesha a pa tshibidilu.

Miaba idibu bakumbaje malu aa, bana badi bapeta biakudia, badi babalongesha mua kuikala ne mankenda ne babambuluisha mu malu makuabu kabidi. Mbimueneke kabidi ne: miaba idi bantu bashintulula bikadilu biabu, disama dia SIDA didi dikepela.

Bia dibungama, bipeta bia madikolela adi bantu benza kabitu misangu mivule bijikija lutatu luonso to. Kadi mu Bible mudi dilaya didi ditukolesha ku muoyo didi dileja ne: nzala neijike bua kashidi. Musambu 72:16 (MMV) udi wamba ne: “Ntete ya kuenza bukula, ivulangane mu ditunga.” Mu Bukalenge bua Nzambi, bantu nebambile Yehowa Nzambi ne: ‘Udi ulua kumona buloba, udi ubumeneshila biakudia bia bungi, udi ubakuamishila blé, bualu bua wakubulongolola nunku.’​—Musambu 65:9.

[Mêyi a dianyisha bua tshimfuanyi mu dibeji 32]

WFP/​Y. Yuge