Utu udifuanyikija ne bakuabu anyi?

NNGANYI wa kutudi utu kayi muanji kumona muntu wa mpala muimpe mupite wende, anyi udi umueneka bamunange yeye bikole, peshi muntu udi umvua malu pa lukasa, nansha udi mulongi muimpe mu kalasa kumupita yeye? Pamuapa bantu bakuabu badi mua kuikala ne bukole bua mubidi anyi mudimu muimpe ne diakalenga anyi bamueneka bikale bobu ne balunda ba bungi kutupita tuetu. Badi mua kuikala ne bintu bia bungi, makuta a bungi, mashinyi a modele mupiamupia, anyi badi mene mua kumueneka bikale ne disanka dipite dietu. Tudiku tudifuanyikija ne bakuabu mu malu aa anyi? Muntu udi mua kuepuka bua kudifuanyikija ne bakuabu anyi? Bua tshinyi muena Kristo udi mua kujinga bua kuepuka kudifuanyikija ne bakuabu? Ne mmunyi mutudi mua kuikala ne disanka kadi katuyi tudifuanyikija ne bakuabu?

Tutu mua kudifuanyikija ne bakuabu bua tshinyi ne ndîba kayi?

Bumue bualu budi bantu badifuanyikijila ne bakuabu mbua se: mmushindu wa bobu kutungunuka ne kudiangata ne mushinga. Misangu ya bungi bantu batu ne disanka dia kumona ne: badi ne diakalenga dia buena dia binabu. Lungenyi lukuabu ndua se: didifuanyikija ne bakuabu ndiditatshisha bua kukepesha dielakana didi muntu nadi bua bualu buende yeye nkayende, bua kumanya malu adiye mukumbane ne kayi mukumbane bua kuenza. Tudi tubandila bidi bakuabu bakumbaje. Bikalabu bu tuetu mu malu a bungi ne bakumbaje bimue bipatshila, tudi mua kudimona bakumbane bua kukumbaja bipatshila bia muomumue.

Misangu mivule bantu badi bafuanangane ke batu bidikijangana: balume ne balume anyi bakaji ne bakaji, ba nsombelu wa muomumue ne badi bamanyangane. Katutu bafuane kudifuanyikija ne muntu udi mushilangane netu bikole to. Mu ngakuilu mukuabu, mbikole bua muana wa bakaji wa mvula dikumi ne pamutu kudifuanyikija ne muntu mukaji udi uleja miodele ya bilamba bua kubisuisha kudi bantu, kadi mbipepele bua kudifuanyikijaye ne balongi nende, ne mbikole bua eu pende kudifuanyikija ne muana wa bakaji wa bidimu dikumi ne pamutu eu.

Kadi mmu malu kayi mutu bantu badifuanyikija ne bakuabu? Mmu malu onso adibu bangata ne mushinga mu bantu bu mudi lungenyi, buimpe bua mpala, bubanji, bilamba. Nansha nanku, tutu basue kudifuanyikija ne bakuabu mu bintu anyi malu adi atusankisha. Tshilejilu, katuena bafuane kutekela muntu kampanda utudi bamanyangane nende lubabu bualu udi  ne tembre ya bungi, anu bikala dilama tembre dikale ditusankisha bikole.

Didifuanyikija ne bakuabu ditu dilela meji kabukabu munda mua bantu: disankishibua nansha dibungama, dianyishangana ne dijinga dia kuidikija bakuabu nansha kanyinganyinga peshi lungenyi lua diluishangana. Meji makuabu a ku atudi batele aa mmabi ne kaena apetangana ne ngikadilu ya bena Kristo.

Didifuanyikija bua kutembangana

Ba bungi batu badienzeja bua “kutshimuna” bakuabu batu baleja lungenyi lua ditembangana. Batu basue kupita bakuabu ne batu basanka anu patubu bamona ne: mbapite bakuabu. Kabitu bisankisha bua kuikala pamue ne bantu ba mushindu eu to. Bulunda nabu butu bua milandu dîba dionso ne malanda atu anu a dikokangana. Bantu aba batu bapange budipuekeshi ne batu pa tshibidilu bapangila bua kutumikila mubelu wa mu Bible wa kunanga muntu nabu, bualu meji abu adi mua kusaka bakuabu ku didimona bikale bashadile anyi bapuekele.​—Matayo 18:1-5; Yone 13:34, 35.

Kusaka bantu bua kudimona ne: “mbashadile” kudi kubatapa ku muoyo mu mushindu kampanda. Bilondeshile mufundi mukuabu, “dipangila dietu dia bintu ditu ditamba kututonda bikole patubi bimueneka ne: bantu badi mu nsombelu wa muomumue netu mbapete bintu bitudi tukeba.” Nunku lungenyi lua kutembangana ludi lulela lubabu, lukuna ne diumvuila muntu lukinu bua bintu bidiye nabi, bubanji, muanzu, lumu, masanka, amu nanku. Ebi bidi bifikisha ku ditembangana bikole kabidi. Bible udi ubenga ‘ditembangana.’​—Galatia 5:26, NW.

Patu bena lubabu bapepeja bidi bena lukuna babu benze, batu bajinga kubenga kujimija mushinga utubu baditua. Meji bu nunku adi mua kumueneka kaayi ne mushinga, kadi muntu yeye kayi muajingulule ne muakande, adi mua kufikisha ku dienza dia malu mabi menemene. Tangila miyuki ibidi ya mu Bible idi ileja muvua lubabu luenze malu.

Pavua Isaka musombele munkatshi mua bena Peleshete, wakapeta ‘bisumbu bia mikoko ne bia ngombe ne bantu ba bungi kunyima kuende. Bena Peleshete bakadi nende mukawu.’ Bakajibikila bina bivuabu bumbule kudi Abalahama, tatuende wa Isaka, ne mukalenge wabu wakambila Isaka bua kumbukaye munkatshi muabu. (Genese 26:1-3, 12-16) Lubabu luabu luvua lubi ne luakanyanga malu. Kabavua mua kuanyisha bua Isaka ikale ne bubanji munkatshi muabu kabidi to.

Kunyima kua bidimu bia bungi, Davidi wakadileja musalayi muluanganyi wa mvita wa dilambu. Bakaji ba mu Isalele bakasekelela ditshimuna diende, bimba ne: ‘Shaula wakashipa binunu bia bantu, Davidi wakashipa binunu makumi bia bantu.’ Nansha muvuabu batumbishaku Shaula, wakamona dimufuanyikija ne Davidi adi dimupuekeshisha milongo, ne lukinu luakajuka mu mutshima wende. Kubangila apu, wakakuatshila Davidi lukuna. Tshikondo katshiyi tshianji kulepa, wakakeba kushipa Davidi, wakenza nanku misangu mivule. Bushuwa, lukinu ludi mua kulela malu mabi a bungi!​—1 Samuele 18:6-11.

Nunku bikala kudifuanyikija kuetu ne bakuabu bua malu mimpe adibu benza anyi ne masanka adibu bapeta kulela lukinu peshi lungenyi lua ditembangana munda muetu, tuadimuka! Eyi nngenyi mibi idi mibengangane ne ngelelu wa meji wa Nzambi. Kadi kumpala kua kumona mutudi mua kutuila ngenyi eyi mibi nkanana, tukonkononayi tshintu tshikuabu tshidi tshisaka bantu bua kudifuanyikija ne bakuabu.

Didikonkonona ne dikala basankishibue

‘Ndi ne meji, ne mpala mulenga, ne dimanya, ne bukole bua mubidi, muakanyine kanemu ne munangibue anyi? Ne mmu mushindu kayi?’ Katutu ne tshibidilu tshia kuditangila mu lumuenu ne kudiela nkonko bu eyi to. Kadi bilondeshile mufundi mukuabu, “nkonko bu eyi itu misangu ya bungi ituvuila mu mitu yetu ne itu ijudija mandamuna a munda munda adi atusankishaku.” Muntu udi kayi mujadike tshidiye mua kukumbaja udi mua kuelangana meji bua malu aa kayi ne lungenyi lua ditembangana anyi lukinu. Udi udikonkonona patupu. Kuenza  nunku kakuena kubi misangu yonso to. Kadi bidi bimpe tuetu kuenza nenku katuyi tudifuanyikija ne bakuabu.

Tudi ne bipedi bishilangane bilondeshile malu kabukabu. Nekuikale anu bamue bantu badi bamueneka batupite. Nunku, pamutu pa tuetu kubumvuila lukinu, tudi ne bua kupima malu atudi tuenza mu diumvuangana ne mikenji miakane ya Nzambi idi ileja menemene tshidi tshilenga ne tshidi tshimpe. Yehowa utu utabalela bua tshitudi muntu ne muntu pa nkayende. Katu utufuanyikija ne bantu bakuabu to. Mupostolo Paulo udi utubela ne: ‘Muntu ne muntu adijadikile mudimu wende, nunku neamanye mua kuditumbisha bua bualu buende, ki mbualu bua mukuabu.’​—Galatia 6:4.

Tuluishayi lukinu

Bu mudi bantu bonso bikale bapange bupuangane, bidi bikengela kutungunuka ne kuenza madikolela a bungi bua kuluisha lukinu. Kumanya mudi Mukanda wa Nzambi utuambila ne: ‘Mu buneme muntu ne muntu ateke mukuabu kumpala’ nkuimpe, kadi mbikole bua kutumikila mêyi aa. Paulo wakitaba muvua meji ende amutuma ku mpekatu. Bua kuluisha meji aa, uvua ne bua ‘kudikuma too ne pavuaye uvuija mubidi wende mabuba, uubueja mu bupika.’ (Lomo 12:10; 1 Kolinto 9:27) Buetu tuetu, abi bidi mua kumvuija kukandamena meji a ditembangana, kupingaja meji adi mimpe pa muaba wawu. Tudi ne bua kulomba Yehowa mu disambila bua atuambuluishe bua ‘katutambi kudielangana meji mapite atudi ne bua kuela.’​—Lomo 12:3.

Dilonga dia Bible ne dielangana meji bidi pabi biambuluisha. Tshilejilu, elabi meji muikala nsombelu mu Mparadizu udi Nzambi mulaye. Tshikondo atshi bantu bonso nebikale ne ditalala, bukole bua mubidi, biakudia bia bungi, nzubu mimpe ne midimu mimpe. (Musambu 46:8, 9; 72:7, 8, 16; Yeshaya 65:21-23) Muntu kampanda neumvue lungenyi lumusaka ku ditembangana anyi? Tòo. Kakuakuikala bualu nansha bumue buasaka bantu bua kutembangana to. Bushuwa, Yehowa ki mmuleje mu kanungu ne mu kanungu muikala nsombelu tshikondo atshi to, kadi mbiakanyine bua tuetu kuela meji ne: bantu bonso nebikale mua kuenza ne kumanya malu adi abasankisha. Muntu umue udi mua kulonga malu a mabulunge, mukuabu kutela bilamba bimpe. Ntshinyi tshiasaka muntu bua kumvuila mukuabu lukinu? Midimu ya bana betu neyikale tshintu tshiatusaka bua kuenza petu malu makuabu kabidi, kadi kayakujudija njiya to. Meji a ditembangana kaakuikalaku kabidi to.

Bituikala tujinga kuikala mu nsombelu eu, katuenaku ne bua kuenza muetu muonso bua kuikala ne meji a muomumue mpindieu anyi? Tukadi bamane kuikala mu mparadizu wa mu nyuma mudi kamuyi malu a bungi a bena panu. Bu muikala lungenyi lua ditembangana kaluyiku mu buloba bupiabupia bua Nzambi, tudi ne bua kuluepuka mpindieu.

Nunku mbibi bua tuetu kudifuanyikija ne bakuabu anyi? Peshi kudi dîba didi kudifuanyikija ne bakuabu kuikale kuakanyine?

Didifuanyikija ne bakuabu didi diakanyine

Didifuanyikija misangu ya bungi ne bakuabu ditu difikisha muntu ku dipeta meji mabi anyi ku tunyinganyinga tukole, kadi kabiena bikengela ne: dikale misangu yonso dienza nanku to. Bua muanda eu, tangila mubelu wa mupostolo Paulo eu: ‘Nulue bidikiji ba badi bapiana milayi bua ditabuja ne lutulu.’ (Ebelu 6:12) Kudienzeja bua kuikala ne ngikadilu ya buena ya basadidi ba lulamatu ba Yehowa ba kale kudi mua kupatula bipeta bimpe. Bushuwa, abi bidi mua kulomba bua kudifuanyikija ne bamue bantu.  Kadi bidi bimpe kumanya bilejilu bitudi mua kuidikija ne kujingulula tshitudi ne bua kuakaja.

Tangila tshilejilu tshia Yonatana. Muntu kampanda udi mua kuamba ne: bivua bikengela yeye kumvua lukinu. Bu muvuaye muana wa kumpala wa Shaula Mukalenge wa Isalele, Yonatana uvua ne bua kuikala mutekemene bua kulua mukalenge, kadi Yehowa wakasungula muntu mushadile kudiye ku bidimu 30: nsonga Davidi. Yonatana kakumvua lukinu to, wakadisunguluja pa kudia bulunda bulelela ne Davidi, yeye kumutua nyama ku mikolo bu mukalenge uvua Yehowa musungule. Bushuwa Yonatana uvua muntu wa mu nyuma. (1 Samuele 19:1-4) Bishilangane ne tatuende uvua wangata Davidi bu muluishi, Yonatana wakajadika ne: Yehowa ke uvua ulombola malu ne wakakokela disua Diende; kakadifuanyikija ne Davidi pa kuamba ne: “Bua tshinyi mbasungule Davidi babenge kunsungula meme?”

Munkatshi mua bena Kristo, katuena ne bua kuela meji ne: badi batuluisha, bienze bu se: bakuabu badi bakeba kutupita anyi kuangata muaba wetu nansha. Ditembangana ki ndimpe to. Bena Kristo bapie batu bumvuangana, basomba mu buobumue ne dinanga, kabayi batembangana to. Mumanyi kampanda wa malu a nsombelu wa bantu (Francesco Alberoni) udi wamba ne: “Dinanga mmuluishi munene wa lukinu. Tuetu banange muntu, tudi tumujingila malu mimpe ne tudi ne disanka padiye ulubuluka ne padiye ne disanka.” Nunku padibu bapesha muntu kampanda mu tshisumbu tshia bena Kristo mudimu kansanga wa pa buawu, tshidi tshimpe kuenza nkusanka bua mudimu au. Ke tshiakenza Yonatana. Anu bu yeye, netupete mabenesha bituatua ne lulamatu luonso aba badi ne bujitu bua kulombola midimu mu bulongolodi bua Yehowa nyama ku mikolo.

Tudi mua kuanyisha mu mushindu muakanyine tshilejilu tshimpe tshia bena Kristo netu. Didifuanyikija nabu ne nkatshinkatshi didi mua kutusaka bua kuidikija ditabuja diabu mu mushindu muimpe. (Ebelu 13:7) Kadi bituikala katuyi ne budimu, dijinga dia dibidikija didi mua kukudimuka kulua ditembangana. Bituikala tumona ne: mbatupite kudi muntu kampanda utudi tuanyisha ne tukeba kumupetula anyi kumujana, dijinga dia kumuidikija didi mua kuandamuka lukinu.

Kakuena muntu mupange bupuangane nansha umue utu muikale tshilejilu katshiyi kadiwu to. Ke bualu kayi Mukanda wa Nzambi udi wamba ne: ‘Nuidikije kuenza mudi Nzambi wenza, bu bana bende bananga.’ Kabidi, ‘Kristo wakakenga bua bualu buenu, wakanushila tshilejilu bua nuenu numulonde mu makasa ende.’ (Efeso 5:1, 2; 1 Petelo 2:21) Ngikadilu ya Yehowa ne Yezu bu mudi dinanga, bulenga, luse ne budipuekeshi bidi ne bua kuikala malu atudi tudienzeja bua kuidikija. Tudi ne bua kudikonkonona ni tudi ne ngikadilu, bipatshila ne mishindu ya kuenza malu ya buena yabu. Didifuanyikija dia mushindu eu didi mua kulengeja nsombelu wetu, kutuludika bimpe, kutushindamija, kutukuba ne kutuambuluisha bua kufika ku mulongo wa balume ne bakaji bena Kristo bapie. (Efeso 4:13) Tuetu badifile muetu muonso bua kuidikija tshilejilu tshipuangane tshia Yehowa ne tshia Yezu, katuakutamba kuikala tudifuanyikija ne bantu netu nansha.

[Tshimfuanyi mu mabeji 28, 29]

Mukalenge Shaula wakumvuila Davidi lukinu

[Tshimfuanyi mu dibeji 31]

Yonatana kavua wangata nsonga Davidi bu muluishi wende nansha