Ngikadilu muimpe udi ‘utumbisha diyisha dia Nzambi’

BU MUTU nsongakaji Maria wa mu tshimenga tshia Kransnoyarsk, mu ditunga dia Russie mumanye kuimba misambu bimpe, mulongeshi wabu wakamubueja mu tshisumbu tshia bimbi ba misambu tshia mu tshilongelu tshiabu. Abidi mmale asatu mmîpi, Maria wakaya kuyukila ne umue wa ku balongeshi babu ne kanemu konso, kumuambilaye ne: kavua mua kuimba minga misambu to. Bua tshinyi? Bualu dimba misambu ivua ne malongesha a mu bitendelelu mu mêyi ayi kadivua dipetangana ne malongesha a mu Bible avuaye witabuja to. Mulongeshi au wakakema, kudiebejaye ne: ‘Kutumbisha Nzambi ne musambu kudi mua kuikala kubi ku tshinyi?’

Bua kuleja tshivuaye ubengela kuimba musambu wa Nzambi wa Busatu-Bunsantu, Maria wakabulula Bible wende ne kumvuija ne: Nzambi ne Yezu Kristo kabena muntu umue to, ne nyuma muimpe mbukole buenzeji bua Nzambi. (Matayo 26:39; Yone 14:28; Bienzedi 4:31) Maria udi wamba ne: “Malanda anyi ne mulongeshi wetu au kaakanyanguka to. Tudi ne balongeshi bimpe be mu tshilongelu tshietu. Batu basue bua katuikadi bena mpala ibidi to.”

Munkatshi mua tshidimu tshijima atshi tshia malonga, ngikadilu wa Maria wakasaka balongeshi ne balongi babu bua kumunemeka. Maria udi wamba ne: “Mêyi a mu Bible adi angambuluisha mu nsombelu wanyi. Ku ndekelu kua tshidimu atshi, bakampesha mukanda wa tshijadikilu tshia bumuntu bujalame ne bua bulongame bindi nabi, ne baledi banyi bakapeta mukanda mubafundila kudi tshilongelu tshietu uvua ubela tuasakidila bua muvuabu bakoleshe muanabu wa bakaji bimpe.”

Maria wakatambula mu dia 18 Tshimungu 2001. Udi wamba ne: “Ndi ne disanka bua mundi nsadila Yehowa, Nzambi muimpe mutambe nenku!” Bansonga Bantemu ba Yehowa ba pa buloba bujima badi batumikila mêyi adi mu Tito 2:10, mutudi tubala ne: ‘Nutumbishe diyisha dia Nzambi, Musungidi wetu, mu malu onso.’

[Tshimfuanyi mu dibeji 32]

Mukanda wa dianyisha ne Mukanda wa tshijadikilu tshia tshikadilu tshilenga

[Tshimfuanyi mu dibeji 32]

Maria ne baledi bende pakatambulaye