Malu a mu nsombelu

Nsombelu wetu wakatuambuluisha bua kuyisha miaba ya bungi ya kule

MALONDA KUDI RICARDO MALICSI

Pangakajimija mudimu wanyi bualu ndi muena Kristo, meme ne dîku dianyi tuakalomba Yehowa bua atuambuluishe tuangate mapangadika bua matuku etu atshivua alua. Tuakasambila, tuetu kuleja dijinga dia kualabaja mudimu wa Nzambi. Panyima, tuakatuadija kuenza ngendu mu matunga muanda mukulu mu Asia ne mu Afrike. Mu ngendu ayi, tuakapeta mushindu wa kuenza mudimu miaba ya bungi ya kule.

MVUA muledibue mu ditunga dia Philippines mu 1933, mu dîku divua mu Tshitendelelu tshia bena Mishonyi tshia mu ditunga edi. Bena dîku dietu bonso 14 bavua mu tshitendelelu atshi. Pamvua ne bidimu bitue ku 12, ngakalomba Nzambi mu disambila bua andombole mu tshitendelelu tshilelela. Umue wa ku balongeshi betu wakambueja mu dilonga dia malu a Nzambi, ne ngakalua muena Katolike wa dilambu. Tshivua mpumbisha diela konfensiyo wa mu Disambombo ne Misa ya mu Dia lumingu to. Kadi, ku kakese ku kakese kabivua binsankisha kabidi to, meme kutuadija kuela mpata. Nkonko imvua nayi pa tshidi tshienzekela bantu padibu bafua ne pa inferno wa kapia ne pa Busatu Bunsantu ivua inkengesha mu lungenyi. Mandamuna a balombodi ba bitendelelu kaavua ne bua nsongo ne ajikija nkonko yanyi.

Ndi mpeta mandamuna a nkonko yanyi

Pamvua ndonga mu tulasa tubandile, ngakabuela mu dingumba dia balongi bakamfikisha ku bibidilu bu mudi diluangana dia mvita, mu manaya a mfranga, dinua dia makanya ne malu makuabu a buenzavi. Dilolo dikuabu ngakapetangana ne mamuende wa mulongi wetu. Uvua Ntemu wa Yehowa. Ngakamuela nkonko imue imue ingakela balongesha betu ba malu a  Nzambi. Wakandamuna nkonko yanyi yonso ne Bible, ne mvua mutuishibue ne: bivuaye wamba bivua bilelela.

Ngakasumba Bible ne kutuadija kumulonga ne Bantemu. Matuku makese meme kutuadija kubuela mu bisangilu biabu bionso. Meme e kulonda mubelu muimpe wa mu Bible wa se: “malunda mabi adi anyanga malu makane a bantu,” kulekela balunda banyi bena buenzavi. (1 Kolinto 15:33) Biakangambuluisha bua kuya kumpala mu dilonga dianyi dia Bible ne kunyima ngakadilambula kudi Yehowa. Pangakatambula mu 1951, ngakenza mudimu wa ku dîba ne ku dîba (bumpanda-njila) mu lupolo kampanda. Pashishe mu Tshisua-munene 1953, ngakasela Aurea Mendoza Cruz, kuluaye muena dianyi bua matuku anyi onso a muoyo ne muenzejanganyi nanyi wa mudimu wa Nzambi muena lulamatu.

Diandamuna ku masambila etu

Tuvua tujinga bushuwa kuikala bampanda-njila. Kadi dijinga dietu edi kadiakakumbana diakamue to. Nansha nanku, katuvua balekele kulomba Yehowa bua atupeteshe mishindu ya kualabaja mudimu wende. Kadi nsombelu wetu uvua mukole. Kadi, tuvua amu balame bipatshila bietu bia mu nyuma mu lungenyi, ne bakanteka musadidi wa tshisumbu pamvua ne bidimu 25 (mutangidi muludiki mu tshisumbu tshia Bantemu ba Yehowa).

Pangakamanya Bible mu buondoke ne kujingulula biakane mikenji ya Yehowa ne mêyi ende ngakamona ne: mudimu wanyi kauvua umvuangana ne kondo kanyi ka muoyo ka muena Kristo. (Yeshaya 2:2-4) Meme kusuika bua kuulekela. Tshivua diteta dia ditabuja dietu. Mmunyi mungadisha dîku dianyi? Tuakasambila kabidi Yehowa Nzambi. (Musambu 65:2) Tuakamuambila malu avua atutonda ne avua atuenza buôwa, ne kumuleja kabidi dijinga dietu dia kusadila muaba uvuabu bakengela bamanyishi ba Bukalenge ba bungi. (Filipoi 4:6, 7) Katuvua tuela meji ne: tuvua mua kupeta mishindu ya bungi bua kualabaja mudimu eu mu mishindu kabukabu to!

Ntuadijilu wa luendu luetu

Mu Tshisanga 1965, ngakapeta mudimu, meme kulua mutangidi wa bajimi ba kapia ne bepudianganyi ku njiwu ba ku Tshipalu tshinene tshia ndeke tshia mu tshimenga tshia Vientiane mu ditunga dia Laos, tuetu kuya kusombelamu. Mu tshimenga atshi muvua Bantemu 24, ne tuvua ne disanka dia kuenza mudimu wa buambi ne bamisionere ne bana betu ba muaba au. Kunyima bakantuma ku Tshipalu tshia mu tshimenga tshia Udon Thani, mu ditunga dia Thaïlande. Kamuvua Bantemu to. Tuvua tuenza bisangilu bionso bia ku lumingu tuetu nkayetu mu dîku. Tuvua tuyisha ku nzubu ne ku nzubu, tuenza makumbula ne tutuadija malonga a Bible.

Tuakavuluka mubelu wakapesha Yezu bayidi bende wa kutungunuka ne ‘kukuama mamuma a bungi.’ (Yone 15:8) Nunku tuakadisuika bua kulonda tshilejilu tshiabu ne kutungunuka ne kumuangalaja lumu luimpe. Abidi mmale asatu mmîpi, bipeta biakamueneka. Mushikankunde mukuabu wa mu ditunga adi wakitaba bulelela ne kulua muanetu wa mu nyuma. Bantu babidi bena mu Amerike wa ku Nord bakitaba bulelela, ne mu kupita kua bidimu, bakalua bakulu bena Kristo. Tuakatungunuka ne kuyisha lumu luimpe bidimu bipite pa dikumi ku Nord kua Thaïlande. Tudi ne disanka dia bungi dia kumanya ne: kudi mpindieu tshisumbu mu Udon Thani! Imue ya ku ntete ya bulelela ituvua bakune itshidi ipatula bipeta.

Kadi tuvua ne bua kumuangala kabidi, ne tuakasambila bua ‘Mukalenge wa bintu bia kunowa’ atuambuluishe bua tutungunuke ne kuenza mudimu wa kuyisha. (Matayo 9:38) Bakatutuma mu Téhéran, tshimenga tshikulu tshia ditunga dia Iran. Bivua tshikondo tshivua Shah ukokesha.

Diyisha miaba ya ntatu

Patuakafika mu Téhéran, tuakakeba bana betu ba mu nyuma diakamue. Tuvua tudisangisha mu kasumbu kakese ka Bantemu kavua kenza ne bantu ba mu matunga 13. Tuvua ne bua kushintuluka mu amue malu bua kuyisha lumu luimpe mu Iran. Nansha muvuaku kakuyi buluishi bumueneke patoke, bivua bikengela kuikala ne budimu.

Bua midimu ya ku mubidi ivua bantu bavua basankidila bulelela benza, imue misangu tuvua tulombola malonga a Bible munda nkulu too ne patshiatshia. Kadi tuvua ne disanka dia bungi dia  kumona bipeta bia mudimu wetu mukole! Amue mêku a bena Philippines ne a bena Corée akitaba bulelela ne akadilambula kudi Yehowa.

Pashishe bakantuma mu tshimenga tshia Dacca, mu ditunga dia Bangladesh. Tuakeyekamu mu Tshisua-munene 1977. Kabivua bipepele bua kuenza mudimu wa buambi mu ditunga edi kabidi to. Kadi tuvua anu bamanye ne: tuvua ne bua kutungunuka ne kuwenza. Ku bulombodi bua nyuma wa Yehowa, tuakafika ku dipetangana ne mêku a bungi a bavua badiamba ne: mbena Kristo. Bamue ba kudibu bavua ne nyota ya mâyi matalale a bulelela budi mu Mifundu Minsantu. (Yeshaya 55:1) Tuakatuadija kulonga Bible ne bantu ba bungi.

Tuvua amu bamanye ne: Nzambi mmusue “bantu bonso basungidibue.” (1 Timote 2:4) Bia diakalenga, kakuvua muntu mututatshishe to. Bua kumbusha meji mabi onso avua bantu mua kuikala nawu, tuvua tudikolesha bua kutamba kuleja bulenga mu mudimu wa diyisha. Anu bu mupostolo Paulo, tuvua tudienzeja bua ‘kulua bena malu onso kudi bonso.’ (1 Kolinto 9:22) Pavuabu batuebeja kendela ketu, tuvua tuandamuna ne bulenga buonso ne tuvua tumona ne: bantu ba bungi bavua batuleja bulunda.

Tuakapetangana ne Ntemu mukuabu mu tshimenga tshia Dacca ne tuakamukankamija bua adisange netu mu bisangilu bia bena Kristo ne mu mudimu wa buambi. Pashishe, mukajanyi wakalonga Bible ne bena dîku kampanda ne kubabikilaye mu bisangilu. Bua luse lujalame lua Yehowa, dîku edi dijima diakitaba bulelela. Kunyima kua matuku, bana ba bakaji babidi ba mu dîku edi bakambuluisha bua kukudimuna mikanda ya malu a mu Bible mu muakulu wa Bengali, ne balela babu ba bungi bakafika pabu ku dimanya Yehowa. Balongi ba Bible bakuabu ba bungi bakitaba bulelela. Bavule ba kudibu badi basadila mpindieu bu bakulu anyi bampanda-njila.

Bu mutu mu tshimenga tshia Dacca muikale bantu ba bungi, tuakabikila bamue balela betu bua kutuambuluisha mu mudimu wa buambi. Ba bungi bakitaba ne kuluabu kutuambuluisha mu Bangladesh. Tudi ne disanka divule ne tusakidila Yehowa bikole bua mutuvua ne diakalenga edi dia kuyisha lumu luimpe mu ditunga adi! Ku ntuadijilu kuvua anu muntu umue mu tshimenga etshi, mpindieu kudi bisumbu bibidi mu Bangladesh.

Mu Kashipu 1982, tuvua ne bua kupaya bisaka ne kumuangala mu Bangladesh. Tuvua ne binsonji ku mêsu patuakashiya bana betu. Matuku kaayi manji kuvula, ngakapeta mudimu ku Tshipalu tshinene tshia ndeke tshia mu tshimenga tshia mu tshimenga tshia Entebbe, mu ditunga dia Ouganda, kuenzamu bidimu binayi ne ngondo muanda mutekete. Ntshinyi tshituvua mua kuenza bua kuambika dîna dinene dia Yehowa buneme mu ditunga edi?

Tudi tusadila Yehowa mu Afrike wa ku Est

Patuakafika ku Tshipalu tshia Entebbe, kanyemesha mukuabu wakatuambula meme ne muena kuanyi bua kuya muaba utuvua ne bua kusombela. Patuvua tuenda tuya, ngakatuadija kuyisha kanyemesha au malu a Bukalenge bua Nzambi. Kungebejaye ne: “Udi Ntemu wa Yehowa anyi?” Pangakitaba, kuambaye ne: “Umue ku bana benu utu wenza mudimu mu nzubu wa biamu bia kuludika nabi ndeke padiye mulu.” Diakamue, ngakamulomba bua amfikishe kudiye. Tuakapetangana ne muanetu au, yeye kumvua disanka dia bungi bua muvuaye mutumone ne tuakumvuangana bua bisangilu ne mudimu wa buambi.

Kuvua anu bamanyisha ba Bukalenge 228 patupu mu Ouganda tshikondo atshi. Mu tshidimu tshietu tshia kumpala tuakakuna ntete ya bulelela pamue ne bana betu ba balume babidi mu Entebbe. Bu mutu bantu basue kubala bikole mu tshimenga etshi, tuakabanya mikanda ya bungi  ne bibejibeji nkama. Tuvua tubikila bana betu ba mu tshimenga tshikulu tshia Kampala bua kulua kutuambuluisha bua kuyisha mu Entebbe matuku a ku ndekelu kua lumingu. Mu muyuki wanyi wa kumpala wa patoke, tuvua bantu batanu.

Munkatshi mua bidimu bisatu biakalonda, tuakapeta disanka dia bungi patuakamona bantu batuvua tulongesha banyisha bulelela ne balubuluka lukasa. (3 Yone 4) Mu mpuilu wa tshijengu kampanda, basambombo ba kudibu bakatambula. Ba bungi ba kudibu kuambabu ne: bavua bakankamijibue bua kuenza mudimu wa ku dîba ne ku dîba bualu bavua batumone tuenza bumpanda-njila nansha mutuvua ne midimu ya ku mubidi ya mêba a bungi.

Tuakajingulula ne: muaba wetu wa mudimu uvua mua kuikala pawu teritware muimpe. Dimue edi, ngakasemena pabuipi ne muena mudimu wa dijima kapia ne kuyikila nende pa ditekemena dia muoyo pa buloba bukudimuna mparadizu didi Bible ulongesha. Meme kumuleja mu Bible wende ne: bantu bena butumike nebasombe mu ditalala ne buobumue, kakuyi bupele, mvita, masama, dipanga dia nzubu ne lufu. (Musambu 46:9; Yeshaya 33:24; 65:21, 22; Buakabuluibua 21:3, 4) Pakadibadilaye nkayende bualu ebu mu Bible wende wakapeta dijinga dia kumanya bia bungi. Ngakatuadija diakamue kulonga nende Bible. Kubangishaye kubuela mu bisangilu bionso. Abidi mmale asatu mmîpi, kudilambulaye kudi Yehowa ne kutambulaye. Kunyima wakaditua pende mu mudimu wa ku dîba ne ku dîba bu tuetu.

Ndululu yakajuka misangu ibidi patuvua mu Ouganda, kadi kayakimanyika midimu yetu ya mu nyuma to. Bena mêku a bantu bavua benza midimu mu bibambalu bia midimu ya pa buloba bujima bakaya mu tshimenga tshia Nairobi, mu ditunga dia Kenya ngondo isambombo. Aba ba kutudi bavua bashale mu Ouganda bakatungunuka ne kuenza bisangilu bia bena Kristo ne mudimu wa buambi, nansha muvuabi bikengela kuikala ne budimu.

Mu Tshisanga 1988, mudimu wanyi wakajika ne tuakamuangala kabidi. Tuvua ne disanka dia bungi patuakashiya Tshisumbu tshia Entebbe tshidiunda. Mu Kashipu 1997, tuakapeta mushindu wa kufika mu Entebbe kabidi. Tshikondo atshi bamue ba ku bantu batuvua balonge nabu Bible kale bakavua balue bakulu. Tuakasangala bikole patuakamona bantu 106 babuele mu muyuki wa patoke!

Tudi tuya muaba uvuabu kabayi banji kuyisha

Tuvuaku mua kupeta mpunga mikuabu ya kuyisha anyi? Eyowa. Bakantuma bua musangu eu mu ditunga dia Somalie, ku Tshipalu tshia ndeke tshia mu tshimenga tshia Mogadiscio. Tuvua badisuike bua kubuelela mu mpunga eu mupiamupia bua kuenza mudimu muaba muvuabu kabayi banji kuyisha.

Tuvua tutamba kuenzela mudimu wetu wa buambi munkatshi mua bena mudimu ba mu biro bia ambasade, bena mudimu bena Philippines ne benyi bakuabu. Tuvua misangu mivule tupetangana nabu mu tshisalu. Tuvua kabidi tubakumbula mu bulunda ku nzubu yabu. Pa kuenza mudimu ne mayele, lungenyi, budimu ne dieyemena Yehowa ne muoyo mujima, tuakafika ku diambila bantu bulelela bua mu Bible, ne bipeta bimpe biakamueneka munkatshi mua bantu ba mu matunga mashilashilangane. Bidimu bibidi kunyima, tuakumbuka mu Mogadiscio matuku makese kumpala kua mvita kubudikayimu.

Bulongolodi bua Malu a Ndeke idi kayiyi ya basalayi bua pa buloba bujima buakantuma mu  tshimenga tshia Rangoun, mu ditunga dia Myanmar. Tuakapeta kabidi muine amu mpunga ya kuambuluisha bantu ba muoyo mululame bua kumanyabu malu adi Nzambi mulongolole. Tuakumbuka ku Myanmar, kututumabu mu tshimenga tshia Dar es-Salam mu ditunga dia Tanzanie. Kuyisha lumu luimpe ku nzubu ne ku nzubu kuvua kutamba kupepela bualu mu tshimenga etshi muvua musumba wa bantu bavua bakula Anglais.

Mu matunga onso mutuvua benzele mudimu, tuakapeta ntatu anu mikese patuvua tuyisha nansha muvuabu bakandike mudimu wa Bantemu ba Yehowa mu matunga mavule a kudiwu. Bu muvua mudimu wanyi utangila pa tshibidilu mbulamatadi anyi bibambalu bidi bikuata mudimu pa buloba bujima, bantu kabavua bajula milandu bua midimu yetu ya mu nyuma to.

Mudimu wanyi wa ku mubidi wakandomba bua meme ne muena kuanyi tuikale bena ngendu bidimu bu makumi asatu. Nansha nanku tuakaumona anu bu mushindu wa kukumbaja kipatshila ketu kanene. Tshipatshila tshietu tshia kumpala tshivua anu tshia kulubuluja malu a Bukalenge bua Nzambi. Tudi tuela Yehowa tuasakidila bua mudiye mutuambuluishe bua kuenza bua nsombelu wetu uvua ushintuluka amu kushintuluka ikale ne dikuatshisha ne atupeteshe diakalenga dinene dia kumuangalaja lumu luimpe miaba ya bungi ya kule.

Ndi mpingana muaba ungakatuadijila

Pamvua ne bidimu 58, ngakangata pansio kumpala kua dîba ne kupingana mu Philippines. Patuakalukila, tuakasambila Yehowa bua atulombole. Tuakabanga kusadila mu tshisumbu tshia Tshimenga tshia Trece Martires mu provense wa Cavite. Patuakafikamu, muvua bamanyishi ba Bukalenge bua Nzambi 19 tshianana. Bakalongolola mudimu wa buambi dituku dionso, ne malonga a Bible a bungi akatuadija. Tshisumbu tshiakatuadija kudiunda. Tshikondo tshikuabu, mukajanyi uvua ulonga Bible ne bantu batue ku 19, meme mvua ndonga ne bantu 14.

Matuku makese Nzubu wa Bukalenge wakalua mukese. Tuakasambila Yehowa bua bualu ebu. Muanetu wa mu nyuma mukuabu ne mukajende bakafila lupangu, nunku biro bia Bantemu bia ditunga kuanyishabi bua kusombesha tshisumbu mfranga bua kuibakisha Nzubu wa Bukalenge mupiamupia. Nzubu eu wakapatula tshipeta tshimpe tshitambe mu mudimu wa buambi ne bungi bua babuedi ba mu bisangilu buvua buvula ku lumingu ku lumingu. Mpindieu, tutu tuenza dîba dijima mu njila bua kuya kuelesha tshisumbu tshikuabu tshia bamanyishi 17 diboko.

Meme ne mukajanyi tudi tuanyisha bikole diakalenga ditudi bapete dia kusadila Yehowa mu matunga kabukabu. Patudi tuela meji ku nsombelu wetu wa bena ngendu, tudi ne disanka divule dia kumanya ne: tuvua benze bualu buimpe menemene mu nsombelu wetu: bambuluishe bantu bakuabu bua bamanye Yehowa!

[Karte mu mabeji 24, 25]

(Bua kumona malu bimpe, tangila mu mukanda)

TANZANIE

OUGANDA

SOMALIE

IRAN

BANGLADESH

MYANMAR

LAOS

THAÏLANDE

PHILIPPINES

[Tshimfuanyi mu dibeji 23]

Meme ne Aurea mukajanyi