‘Bu dibue dikunze dia mushinga mukole’

MUPOSTOLO Yone wakamona nkuasa wa butumbi mu diulu mu tshikena-kumona. Eu uvua musombe mu nkuasa au uvua umueneka “bu dibue dia jaspe.” Uvua kabidi bu “dibue dikunze dia mushinga mukole.” (Buakabuluibua 4:2, 3, NW) Mabue aa avua mabue a mushindu kayi?

Kaavua mabue mashitakane avua akenka anu pa mutu pa mutu to. Kale, muaku wa tshiena-Greke udibu bakudimune “jaspe” uvua uleja mabue a mekala mashilangane, pamue ne mabue a mushinga mukole avua masuke. Mu mukanda wende kampanda, Archibald Robertson udi wamba ne: “dibue dia jaspe” dia mu Buakabuluibua 4:3 kadivua “bulelela dibue dia jaspe dia mushinga mukese ditudi bamanye lelu eu to.” (Word Pictures in the New Testament) Kabidi, ku ndekelu kua mukanda wa Buakabuluibua, Yone udi umvuija mudi musoko wa Yelushalema wa mu diulu wamba ne: ‘Dinkenka diawu diakafuana dibue dia mushinga mutambe bukole, bu dibue dia jaspe, ditoke too bu ntalatala.’ (Buakabuluibua 21:10, 11) Bidi bimueneka ne: mabue adi Yone wamba ng’avua amuenesha anyi apitshisha butoke.

Eu udibu baleje musombe mu nkuasa wa butumbi mu tshikena-kumona tshivua Yone mumone uvua Yehowa Nzambi, yeye udi ne butumbi bua bungi kupita bonso mu diulu ne pa buloba. Mmupite bonso kule ne kule menemene ku bukezuke ne ku bunsantu. Mu diumvuangana ne malu aa, mupostolo Yone wakafunda ne: ‘Nzambi udi munya [peshi butoke] ne munda muende kamuena mîdima nansha kakese.’ (1 Yone 1:5) Ke bualu kayi Yone wakalomba bena kuitabuja nende bua ‘badilengeje bu mudi Yehowa mulengele.’​—1 Yone 3:3.

Ntshinyi tshitudi ne bua kuenza bua tuetu kuikala bakezuke ku mêsu kua Nzambi? Tudi ne bua kuikala ne ditabuja mu mashi adi Kristo muele panshi bua kutufuilabu luse bua mibi yetu. Tudi kabidi ne bua kutungunuka ne ‘kuenda mu munya’ pa kudilongela Bible pa tshibidilu ne pa kutumikila malongesha adimu.​—1 Yone 1:7.