Bukole bua Yezu kudi bantu bonso ba buloba bujima

MUKUDIMUNYI mukuabu wa Bible (Edgar Goodspeed) wakafunda ne: “Malu onso adi evanjeliyo ilonda akamba Yezu munkatshi mua bantu anyi ku luseke, uvua mua kuikala muambe mu mêba abidi. Kadi nansha mêyi ende makese au avua masake bantu ne mabalenge ku muoyo bikole be bua tuetu kuamba katuyi mua kutupakana se: kakuena muntu mukuabu udi ne bukole mu buloba bujima bu Yezu to.”

Pakajikija Yezu Kristo mudimu wende pa buloba mu tshidimu tshia 33 bikondo bietu ebi (B.B.), kuvua bantu balume ne bakaji bu 120 bavua bayidi bende. (Bienzedi 1:15) Lelu wa ndaya eu, bantu bapite pa miliyare ibidi batu bamba mudibu bena Kristo. Bantu bakuabu nkama ya miliyo badi bitaba ne: Yezu mmuprofete. Malongesha ende adi bushuwa ne bukokeshi bua bungi mu bukua-bantu.

Nansha bamfumu badi kabayi bena Kristo batu bitaba bukokeshi budi nabu Yezu mu buloba bujima. Tshilejilu, labi mukuabu muena Yuda (Hyman Enelow) wakafunda ne: “Yezu mmuntu udi mutambe kumanyika, udibu batambe kulonga mua kumanya, udi ne bukokeshi butambe mu malu a ntendelelu a bukua-bantu.” Wakamba kabidi ne: “Nganyi udi mua kubala bukokeshi buonso budi nabu Yezu kudi bantu? Dinanga didiye mujule, busambi budiye mufile, malu mimpe adiye muenze, ditekemena ne disanka bidiye mujudije: malu aa onso kakuena muntu nansha umue udi muenze bu yeye. Ku malu manene ne mimpe adi bantu benze kakuena nansha umue udi mua kusemena pabuipi ne bukokeshi  budi nabu Yezu kudi bantu ba buloba bujima ne mudibu bamusankidila. Mmulue muntu wa katshia ne katshia udi ukoka ntema kupita bonso.” Mulombodi muena Hindu Mohandas Gandhi wakamba ne: “Tshiena mumanye muntu mukuabu udi muenzele bantu malu a bungi kupita Yezu to. Bushuwa Buena-Kristo kabuena ne bubi.” Kadi wakasakidila ne: “Nuenu bena Kristo ke badi ne tshilumbu. Kanuena nansha pabuipi ne kutumikila malongesha enu nkayenu.”

Mbimanyike katshia ku kale ne: Bukua-buena-Kristo mbupangile mua kutumikila malongesha a Yezu. Mumanyi mukuabu wa malu a kale a Buena-Kristo (Cecil John Cadoux) wakaleja ne: “Ditangalaka ku kakese ku kakese dia tshilele tshia dilengulula bikadilu bibi mu Ekeleziya” diakakoka “ntema ya balombodi ba Buena-Kristo katshia ku kale . . . mu 140 mu tshidimu tshia Mukalenge wetu.” Wakamba ne: “Dilekela bikadilu bilenga bivua kudi bena Kristo ba kumpala binyanguka divua ne bua kufikisha kakuyi mpata ku dilonda nsombelu ya bena panu.”

Dinyanguka dia bikadilu edi diakakola mu bidimu bia 300, pavua Mukalenge wa bena Lomo Constantin mubuele mu Buena-Kristo. Cadoux wakafunda ne: “Bamanyi ba malu a kale ki mbapange kumona dipangadika dibi divua Ekeleziya muangate pavuaye mutue ndondo ne Constantinus ne imue misangu batu banyingalala bua bualu ebu.” Katshia tshikondo atshi, bena Kristo ba ku dîna mbenze malu a bungi a bundu adi apepejija dîna dia Kristo.

Nunku nkonko ya mushinga nyoyi eyi: Ntshinyi menemene tshiakalongesha Yezu? Ne malongesha ende adi ne bua kuikala ne bukole kayi kutudi?

[Tshimfuanyi mu dibeji 3]

“Tshiena mumanye muntu mukuabu udi muenzele bantu malu a bungi kupita Yezu to.”​—Mohandas K. Gandhi

[Tshimfuanyi mu dibeji 3]

“Kakuena muntu mukuabu udi ne bukole mu buloba bujima bu Yezu to.”​—Edgar Goodspeed

[Mêyi a dianyisha]

Culver Pictures