Muanda wa kuvuluka

MMUANDA kayi au? Ndufu lua muntu wakafua kukadi mpindieu bidimu bitue ku 2 000. Wakamba ne: ‘Ndi nteka muoyo wanyi panshi bua meme kuwangata kabidi. Kakuena mukuabu udi uwunyenga, ndi nditekelawu panshi nkayanyi.’ (Yone 10:17, 18) Muntu au uvua Yezu Kristo.

Yezu wakalomba bayidi bende bua bikale basekelela Tshivulukilu tshia lufu luende lua mulambu. Tshibilu etshi batu batshibikila kabidi ne: ‘Bidia bia Mukalenge,’ anyi “Didia dia Mfumu.” (1 Kolinto 11:20, MMM) Bantemu ba Yehowa ne balunda babu nebenze Tshivulukilu tshivua Yezu mutuadije bua kuvulukabu lufu luende mu Dinayi dia matuku 24 a ngondo muisatu 2005 padi dîba dibuela.

Muyuki muangatshila mu Bible neuleje diumvuija dia diampa kadiyi luevene ne mvinyo mukunze bitu mu tshibilu etshi. (Matayo 26:26-28) Muyuki eu newandamune kabidi nkonko bu mudi eyi: Mmisangu bungi kayi idi bena Kristo ne bua kuenza Tshivulukilu? Nnganyi udi muakanyine bua kudia diampa ne kunua mvinyo bidi bu bimanyishilu? Lufu lua Yezu ludi bua diakalenga dia banganyi? Musekelelu eu wa mushinga mukole newambuluishe bonso bua kumvua kavuidila ka Yezu panu ne tshivuaye mufuile.

Tudi tukubikila ne disanka dionso bua ulue mu Tshivulukilu tshia lufu lua Yezu. Suaku webeje Bantemu ba Yehowa ba muaba uudi musombele dîba dijalame ne muaba wenzelabu tshisangilu etshi.