Nkonko ya babadi

Bu muvua Davidi ne bantu bende badie mampa a mulambu, bidi bileja ne: padi nsombelu ukola, bantu badi mua kushipa mikenji ya Nzambi kabayi babanyoka anyi?​—1 Samuele 21:1-6.

Bilondeshile Lewitiki 24:5-9, mampa a mulambu avuabu bashintulula dituku dia Nsabatu dionso, anu bakuidi ke bavua baadia. Lungenyi luvua mu mukenji eu ndua se: mampa au avua a tshijila ne bavua ne bua kuadia kudi bantu bavua benzela Nzambi mudimu, mbuena kuamba ne: bakuidi. Bivua bibi bua kuapesha muena mudimu yonso wa tshianana anyi kuadia bua disanka patupu. Kadi muakuidi Ahimeleke kavua muenze mpekatu pakapeshaye Davidi ne bantu bende mampa a mulambu to.

Bidi bimueneka ne: Davidi uvua mu mudimu wa pa buawu uvua Mukalenge Shaula mumupeshe. Davidi ne bantu bende bavua ne nzala. Ahimeleke wakashindika ne: bavua bakezuke bilondeshile mikiya ya mu mikenji. Nansha muvuabi bibi bua muvuabu badie mampa a mulambu bilondeshile ngumvuilu musumisha wa mikenji, bivua mu diumvuangana ne tshivuabu benza ne mampa a mulambu. Ngelelu wa meji eu wakafikisha Ahimeleke bua kuenza bualu buvua kabuyi bubengangana ne mikenji to. Yezu Kristo muine wakatela muanda eu bua kuleja ne: ki mbijalame bua kuikala ne mmuenenu wa malu mumisha bikole bua ditumikila dia mukenji wa Nsabatu bilondeshile diumvuija dia Bafalese nansha.​—Matayo 12:1-8.

Kadi malu atudi tufuma ku dimona aa kaena asua kumvuija ne: bantu badi mua kushipa mikenji ya Nzambi padi nsombelu ukola. Tshilejilu, nsombelu uvua umueneka wa lutatu wakajuka pavua basalayi bena Isalele baluangana ne bena Peleshete. Mukalenge Shaula wakamba ne: ‘Muntu udi udia too ne ku dilolo diambedi tshiyi muanji kusombuela badi nanyi lukuna, udi ne mulawu.’ Bible udi wamba ne: ‘Bakashipa bena Peleshete dituku adi.’ Basalayi bavua batshioke mu mvita ne bavua ne nzala, ‘bakaya kushipa nyama, bakayidia ne mashi ayi.’ (1 Samuele 14:24, 31-33) Bakenza mpekatu ku mêsu kua Yehowa pa kushipa mukenji uvuaye muele bua mashi. Malu avuabu benze kaavua umvuangana ne mudimu umuepele uvua Nzambi muitabe bua kuenza ne mashi, wa ‘kubuikidila nawu’ bantu mpekatu. (Lewitiki 17:10-12; Genese 9:3, 4) Bua luse luende, Yehowa wakanyisha milambu ya pa buayi yakafidilabu bantu bavua benze mpekatu.​—1 Samuele 14:34, 35.

Yehowa mmutekemene bua tuetu kutumikila mikenji yende mu nsombelu yonso. Mupostolo Yone udi wamba ne: ‘Bua edi ndinanga dia Nzambi, bua tuetu tutumikile mikenji yende.’​—1 Yone 5:3.

[Tshimfuanyi mu dibeji 30]

Bavua bateka mampa a mulambu mapiamapia mu nzubu wa Yehowa dia Nsabatu dionso