Mamanya a bantu ne bitendelelu: Ntuadijilu wa dikokangana
Mamanya a bantu ne bitendelelu: Ntuadijilu wa dikokangana
MUMANYI mukuabu wa malu a mabulunga wa bidimu 70 ukavua ne mikolo ku tshina, uvua upatata bua kubala mukanda. Mu bianza biende muvua mabeji a mukanda wende ukavua pa kupatuka. Ni uvua mumanye anyi kayi mumanye, mukanda eu uvua ne bua kushintulula mushindu uvua bantu bangata tshibuashibuashi. Uvua kabidi ne bua kujudija dikokangana dikole munda mua Bukua-buena-Kristo, ne bipeta biadi bitshidiku too ne lelu.
Muntu eu uvua upunga ne lufu uvua Nicolas Copernic, muena Katolike wa mu ditunga dia Pologne, ne bivua mu 1543. Mukanda wa Copernic, uvua ne tshiena-bualu tshia se: Dinyunguluka dia Mabulunga a mulu (Angl.) uvua wamba ne: dîba ke didibu banyunguluke kudi mabulunga makuabu, kadi ki mbuloba to. Amu bua mukanda umue eu patupu wakapatulaye, Copernic wakapingaja dilongesha dipepele dia se: dîba didi munkatshi mua tshibuashibuashi pa muaba wa dilongesha dikole menemene divuaku dia se: buloba ke buvua munkatshi mua tshibuashibuashi.
Kumpala, kabivua bimueneka menemene ne: dikokangana divua mua kujuka to. Bivua nanku bualu Copernic uvua ne budimu pavuaye umanyisha ngenyi yende. Kabidi, Ekeleziya Katolike, ukavua muitabe dilongesha dia se: buloba buvua munkatshi mua tshibuashibuashi, uvua umueneka kayi ulondakaja bivua bena meji mua kuamba tshikondo atshi. Nansha papa muine wakakankamija Copernic bua kupatulaye mukanda wende au. Pakalua Copernic ndekelu wa bionso kuupatula, mupatudi mukuabu wa mikanda uvua ne buôwa wakafunda mêyi ende a ntuadijilu, uleja mudi dilongesha dia se: dîba didi munkatshi mua tshibuashibuashi dipetangana ne malu a makumi, ne kadiyi anu dilelela mu malu a mabulunga.
Dikokangana didi dikola
Pashishe mumanyi wa malu a mabulunga wa mu Italie, muena makumi ne mumanyi wa malu a bukole budi mu bintu bifuka, uvua kabidi muena Katolike, diende Galileo Galilei (1564-1642), wakabuela pende mu tshialu etshi tshia dikokangana. Wakatangila mulu ne tshiamu tshia ditangila natshi mabulunga tshivuaye muenze ne muelamu ntalatala mipiamipia, kumonaye bintu bivua muntu kayi muanji kumona katshia. Malu akamonaye akamujadikila ne: Copernic uvua muambe bulelela. Galilée (Galileo) wakamona kabidi matoba mu dîba, atubu babikila lelu ne: matoba a mu dîba, ke yeye kutontolola dilongesha dikuabu divua bena nkindi ne bena bitendelelu bangata ne mushinga wa bungi, dia se: dîba kadiena mua kushintuluka anyi kunyanguka.
Galilée uvua mushilangane ne Copernic bualu yeye uvua ne dikima ne lukunukunu mu ditangalaja ngenyi yende. Ne wakatangalaja ngenyi eyi pavua bena ntendelelu kabayi basue bualu ebu nansha kakese, bualu dîba adi banene ba Ekeleziya Katolike bakavua baleje patoke muvuabu babenge dilongesha dia Copernic. Nunku, pakamba Galilée ne: dilongesha dia se: dîba didi munkatshi mua tshibuashibuashi divua dilelela ne divua kabidi dipetangana ne Bible, ekeleziya wakamona bualu ebu bu butontolodi. *
Galilée wakaya ku Lomo bua kudibingisha, kadi kabiakakumbana to. Mu 1616 ekeleziya wakamuambila bua kulekela ditangalaja ngenyi ya Copernic. Bakapuwisha Galilée munkatshi mua tshikondo kampanda. Pashishe mu 1632, wakapatula mukanda mukuabu uvua utua ku tshia Copernic. Tshidimu tshiakalonda, Tshilumbuluidi tshia Ekeleziya Katolike tshiakakosela Galilée tshibawu tshia buloko bua matuku ende onso a muoyo. Kadi bua bungi bua bidimu bikavuaye nabi, bakatekesha tshibawu etshi, kumufundilabu buloko bua bamulamine kuende.
Bantu ba bungi batu bamona dikokangana dia Galilée ne ekeleziya bu se: bena meji mbatshimune ntendelelu, anyi mene bu se: bena meji mbatshimune Bible. Kadi anu mutuamona mu tshiena-bualu tshidi tshilua, mbafike ku dimona malu mushindu eu kabayi bele meji ku mianda mikuabu ya bungi.
[Mêyi adi kuinshi]
^ tshik. 7 Galilée wakadikebela patupu baluishi ba bukole bua mandamuna ende a lukasa ne diambangana mêyi avua atapa. Kabidi, mu diamba ne: dilongesha dia se: dîba didi munkatshi mua tshibuashibuashi divua dipetangana ne Bible, wakadileja bu muntu munene mu malu a ntendelelu, biobi kupesha kabidi banene ba ekeleziya tshiji tshikole.
[Tshimfuanyi mu dibeji 3]
Copernic
[Mêyi a dianyisha]
Muangata mu Giordano Bruno ne Galilei (Mufunda mu tshiena-Allemange)
[Tshimfuanyi mu dibeji 3]
Galilée udi udibingisha kumpala kua Tshilumbuluidi tshia bena Lomo
[Mêyi a dianyisha]
Wa mu mukanda wa The Historian’s History of the World, Tshit. IX, 1904
[Mêyi a dianyisha bua tshimfuanyi mu dibeji 3]
Munyima: Tshimfuanyi tshiumvuija dilongesha dia Copernic dia dîba dinyunguluka kudi mabulunga