Vuija Yehowa Nzambi webe

BIKONDO bia kale, bamue bantu bavua mu malanda masheme menemene ne Yehowa, bifikishe ne ku dimubikila ne: Nzambi wabu. Tshilejilu, mu Bible, badi babikila Yehowa ne: “Nzambi wa Abalahama,” “Nzambi wa Davidi” ne “Nzambi wa Eliya.”​—Genese 31:42; 2 Bakelenge 2:14; 20:5.

Mmunyi muvua yonso wa ku bantu aba mufike ku didia malanda masheme ne Nzambi? Mmalongesha kayi atudi mua kupetela kudibu bua tuetu petu kudia ne kulama malanda masheme a nsungasunga ne Mufuki?

Abalahama ‘wakitabuja Yehowa’

Abalahama uvua muntu wa kumpala udi Bible wamba bualu buende ne: uvua muitabuje Yehowa. Ditabuja ke ngikadilu wa kumpala uvua nende Abalahama wakamuanyishisha kudi Nzambi. Bushuwa, Yehowa uvua muanyishe Abalahama bikole, kufikaye ne ku didimanyisha pashishe kudi Mose bu “Nzambi wa Abalahama” ne wa muanende Isaka ne wa muikuluende Yakoba kabidi.​—Genese 15:6; Ekesode 3:6.

Mmunyi muvua Abalahama mufike ku dikala ne ditabuja dia mushindu eu kudi Nzambi? Tshia kumpala, Abalahama wakashila ditabuja diende pa tshishimikidi tshikole. Bavua mua kuikala bamulongeshe njila ya Yehowa kudi Sheme muana wa Noa, uvua mudimuene ne ende abidi malu avua Nzambi muenze bua kusungila bantu bende. Sheme uvua mudimuenene ne mêsu ende muvua Yehowa ‘mulame Noa, muambi wa malu mimpe ne bantu bakuabu muanda mutekete pakatumaye mâyi manene pa buloba bua bantu babi.’ (2 Petelo 2:5) Abalahama uvua mua kuikala mumanyine kudi Sheme ne: pavua Yehowa ulaya tshintu kampanda, uvua ne bua kutshikumbaja kakuyi mpata. Mu mishindu yonso, pavua Abalahama muine mupete mulayi wa Nzambi, wakasanka ne kushalaye ne nsombelu mushindamene pa dimanya dilelela dia se: mulayi au uvua ne bua kukumbana.

Bu muvua ditabuja diende ne tshishimikidi tshikole, diakakoleshibua kudi bienzedi biende. Mupostolo Paulo wakafunda ne: ‘Bua ditabuja Abalahama, pakabikidibuaye wakatumikila bua kuyaye ku muaba wakadiye wamba kuangata bu bumpianyi; wakalopoka, kayi mumanye kuakadiye uya.’ (Ebelu 11:8) Tshienzedi atshi tshia ditumikila tshiakakolesha ditabuja dia Abalahama, divua muyidi Yakobo muambe bualu buadi ne: ‘Wewe udi utangila ne: Ditabuja diakenza mudimu popamue ne kuenza kuende: ne ditabuja diende diakavuijibua diakane tshishiki ku kuenza kuende.’​—Yakobo 2:22.

Kabidi, Yehowa wakalekela ditabuja dia Abalahama ditetshibua bua kuluadi kabidi dikole menemene. Paulo wakatungunuka wamba ne: ‘Bua ditabuja Abalahama, pakamutetabu, [wakamba] kufila Isaka bu mulambu.’ Mateta  adi alengeja ne akolesha ditabuja, adivuija ‘ditambe ngolo mushinga mukole.’​—Ebelu 11:17; 1 Petelo 1:7.

Nansha muvua Abalahama kayi mushale ne muoyo too ne pakakumbana bionso bivua Nzambi mulaye, uvua ne disanka dia kumona bantu bakuabu balonda tshilejilu tshiende. Mukajende Sala ne bena dîku diende bakuabu basatu: Isaka, Yakoba ne Yosefe, mbabele pabu kalumbandi mu Bible bua ditabuja diabu dia dikema.​—Ebelu 11:11, 20-22.

Ditabuja bu dia Abalahama lelu

Ditabuja didi ne mushinga wa bungi bua eu yonso udi ujinga kuvuija Yehowa Nzambi wende. Paulo wakafunda ne: ‘Bikalaku kakuyi ditabuja, muntu kêna mua kusankisha [Nzambi].’ (Ebelu 11:6) Mmunyi mudi musadidi wa Nzambi lelu eu mua kudima ditabuja dikole bu dia Abalahama?

Anu muvuabi bua Abalahama, ditabuja dietu didi ne bua kuikala dishindamene pa tshishimikidi tshikole. Tudi mua kufika ku dienza bimpe nanku patudi tulonga Bible ne mikanda ya malu a mu Bible pa tshibidilu. Dibala dia Bible ne dielangana meji bua malu atudi tubala bidi mua kutushindikila ne: milayi ya Nzambi neikumbane. Dîba adi nebitusake bua kuakaja nsombelu wetu bilondeshile ditekemena adi dishindika. Ditabuja dietu didi kabidi dikolesha kudi bienzedi bia butumike, bu mudi dienza mudimu wa buambi ne dibuela mu bisangilu bia bena Kristo.​—Matayo 24:14; 28:19, 20; Ebelu 10:24, 25.

Kakuyi mpata, ditabuja dietu neditetshibue pamuapa kudi buluishi, disama dikole, lufu lua munangibue wetu kampanda anyi kudi tshinga tshintu. Patudi tushala balamate Yehowa mu matetshibua bidi bikolesha ditabuja dietu, bidivuija ne mushinga mukole kupita ngolo. Nansha tuetu bashale ne muoyo too ne pakumbana milayi yonso ya Nzambi anyi katuyi bashale nawu, ditabuja dietu neditusemeje pabuipi menemene ne Yehowa. Kabidi, tshilejilu tshietu netshikankamije bakuabu bua kuidikija ditabuja dietu. (Ebelu 13:7) Ke tshivua tshienzekele Raph, wakatangila ne kuidikija ditabuja dia baledi bende. Udi umvuija ne:

“Pamvua kuetu, baledi banyi bavua bakankamija dîku dietu dijima bua kujuka kumpala kua dîba mu dinda bua tuetu kumona mua kubala Bible pamue. Tuakabala Bible mujima mushindu au.” Raph utshitu ubala Bible mu dinda dionso, ne ebi bitu bimuambuluisha bua kutuadija dituku bimpe. Raph uvua ne tshibidilu tshia kuya mu mudimu wa buambi ne tatuende lumingu luonso. Udi wamba ne: “Ke tshikondo tshingakalonga mua kupingulukila bantu tshiakabidi ne mua kulombola malonga a Bible.” Mpindieu Raph udi wenza mudimu bu muena budisuile ku bimue bia ku biro bia Bantemu ba Yehowa ku Mputu. Ki ndifutu dimpe bua ditabuja dia baledi bende anyi?

Muntu uvua mutshima wa Yehowa musue

Davidi, uvua muledibue bidimu bu 900 kunyima kua Abalahama, uvua muntu wa dikema munkatshi mua basadidi ba Yehowa badibu batele mu Bible. Muprofete Samuele wakamba bua muvua Yehowa musungule Davidi bua kuluaye mukalenge ne: ‘Yehowa wakamana kudikebela muntu udi mutshima wende musue.’ Malanda avua pankatshi pa Yehowa ne Davidi avua masheme menemene, ke muprofete Yeshaya kufikaye ku diambila Mukalenge Hezikiya panyima ne: “Yehowa, Nzambi wa Davidi [nkambua webe].”​—1 Samuele 13:14; 2 Bakelenge 20:5; Yeshaya 38:5.

Nansha muvua Davidi muntu uvua mutshima wa Yehowa musue, kuvua bikondo bivuaye mulekele majinga ende amulalula. Misangu isatu wakenza bilema binene: Wakalekela bambula mushete wa tshipungidi bibi bua kulua nawu ku Yelushalema; wakenda masandi ne Beta-sheba ne kushipeshaye bayende Uliya; ne wakabadisha  bungi bua bantu ba Isalele ne ba Yuda, bualu buvua Yehowa kayi mumuambile bua kuenza. Misangu yonso eyi, Davidi wakashipa Mikenji ya Nzambi.​—2 Samuele 6:2-10; 11:2-27; 24:1-9.

Kadi pakamulejabu mpekatu yende, Davidi wakitaba bubi buende ne kakabuela pambidi pa bantu bakuabu nansha. Wakitaba ne: diambula dia Mushete wa tshipungidi kadivua dilongolola bimpe, kuambaye kabidi ne: ‘tuetu katuakakeba disua dia [Yehowa] mu mukenji eu.’ Pakamuleja muprofete Natana masandi avuaye muende, Davidi wakamuandamuna ne: ‘Ngakuenzela Yehowa bibi.’ Ne pakalua Davidi kumanya muvua dibala bantu dikale bualu bubi, wakitaba ne: ‘Ngakenza bubi mu bualu ebu bungakenza.’ Davidi wakanyingalala bua mpekatu yende ne wakashala pabuipi ne Yehowa.​—1 Kulondolola 15:13; 2 Samuele 12:13; 24:10.

Patudi tuenza bilema

Tshilejilu tshia Davidi tshidi tshitukankamija mu didienzeja dietu bua kuvuija Yehowa Nzambi wetu. Bu bikala muntu uvua mutshima wa Yehowa musue bikole mufike ku dienza mpekatu minene nunku, katuena ne bua kuteketa mu maboko bituikala imue misangu mua kuenza bilema anyi mene kupona mu mpekatu minene nansha mutudi tuenza muetu muonso bua kuepuka bubi. (Muambi 7:20) Tudi mua kukola ku muoyo bualu pavua Davidi munyingalale, bakamufuila luse bua mpekatu yende. Ke tshiakenzekela Uwe * kukadi bidimu ndambu.

Uwe uvua mukulu mu tshimue tshisumbu tshia Bantemu ba Yehowa. Dimue edi, majinga mabi akamupita makanda ne yeye kupona mu tshiendenda. Amu bu Mukalenge Davidi, kumpala Uwe wakakeba bua kusokoka bualu abu, wela meji ne: Yehowa uvua mua kubuikila mêsu pa bubi buende. Kunyima, kondo kende ka muoyo kakamutatshisha bikole, ke yeye kufika ku ditondela mukulu nende bubi abu, ne bakamuambuluisha bua kupatuka mu nsombelu au wa kabutu ka mu nyuma.

Uwe wakanyingalala bua mpekatu yende ne wakashala pabuipi ne Yehowa ne tshisumbu tshiende kabidi. Wakanyisha bikole diambuluisha diakapetaye, ke bualu kayi mbingu mikese kunyima wakafundila bakulu ubaleja dianyisha diende ne muoyo mujima bua dikuatshisha diabu. Wakafunda ne: “Nudi bangambuluishe bua kumbusha tshipendu pa dîna dia Yehowa.” Uwe wakalama malanda ende ne Yehowa ne kunyima bakamuteka kabidi musadidi mu tshisumbu tshimue tshimue atshi.

‘Muntu wa mutshima wa muomumue netu’

Eliya, uvua ne muoyo mu lukama lua bidimu luakalonda panyima pa Davidi, uvua umue wa ku baprofete batambe bunene mu Isalele. Eliya wakabingisha ntendelelu mulelela mu tshikondo tshivua malu mabi ne tshiendenda bitampakane, ne lulamatu luende kudi Yehowa kaluakatenkakana nansha kakese. Kabiena bikemesha bua muvua Elisha wakamupingana mubikile Yehowa ne: “Nzambi wa Eliya”!​—2 Bakelenge 2:14.

Kadi Eliya uvua anu bu bantu bonso. Yakobo wakafunda ne: ‘Eliya uvua muntu wa mutshima [wa] muomumue netu.’ (Yakobo 5:17) Tshilejilu, kunyima kua yeye mumane kutshimuna menemene batendeledi ba Bâla mu Isalele, Mukalenge-mukaji Izebele wakafuna bua kumushipa. Tshiakenzaye ntshinyi? Wakumvua buôwa ne kunyemenaye mu tshipela. Muine amu, kusombaye muinshi mua mutshi wa genêt udiabila ne: ‘Kuakujika mpindieu, Yehowa angate muoyo wanyi, bualu bua meme tshiena mupite batatu banyi buakane.’ Eliya katshivua kabidi musue kuikala muprofete to, uvua ujinga kufua.​—1 Bakelenge 19:4.

Kadi Yehowa wakumvuila Eliya bua meji avuaye nawu. Nzambi wakamukolesha ku muoyo, kumujadikilaye ne: kavua nkayende, bualu kuvua bantu bakuabu bavua balamate ntendelelu mulelela. Kabidi, Yehowa utshivua mutekele Eliya muoyo ne wakamupesha mudimu wa kuenza.​—1 Bakelenge 19:5-18.

Dilubakana dia Eliya kadivua tshimanyinu tshia se: Nzambi katshivua umuanyisha kabidi to. Bidimu bu 1 000 kunyima, pakakudimuka Kristo Yezu mpala kumpala kua Petelo, Yakobo ne Yone, Yehowa wakasungula banganyi bua kumuenekabu mu tshikena-kumona etshi bimane pamue ne Yezu? Mose ne Eliya. (Matayo 17:1-9) Bulelela, Yehowa uvua wangata Eliya  bu muprofete wa tshitembu. Nansha muvua Eliya ‘muntu wa mutshima [wa] muomumue netu,’ Nzambi wakanyisha mudimu wende mukole wa kupingajilula ntendelelu mukezuke mu Isalele ne wa kutumbisha dîna Diende.

Diluangana ne muoyo wa munda

Lelu eu basadidi ba Yehowa badi imue misangu mua kumvua buôwa anyi kuteketa mu mikolo. Bidi bikankamija bua kumanya ne: Eliya wakumvua pende nanku. Ne bidi bushuwa bikolesha ku muoyo bua kumanya se: anu muvua Yehowa mumvuile Eliya bua meji ende, Udi kabidi utumvuila petu patudi tuluangana ne meji etu munda.​—Musambu 103:14.

Ku lumue luseke, tudi banange Nzambi ne muntu netu ne tudi basue kuenza mudimu wa kuyisha lumu luimpe lua Bukalenge. Ku lukuabu luseke, tudi mua kuteketa ku muoyo padi bantu kabayi bitaba bulelela butudi tubayisha anyi mene tudi mua kumvua buôwa padi baluishi ba ntendelelu mulelela batukanyina. Kadi anu bu muakakolesha Yehowa Eliya bua kutungunukaye ke mudiye ukolesha kabidi basadidi bende lelu eu. Tangila tshilejilu tshia Herbert ne Gertrud.

Herbert ne Gertrud bakatambula ne kuluabu Bantemu ba Yehowa mu tshimenga tshia Leipzig mu 1952, mu ditunga divua kale République démocratique allemande. Nsombelu uvua wa lutatu bua basadidi ba Nzambi tshikondo atshi, bualu mudimu wabu wa buambi uvua mukandika. Herbert uvua umvua bishi bua kuyisha ku nzubu ne ku nzubu?

Udi wamba ne: “Misangu mikuabu tuvua ne buôwa bua bungi. Patuvua tuya ku nzubu ne ku nzubu, katuvua bamanye bamfumu ni bavua mua kutupatukila diakamue ne kutukuata.” Ntshinyi tshiakambuluisha Herbert ne bakuabu bua kutshimuna buôwa? “Tuvua tudilongela Bible bikole. Ne Yehowa wakatupesha bukole bua kutungunuka ne mudimu wa buambi.” Mu mudimu wende wa buambi, Herbert wakamona malu a bungi akamukolesha ne akamusekesha mene.

Herbert wakapetangana ne mamu mukuabu mushindame wakasankidila mukenji wa mu Bible. Pakamupingulukila Herbert matuku makese kunyima, nsongalume mukuabu uvuapu ne wakateleja diyiki diabu. Kunyima kua katupa kakese Herbert wakamona tshintu kampanda tshiakamuzakeja. Pa nkuasa uvua mu ditumba dia nzubu pavua tshifulu tshia mpulushi. Tshivua tshia nsongalume au, uvua mpulushi tshia bushuwa ne uvua mupangadike bua kukuata Herbert.

Nsongalume au wakamba ne: “Udi Ntemu wa Yehowa! Ndeje karte kebe.” Herbert wakamupesha karte kende. Pashishe, bualu buvuaye kayi muelele meji buakenzeka. Mamu au wakatangila mpulushi ne kumuambilaye ne: “Bualu buobu buenzekele muntu wa Nzambi eu kuakufika kabidi muaba eu to.”

Nsongalume wakapuwa katupa, pashishe yeye kupingajila Herbert karte ne kumulekelaye. Kunyima Herbert wakalua kumvua ne: mpulushi au uvua usesela muana wa bakaji wa mamu au. Bidi bimueneka ne: wakela meji ne: bivua bitambe buimpe bua yeye kutungunuka ne kusesela muana wa bakaji au pamutu pa kukuata Herbert.

Tuvuije Yehowa Nzambi wetu

Malu aa adi atulongesha tshinyi? Adi atulongesha ne: anu bu Abalahama, tudi ne bua kuikala ne ditabuja dikole mu milayi ya Yehowa. Anu bu Davidi, misangu yonso itudi tuenza bilema tudi ne bua kuya kudi Yehowa ne dinyingalala dilelela. Ne anu bu Eliya, tudi ne bua kueyemena Yehowa bua kupeta bukole dîba ditudi ne buôwa. Tuetu tuenza malu aa, tudi mua kuvuija Yehowa Nzambi wetu lelu ne kashidi ne tshiendelele, bualu yeye udi ‘Nzambi udi ne muoyo, udi Musungidi wa bantu bonso, kadi [udi] mutambe kuikala Musungidi wa badi bamuitabuja.’​—1 Timote 4:10.

[Mêyi adi kuinshi]

[Bimfuanyi mu dibeji 25]

Bienzedi bia butumike biakakolesha ditabuja dia Abalahama

[Tshimfuanyi mu dibeji 26]

Anu bu Davidi, tudi ne bua kunyingalala patudi tuenza mpekatu

[Tshimfuanyi mu dibeji 28]

Anu muvua Yehowa mumvuile Eliya bua meji avuaye nawu ke mudiye utumvuila petu