Eyemena Dîyi dia Yehowa

‘Ndi ngeyemena dîyi diebe.’​—MUSAMBU 119:42.

1. Ntshinyi tshiudi mua kuambaku bua mufundi wa Musambu wa 119 ne bua ngikadilu wende?

 MUFUNDI wa Musambu wa 119 uvua munange dîyi dia Yehowa. Uvua mua kuikala Hezikiya, muana wa Mukalenge wa Yuda. Ngimbilu wa musambu eu mufundisha ku nyuma wa Nzambi udi upetangana ne ngikadilu wa Hezikiya ‘wakalamata Yehowa’ pakaluaye mukalenge wa Yuda. (2 Bakelenge 18:3-7) Tshidi tshilelela ntshia se: mufundi wa musambu eu uvua mumanye majinga ende a mu nyuma.​—Matayo 5:3.

2. Musambu wa 119 udi ne dilongesha kayi dinene, ne mmunyi muakaufundabu?

² Bualu bunene budi mu Musambu wa 119 mmushinga wa dîyi dia Nzambi anyi mukenji wende. * Wakafunda musambu eu mu bitupa bilondangane bilondeshile maleta a alfabe bua kuikalawu pamuapa umuvuluija malu. Mmusambu udi ne mvese 176 mifunda mu bitupa mu bitupa bilondeshile dilondangana dia maleta a alfabe wa tshiena-Ebelu. Mu tshiena-Ebelu tshia ku ntuadijilu, tshitupa tshionso tshia ku bitupa 22 bia musambu eu tshidi ne milongo 8 ya tubiambilu idi ituadija anu ne dileta dimue dimue. Musambu eu udi wakula bua dîyi dia Nzambi, mikenji yende, njila yende, mêyi adiye ututumina, mêyi adi atuludika, mapangadika a kulumbulula kuende, mêyi adiye utuambila ne mêyi ende mafunda atudi ne bua kunemeka. Mu tshiena-bualu etshi ne tshidi tshilonda, netuikale mua kulonga Musambu wa 119 bilondeshile nkudimuinu mujalame wa Bible wa mu tshiena-Ebelu. Kuelangana meji pa malu a basadidi ba Yehowa ba kale ne ba lelu kudi ne bua kubandisha ngumvuilu wetu wa musambu eu udi mufundisha ku nyuma wa Nzambi ne kuvudija dianyisha ditudi nadi bua Dîyi dia Nzambi didiye mufundishe mu Bible.

Tutumikile Dîyi dia Nzambi bua tuikale ne disanka

3. Leja tshidi kuikala bajalame tshishiki kumvuija, pashishe ufile tshilejilu.

³ Disanka dilelela didi difuma ku dienda dietu dia mu mikenji ya Nzambi. (Musambu 119:1-8) Bituenza nanku, Yehowa neatuangate bu bantu ‘bajalame tshishiki mu bienzedi bietu.’ (Musambu 119:1) Kuikala bajalame tshishiki anyi katuyi ne kalema kakuena kumvuija ne: tudi bapuangane to, kadi kudi kuleja ne: tudi tuluangana anu bua kuenza disua dia Yehowa Nzambi. Noa ‘wakadi muakane tshishiki mu tshikondo tshiende’ bu muntu ‘wakenda ne Nzambi.’ Nkambua wa lulamatu au ne bena dîku diende bakapanduka ku Mvula wa kabutu bualu wakalonda njila uvua Yehowa mumuleje. (Genese 6:9; 1 Petelo 3:20) Bia muomumue, bua tuetu kupanduka petu ku nshikidilu wa malu a tshikondo etshi mbimpe tuetu kukumbaja disua dia Nzambi, kuenza ‘mikenji yende ne dinanukila.’​—Musambu 119:4.

4. Mmunyi mutudi mua kuikala ne disanka ne kulubuluka?

⁴ Tuetu bikala tutumbisha Yehowa ‘ne buakane bua mutshima ne tutumikila mikenji idiye mutufundile,’ kakutulekela nansha kakese. (Musambu 119:7, 8) Nzambi kakalekela Yoshua mulombodi  wa Isalele uvua mutumikile mubelu wa kubala ‘mukanda wa mikenji yende munya ne butuku bua kudimuka mua kuenza malu onso avua mafundamu’ nansha. Biakamuambuluisha bua kulubuluka ne kuenza malu ne meji. (Yoshua 1:8) Pakavua Yoshua ne mikolo ku tshina, wakatungunuka ne kutumbisha Nzambi ne kuvuluija bena Isalele ne: ‘Nudi bamanye mu mitshima yenu yonso ne mu mioyo yenu yonso ne kanuakapanga tshintu tshimpe nansha tshimue tshiakanulaya Yehowa Nzambi wenu.’ (Yoshua 23:14) Anu bu Yoshua ne mufundi wa Musambu wa 119, tudi mua kupeta disanka ne kulubuluka kuya kumpala tuetu tutumbisha Yehowa ne tueyemena dîyi diende.

Dîyi dia Yehowa didi ditulama bakezuke

5. (a) Umvuija mutudi mua kushala bakezuke mu nyuma. (b) Ndiambuluisha kayi didiku bua nsonga udi muenze mpekatu mutambe bubi?

⁵ Bua tuetu kushala bakezuke mu nyuma mbimpe tudimuke bu mudi dîyi dia Nzambi diamba. (Musambu 119:9-16) Bidi nanku nansha bikala baledi kabayi tshilejilu tshimpe. Tshilejilu, nansha muvua tatuende wa Hezikiya muikale mutendeledi wa mpingu, Hezikiya ‘wakalengeja bienzedi biende’ bivua pamuapa kumpala bia bumpangano. Kadi tshia kuenza ntshinyi bikala nsonga kampanda udi usadila Nzambi lelu’eu mukuluke mu mpekatu mubi mutambe? Dinyingalala, disambila, diambuluisha dia baledi ne dikuatshisha dia dinanga dia bakulu bena Kristo didi mua kumuambuluisha bua kufuana Hezikiya ne ‘kulengeja bienzedi ne kushala mudimuke.’​—Yakobo 5:13-15.

6. Mbakaji kayi ‘bakalengeja bienzedi biabu bakadimuka bu muvua dîyi dia Nzambi diamba’?

⁶ Nansha muvua Lahaba ne Luta bantu ba kalekale ba kumpala kua Musambu wa 119 kufundibua, ‘bakalengeja bienzedi biabu.’ Lahaba uvua ndumba muena Kanana, kadi wakalua kumanyika bua ditabuja diende bu mutendeledi wa Yehowa. (Ebelu 11:30, 31) Luta muena Moaba wakalekela nzambi ya kuabu, kulua musadidi wa Yehowa e kubanga kutumikila Mikenji ivuaye muelele bena Isalele. (Luta 1:14-17; 4:9-13) Bakaji babidi aba bavua kabayi bena Isalele ‘bakadimuka bu muvua dîyi dia Nzambi diamba’ e kututabu diakalenga dia dikema dia kulua bankambua ba Yezu Kristo.​—Matayo 1:1, 4-6.

7. Danyele ne bansonga bakuabu basatu bena Ebelu bakatushila tshilejilu kayi tshimpe tshia mua kulama bukezuke bua mu nyuma?

⁷ ‘Bantu badi ne meji mabi mu mitshima yabu anu patshidibu bitende too ne pakulumpabu,’ kadi bansonga badi mua kulengeja njila wabu nansha mu buloba bunyanguke budi ku bukokeshi bua Satana ebu. (Genese 8:21; 1 Yone 5:19) Danyele ne bansonga nende bakuabu basatu bena Ebelu bavuabu nabu mu bupika ku Babulona ‘bakadimuka bu mudi dîyi dia Nzambi diamba.’ Tshilejilu, bakabenga kudibipisha ‘ne biakudia bia mukalenge.’ (Danyele 1:6-10) Bena Babulona bavua badia nyama mibi mipange bukezuke, mikandika mu Mikenji ya Mose. (Lewitiki 11:1-31; 20:24-26) Ne nyama ivuabu bashipa bua kudia, kabavua nangananga ne tshibidilu tshia kupongolola mashi ayi panshi nansha, ne didia diabu dia minyinyi kayiyi miela mashi panshi divua dishipa mukenji wa Nzambi udi utangila mashi. (Genese 9:3, 4) Nunku ki mpatupu  pakabenga bena Ebelu banayi abu bua kudia biakudia bia mukalenge to! Bansonga bavua batshina Nzambi abu bakalama bukezuke buabu bua mu nyuma, kutushilabu tshilejilu tshimpe.

Dîyi dia Nzambi dituambuluishe bua kushala ne lulamatu

8. Nngikadilu kayi ne dimanya dia malu kayi bitudi ne bua kuikala nabi bituasua kujingulula mikenji ya Nzambi ne kuyitumikila?

⁸ Dinanga dia dîyi dia Nzambi ke didi mua kutuambuluisha bua kushala ne lulamatu kudi Yehowa. (Musambu 119:17-24) Bituikala bu mufundi wa musambu eu, netumvue dijinga dikole dia kumvua “malu a kukema” a mu mikenji ya Nzambi. Netuikale misangu yonso ‘tujinga kulumbulula kuakane kua Yehowa’ ne ‘mêyi [ende a dituvuluija nawu] atusankisha.’ (Musambu 119:18, 20, 24) Bituikala tutshiena tudilambuilaku kudi Yehowa, tukadiku babange ‘kujinga mabele a meji adi kaayi ne kudinga [a dîyi]’ anyi? (1 Petelo 2:1, 2) Tudi ne bua kumvua tshidi malongesha a Bible a ntaku bua tuetu kumona mua kujingulula mikenji ya Nzambi bimpe ne kuyitumikila.

9. Ntshinyi tshitudi ne bua kuenza padi mikenji ya Nzambi ne bidi bantu batulomba bibengangana?

⁹ Tudi mua kuikala banange mêyi a Nzambi a dituvuluija nawu, kadi netuenze tshinyi bikala “baminyampala” batuelela tshifufu bua bualu kampanda? (Musambu 119:23, 24) Lelu’eu bantu badi ne bukokeshi batu misangu mivule bakeba kutuenzeja bua kulonda mikenji ya bantu kumpala kua ya Nzambi. Bikala malu adi bantu batulomba abengangana ne disua dia Nzambi, netuenze tshinyi? Dinanga dia dîyi dia Nzambi nedituambuluishe bua kushala balamate anu Yehowa. Netuambe petu amu bu bapostolo ba Kristo bakakengeshabu ne: ‘Butudi nabu mbua kutumikila mêyi a Nzambi kumpala kua mêyi a bantu.’​—Bienzedi 5:29.

10, 11. Fila tshilejilu tshia mutudi mua kushala ne lulamatu kudi Yehowa mu nsombelu mikole menemene.

¹⁰ Tudi mua kushala ne lulamatu kudi Yehowa nansha mu nsombelu mikole mitambe. (Musambu 119:25-32) Bua tuetu kushala ne lulamatu kudi Nzambi, tudi ne bua kuanyisha bua kutulongeshabu ne kusambila ne muoyo mujima bua kutulejaye mêyi a tuetu kulonda. Tudi ne bua kusungula kabidi ‘njila wa lulamatu.’​—Musambu 119:26, 30.

¹¹ Hezikiya (muntu uvua pamuapa mufunde Musambu wa 119) wakasungula “njila wa lulamatu.” Wakenza nanku nansha muvuaye munkatshi mua batendeledi ba dishima, pamuapa bamuseka bamupetula kudi bantu ba mu nzubu wa mukalenge. Pamuapa malu a mushindu au ke avua ‘muoyo wende wengulukila ne kanyinganyinga.’ (Musambu 119:28) Kadi Hezikiya wakeyemena Nzambi, kuluaye mukalenge muimpe, e ‘kuenzaye malu mimpe ku mêsu kua Yehowa.’ (2 Bakelenge 18:1-5) Tuetu beyemene petu Nzambi, netuikale petu mua kutantamena mateta ne kushala bena lulamatu.​—Yakobo 1:5-8.

Dîyi dia Yehowa didi difila dikima

12. Mmunyi mutudi muntu pa nkayende mua kutumikila Musambu wa 119:36, 37?

¹² Kulonda mibelu ya dîyi dia Nzambi kudi kutupesha dikima ditudi tukengela bua kutantamena ntatu ya mu nsombelu. (Musambu 119:33-40) Tudi tudipuekesha tukeba bua Yehowa kutulongesha bua tumone mua kutumikila mikenji yende ‘ne mutshima wetu mujima.’ (Musambu 119:33, 34) Tudi tulomba Nzambi anu bu mufundi wa Misambu ne: ‘Inyika mutshima wanyi bua kulondawu mêyi awakummanyisha, kuukumishi ku lukuka lua lupetu,’ anyi mpetu mibi. (Musambu 119:36) Anu bu mupostolo Paulo, tudi basue “kuenda bimpe mu malu onso.” (Ebelu 13:18) Bikala mfumuetu wa mudimu musue kutuenzeja bualu budi kabuyi mu njila mululame, tudi tuetu tushala balamate ku mikenji ya Nzambi ne dikima, bualu Yehowa utu ubenesha badi bamulamate nunku misangu yonso. Bushuwa utu utuambuluisha bua kutshimuna majinga etu onso mabi. Nunku tusambilayi ne: ‘Ukudimune mêsu anyi bua kaatangidi malu a patupu.’ (Musambu 119:37) Katuakuitaba bua kuanyisha tshintu tshionso tshidi Nzambi mukine nansha kakese. (Musambu 97:10) Bibidi bia ku bintu bidi disambila dituambuluisha bua kuepuka mbindidimbi ne malu a bantu butaka, ne malu a nyuma mibi.​—1 Kolinto 6:9, 10; Buakabuluibua 21:8.

13. Mmunyi muvua bayidi ba Yezu bavuabu bakengesha bapete dikima dia kumanyisha lumu luimpe kabayi batshina?

 ¹³ Dimanya dijalame dia dîyi dia Nzambi didi ditupesha dikima dia kumanyisha lumu luimpe. (Musambu 119:41-48) Kabidi dikima ndimpe bua ‘kuikala ne dîyi dia kukudimuna muntu udi utupenda.’ (Musambu 119:42) Mikuabu misangu tudi mua kufuana bayidi ba Yezu bakasambila pavuabu babakengesha ne: ‘Mukalenge upe bantu bebe mitshima ya kuamba dîyi diebe ne dikima dikole.’ Ntshinyi tshiakenzeka? ‘Buonso buabu bakuwula tente ne nyuma muimpe, bakamba dîyi dia Nzambi ne dikima.’ Mukalenge Mutambe bunene umue umue au udi utupa petu dikima dia kuamba dîyi diende katuyi tutshina.​—Bienzedi 4:24-31.

14. Ntshinyi tshidi tshituambuluisha bua kuyisha ne dikima bu muakenza Paulo?

¹⁴ Netuikale ne dikima dikumbane bua kuamba lumu luimpe katuyi tutshina bua kutufuishabu bundu bituikala banange ‘dîyi dia [bulelela]’ ne ‘tutumikila mikenji ya [Nzambi] matuku onso.’ (Musambu 119:43, 44) Kusuminyina mu dilonga dia Dîyi dia Nzambi difunda nekutuambuluishe bua ‘kuamba kabidi mêyi ende ku mêsu kua bakalenge.’ (Musambu 119:46) Disambila ne nyuma wa Yehowa nebituambuluishe kabidi bua kuamba mêyi makane mu mushindu muakuane. (Matayo 10:16-20; Kolosai 4:6) Paulo wakakula bua mikenji ya Nzambi ne dikima kumpala kua bakokeshi ba mu bidimu lukama bia kumpala. Tshilejilu, wakayisha Felika, ngovena wa bena Lomo ‘wakumvua dîyi diende [pa] bualu bua ditabuja dia mu Kristo Yezu.’ (Bienzedi 24:24, 25) Paulo wakayisha kabidi ngovena Festo ne Mukalenge Agipa. (Bienzedi 25:22–26:32) Ne dikuatshisha dia Yehowa, tuetu petu tudi mua kulua bantemu ba dikima, katuyi ‘tufua bundu bua lumu luimpe’ nansha.​—Lomo 1:16.

Dîyi dia Nzambi didi ditusamba

15. Mmunyi mudi Dîyi dia Nzambi mua kutusamba padi bakuabu batuseka?

¹⁵ Dîyi dia Yehowa didi ditusamba anu kutusamba. (Musambu 119:49-56) Kutu bikondo bitutu nangananga dijinga ne kutusambabu. Nansha tuetu tuakula ne dikima bu Bantemu ba Yehowa, bantu ‘badi badisua,’ tuambe ne: badi benza malu a didibandisha ku mêsu kua Nzambi, misangu mikaubu batu ‘batamba kutuseka.’ (Musambu 119:51) Kadi patudi tusambila tudi mua kuvuluka malu mimpe mamba mu Dîyi dia Nzambi, dîba adi bidi ‘bitukolesha mutshima.’ (Musambu 119:52) Patudi tulomba Nzambi, tudi mua kuvuluka mukenji anyi dîyi dia mu Bible didi ditusamba ne ditupesha dikima didi dikengedibua mu nsombelu mukole.

16. Ntshinyi tshidi basadidi ba Nzambi kabayi benze nansha babakengesha?

¹⁶ Badisu bavua baseka mufundi wa Misambu abu bavua bena Isalele, ba mu tshisamba tshivua tshidilambule kudi Nzambi. Bia bundu be! Kadi katubafuanyi to, tudisuikayi tuetu bua kubenga kusesuka ku mikenji ya Nzambi nansha kakese. (Musambu 119:51) Basadidi ba Nzambi binunu ne binunu bavuabu bakisa kudi bena Nazi ne badibu bakengeshe kabidi muomumue miaba mikuabu mu bidimu bipite bungi bakabenga bua kusesuka ku mikenji ne mêyi adi mu Dîyi dia Nzambi. (Yone 15:18-21) Kabidi kutumikila kua Yehowa ki mbujitu to, bualu mikenji yende idi anu bu mijiki mimpe idi itusamba.​—Musambu 119:54; 1 Yone 5:3.

 Tuikale ne dianyisha bua Dîyi dia Yehowa

17. Dianyisha dietu dia dîyi dia Nzambi didi ditusaka ku tshinyi?

¹⁷ Tudi tuleja dianyisha dietu dia dîyi dia Nzambi pa kuditumikila. (Musambu 119:57-64) Mufundi wa Misambu wakalaya bua ‘kulama mêyi a Yehowa,’ kabidi ‘ubika mundankulu bua kuela Nzambi tuasakidila, bualu bua mêyi ende [anyi mapangadika ende a bundumbulula] makane avua majalame.’ Tuetu mua kutabuluka butuku, bidi mua kuikala tshikondo tshilenga bushuwa tshia kuela Nzambi tuasakidila mu disambila. (Musambu 119:57, 62) Dianyisha dietu dia dîyi dia Nzambi didi ditusaka bua kukeba dilongesha dia Nzambi ne kulua ‘balunda [bena disanka] ba bonso badi banemeka Yehowa,’ bantu badi ne kanemu ne ditshina dia Nzambi. (Musambu 119:63, 64) Kakuena balunda bakuabu pa buloba apa bapite aba to!

18. Mmunyi mudi Yehowa wandamuna masambila etu padi ‘mionji ya bantu babi itunjingila’?

¹⁸ Patudi tusambila ne muoyo wetu wonso tulomba Yehowa ne budipuekeshi bua atulongeshe, tudi ‘tumulomba luse’ ne lungenyi lua se: atumvuilaku. Tudi ne bua kusambila nangangana padi ‘mionji ya bantu babi mitunjingile.’ (Musambu 119:58, 61) Yehowa udi mua kukosa mionji ya baluishi idi itupangisha mua kunyunga ne kutupesha budikadidi bua kuyisha Bukalenge ne kuvuija bantu bayidi. (Matayo 24:14; 28:19, 20) Mbienzeke nunku misangu ne misangu mu matunga avua mudimu wetu mukandikibue.

Ikale ne ditabuja mu Dîyi dia Nzambi

19, 20. Mmushindu kayi udibi mua kuikala bimpe bua kukenga?

¹⁹ Ditabuja kudi Nzambi ne dia dîyi diende didi dituambuluisha bua kutantamena ntatu ne kuenza disua diende. (Musambu 119:65-72) Nansha muvua bavua badisua ‘bashiminyine bikole’ mufundi wa Misambu, wakimba ne: ‘Bidi bimpe kundi bua mungakukengeshibua.’ (Musambu 119:66, 69, 71) Mmunyi mudibi mua kuikala bimpe bua yonso wa ku basadidi ba Yehowa kutata ne makenga?

²⁰ Patutu mu makenga, katutu tupanga kusambila tulomba Yehowa ne muoyo mujima nansha, pinapu bitusemeja pabuipi menemene nende. Dîba adi tudi mua kufila dîba dia bungi ku dilonga dia Dîyi dia Nzambi difunda ne tudienzeja bikole bua kuditumikila, bitufikisha ne ku nsombelu wa disanka dia bungi. Kadi bituikala mua kuenza malu adi aleja ngikadilu mibi itudi nayi bu mudi dipanga lutulu ne lutambishi patudi mu dikenga? Tudi mua kutshimuna ngikadilu mibi ya nunku ne ‘kuluata muntu mupiamupia’ bimpe menemene patudi tusambila ne muoyo umue ne ku diambuluisha dia Dîyi dia Nzambi ne dia nyuma wende. (Kolosai 3:9-14) Kabidi, ditabuja dietu didi dikoleshibua patudi tutantamena makenga. (1 Petelo 1:6, 7) Makenga a Paulo akamuambuluisha bualu akamusaka bua kutamba kueyemena Yehowa. (2 Kolinto 1:8-10) Tutuku tulekele dikenga ditufikisha ku bualu budi buimpe anyi?

Tueyemene Yehowa misangu yonso

21. Ntshinyi tshidi tshienzeka padi Nzambi ufuisha badi badisua bundu?

²¹ Dîyi dia Nzambi didi dituleja bualu bua mushinga butudi ne bua kueyemenyina Yehowa. (Musambu 119:73-80) Bituikala bushuwa tueyemena Mufuki wetu, katuakuikala ne tshiakumvuila bundu to. Bua bidi bakuabu batuenza, tudi dijinga ne busambi ne pamuapa tumvua mua kusambila bua ne: “Badi badisue bafuishibue bundu.” (Musambu 119:76-78) Padi Yehowa ufuisha bantu ba mushindu eu bundu, njila yabu mibi idi yedibua patoke ne dîna diende dinsantu ditumbishibua. Tushale bajadike ne: badi bakengesha bantu ba Nzambi kabena bushuwa ne tshidibu mua kupeta. Tshilejilu, kabatu banji kujimija Bantemu ba Yehowa badi beyemena Nzambi ne muoyo wabu mujima to; ne kabakuenza nanku nansha.​—Nsumuinu 3:5, 6.

22. Mmushindu kayi uvua mufundi wa Misambu mushale ‘bu mulondo wa tshiseba pa muishi wa kapia’?

²² Dîyi dia Nzambi didi dikolesha dieyemena  dietu kudiye padibu batukengesha. (Musambu 119:81-88) Mufundi wa Misambu wakadiumvua ‘bu mulondo wa tshiseba pa muishi wa kapia’ pavua bavua badisue bamukengesha. (Musambu 119:83, 86) Mu bikondo bia kale, bavua bela mâyi, mvinyo ne bintu bikuabu bia muengungu mu milondo mienza ne biseba bia nyama. Pavuabu kabayi bela bintu mu milondo ayi, ivua ifulama ikayabala pavuabu bayishiya mikudika pabuipi ne kapia mu nzubu muvua mukutakana muishi wa bungi. Lutatu ne dikenga dia bakukengesha bikadiku bikufikishe ku didiumvua ‘bu mulondo wa tshiseba pa muishi wa kapia’ anyi? Bikalabi nanku, eyemena Yehowa umulombe ne: ‘Usangaje muoyo wanyi bu mudi luse luebe lujalame, bua ndame mikenji ya mukana muebe.’​—Musambu 119:88.

23. Ntshinyi tshitudi balonge mu dikonkonona dia Musambu wa 119:1-88; ne ntshinyi tshitudi mua kudiebeja patudi bindile bua kulonga Musambu wa 119:89-176?

²³ Malu atudi bakonkonone mu tshitupa tshia kumpala tshia Musambu 119 adi aleja ne: Yehowa udi uleja luse luende lujalame kudi basadidi bende bualu mbeyemene dîyi diende ne mbanange mêyi ende mafunda, mêyi ende a dibavuluija nawu, mêyi adiye ubatumina, ne mikenji yende. (Musambu 119:16, 47, 64, 70, 77, 88) Udi usanka padi badi badilambule kudiye badimuka bu mudi dîyi diende diamba. (Musambu 119:9, 17, 41, 42) Nunku matuku atudi tushala bindile bua kulonga tshitupa tshidi tshishale tshia musambu eu mulenga, mbimpe udiebeje ne: ‘Ntuku bushuwa ndekela dîyi dia Yehowa ditokesha njila wanyi anyi?’

[Mêyi adi kuinshi]

Mmunyi muwandamuna?

• Disanka dilelela didi difumina ku tshinyi?

• Mmunyi mudi dîyi dia Yehowa ditulama bakezuke mu nyuma?

• Mmu mishindu kayi mudi dîyi dia Nzambi ditupesha dikima ne ditusamba?

• Bua tshinyi tudi ne bua kuikala ne ditabuja kudi Yehowa ne mu dîyi diende?

[Nkonko ya dilonga]

[Bimfuanyi mu dibeji 11]

Luta, Lahaba, ne bansonga bena Ebelu bavua mu bupika ku Babulona ‘bavua badimuke bu muvua dîyi dia Nzambi diamba’

[Tshimfuanyi mu dibeji 12]

Paulo ‘wakamba kabidi mêyi a Nzambi ku mêsu kua bakalenge’ ne dikima dionso